Эстер 7

ПарччахӀас Гьамание гьабураб жаза

1ПарччахӀ, цадахъ Гьамангун, парччахӀ Эстерихъе сухӀматалде щвана. 2Нахъеги, цебесеб къоялъго гӀадин квана-гьекъолел рукӀаго, парччахӀас цӀехана Эстерида: «Щиб бугеб дур къваригӀел, Эстер бика? Щиб бокьаниги кьела дуе. Кинаб бугеб дур гьари? Дуца гьарараб жо, бащдаб парччахӀлъиялде гӀунтӀунги – кинабго тӀубазабила».

3Эстер бикаца абуна: «ПарччахӀасул дида ракӀ рекъолеб батани, ва парччахӀасе гьеб жо къабуллъани, гьарула дир гӀумру цӀуне – гьеб буго дир къваригӀел! Мун гурхӀа дир халкъалда – гьеле дир рекӀел гьари! 4Щайгурелъул, ричун ругелъул ниж – дунги дир халкъги гъуризе, чӀвазе ва тӀагӀинаризе къотӀун руго ниж! Ниж лагълъиялде ричун, лагъзаллъун гьаризехъин рукӀараланицин, дун юцӀцӀун чӀелаан – гьединаб балагь сабаблъунцин парччахӀасул рахӀат хвезабилароан!»

5ПарччахӀ Ахашверошица Эстерида цӀехана: «Щив кколев гьев чи? Кив гьев вугев? Лъида кӀвараб щибго нахъе къачӀого гьединаб пикру рекӀелъе биччазе?» 6«Гьев тушман ккола гьале гьав хӀалихьат Гьаман!» – ин жаваб кьуна Эстерица. Гьаманиде кутакаб хӀинкъи рещтӀана парччахӀасда ва гьесул лъадуда цебе.

7Ццидаца гьалаглъарав парччахӀ, квана-гьекъейги тун, тӀадеги вахъун, къватӀивехун кӀалгӀаялъул ахикье ана, Гьаманин абуни Эстер бикада, жинда гурхӀун, гӀумру цӀунейин гьардезе лъугьана: гьесда бичӀчӀана, парччахӀас жиндие гӀасияб хӀукму къотӀараблъи.

8КӀалгӀаялъул ахикьа квана-гьекъолеб рокъове тӀадвуссиндал, парччахӀасда бихьана Гьаман, Эстер бикал тахбакӀалде кӀалагъоркье щапун. «Гьанже дир лъадуде тӀаде лъугьинегийищ къасд ккараб, битӀахъе дир кӀалгӀаялъуб?!» – ан ахӀдана парччахӀ.

ПарччахӀасул кӀалдиса къватӀибе гьеб рагӀи араб сагӀаталъ, Гьаманил гьумер, тӀаде жо рехун, бахчизабуна.

9ПарччахӀасул ахтабазул цояв, гьесие хъулухъалъе чӀезавурав Харвоница абуна: «ПарччахӀасе лъикӀлъи гьабурав Мардохай вазе хӀубицин къачӀан букӀана Гьаманица, – кӀикъоялда анцӀго натӀалъ борхатаб гьеб хӀуби Гьаманил минаялда цебе чӀван буго!» – ян.

«Гьеле гьеб хӀобода вай гьев!» – ин буюрухъ кьуна парччахӀас. 10Гьедин Мардохайие гьес къачӀан букӀараб хӀобода Гьаман живго вана, ва парччахӀасул ццин гӀодобе буссана.

Currently Selected:

Эстер 7: АварАК

Highlight

Copy