Тархъанлъи 34

ЦӀиял къанал

(Къан. 10:1-5)

1БЕТӀЕРГЬАНАС Мусада абуна:

«КӀиго къоно къачӀай ганчӀил бекӀкӀун, цере рукӀаразда релълъарал. Дица гьезда тӀад хъвала дол тӀоцересел къаназда рукӀарал рагӀаби. 2Мун радалалде хӀадурго вукӀа цудунго вахъун Синай магӀарде вахине ва мегӀералъул тӀогьив Дида цеве вахъун чӀезе. 3Цадахъ щивниги вачунге ва кивниги магӀарда чиги вихьуге; мугӀрул ахада рехъада гӀи-боцӀигицин букӀине бегьуларо».

4Мусаца бекӀкӀун къачӀана ганчӀил кӀиго къоно, цереккун рукӀаразда релълъарал, ва, радал цудунго вахъун, кодор гьел къаналгун, БЕТӀЕРГЬАНАСУЛ амруялда рекъон, гьев Синай магӀарде вахана. 5БЕТӀЕРГЬАН гьесухъе рещтӀана накӀкӀул парчадулъ, вахъун чӀана гьесда аскӀов ва БЕТӀЕРГЬАНАСУЛ цӀар ахӀулеб рагӀана. 6Цинги БЕТӀЕРГЬАН Мусада цевесан ана, ва рагӀулеб букӀана: «БЕТӀЕРГЬАН, БЕТӀЕРГЬАН Аллагь, гурхӀел цӀикӀкӀарав, рахӀму-цӀоб гӀатӀидав, сабру халатав, рокьи гӀемерав ва ритӀухълъи машгьурав! 7Аза-азар наслабазеги гурхӀел-рахӀму бикьулев ва ккараб мунагь-хатӀаялдасаги мекъи ккеялдасаги тӀаса лъугьунев! Амма Гьес гӀайибияв тамихӀалде цӀала: умумузул мунагьазухъ Гьес жаза гьабула гьезул наслабазеги – гьезул лъималазул лъабабилеб ва ункъабилеб наслуялде щвезегӀанги!»

8Мусаца, гьебсагӀатго гӀодоб нодоги цун, Аллагьасе сужда гьабуна. 9Гьес абуна:

«Я дир БетӀергьан, Дуца дида рахӀму гьабулеб батани, гьарула, дир БетӀергьан, Мунго вилълъа нижеда цадахъ! ГӀасиял ракӀазул халкъ гьаб бугониги, тӀаса лъугьа нижер такъсиралгун мунагьаздаса ва Дуцаго Дурго умматлъун къабул гьаре ниж!»

КъотӀи цӀигьаби

10Гьебмехалъ БетӀергьанас абуна:

«Дица КъотӀи гьабулеб буго нужергун. Цебеккун ракьалда букӀараб цониги халкъалда киданиги рихьичӀел хӀикмалъаби гьарила Дица тӀолабго дур халкъалда цере. Дуда цадахъ ругел тӀолалго гӀизраилазда бихьила гьеб ва кӀудияб хӀинкъи рещтӀина гьезде, дуе гӀоло Дица – БЕТӀЕРГЬАНАС – гьаризе ругел гьел ишал рихьидал. 11Дица жакъа нужее буюрарабщинаб рагӀа-ракьанде щун тӀубазабе. Дица нужеда цереса лъутизарила амориялги, ханааниялги, хитиялги, перизиялги, хивиялги ва евусиялги. 12Балагье, кинабгӀаги гьоркьоблъи гьабуге нуж унел ругел ракьазда гӀумру гьабун ругел гӀадамазулгун, гурони гьез нужги къосинаризе руго. 13Гьезул къурбан-бакӀал риххизаре, диниял ганчӀал гъуре ва Ашерал хӀубал къотӀе. 14Чияр аллагьзабазе сужда гьабуге! Щайгурелъул, Хилиплъи ХӀехьоларев БЕТӀЕРГЬАН – гьеле Дир цӀар, Хилиплъи ХӀехьоларев Аллагь!

15Гьединлъидал, доб ракьалъул гӀадамалгун кинабгӀаги гьоркьоблъи гьабуге, щайгурелъул доз жидерго аллагьзабазе рокьукъал гӀадаталгун ва къурбаналгун тӀагӀат-гӀибадат гьабулеб мехалда, доз нужги ахӀизе руго гьелдего, ва нужецаги гьез гьабураб гьабизе буго ва гьезул къурбаналъул квен квине ккезе буго. 16Цинги нужеца рачина дозул халкъалъул ясал нужерго васазе лъудбилъун, ва нужер васалги цӀазе руго гьез жидерго аллагьзабазул рокьукъал диниял гӀадатазде.

17Биун тӀун кинаб букӀаниги маххгун, аллагьзабазул сипатал гьаруге нужеего.

18КӀодо гьабе Бугьурго Чадазул байрам: анкьго къоялъ кванай реччеб гьечӀеб чед, Дица гьабураб амруялда рекъон, Авив моцӀалъул гьелъие чӀезарурал къоязда#34:18 Ихдалил авал., щайгурелъул гьеб заманалда рахъана нуж Мисриялдаса къватӀире.

19Эбелалъул тӀоцебесеб бихьинлъимер Дир ккола, гьединго нужер гӀи-боцӀул щибаб тӀоцебесеб бихьинтӀинчӀги Дир ккола. 20ХӀамил тӀоцебесеб кӀерталъухъ кьегӀер кье, гьедин кьезе бокьичӀони, кӀерталъул габур беке. Нужер тӀоцере гьарурал васазухъ Дие хӀакъ кье.

Цониги чи чӀового вачӀунге Дида цеве.

21Анлъго къоялъ хӀалтӀе, анкьабилеб къоялъ хӀухьбахъи гьабе; хӀухьбахъе хур бекьулеб ва бачӀин бакӀарулеб заманалдацин.

22Анкьазул байрам тӀобитӀе лъилъари байбихьараб заманалда, ва лъагӀалил ахиралда ТӀорщел БакӀариялъул байрам тӀобитӀе. 23ЛъагӀалида жаниб лъабцӀул киналго бихьинал рачӀине ккола ХӀалкӀолев БЕТӀЕРГЬАНАСДА – ГӀизраилалъул Аллагьасда цере. 24Нужеда цереса халкъал рачахъила Дица ва гӀатӀид гьарила нужер ракьазул гӀорхъаби. Лъицаниги зарал гьабизе гьечӀо нужер ракьазе, лъагӀалида жаниб лъабцӀул нуж нужер БЕТӀЕРГЬАН Аллагьасда цере чӀезе араб мехалда.

25Дуца хъураб къурбаналъул би къурбаналъул бакӀалде тӀаде босулеб мехалда реччеб тӀураб чед букӀине бегьуларо гьениб. Песахалъул байрамалъул къурбаналъул гьан рогьинегӀан нахъе тезе бегьуларо.

26Лъилъари байбихьарабго, цӀияб тӀорщалил бищунго лъикӀаб бутӀа щвезабе нужерго БЕТӀЕРГЬАН Аллагьасул Рокъобе.

БурутӀ гьелъул эбелалъул рахьдалъ белъунге».

27БЕТӀЕРГЬАНАС Мусада абуна:

«Дица дуда абурабщиналъул хъвай-хъвагӀай гьабе. Гьел руго Дица дургун ва ГӀизраилил халкъгун гьабураб КъотӀиялъул шартӀал».

28КӀикъого къоги кӀикъого сордоги бана Мусаца БЕТӀЕРГЬАНГУН магӀарда; гьебгощинаб заманаялъ гьес щибниги кваначӀо ва гьекъечӀо. Гьес ганчӀил къаназда тӀад хъвана КъотӀиялъул шартӀал – АнцӀго амру.

Мусал гьумералъул нур

29Кодоб хирияб КъотӀиялъул кӀиго ганчӀил къоногун Синай магӀардаса рещтӀунев вукӀарав Мусада лъалароан, Аллагь гьесда кӀалъан хадуб, гьесул гьурмада нур балеб букӀин. 30Гьарунидаги гӀизраилаздаги Мусал кенчӀолеб гьумер бихьидал, гьел цӀакъ хӀинкъана гьесде гӀагарлъизе. 31Амма Мусаца гьел аскӀоре ахӀана. Гьебмехалда Гьарунги халкъалъул кӀудиялги рачӀана гьесда аскӀоре, ва Муса гьелгун кӀалъана. 32Цинги хутӀарал гӀизраилалги рачӀана гьесда аскӀоре, ва Мусаца гьезда рицана Синай магӀарда БЕТӀЕРГЬАНАС кьурал амраби.

33Гьелгун кӀалъан вахъаравго, Мусаца гьурмаде пардав бачана. 34БЕТӀЕРГЬАНАСДА кӀалъазе Гьесда цеве унеб мехалда, гьес пардав тӀаса бахъулаан, Чадиралъуса къватӀиве вачӀинегӀан. КъватӀивеги вачӀун, ГӀизраилил халкъалда БетӀергьанасул амру бицунеб мехалда, 35гьезда бихьулаан, гьесул гьурмадаса нур чвахулеб букӀин. Ва Мусаца нахъеги гьурмаде пардав цӀалаан, цӀидасанги БЕТӀЕРГЬАНАСДА цеве инегӀан.

Currently Selected:

Тархъанлъи 34: АварАК

Highlight

Copy