Тархъанлъи 19

Синаялда гӀагарлъухъ

1Мисриялдаса къватӀире рахъун лъабабилеб моцӀалъ, гӀизраилал щвана Синаялъул салул авлахъалде. 2Рефидималдаса Синай авлахъалде ана ГӀизраилил халкъ ва гьениб мегӀералда аскӀоб къайи чӀвана.

3Муса магӀарде вахана Аллагьасда цеве чӀезе, ва БЕТӀЕРГЬАН кӀалъана гьесда: «Якъубил зурияталда гьадин абе ва ГӀизраилил халкъалда гьадин бице:

4„Нужеда бихьана Дица Мисриялъе гьабураб ва Дица нуж, цӀудул кваркьиялда кинигин росун, гьанире Дихъего рачараблъи. 5Гьанже Дихъ гӀенекке: нуж тӀубанго Дие мутӀигӀлъулел ругони ва нужеца Диргун КъотӀи тӀубазабулеб бугони, киналгӀаги халкъазда гьоркьор гӀицӀго нуж рукӀине руго Дир багьа тӀадегӀанаб хазиналъун. ТӀолабго дунял Дир ккола, 6амма нуж рукӀине руго дир хирияб халкълъун, Дир кашишзабазул умматлъун“. Гьебин абе ГӀизраилил халкъалда».

7Муса магӀардаса гъоркье лъугьана ва, халкъалъул церехъабиги ахӀун, гьезда бицана БЕТӀЕРГЬАНАСУЛ амру. 8Цинги халкъалъ цохӀо кӀалдисан гӀадин абуна:

«Нижеца тӀубазабизе буго БЕТӀЕРГЬАНАС тӀадкъарабщинаб».

Муса гьезул жаваб босун БЕТӀЕРГЬАНАСДА цеве вилълъана.

9БЕТӀЕРГЬАНАС Мусада абуна:

«Дун вачӀине вуго духъе буччараб накӀкӀулъ ва халкъалда цеве дуда кӀалъазе вуго, гьел абадиялъего дуда божизе рукӀине».

Цинги Мусаца БЕТӀЕРГЬАНАСДА бицана халкъалъул жаваб.

10БЕТӀЕРГЬАНАС Мусада абуна: «Халкъалъухъеги ун, жакъаги метерги гьезие динияб рацӀцӀалъиялъул низам тӀобитӀе. Биччанте гьез жидерго ретӀел-кун чуризе

11ва гьел лъабабилеб къоялде хӀадурго рукӀине, щайгурелъул лъабабилеб къоялъ БЕТӀЕРГЬАН Синай магӀарда рещтӀине вуго тӀолабго халкъалда цеве. 12МегӀералда сверухъ халкъалъе гӀорхъи чӀезабе ва гьезда абе: „МегӀералда тӀаде рахиналдаса ва гьелъул ахалъиялда хъваялдаса нужго цӀуне! МегӀералда хъванщинасе гӀажал букӀине буго. 13Гьев ганчӀица яги чӀорал речӀчӀун чӀвазе ккола, гьединав чиясда квер хъвазеги бегьуларо. Инсан вукӀа гьев, хӀайван букӀа гьеб – цого гӀажал. ГӀицӀго халат бахъун сур пун хадусала рахине бегьула магӀарде тӀаде“».

14Муса магӀардаса гъоркье халкъалъухъе вилълъана, ва гьес халкъ бацӀцӀад гьабулеб тадбир тӀобитӀана. Гьез ретӀел-кунги чурана. 15Гьес халкъалда абуна:

«Лъабабилеб къоялде хӀадурлъи гьабе; лъудбузда хъваге».

16Лъабабилеб къоялъул рогьалил гӀужалда гъугъадана дунял ва пирхана пири, мегӀералда тӀад буччараб накӀкӀ лъуна ва суралъубе пулеб кутакалда кӀудияб гьаракь рагӀана. ТӀолабго халкъ гӀемераб хӀинкъиялъ сородизе лъугьана. 17Къайи чӀвараб бакӀалдаса Мусаца халкъ бачана Аллагьасда данде ва мегӀералъул ахалъуда эхетана. 18Синай мегӀер кӀкӀуялъ бацун букӀана, щайгурелъул БЕТӀЕРГЬАН гьелда тӀад рещтӀана цӀадулъ. Гьелъул тӀогьисан, корода жаниса кинигин, гьаваялде бахъун унеб букӀана кӀкӀуй ва тӀолабго мегӀер сородулеб букӀана. 19Сур пулеб гьаракьги кӀванагӀан кӀодолъулеб букӀана. Муса кӀалъалев вукӀана, ва Аллагьас гьесие жаваб кьолеб букӀана якъинаб гьаркьидалъун#19:19 Ялъуни «гъугъадиялдалъун»..

20БЕТӀЕРГЬАН рещтӀана Синай мегӀералъул тӀогьиве, ва Гьес Муса гьениве ахӀана. Муса тӀаде вахараб мехалда, 21БЕТӀЕРГЬАНАС гьесда абуна: «ГӀодовеги рещтӀун, халкъалда лъазабе, БЕТӀЕРГЬАНАСУХЪ ралагьизеян абун, чӀезабураб гӀорхъи бахун жанибехун гьез гали тӀамугеян, гурони гьезул гӀемерисел хвезе руго.

22БЕТӀЕРГЬАНАСДЕ гӀагарлъулел кашишзабазги жалго рацӀцӀад гьаризе ккола, гурони БЕТӀЕРГЬАНАС гьезие жаза гьабизе буго».

23Мусаца БЕТӀЕРГЬАНАСДА абуна:

«Халкъ Синай мегӀералде тӀаде бахине гьечӀо, Дуцаголъидал нижеда кьварун лъазабураб: „МегӀер сверухъ гӀорхъи чӀезабе ва гьеб бацӀцӀад гьабе“, – ян».

24БЕТӀЕРГЬАНАС жаваб кьуна:

«ГӀодове рещтӀа ва Гьарунгун цадахъ тӀаде вачӀа. Кашишзабазги халкъалъги БЕТӀЕРГЬАНАСДА цере рачӀинеян гӀорхъи бахине пикругицин гьабугеян абе, гурони Гьес гьезие жаза гьабизе буго».

25Муса халкъалъухъе гӀодове рещтӀана ва гьеб кинабго халкъалда бицана.

Currently Selected:

Тархъанлъи 19: АварАК

Highlight

Copy