Къанун 7

Тушбаби нахъе ахӀи

(Тархъ. 34:11-16)

1БЕТӀЕРГЬАН Аллагьас нуж доб ракьалде щвезарила ва гьенир ругел гӀемерал халкъал нахъе къотӀила: хитиялги, гиргашиялги, амориялги, ханааниялги, перизиялги, хивиялги, евусиялги – нужедаса рикӀкӀен гӀемераб ва къуватаб анкьго халкъ. 2БЕТӀЕРГЬАН Аллагьас гьел нужер кверде кьураб мехалъ ва нужеца гьезда тӀад бергьенлъи босараб мехалъ, гьел херем#7:2 Херем гьаби – тӀубан тӀагӀинабиялдалъун БетӀергьанасухъе кьей. Гьаб магӀнаялда чи «херем» гьавизе бегьулаан кинаб букӀаниги такъсиралъухъ, ялъуни гьересиаллагьзабазе лагълъи гьабиялъухъ. Гьебго магӀнаялда «херем» гьабизе ва цӀа гъун бухӀизе бегьулаан тушбабазул шагьар ва рагъда щвараб давла (бал. Тархъ. 22:20; Къан. 13:16). гьаре, ай цо чи нахъе течӀого чӀвай гьел. Гьезулгун кинабгӀаги къотӀи-къайги гьабуге, гьезда гурхӀелги гьабуге, 3гьезулгун ригьналги гьаруге. Нужерго ясал гьезул васазе россабазе кьоге, гьезул ясал нужерго васазе лъудбилъунги рачунге. 4Гурони, гьез нужер васал Дир нухдасаги къосинарун, батӀиял аллагьзабазе тӀагӀат гьабиялде цӀазе руго ва, БЕТӀЕРГЬАНАСУЛ гьалагаб ццинги рещтӀун, нужги къокъаб заманалда жанир тӀагӀинаризе руго. 5Гьале нужеца гьабизе кколеб жо: гьезул къурбаназул бакӀал риххизаре, диниял ганчӀал гъуре, Ашерал хӀубал къотӀе ва гьезул гьересиаллагьзаби цӀадулъ рухӀе. 6Нуж БЕТӀЕРГЬАН Аллагьас Жиндиего батӀа гьабураб халкълъидал. БЕТӀЕРГЬАН Аллагьас тӀолго дунялалъул халкъазда гьоркьоса тӀаса рищун руго нуж, Гьесул хирияб халкълъун ва къиматал ирсилаллъун гьаризе.

7Цогидаб халкъалдаса рикӀкӀен гӀемерал рукӀиналъ гуро БЕТӀЕРГЬАНАСЕ нуж хиралъарал ва тӀаса рищарал, гьелъул гӀаксалда, цогидал халкъазда данде ккун, нужер халкъалъул къадар буго бищун дагьаб. 8Амма БЕТӀЕРГЬАНАС Жиндирго къудратаб квералдалъун Мисриялдаса нахъе рачана нуж, лагълъиялдаса хвасарги гьарун, ва Мисриялъул пача пиргӀавнасул кверщаликьа рорчӀизаруна, нуж Бичасе хириял рукӀун ва нужер умумузе кьураб рагӀи кквезе бокьун. 9Кидаго кӀочон тоге, дур БЕТӀЕРГЬАН Аллагь вукӀин ХӀакъав Аллагь. Гьев вуго ритӀухъав Аллагь, Гьев вокьулезул ва Гьесул амрабиги тӀуразарулезул наслабазе – гьезул азарабилеб гӀелалде гӀунтӀунги – рахӀмуялъул КъотӀи цӀунулев.

10Амма Гьев рихаразе гӀажал хъвала Гьес;

нахъ бахъичӀого жаза гьабула гьединазе.

11ПалхӀасил, дица жакъа нужее кьурал амрабиги, къануналги, хӀукмабиги цӀунун хьваде.

12Нуж гьал къануназухъ гӀенеккани ва нужеца гьел мухӀканго тӀуразарулел ругони, нужер БЕТӀЕРГЬАН Аллагьасги тӀубазабила Жиндирго рахӀму-цӀобалъул КъотӀи, нужер умумузе кьураб рагӀуда рекъон. 13Гьесие хириял рукӀина нуж, Гьес баракат лъела нужеда ва рикӀкӀен гӀемераб кӀудияб халкълъун гьарила нуж. Гьес нужее гӀемерал лъимал кьела, гьарзаяб хӀалухъен кьела, цӀибахъараб чагъирги зайтуналъул нахги кьела, боцӀуе бачал гӀемерал гьарила, гӀи-цӀаназул рехъалъ буртӀал ва кьагӀи гӀемерлъила. Нужер умумузе рагӀи кьураб ракьалда гьедин букӀине буго нужее. 14Нужее гӀадин рикъзи битӀараб халкъ тӀокӀалъ цониги букӀинаро; лъимал гьаруларев бихьинчи яги чӀужугӀадан нужеда гьоркьор рукӀине гьечӀо, цониги хӀораб жо гӀи-боцӀуда гьоркьобги букӀине гьечӀо. 15БЕТӀЕРГЬАНАС киналго унтаби тӀаса росила нужедаса. Мисриялъул квешал унтаби (нужеда лъала гьел) риччаларо нужеда тӀаде, гьел риччала нужер тушбабазде. 16БЕТӀЕРГЬАН Аллагьас нужер кверщаликье кьурал киналго халкъал нужеца чӀвазе ккола; гьезда гурхӀизе бегьуларо ва гьезул аллагьзабазе тӀагӀат-гӀибадатги гьабизе бегьуларо, гурони, гьеб нужеего гъураб къорлъун букӀине буго.

БатӀиял халкъазукьа хӀинкъуге

17Нужеда ракӀалда ккезе бегьула: „Гьал нижедасаги къуватал халкъал руго! Кин нижехъа бажарилеб гьал нахъе къотӀун?“ – ин. 18Нуж гьезукьа хӀинкъуге! РакӀалде щвезабе БЕТӀЕРГЬАНАС пиргӀавнасеги тӀолабго Мисриялъеги гьабураб. 19Нужерго беразда бихьана доб мехалъ Гьес риччарал кӀудиял балагьалги, Гьесул хӀикматалги, мугӀжизаталги, гьениса къватӀире нуж рачарав БЕТӀЕРГЬАН Аллагьасул къуватаб кверги къудратги. Гьебго гьабизе буго, гьанже нуж хӀинкъун ругел, киналго цогидал халкъазеги. 20Кьужнаял риччазе руго БЕТӀЕРГЬАН Аллагьас гьезда тӀаде, нужедаса рахчун чӀаго хутӀаралцин хвезаризе. 21ХӀинкъуге гьезукьа, щайгурелъул нуж цӀунулев БЕТӀЕРГЬАН Аллагь ккола къудратав ва хӀинкъи кьолев Аллагь. 22БЕТӀЕРГЬАН Аллагьас нужеда цересан цо-цоккун гьел халкъал нахъе къотӀила; киналго цадахъ гъуризе бегьуларелъул, нужеда сверухъ гӀалхул жанаварал гӀемерлъизе гурилан. 23БЕТӀЕРГЬАН Аллагьас гьел халкъазда тӀад бергьенлъи кьела нужее; рихха-хочизарила ва гъурила гьел. 24Гьес гьезул пачазаби нужер кверде кьезе руго ва нужеца гьезул цӀаралцин дунялалдаса нахъе хъвагӀазе руго. Лъиданиги бажаризе гьечӀо нужеда данде чӀун. Нужеца киналго тӀагӀинаризе руго. 25Гьезул аллагьзабазул сипат-суратал нужеца цӀа гъун рухӀизе ккола. Гьезда тӀад бекьараб гӀарац-меседалде квер бегьуге, гурони гьеб нужее къорлъун ккезе буго, нужер БЕТӀЕРГЬАН Аллагьасе кутакалда рихараб жо буго гьеб. 26Хъубаб рихараб жо нужерго рокъобе жанибе босуге, гурони нужги гьеб жоялда цадахъ херем гьаризе руго. Гьединал жалаздаса цӀуне нужго, гьел тӀуран тӀагӀинаризе ккола.

Currently Selected:

Къанун 7: АварАК

Highlight

Copy