Тархъанлъи 18

Мусахъе гьоболлъухъ Итро вачӀин

1Мидяналъул кашишасда, ай Мусал вакьад Итрода рагӀана Аллагьас Мусаеги Жиндирго халкъ ГӀизраилалъеги гьабурабщиналъул ва БЕТӀЕРГЬАНАС ГӀизраилил халкъ Мисриялдаса къватӀибе бачиналъул хӀакъалъулъ. 2Гьебмехалъ Мусал вакьад Итро нухда вахъана, жиндирго яс ва Мусал лъади Ципораги ячана цадахъ. Гьей цее эбел-инсул рокъое тӀадюссинаюн йикӀана Мусаца. 3Гьединго гьелъул кӀиго васги вачана (гьезул цоясда цӀар лъун букӀана Гершом#18:3 Гершом – гьаб цӀар релълъуна «гер» абураб рагӀуда ва гьелъул магӀнаги ккола «апараг» яги «къватӀисев»., Мусаца абидал: «Чияр ракьалда Дун апараглъун лъугьана» – ян. 4Цогидасда – Элиезер#18:4 Элиезер – гьаб цӀаралъул магӀна ккола «Аллагь вуго дир кумекчи» абураб. лъун букӀана: «Дир инсул Аллагьас кумек гьабуна дие. Дос хвасар гьавуна дун пиргӀавнасдаса», – янги абун).

5Ва Мусал вакьад Итро вачӀана рачун гьесул васалгун ва лъадигун салул авлахъалде, Аллагьасул МегӀералда аскӀоб Мусаца къайи чӀвараб бакӀалде. 6Итроца Мусахъе хабар битӀана:

«Дун, дур вакьад Итро, вачӀунев вуго духъе дур лъадигун ва дур кӀиго васгун цадахъ».

7Муса вакьадасда дандчӀвазе къватӀиве вахъана. Вакьад вихьидал, гьев гьесие къулана ва гьезул хинаб дандчӀвай ккана. Салам-каламги гьабун, гьел чадиралъуре лъугьана. 8Мусаца вакьадасда бицана ГӀизраилалъе гӀоло БЕТӀЕРГЬАНАС пиргӀавнасеги мисриязеги гьабурабщиналъул, нухда жидедаго рихьарал захӀмалъабазул ва БЕТӀЕРГЬАНАС жалго хвасар гьариялъул хӀакъалъулъ. 9Итро вохун вукӀана, Мисриялъул кверщаликьа эркенги гьарун, БЕТӀЕРГЬАНАС гӀизраилазе кигӀан гӀемер лъикӀлъи гьабурабали рагӀидал. 10Итроца абуна: «Мисриялъулги пиргӀавнасулги кверщаликьа нужер халкъ эркен гьабурав БЕТӀЕРГЬАНАСЕ рецц!

11Гьанже дида лъана БЕТӀЕРГЬАН цогидал аллагьзабаздаса кигӀанги тӀадегӀанав вукӀин, гӀамалкӀодого зулму-хӀал гьабизе лъугьаразул кверщаликьа халкъ эркен гьабурав!»

12Хадуб Мусал вакьад Итроца Аллагьасе тӀубанго бухӀулеб къурбанги цогидал къурбаналги гьаруна. Цадахъ ГӀизраилалъул церехъабигун, Гьарунги вачӀана Мусал вакьадасулгун тӀутӀ гӀахьал гьабизе.

ДиванчагӀи хъулухъалде тӀами

(Къан. 1:9-18)

13Нахъисеб къоялъ Мусаца байбихьана халкъалда гьоркьоб ккара-таралъухъ ва кинаб батаниги дагӀба-къецалъухъ гӀенеккизе ва щибаб суалалъе рекъараб хӀукму къотӀизе, ва рогьалидаса бахъараб къасилъизегӀан гьесда сверухъ бакӀарун букӀана халкъ. 14Гьеб кинабго бихьараб мехалъ, гьесул вакьад Итроца абуна:

«Гьаб щиб дуца халкъалъе гьабулеб бугеб? Щай цохӀо дуцаго гьабулеб гьеб хӀалтӀи, тӀолабго халкъги рогьалидаса бахъараб къасилъизегӀан дуда сверухъ бахъун чӀезабун?»

15Мусаца жаваб гьабуна: «Гьел дихъе рачӀуна ккара-тараб жоялъе Аллагьасул хӀукму балагьизе.

16Жидедаго гьоркьоб дагӀба ккараб мехалда, гьел рачӀуна дихъе. Дица хӀукму къотӀула гьезие, Аллагьасул низамалги къануналги кьочӀоеги росун».

17Мусал вакьадас абуна: «Дуца гьеб битӀун гьабулеб гьечӀо.

18Дурги духъе рачӀунезулги свакан тату хола гьедин, щайгурелъул гьеб буго цӀакъ захӀматаб хӀалтӀи. ЦохӀо дуцаго тӀубазабизе кӀолеб хӀалтӀи гуро гьеб. 19Дихъ гӀенекке, дица дуе гӀакълу кьела, цинги Аллагьас квербакъаги дуе! Мун вукӀа Аллагьасдаги халкъалдаги гьоркьов гьоркьохъанлъун, ва дуца Гьесда цере росе гьезул гӀарзал. 20Гьединго дуца халкъалда малъе низамалги, къануналги, битӀараб нухги, хьвада-чӀвадиги. 21Гьелдаго цадахъ халкъалда гьоркьоса тӀаса рище бажари бугел, Аллагьасукьа хӀинкъарал, божи-иман бугел ва гӀарцухъ яхӀ бичуларел гӀадамал ва гьелго тӀаме азаргоязда, нусгоязда, кӀикъоялда анцӀгоязда ва анцӀгоязда тӀад кӀудияллъун. 22Гьеле гьез гьабизе биччанте гӀадамазда гьоркьоб ккара-таралъул хӀисаб-суал. ЗахӀматал ишал ккани, риччанте гьез гьел духъе росун рачӀине, бигьаял ишал жидецаго тӀуразаризе риччай. Дур гьир гьезда гьоркьоб бикьани, гьеб дуе бигьалъила. 23Дуца гьедин гьабуни, Аллагьасеги гьеб къабуллъани, дуегоги гьир баччизе бигьалъила, гӀадамалги разиго рокъо-рокъоре тӀадруссина».

24Муса вакьадасухъ гӀенеккана ва кинабго гьес абухъе гьабуна. 25ГӀизраилазда гьоркьоса гьес тӀаса рищана бажари бугел гӀадамал ва гьел тана халкъалда тӀад: азаргоязда, нусгоязда, кӀикъоялда анцӀгоязда ва анцӀгоязда тӀад. 26Гьел лъугьана халкъалъе хӀукму къотӀулел диванчагӀилъунги. ЗахӀматал суалал гьез росулаан Мусахъе, бигьаялин абуни, жидецаго тӀуралаан.

27Цодагьаб заманалдасан Мусаца вакьад нухарегӀана ва Итро жиндирго улкаялде тӀадвуссун ана.

Currently Selected:

Тархъанлъи 18: АварАК

Highlight

Copy