Тархъанлъи 11

АнцӀабилеб жазаялъул магӀна

1БЕТӀЕРГЬАНАС Мусада абуна: «Дица пиргӀавнасдеги Мисриялдеги тӀаде цоги цо балагь биччалеб буго. Гьелдаса хадуб гьес нуж риччан тезе руго, ва гьадинго риччан тезе гурел, къватӀире рачахъизе руго.

2Халкъалда абе бихьиназги руччабазги жидерго мадугьалзабазухъа гӀарцул ва меседил къайи гьареян».

3(БЕТӀЕРГЬАНАС мисриязул рекӀелъ Жиндирго халкъалдехун рахӀму бижизабуна; живго Мусаги Мисриялъул тӀолабго халкъалъ – гӀадатиял чагӀазги, пиргӀавнасул цересел чагӀазги – къадруяв чилъун рикӀкӀунаан.)

4Мусаца пиргӀавнасда абуна: «БЕТӀЕРГЬАНАС гьадин лъазабулеб буго: „Сордо бащалъулеб ригьалда Дун Мисри къотӀун ине вуго,

5ва щибаб тӀоцебе гьабураб лъимер хвезе буго Мисриялда – пачаясул тахида вугев пиргӀавнасул лъимадаса байбихьун, гьабида цее кӀусарай лагъалъул лъимаде щвезегӀан. ХӀайваназул тӀоцебе гьабураб тӀинчӀги хвезе буго. 6ТӀолабго Мисриялда букӀине буго цебе киданиги букӀинчӀебгӀан ва хадубккунги киданиги букӀинаребгӀан кӀудияб магӀу. 7Амма гӀизраилазе ва гьезул боцӀуе гьой хӀапарабгӀанги зарал ккезе гьечӀо“. Гьеле гьеб мехалда лъала нужеда БЕТӀЕРГЬАНАС Мисриялдаги ГӀизраилалдаги гьоркьоб батӀалъи гьабулеб букӀин. 8Дур цересел чагӀи рачӀина дихъе ва наку чӀван гьарила гьез: „Мунги дуда хадуб билълъараб тӀолабго халкъги нахъе а гьаниса!“ – ян. Гьелдаса хадув дунги ина».

Цинги Муса, ццидаца гъанкъулаго, пиргӀавнасда аскӀоса нахъе ана.

9БЕТӀЕРГЬАНАС Мусада абуна: «ПиргӀавнас нужехъ гӀин тӀамизе гьечӀо, амма гьедин букӀине ккола, Дица Мисриялъул ракьалда Дирго хӀикматал ишал жеги цӀикӀкӀинаризе рукӀине».

10Мусацаги Гьаруницаги гьал киналго мугӀжизатал рихьизаруна пиргӀавнасда цере, амма БЕТӀЕРГЬАНАС пиргӀавнасул рекӀелъе согӀлъи биччана, ва гьес гӀизраилал жиндирго улкаялдаса нахъе ине риччачӀо.

Currently Selected:

Тархъанлъи 11: АварАК

Highlight

Copy