Тархъанлъи 12
12
Песахалъул байрам
(Лев. 23:5-8; Тар. 28:16-25; Къан. 16:1-8)
1Мисриялда рукӀаго Мусадаги Гьарунидаги БЕТӀЕРГЬАНАС абуна:
2«Биччанте нужее гьаб моцӀ букӀине тӀоцебесеб моцӀлъун, лъагӀалил аваллъун. 3ТӀолабго ГӀизраилалъул жамагӀаталда абе гьаб моцӀалъул анцӀабилеб къоялъ, щибаб хъизан-къаялъ цо-цо кьегӀер босейин. 4ТӀубараб кьегӀер кваназе гӀураб хъизан гьечӀони, биччанте гьеб – щивас кигӀан кваналеб хӀисабалдеги босун, киназего гӀолеб къагӀидаялда – бищун цересел мадугьалзабазгун гӀахьал гьабизе. 5Гьел кьагӀи рукӀине ккола лъагӀел барал, бихьинал ва жагъаллъи гьечӀел. Гьел рукӀине бегьула кьагӀи яги буртӀал. 6Гьел хьихье гьаб моцӀалъул анцӀила ункъабилеб къоялде щвезегӀан, цинги биччанте маркӀачӀул гӀужалда гӀизраилазул тӀолабго жамагӀаталъ гьел хъвезе. 7Къурбаналъе хъурал жалазул биги, гьеб къурбан нужеца кваналеб минаялъул кавуялъул кӀиябго рахъалдаги рахаздаги бахе. 8ЦӀадуда тӀадги бежун, гьебго сордоялъ кванай гьеб гьан, бугьурго чадалгун#12:8 Бугьурго чед – реччеб гъорлъе жубачӀого бежараб чед. ва кьогӀал хурдулгун цадахъ. 9ГӀатӀго яги белъун гьан кванаге, амма цӀадуда тӀад бежизабун кванай – бетӀерги, хӀатӀалги, ургьимесги цадахъ. 10Радалалде щибго жо нахъе тоге. РогьинегӀан кваначӀого хутӀараб цӀадулъ бухӀе. 11Гьале нужеца гьеб кваназе кколеб къагӀида: сапаралде къачӀарал чагӀи кинигин ретӀун ретӀелгун, къан рачелгун, хӀатӀазда ретӀун хьиталгун, хъатикь ккун гӀансагун, гӀедегӀалихъего кванай гьеб. Гьеб ккола БЕТӀЕРГЬАНАСУЛ Песах.
12Гьеб сордоялъ Дун Мисри къотӀун ине вуго, ва Дица хвезаризе руго киналго тӀоцере гьарурал лъималги боцӀул щибаб тӀоцебе гьабураб тӀинчӀги; Дица жаза гьабизе буго Мисриялъул тӀолалго аллагьзабазе. Дун вуго БЕТӀЕРГЬАН. 13Амма нужер минабазул кавабазда бахараб би букӀина нуж цӀунулеб гӀаламатлъун: гьеб би бихьидал, Дун аскӀосан ине вуго. Мисриялда тӀаде Дица хвалил унти биччайдал, нужеда гьеб хъвазе гьечӀо. 14Гьеб къо нужеда кидаго кӀочонге. Гьеб къо нужее байрамлъун букӀа абе – БЕТӀЕРГЬАНАСЕ тӀобитӀулеб байрамлъун. Абадиялъего нужеда тӀад лъураб байрам хӀисабалда рачӀунел гӀелазги кӀодо гьабизе биччай гьеб къо. 15Анкьго къоялъ реччеб жубачӀел чадал гурони кванаге. ТӀоцебесеб къоялъго рокъоса реччеб тӀагӀинабе, щай абуни, гьеб анкьго къоялда жаниб реччеб лъун гьабураб чед кванарав чи ГӀизраилалъул халкъалда гьоркьоса нахъе къотӀизе ккола. 16Гьел къоязул тӀоцебесеб къо хирияб къолъун букӀине ккола – анкьабилеб къоги хирияблъун букӀине ккола. Гьел къояз щибго хӀалтӀи гьабуге, нужеего квен хӀадур гьаби тун батӀияб.
17Бугьурго Чадазул байрам тӀобитӀе, щайгурелъул Дица нуж аскарал гьарун Мисриялдаса нахъе рачана гьеб къоялъ. Гьеб къо кӀодо гьабе хадусел гӀелазги – гьеб буго абадиялъего нужее бугеб амру. 18ТӀоцебесеб моцӀалъул анцӀила ункъабилеб къоялъул къаси гӀужалдаса байбихьун къоло цоабилеб къоялъул къаси гӀужалде щвезегӀан кванай реччеб тӀечӀеб чед. 19Анкьго къоялда жаниб нужер къавулъ букӀине бегьуларо реччебалъул къатӀра. Реччеб гъорлъ бугеб квен кванарав чи, щив гьев ватаниги, къватӀиса гочун вачӀарав вукӀа, нужер ракьцояв вукӀа, гьев чи ГӀизраилалъул жамагӀаталда гьоркьоса нахъе къотӀизе ккола. 20Гьел къояз, нуж кир рукӀаниги, реччеб гъорлъ хӀалтӀизабураб кинабгӀаги квен кванаге – кванай бугьурго чадал».
21Мусаца ГӀизраилалъул церехъаби данде ракӀарана ва гьезда абуна: «Инеги ун, нужерго хъизамазе цо-цо кьегӀер тӀаса бище щивас ва Песахалъул къурбанал хъве.
22Цинги иссопалъул#12:22 Иссоп – ГӀизраилалда бижулеб махӀгьуинаб хер. квацӀиги босун, цӀарагӀалъубе тӀураб бидулъ ччуй гьеб ва кавуялъул рахаздаги кӀиябго рахъалдаги бахе. Гьелдаса хадуб нужер цониги чи минаялъул рагьумахӀу бахун къватӀире унге радаллъизегӀан. 23Мисриял чӀвазе БЕТӀЕРГЬАН вахъараб мехалда, гьесда бихьила кавуялъул кӀиябго рахъалдаги рахаздаги бахараб би ва гьеб мина гьес жибго тела; нуж чӀвазе чӀвазеян нужер минабазда жаниве лъугьине, рухӀ бахъулев Малаикасе изнуги кьеларо. 24Нужее ва нужер хадусел наслабазе абадиялъего чӀезабураб тӀадкъай хӀисабалда цӀуне гьеб амру. 25БЕТӀЕРГЬАНАС нужее кьезе къотӀи гьабураб ракьалде щведал, гьенибги билълъанхъизабе гьеб гӀадат. 26„Гьаб щиб гӀадат?“ – ин нужер лъималаз гьикъидал, 27гьезда абе: „Гьаб ккола БЕТӀЕРГЬАНАСЕ тӀобитӀулеб Песахалъул къурбан: мисриял чӀвалеб мехалда, Гьев гӀизраилазул минабазда аскӀосан ана ва ниж тархъан гьаруна“», – ян.
Гьебмехалъ тӀолабго халкъ накабазде ккана ва БЕТӀЕРГЬАНАСЕ рецц гьабуна.
28БЕТӀЕРГЬАНАС Мусадеги Гьарунидеги амру гьабунщинаб мухӀканго тӀубазабуна гӀизраилаз.
АнцӀабилеб жаза: тӀоцере гьарурал васал хвей
29Сордо бащалъуда Мисриялъул ракьалда гьабунщинаб тӀоцебесеб лъимадул рухӀ бахъана БЕТӀЕРГЬАНАС: Мисриялъул пачаясул, ай пиргӀавнасул тӀоцебесеб лъимадаса байбихьун, туснахъалда тӀамун вугев такъсирчиясул тӀоцебесеб лъимаде щвезегӀан, ва тӀолабго боцӀул щибаб тӀоцебе гьабураб тӀинчӀги хвезабуна. 30ПиргӀавнги, гьесул цересел чагӀиги, тӀолалго мисриялги тӀаде рахъана гьеб сардилъ, ва киса-кибего Мисриялда кутакаб магӀил гьаракь бахъана – цониги рукъ хутӀун букӀинчӀо жаниб хвел ккечӀеб.
БетӀергьанасул халкъ Мисриялдаса тархъанлъи
31Гьебго сордоялъ пиргӀавнас Мусаги Гьарунги тӀаде ахӀана ва гьезда абуна: «Рахъа! Нужеца кӀиязго ва тӀолалго гӀизраилаз дир халкъги дир ракьги те! Нужеца абулеб букӀараб къагӀидаялъ БЕТӀЕРГЬАНАСЕ тӀагӀат-гӀибадат гьабизе а! 32ГӀиги баче, боцӀиги баче ва нужерго нухда а! Диеги цо дугӀа гьабе!» – ян.
33Мисрияз халкъ гӀедегӀизабулеб букӀана улка тун ине.
«Гурони ниж киналго хвезехъин руго!» – ян абулеб букӀана гьез.
34Халкъалъ цадахъ босана реччебги гъорлъе жубачӀого буцараб ролъ; гьеб жаниб лъурал хӀерчал ратӀлилъ жемана ва гъажибутӀрузда лъуна. 35ГӀизраилаз, Мусаца гьезда малъараб къагӀидаялъ, мисриязда гьарун кьезабуна гӀарцулги меседилги цӀарагӀ ва ретӀел. 36БЕТӀЕРГЬАНАС мисриязул рекӀелъе гӀизраилаздехун рахӀму бижизабуна ва гьединлъидал, гьез щиб гьараниги, кьолеб букӀана гьезие. Гьеб хӀалалда гьезие мисриязухъа кӀудияб бечелъи щвана. 37ГӀизраилал ана Раамсесалдаса Суккоталде. Руччабиги лъималги рикӀкӀинчӀого, кинавниги гьезул вукӀана анлънусазарго бихьинчи. 38Гьезда цадахъ рукӀана гӀемерал батӀи-батӀиял халкъазул гӀадамалги ва цӀикӀкӀараб къадаралда гӀи-боцӀиги. 39Мисриялдаса жидедаго цадахъ босун бачӀараб буцараб ролъул гьез чадал режана; реччеб жубан букӀинчӀо гьенибе. Гьел гӀедегӀун Мисриялдаса къватӀире рахъинарун рукӀиндал, гьезие заман букӀинчӀо сапаралде цадахъ босизе квен хӀадуризе.
40ГӀизраилил халкъалъ Мисриялда бана ункънусиялда лъеберго сон. 41Дурусго ункънусиялда лъеберго сон тӀубараб къоялъ, БЕТӀЕРГЬАНАСУЛ халкъ, кӀудиял аскарал гьарун, Мисриялдаса нахъе ана. 42Гьеб сордо ккола БЕТӀЕРГЬАНАСЕ гӀоло макьу толеб сордо; гьеб сордоялъ Гьес Мисриялдаса гӀизраилал нахъе рачана. Гьеб БЕТӀЕРГЬАНАСУЛ сордо буго! ГӀизраилалъул тӀолалго гӀелазе гьеб сордо ккола макьу толеб сордо.
Песахалъул къанунал
43БЕТӀЕРГЬАНАС Мусадаги Гьарунидаги абуна: «Гьале Песахалъул къурбан хъвеялъул тадбир: батӀияб ракьалдаса чияс гьеб квине бегьуларо.
44Дуца вичун восарав лагъас гьеб квине бегьула, дуца гьесие суннат гьабун бугони, 45амма заманаялъе гӀумру гьабун нужер ракьалда чӀарав чияс яги мухьдахъ ккурав хӀалтӀухъанас гьеб квине бегьуларо. 46Гьеб къурбан квине ккола гьеб хӀадурараб рокъоб – гьан рокъоса къватӀибе босуге ва гьелъул цониги ракьа бекуге. 47ГӀизраилалъул тӀолабго жамагӀаталъ тӀобитӀизе ккола гьеб байрам. 48Нужеда цадахъ гӀумру гьабун вугев къватӀиракьалдаса чиясе БЕТӀЕРГЬАНАСУЛ Песах кӀодо гьабизе бокьун бугони, гьесул рокъор гӀумру гьабун ругел киналго бихьиназе суннат гьабизе ккола. Гьебмехалда гьес гьелъулъ гӀахьаллъи гьабизе бегьула нужеда гьоркьов гьавурав чиясго гӀадин. Суннат гьабичӀев чияс гӀахьаллъи гьабизе бегьуларо Песахалъул байрамалъул тӀутӀалда. 49Цого къанун хӀалтӀула нужер ракьцоязеги ва батӀияб ракьалдаса рачӀун нужеда гьоркьоб гӀумру гьабун ругел гӀадамазеги».
50ГӀизраилаз кинабго гьабуна Мусадеги Гьарунидеги БЕТӀЕРГЬАНАС гьабураб амруялда рекъон. 51Гьебго къоялъ БЕТӀЕРГЬАНАС Мисриялдаса къватӀире рачана гӀизраилал аскараздеги рикьун.
Currently Selected:
Тархъанлъи 12: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023