Тархъанлъи 33
33
1БЕТӀЕРГЬАНАС Мусада абуна:
«Гьанже мун гьаниса а, дуца Мисриялдаса къватӀибе бачараб халкъги цадахъ бачун. Нуж а Дица Ибрагьимиеги, ИсхӀакъиеги, Якъубиеги ва гьезул наслабазеги кьелин абун букӀараб ракьалде. 2Дуда цеве-цеве Дица Малаик витӀила ва гьениса нахъе хъамила ханааниялги, амориялги, хитиялги, перизиялги, хивиялги, евусиялги. 3Нуж ина рахьги гьоцӀоги чвахулеб ракьалде. Амма Дун вилълъинаро нужеда цадахъ, нухда нуж тӀагӀинарунгутӀизе, щайгурелъул нуж руго риццатал ракӀазул халкъ!»
4Гьел кьварарал рагӀаби рагӀидал, халкъ гӀек-гӀекиялда гӀодана ва киназго гӀарац-месед тӀаса бахъана. 5БЕТӀЕРГЬАНАС Мусада абидалха:
«ГӀизраилазда абе: „Нуж, риццатал ракӀазул чагӀи, цодагьавниги нужеда цадахъ Дун вилълъани, Дица нуж цо параялда тӀагӀинаризе ккезе руго. Нужерго дахӀаби тӀаса рахъе, ва Дица хӀукму къотӀила щиб нужеда гьабилебали“, – ян».
6(Хорив мегӀералда аскӀор чӀун рукӀараб доб заманалда кинабго гӀарац-месед тӀаса бахъана гӀизраилаз).
ДандчӀваялъул Чадир
7Мусаца чадир чӀвана батӀаго, халкъалъул чадрал чӀвараб бакӀалдаса дагьаб добегӀан, ва гьелда цӀар лъуна: «ДандчӀваялъул Чадир», – абун. БЕТӀЕРГЬАНАСДА щибгӀаги гьаризе бокьарав чи унаан ДандчӀваялъул Чадиралъухъе. 8Чадиралда аскӀове Муса унеб мехалъ, халкъ тӀаде бахъунаан ва, жидерго чадиразул кӀалтӀаги эхетун, балагьулаан Мусада хадур, гьев Чадиралъуве лъугьинегӀан. 9Чадиралъуве Муса лъугьаравго, зодисан бачӀун накӀкӀул хӀуби Чадиралъул кӀалтӀа эхетулаан, ва БЕТӀЕРГЬАН кӀалъалаан Мусагун. 10Чадиралъул кӀалтӀа накӀкӀул хӀуби бихьарабго, жидерго чадиразул кӀалтӀа эхетарал киналго гӀадамал суждаялда чӀолаан. 11БЕТӀЕРГЬАН Мусагун кӀалъалаан бадиса бадиве, Жиндирго гьудул-гьалмагъасда кӀалъалев гӀадин. Хадув Муса тӀадвуссунаан халкъалъухъе, амма Нунил вас Егьошуа – гьесул гӀолохъанав кумекчи – кидаго гьеб Чадиралъув вукӀунаан.
Муса ва БЕТӀЕРГЬАНАСУЛ къудрат
12Мусаца БЕТӀЕРГЬАНАСДА абуна:
«Дуца дие амру гьабуна: „Баче гьаб халкъ“, – ин, амма лъазе течӀо щив дида цадахъ витӀулевали. Дуца абуна: „Дида лъала дур цӀар. Дир рахӀму насиблъана дуе“, – ян. 13Гьедин батани, малъе дида Дурго нухал, дида Мунго лъазе ва хадубккунги Дур рахӀмуялде дир хьул букӀине. Гьал гӀадамалги Дур халкълъидал!»
14БЕТӀЕРГЬАНАС жаваб кьуна:
«Дунго вилълъина мунгун цадахъ ва кьела рекӀее хӀалхьи».
15Гьебмехалда Мусаца абуна:
«Мун нижгун вилълъинчӀони, нижги рачунге гьаниса къватӀире. 16Кинха лъазе бугеб дидаги Дурго халкъалдаги Дуца рахӀму-цӀоб лъун букӀин? Мун нижеда цадахъ вукӀиналъ гуребдай? Цоги сунцаха батӀа бахъизе бугеб Дур халкъ дунялалъул цогидал халкъаздаса?»
17БЕТӀЕРГЬАНАС Мусада абуна:
«Дур гьеб гьариги тӀубазабила Дица, мун Дие хирияв вугелъул ва дур цӀарги Дида лъалелъул».
18Гьебмехалда Мусаца абуна:
«Гьарула, бихьизабе дида Дур къудрат», – ин.
19БЕТӀЕРГЬАНАС абуна:
«Дица дуе загьир гьабила тӀолабго Дир лъикӀлъи ва гьелдалъун рагьила дуе Дир цӀар „БЕТӀЕРГЬАН“ – Диего рокьарал Дие хиралъулелъул, ва Диего гурхӀизе бокьаразда Дун гурхӀулелъул. 20Амма Дир гьурмахъ мун валагьизе бегьуларо, щайгурелъул Дир гьумер бихьун хадуб чи чӀаго хутӀуларо».
21БЕТӀЕРГЬАНАС абуна:
«Гьале гьаниб Дида аскӀоб бакӀ буго – ваха гьаб кьуруялде. 22Дирго къудратгун Дун аскӀосан унеб мехалда, кьурул кьватӀелалъув лъела Дица мун ва, Дун аскӀосан ун вахъинегӀан, тӀасан Дирго квералъ вахчила. 23Дица квер нахъе босараб мехалда, дуда Дун вихьила нахъасан, амма Дир гьумер дуда бихьизе гьечӀо».
Currently Selected:
Тархъанлъи 33: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
