Къанун 8
8
БЕТӀЕРГЬАН кӀочонге
1ТӀадчӀун тӀубазабе дица жакъа нужее кьолеб бугеб Аллагьасул щибаб амру, нужер гӀумруги цӀунизе, халкъги цӀикӀкӀине букӀине. Цинги БЕТӀЕРГЬАНАС нужее кьелин нужер умумузе гьа бараб ракьалде лъугьина нуж ва гьеб мукӀур гьабила. 2Нужеда кӀочонге нужер БЕТӀЕРГЬАН Аллагьас кӀикъого соналъ нуж гӀицӀаб авлахъалдасан сапаралда рачараб куц. Нужер хӀалбихьизеги, нуж мутӀигӀ гьаризеги, рекӀелъ бугеб лъазабизеги гӀоло гьабуна гьеб – нужеца Гьесул амраби тӀуразарулищали балагьизе. 3Гьес нуж квегъана ракъиялъ кӀвекӀун, хадуб, нужеда яги нужер умумузда цебе бихьа-рагӀичӀеб маннаги кьун, хьихьана. Гьес нужеда бихьизабуна цохӀо чед-хинкӀалдалъун гурев инсан чӀаго вукӀунеблъи – инсанасе чӀаголъи БЕТӀЕРГЬАНАСУЛ кӀалдисан бачӀараб щибаб рагӀудасан букӀунеблъи! 4КӀикъоябго соналъ нужер ретӀел басралъичӀо, хӀатӀалги гьорочӀо. 5БичӀчӀа нужеда, БЕТӀЕРГЬАН Аллагьас нужеда малъула инсанас жиндирго васасда малъулеб гӀадин.
6БЕТӀЕРГЬАН Аллагьасул амраби цӀуне, Гьесул нухккун хьваде ва Гьесукьа хӀинкъа. 7БЕТӀЕРГЬАН Аллагьас нуж рачина гьайбатаб улкаялде: гӀоралги чвахулеб, лъадал хӀавузалги ругеб, гӀатӀиракьаздагун мугӀрузда иццалги чвахулеб, 8ролъги пурчӀинаги гьарзаяб улкаялде, гьединго цӀибилги, инжирги, соногӀечги гьарзаяб, зайтуналъул гъутӀбиги гьоцӀоги гӀемераб ракьалде. 9Гьениб чадил мукъсанлъи букӀине гьечӀо ва гӀорцӀизегӀан квен букӀине буго – нужее гӀолареб жо гьениб щибго букӀине гьечӀо. ГанчӀилъ махх буго гьениб, кьурабалъан мазгаргун пахь бахъизе бегьула.
10Гьенир гӀорцӀизегӀан кваналеб мехалъ БЕТӀЕРГЬАН Аллагьасе рецц гьабе, Гьес нужее кьураб баракатаб ракьалъухъ. 11Вореги, БЕТӀЕРГЬАН Аллагь кӀочонге, дица жакъа нужее кьурал Гьесул къануналги, амрабиги, хӀукмабиги тӀуразаре. 12Нужее гӀорцӀизегӀан кваназе жоги щвараб, лъикӀал минабиги ран нуж гьениреги рахъараб ва 13гӀи-боцӀиги, гӀарац-меседги, цогидаб бечелъиги гӀемерлъараб мехалъ, 14нужер гӀамал кӀодолъуге ва БЕТӀЕРГЬАН Аллагь кӀочон тоге. Гьеслъидал нуж Мисриялдаса, нужер лагълъиялдаса, хвасар гьарурал 15ва, загьруял борхьазулги ичӀкӀалазулги цӀураб, хӀинкъи цӀикӀкӀараб салул авлахъалдасан ва бакъвараб чӀобогояб ракьалдасан нуж цере рачарал. Нужее гӀоло Гьес кьурулъа къватӀибе лъим бачӀинабуна 16ва бакъвараб авлахъалда, нужер умумузда бихьа-рагӀичӀеб манна кьуна кваназе. Гьес нуж квегъулел рукӀана ва хӀалал рихьулел рукӀана, хадубккун нужее лъикӀлъи-парахалъи букӀиналъул мурадалда. 17Нужеда ккоге гьеб кинабго бечелъи нужерго бажариялдалъун щвараб бугин. 18БЕТӀЕРГЬАН Аллагь кӀочонге. Гьесин нужее рикъзи кьолеб бугеб жакъа къоялде щвезегӀанги, нужер умумулгун гьабураб Жиндирго къотӀи цӀуниялъе гӀоло.
19Амма нужерго БЕТӀЕРГЬАН Аллагьги кӀочон тани, цогидал аллагьзабазда нахъги рилълъун, гьезие тӀагӀат-гӀибадатги гьабуни – гьале Дица нужеда лъазабулеб буго, чара гьечӀого нуж хвезе руго! 20Нуж нужерго БЕТӀЕРГЬАН Аллагьасухъ гӀенеккичӀони, нужее ракьал кьеялъе гӀоло БЕТӀЕРГЬАНАС тӀагӀинаризе хъварал халкъал гӀадин, нужги хвезаризе руго.
Currently Selected:
Къанун 8: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
