Тархъанлъи 22

Зарал бецӀиялъул къанунал

1Нагагь цониги чияс оц яги гӀиялъажо бикъани ва гьеб хъуни яги бичани, гьес кьезе ккола цо бикъараб оцалъухъ щуго оц, цо гӀиялъажоялъухъ ункъго гӀиялъажо. 2ЦӀогьодизе сардилъ цо пуланаб рокъове кӀанцӀулев вукӀаго ккурав цӀогьор вухун нагагь хвани, гьев вухарав чи гӀайибиявлъун рикӀкӀунаро. 3Амма къад гьединаб жо ккани, цӀогьор чӀварав чи гӀайибиявлъун рикӀкӀуна. ЦӀогьор чӀаго хутӀани, гьес бикъараб бецӀизе ккола. Гьесул щибниги гьечӀони, гьев лагълъиялде виче, бикъараб бецӀизелъун. 4Гьес бикъараб боцӀи чӀаго батани – оц, хӀама яги гӀиялъажо батӀалъи гьечӀого – гьесухъа кӀицӀулго цӀикӀкӀун рецӀел бахъизе ккола.

5Лъицаниги чияр хурибе яги цӀолбол ахикье жиндирго боцӀи биччани ва гьеб мерхьани, ккараб заралалъухъ рецӀел хӀисабалда, гьесухъа бахъизе ккола жиндирго хуриса яги цӀолбол ахикьа щвараб бачӀиналъул бищун лъикӀаб бутӀа.

6Нагагь цӀаги рекӀун, гъутӀби, харил гӀархъал яги хуриса жеги бакӀаричӀеб тӀорщел бухӀани, гьеб цӀа рекӀине биччан тарав чияс бецӀизе ккола гьелдалъун ккараб зарал.

7Цо чияс цогидасухъе цӀунизе кьураб гӀарцул тӀагӀел, яги цогидаб къиматаб къайи, цӀунизе тӀаде босарасул рокъоса цӀогьорас бикъани ва гьев кквезе щвани, цӀогьорасухъа бахъизе ккола бикъаралъул кӀиго бутӀа. 8Амма цӀогьор кквезе щвечӀони, чияр къайи цӀунизе тӀаде босарав чи эхетизе ккола диванчиясда цеве ва гьедизе ккола, жинца чияр хазинаялда квер хъвачӀин абун. 9Мулкалъул ихтияралда тӀасан кӀигояв дагӀбадулев вугони, ‘гьаб дир кколин’ абун – оц, хӀама, чахъу, ретӀел яги цогидаб билараб къайи – гьеб иш кьезе ккола диванчиясухъе. Диванчияс мекъавлъун рикӀкӀарав чияс ритӀухъ гьавурасе кьезе ккола кӀиго бутӀа.

10Цо чияс цогидасухъе хьихьизе кьураб хӀама, оц, чахъу яги бокьараб рукъалъул хӀайван лъиданиги бихьичӀого хвани, яги лъукъани, ялъуни бикъани, 11боцӀи хьихьизе тӀаде босарав чи гьедизе ккола БЕТӀЕРГЬАНАСУЛ цӀаралдалъун боцӀул хважаинасда цеве, жинца чияр боцӀуда квер хъвачӀин абун. БоцӀул хважаинас къабул гьабизе ккола гьесул гьа, гьебмехалъ рецӀелги кьезе кколаро. 12Амма рехъада вукӀарасул гӀайибалдалъун боцӀи бикъун ани, боцӀул хважаинасе ккараб зарал бецӀизе ккола гьес. 13Нагагь боцӀи гӀалхул хӀайваназ чӀван батани, рехъада вукӀарас гьелъул балкан бихьизабизе ккола. Гьебмехалъ, гӀалхул хӀайваназ чӀвараб боцӀи бецӀизе кколаро.

14Цояс цогидасухъа заманалда хӀалтӀизабизеян абун хӀайван бачани ва хважаин аскӀов гьечӀого гьеб хвани яги лъукъани, гьеб бецӀизе ккола. 15Гьеб заманалда хӀайваналъул хважаин аскӀов вугони, бачарав чияс гьеб бецӀизе кколаро. Амма гьеб хӀайван мухьдахъ бачун букӀун батани, кколеб мухь кьезе ккола.

ЖамгӀиял ва диниял къанунал

16Бихьинчияс жеги росасе инчӀей яс басра гьаюни, гьес гьелъухъ бахӀаралъул хъалим кьезе ккола ва гьей лъадилъун ячине ккола. 17Нагагь гьелъул инсуца гьев чиясе гьей лъадилъун кьезе инкар гьабуни, гьебмехалдаги гьес кьезе ккола ясалъухъ кьолеб бахӀаралъул хӀакъ.

18СихӀручӀужу-палихъан чӀаго тоге.

19ХӀайваналгун пасатал гьоркьорлъаби гьарулев чи чӀвазе ккола.

20БЕТӀЕРГЬАНАСЕ гуреб, батӀиял аллагьзабазе къурбан гьабулевщинав чиги тӀагӀинавизе ккола.

21Чияр ракьалдаса рачӀарал къварид гьаруге, гьезие зулму гьабуге: Мисриялда нужгоги рукӀиндал чияр ракьалдаса рачӀараллъун.

22Къоролалги бесдалалги къварид гьаруге. 23Нужеца гьедин гьабуни, гьез кумек гьарун ахӀи бала Диде, ва Дица чара гьечӀого къабул гьабила гьезул гьари. 24Цинги Дир ццин гьалаглъила ва Дица нуж хвалчаца чӀвала: гьебмехалъ нужер лъудбиги къороллъила нужер лъималги бесдаллъила.

25Дир халкъалъул мискинчиясе дуца къарзалъе гӀарац кьуни, гьесухъа тӀадеги гӀарац бахъуге. 26Цогидасухъа гъоркьлъалие дуца гӀаба босани, бакъанил гӀужалде гьеб тӀадбуссинабичӀого тоге: 27гьеб гурони тӀокӀаб тӀад базе жо гьечӀелъул гьесул. Кин гьев къаси кьижилев, тӀад базе жоги гьечӀого? Дос Дида гьаридал Дида рагӀула, щайгурелъул Дун рахӀмуяв вугелъул.

28Аллагьасде хьандоге ва нужерго халкъалъул бутӀрулги церехъабиги какуге.

29БакӀарараб тӀорщелалдасаги цӀолбол цӀцӀуялдасаги хириял садакъаби кьезе кватӀуге.

ТӀоцере гьарурал васал Дие кье. 30Гьединго нужеца Дие кьезе ккола нужер гӀи-боцӀуца гьабураб тӀоцебесеб тӀинчӀ; анкьго къоялъ гьеб эбелалда аскӀоб те ва микьабилеб къоялъ Дие кье.

31Нуж рукӀине ккола Дир бацӀцӀадаб халкълъун. ГӀалхул жанаваралъ чӀвараб хӀайваналъул гьан кванаге, гьеб гьабзазе рехе.

Currently Selected:

Тархъанлъи 22: АварАК

Highlight

Copy