Тархъанлъи 32
32
Меседил баси
(Къан. 9:7-21, 25-29)
1МагӀардаса тӀадвуссине Муса кватӀулев вукӀинги бихьун, халкъ бакӀарана Гьарунида сверун ва гьез абуна:
«Мисриялдаса къватӀире нилъ рачарав дов Мусаеги щиб ккарабали нижеда лъаларо, гьединлъидал нижее аллагьзабазул сипат гьабе, гьез ниж цере рачине рукӀине», – ян.
2Гьаруница гьезда абуна:
«Нужер лъудбузулги васал-ясазулги гӀундуздаса рахъун, меседил кӀилкӀал щвезаре дихъе», – ян.
3Халкъалъ меседил кӀилкӀал рахъана ва гьел Гьарунихъе росана. 4Гьаруница гьеб кинабго меседги биун тӀун, басидул сипат гьабуна. Гьебмехалда халкъалъ абуна:
«ГӀизраилил халкъ, гьале Мисриялдаса къватӀире нуж рачарав дур аллагь!»
5Гьеб рагӀараб мехалъ, Гьаруница басиялда цебе къурбан-бакӀ бана ва халкъалда абуна:
«Метер букӀине буго БЕТӀЕРГЬАНАСУЛ байрам!» – ин.
6Нахъисеб къоялъ радал цудунго тӀадеги рахъун, гьез тӀоритӀана тӀуран рухӀулел къурбаналги ракълил къурбаналги. Гьелдаса хадуб халкъ квана-гьекъезе гӀодоб чӀана ва кӀудияб ихтилат-кепалде байбихьана.
7Гьебмехалда БЕТӀЕРГЬАНАС Мусада абуна:
«РещтӀа магӀардаса. Дуца Мисриялдаса къватӀибе бачараб дур халкъ пасатлъун буго! 8КигӀан хехгоха мугъ рехараб гьез Дир амрабазде! Гьез биун тӀураб басиялъул сипат гьабуна ва гьелда цере суждаялда чӀана: „ГӀизраилил халкъ, гьале нуж Мисриялдаса къватӀире рачарав нужер аллагь!“ – инги абун.
9Дида бихьулеб буго гьеб халкъ, – ин абуна БЕТӀЕРГЬАНАС Мусада, – унго риццалъи гьезул ракӀазул! 10Биччанте, Дир ццидал квачӀ гьезда кьабун, гьел тӀуран тӀагӀинаризе. Хадуб Дица дудасан лъугьинабила тӀадегӀанаб халкъ!»
11Амма Мусаца байбихьана БЕТӀЕРГЬАНАСДЕ, жиндирго Аллагьасде гьардезе:
«Вай БЕТӀЕРГЬАН, – ин абуна гьес, – щай Дур гьедин ццин бахъунеб Дурго кӀудияб къудраталдалъун ва гучаб квералдалъун Мисриялдаса къватӀибе бачараб Дурго халкъалда? 12Дуца гьедин гьабуни, мисрияз абизе буго: „Аллагьас гьел Мисриялдаса нахъе рачун рукӀун руго, рекӀелъ квешаб пикругун, магӀардеги рачун, гьенир чӀвазе ва дунялалдаса тӀагӀинаризе“, – ян. Гьарула, Дур гьалагаб ццин нахъ буссинабе, гурхӀа, биччаге халкъалде балагь! 13РакӀалде щвезаре Дурго лагъзал Ибрагьимги, ИсхӀакъги, ГӀизраилги. Мун гьезие Дурго цӀаралдалъун гьедун вукӀиндалха: „Дица нужее кьела зодир цӀвабигӀан гӀемерал наслаби. Гьаб кинабго нужеда бихьизабураб ракьги Дица нужер наслабазе кьела ва абадиялъего гьеб гьезуллъун букӀина“, – янги абун!»
14Гьебмехалъ БЕТӀЕРГЬАН гурхӀана ва халкъалде биччазехъин букӀараб балагь нахъчӀвана.
15Муса, кодоб КъотӀиялъул хъвай-хъвагӀай гьабураб кӀиго ганчӀил къоногун, магӀардаса гӀодове вилълъана. Гьел къанабазул кӀиябго рахъалда хъван рукӀана Аллагьасул амраби. 16Аллагьас Жиндицаго гьаруна гьел къанал ва Гьес рикӀана гьезда Жиндирго амраби.
17Ихтилат-кепалда бугеб халкъалъул ахӀи-хӀур рагӀараб мехалда, Егьошуаца Мусада абуна:
«Рагъул гӀадаб хъуй буго халкъ чӀараб бакӀалда!» – ян.
18Амма Мусаца жаваб кьуна:
«Бергьенлъи босаразул ахӀиги гуро доб,
къуразул гӀодиги гуро:
дида рагӀулеб буго кечӀ ахӀулезул гьаракь», – ин.
19Халкъ чӀараб бакӀалде гӀагарлъидал, Мусада бихьана басиялъул сипатги, кьурди-кӀанцӀиялда ругел гӀадамалги. Гьебмехалъ Мусаца кутакаб ццидалъ, гӀодорги речӀчӀун, мегӀералъул ахада гъурана кодор ккун рукӀарал ганчӀил къанал. 20Цинги гьес босун басиялъул сипат бухӀана ва гьелъул рахъу гьабуна; гьеб рахъу бана лъадалъе ва гьеб лъим гьекъезабуна гӀизраилазда.
21Мусаца Гьарунида абуна:
«Щиб дуе гьабураб гьал гӀадамаз, гьадигӀан кӀудияб мунагьалъукье дуца гьал ккезаризе ккани?» – ян.
22«Ццидахунге, дир бетӀерчӀахъад, – ин жаваб кьуна Гьаруница. – Дуда лъала гьал гӀадамал кидаго квешлъиялде гьесарал ругеллъи. 23Гьез абуна дида: „Гьаве нижее аллагь, ниж нухда рачине рукӀине, щайгурелъул нижеда лъаларелъул, ниж Мисриялдаса къватӀире рачарав дов Муса абурав чиясе ккараб жо“, – ян. 24Гьебмехалда дица гьезда абуна: „Нужер ругел меседил тӀагӀелал тӀаса рахъе“, – ян. Гьез дихъе кьуна месед, дица гьеб цӀадабе рехана ва гьеле гьеб басиялъул сипат лъугьана!» – ян.
25Мусада бихьана, гӀадамал квегъизе кӀвеялдаса ун, пасатлъун рукӀин, щайгурелъул Гьаруница тушбаби тӀад релъанхъилеб хӀалалъ, гьел ричча-рихъан тун рукӀун. 26Муса гьезда цеве вахъана ва гьес абуна:
«БЕТӀЕРГЬАНАСУЛАВЛЪУН кколевщинав чи дида аскӀове вачӀа!» – ян. Ва тӀолалго Левийил наслаби гьесда сверухъ ракӀарана.
27Гьес гьезда абуна:
«Гьадин абулеб буго ГӀизраилалъул БЕТӀЕРГЬАН Аллагьас: „Кинацаго рачлихъ хвалчен бай! Къайи чӀвараб бакӀалъул цо рагӀалдаса цогидаб рагӀалде щвезегӀан, щибаб чадирккун а, нуже-нужер вацалги, гьалмагъзабиги, гӀагарал чагӀиги чӀвалаго“».
28Левийил наслабаз Мусаца малъухъе гьабуна ва гьеб къоялъ гӀизраилазул лъабазаргогӀанасев чи хвана. 29Гьебмехалъ Мусаца абуна:
«Жакъа нужеца нужго тӀубан БЕТӀЕРГЬАНАСУЛ ихтияралде кьуна, гьесие хъулухъалъе рукӀине, нужерго васаздаги вацаздагицин барахщичӀого, гьединлъидал Гьес баракат лъела нужеда».
30Хадусеб къоялъ Мусаца халкъалда абуна:
«Нужеца гьабуна кутакалда кӀудияб мунагь! ГьабсагӀат дун БЕТӀЕРГЬАНАСДА цеве чӀезе ина: щиб лъалеб, нужедаса мунагь бацӀцӀун бажаризеги бегьулин дихъа».
31Муса БЕТӀЕРГЬАНАСУХЪЕ тӀадвуссана ва гьес гьарана:
«Гьарула Дуда, тӀаса лъугьа! БитӀараб буго, гьал гӀадамаз кутакалда кӀудияб мунагь гьабуна, жидеего меседил аллагьги гьавун. 32Амма, букӀаниги гьанже Мун гьезда тӀаса лъугьа! Мун тӀасалъугьинчӀони, дир цӀарги нахъе бацӀцӀе Дуца хъвараб тӀехьалдаса#32:32 Дуца хъвараб тӀехь – гьеб ккола Аллагьасда божарал ва Гьесие мутӀигӀал чагӀазул цӀарал хъвараб Зобалазул тӀехь.».
33БЕТӀЕРГЬАНАС Мусае жаваб кьуна:
«Дица Дирго тӀехьалдаса нахъе бацӀцӀина Диде данде мунагь гьабурасул цӀар. 34Гьанже а, баче халкъ Дица абураб бакӀалде, ва Дир Малаик вилълъина дуда цеве-цеве. Амма Дир рецӀел босулеб къо щведал, Дица жаза гьабилеб гьезие».
35Ва БЕТӀЕРГЬАНАС квешаб унти биччана халкъалде, меседил басиялъул сипат гьабуралъухъ, ай Гьаруница хӀадурараб басидул сипаталъухъ.
Currently Selected:
Тархъанлъи 32: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
