Тархъанлъи 21

1Гьале дуца халкъалъе загьир гьаризе кколел къанунал:

Лагъзадерил хӀакъалъулъ къанунал

(Къан. 15:12-18)

2„Дуца жугьутӀав лагъ вичун восун вугони, ва гьес дуе анлъго соналъ хъулухъги гьабун батани, анкьабилеб соналъ дуца гьев эркен гьавизе ккола, гьесухъ мухьги босичӀого. 3Гьев живго цохӀо вачӀун вукӀун ватани, эркенги гьавила живго цохӀо, ва лъадигун вукӀун ватани, гьесда цадахъ эркенлъизе те лъадиги. 4Нагагь хважаинас лагъасе лъади кьун йикӀун ятани, ва гьелъ гьесие лъималги гьарун ругони, чӀужугӀаданги гьелъул лъималги хутӀула хважаинасе, эркенлъи щола гӀицӀго гьесие.

5Амма лагъас ‘Дие рокьула дирго хважаинги лъадигун лъималги, гьединлъидал дие эркенавлъун вукӀине бокьун гьечӀо’, – ян абуни, 6биччанте хважаинас гьев Аллагьасда цеве вачине ва нуцӀида яги нуцӀил ххеналда аскӀовги чӀезавун, гӀебуялъ гьесул гӀин борлъизе. Гьелдаса хадуб гьев гӀумруялъго гьесул лагълъун хутӀила.

7Пуланав чияс жиндирго яс лагълъиялде йичун йигони, гьей лагълъиялдаса эркен гьайизе бегьуларо, бихьинал лагъзал эркен гьарулеб къагӀидаялда. 8Хважаинас гьей жиндиего ячине йосунги йикӀун, амма гьесие гьей рекӀее гӀун ятичӀони, гьес рес кьезе ккола, мухьги кьун, гьей жинда аскӀоса нахъе ячине. Амма гьесул ихтияр букӀунаро, жиндицаго нахъги чӀван, гьей чияе йичизе. 9Гьес жиндирго васасе кьезе мурадалда лагъ йосун ятани, гьелдехун жиндирго ясалдехун гӀадаб бербалагьи букӀине ккола гьесул. 10Гьес тӀадеги лъади ячани, махӀрум гьаюге цее ячарай лъади кванидасаги, ратӀлидасаги ва рос-лъадул букӀунеб цадахъаб гӀумруялдасаги. 11Гьеб лъабабго жо гьес гьелъие кьолеб гьечӀони, гьелъул ихтияр буго мухьги кьечӀого эркенлъизе.

Черхалъе зарал гьабиялъул хӀакъалъулъ къанунал

12Цо кьабураб жоялъ чи хвезавурав инсан чӀвазе ккола. 13Нагагь гьеб тохлъукьего ккараб иш бугони (Аллагьас гьедин ккезе хъван букӀун), чӀвазе хиялги букӀун батичӀони, виччанте чӀвадарухъан лъутизе Дица бихьизабураб бакӀалде. 14Амма рекӀелъ ццинги хьихьун, цебеккунго ургъун, цо чияс цогидав чи чӀвани, Дир къурбан-бакӀалде лъутанигицин, гьенисаги нахъе вачун, гьев чи гӀумруялдаса махӀрум гьаве.

15Инсуда яги эбелалда кьабурав чи, щив гьев ватаниги, чӀвазе ккола.

16Лагълъун вичизе яги жиндиего хӀалтӀизавизе пуланав чи викъарав инсан чӀвазе ккола.

17Эбел-эмен къабихӀ гьарун кӀалъалев чи чӀвазе ккола.

18Нагагь бихьинал цоцалъ рагъулаго, цояс цогидасда гамачӀ яги зар кьабани ва гьев хвечӀони, амма бусаде ккани, 19гьесда кьабурав чиясе тамихӀ гьабизе бегьуларо, вухарав тӀаде вахъани ва гӀансидеги ккун, рокъоса къватӀиве вахъине кӀолеб бугони. Амма кьабурав чиясухъа гӀакӀа бахъизе ккола вухарав бусаде ккеялдалъун араб заманалъухъги сахлъиялъул мурадалда гьабураб дару-сабабалъухъги.

20Хважаинас лагъасда яги лагъалда тӀил кьабуни, ва гьебсагӀатго лагъ хвани, хважаин тамихӀалде цӀазе ккола. 21Амма лагъ цо-кӀиго къоялъ чӀаго хутӀани, хважаинасе тамихӀ гьабиларо, щайгурелъул лагъ ккола гьесул мулк.

22Бихьинал цоцалъ рагъулаго, лъачӀого къинай гӀаданалда кьабуни ва гьелдалъун лъимер биххани, амма гьеб гуреб заралги ккечӀони, чӀужугӀаданалда кьабурасухъа бахъизе ккола гьелъул росас тӀалаб гьабураб ва диванчияс хӀукму къотӀараб гӀакӀа. 23ЧӀужугӀаданалъе зарал ккун бугони, гьелда рекъараб тамихӀги гьабе: гӀумруялъухъ – гӀумру, 24бералъухъ – бер, гӀусалъухъ – гӀус, бохалъухъ – бох бахъе, 25бухӀараб бакӀалъухъ – бухӀараб бакӀ, ругъуналъухъ – ругъун, би речинабиялъухъ – би речинаби.

26Нагагь хважаинас лагъасул яги лагъалъул бадиб зар кьабуни ва гьезул бер бахъани, риччанте бералдаса махӀрумлъиялъухъ гьел лагъзал эркен гьаризе. 27Нагагь хважаинас лагъасул яги лагъалъул гӀус бортизабуни, гьелги риччанте эркенлъиялде, жидер рахъарал гӀусазухъ.

28Нагагь бихьинчи яги чӀужугӀадан оцоца мерхьун хвани, гьеб оц ганчӀалги речӀчӀун чӀвазе ккола, гьелъул гьанги квине бегьуларо. Оцол хважаинас гьелъул жаваб кьезе кколаро. 29Амма оц багъулеб тайпаялъул букӀун батани ва хважаинасда гьелъул хӀакъалъулъ абунги букӀун бугони, амма гьес гьелъул кӀвар гьабичӀого тани ва гьелъ бихьинчи яги чӀужугӀадан чӀвани, ганчӀица бухун гьеб оцги чӀвазе ккола, гьелъул хважаинги чӀвазе ккола. 30Амма гьев чӀваялъул бакӀалда гьесухъа рецӀел тӀалаб гьабизе бокьани, бицараб багьа, кинаб батаниги, кьезе ккола гьес жиндирго гӀумруялъухъ. 31Гьебго къанун хӀалтӀизабула оц лъимада багъаниги – яс йикӀа, вас вукӀа. 32Оцоца лагъ (бихьинчи яги чӀужугӀадан) чӀвани, гьелъул хважаинас дозул хважаинасе кьезе ккола лъеберго шекел#21:32 ГӀага-шагарго 330 грамм гӀарцул. ва оц ганчӀица бухун хвезабизе ккола.

33Нагагь цониги чияс гвендги бухъун, гьелда тӀаде ракь хъвачӀого тун, гьенибе жанибе оц яги хӀама бортани, 34гвенд бухъарас бецӀизе ккола ккараб зарал. Гьес хважаинасе гӀарац кьезе ккола, амма хвараб хӀайван гьесие хутӀула.

35Лъилниги оц чияр оцолъ багъани ва гьеб хвани, чӀаго хутӀараб оц бичила ва гьеб бичун щвараб гӀарацги хвараб оцги гьезул белегьабазда гьоркьоб бащад бикьила. 36Амма оц багъулеб тайпаялъул букӀун батани, ва гьебги лъалаго, хважаинас гьеб биччан тун букӀун батани, чӀвараб оцалъухъ гьес жиндирго чӀагояб оц кьезе ккола ва чӀвараб жиндиего тела.

Currently Selected:

Тархъанлъи 21: АварАК

Highlight

Copy