Къанун 2
2
ГӀицӀаб авлахъалда
1БЕТӀЕРГЬАНАСУЛ амруялда рекъон, нахъги руссун, нилъ БагӀараб ралъдахъе унеб нухда бугеб гӀицӀаб авлахъалде рилълъана. ГӀемераб заманалъ Сеир мегӀералда сверун хьвадизе ккана нилъ.
2Хадуб БЕТӀЕРГЬАНАС дида абуна: 3„ГӀела гьал мугӀрул-щобал сверун хьвадарал, гьанже шималалъул рахъалде русса. 4Халкъалъе гьадинаб буюрухъги кье: ‘Гьанже нуж инехъин руго Сеиралда чӀарал нужер вацазул, ай ГӀисавил наслабазул ракьалдасан. Гьел нужекьа хӀинкъизе руго, амма цӀодорлъи гьабе. 5Гьелгун рагъ гьабизеян лъугьунге, щайгурелъул Дица нужее гьезул ракьазул цо цедерцин кьезе гьечӀо. 6Нужеца гьениб кванараб нигӀматалъухъги гьекъараб лъадахъги гьезие мухь кье’, – ян“.
7Нужеца гьабулебщиналъулъ БЕТӀЕРГЬАН Аллагьас баракат рещтӀинабуна нужее, Гьесда лъалелъул рагӀа-ракьан гьечӀеб гӀицӀаб авлахъалда нужеца гьабураб сапар. КӀикъоябго соналъ нужгун вукӀана нужер БЕТӀЕРГЬАН Аллагь ва гьединлъидал нужее къваригӀарабщинабги гӀунги тӀокӀ букӀана.
8Гьединаб хӀалалда, Сеиралда чӀел гьабурал вацазда, ай ГӀисавил наслабазда аскӀосан ана нилъ. Иорданалъул расалъиялдасан Элаталдеги Ецион-Гевералдеги унеб нухдасаги сверун, нилъ рилълъана МогӀавалъул гӀицӀаб авлахъалде.
9БЕТӀЕРГЬАНАС дида абуна: „МогӀавиязул рахӀат хвезабуге ва гьезулгун рагъ гьабуге, щайгурелъул Дица нужее гьезул ракь кьезе гьечӀо. Дица Ар#2:9 Ар – улкаялъулго кӀвар бугеб могӀавиязул шагьар. ЛутӀил наслабазе кьуна“, – ян.
10(Цебе доба гӀумру гьабулеб букӀана эмеяз. Анакилал гӀадинал къуватал ва логолъа чӀахӀиял гӀадамал рукӀана гьел, гӀемераб халкъги букӀана гьезул. 11Анакил наслабиго гӀадин, гьелги рефаималлъун#2:11 Рефаимал – НекӀсияб КъотӀиялда гӀемер рехсарал кӀудияб къаркъалаялъул ва къуватал, цӀар рагӀарал гӀадамал. Къанун абураб тӀехьалъул кӀиабилеб бетӀералъул 10, 11, 20, 21-абилел мухъазда хъваралда рекъон, гьезда гьоркьоре унаан, МогӀавиялде могӀавиял рачӀинегӀан гьенир рукӀарал «эмеял» ва Аммониялде аммониял рачӀинегӀан гьенир рукӀарал «замзуммеял» (гьелго «зузеял»). рикӀкӀунаан, амма могӀавияз гьезда эмеялин абулаан. 12Сеиралдайин абуни, цебе хорияз гӀумру гьабулеб букӀана, амма ГӀисавил наслабаз гьел гьениса нахъе ахӀана ва гьезул бакӀалда жалго чӀана; БЕТӀЕРГЬАНАС кьураб ракьалда гӀизраилаз гьабурабго гӀадин гьабуна гьезги.)
13„Рахъа гьанже ва Заредалъул кӀкӀал бахе“, – ян абуна БетӀергьанас. Ва нилъеца гьеб кӀкӀал бахана.
14Нилъеца Кадеш-Барнеа тараб заманалдаги Заредалъул кӀкӀал бахараб заманалдаги гьоркьоб лъебералда микьго сон ана. Гьебгощинаб заманалда жаниб, БЕТӀЕРГЬАНАСУЛ гьаялда рекъон, цо тӀубараб гӀелалъул рагъуе ярагьуневщинав чи хвана. 15ГӀизраилазда гъорлъа гьел тӀуран тӀагӀинаризегӀан, БЕТӀЕРГЬАН гьезда данде чӀана.
16Рагъуе ярагьунел гьел киналго бихьинал хвараб мехалъ, 17БЕТӀЕРГЬАНАС дида абуна: 18„Гьанже нуж МогӀавалъул ракьалдасан, Ар шагьаралда аскӀосан а. 19КватӀичӀого нуж аммониязда гӀагарлъухъе щвела, амма гьезул рахӀат хвезабуге ва гьезулгун рагъ гьабуге, щайгурелъул Дица нужее аммониязул ракьалъул цо цедерцин кьезе гьечӀо. Дица гьеб ЛутӀил наслабазе кьуна“.
20(Кидаялиго гьел рефаимазул ракьалин рикӀкӀунаан, цебе гьез чӀел гьабун букӀиндал гьениб. Амма аммонияз гьезда замзуммеялин абулаан. 21Гьелги рукӀана анакилал гӀадинал къуватал ва логолъа рорхатал гӀадамал; гӀемераб халкъ букӀана гьезул. Амма БЕТӀЕРГЬАНАС тӀагӀинаруна гьел; гьелги нахъе хъамун, аммониял рахъана гьезул бакӀалде. 22БетӀергьанас гьебго гьабуна Сеиралда чӀел гьабурал ГӀисавил наслабазеги, цереккун гьенир рукӀарал хориялги тӀагӀинарун. ГӀисавилаз нахъе ахӀана гьел ва гьезул бакӀалда жалго чӀана. 23Газаялде гӀунтӀизегӀанги росабалъ гӀумру гьабун рукӀарал аввиял гъурана Криталдаса#2:23 Кафтора – Крит. рачӀарал кафторияз, жалгоги гьезул бакӀалде рахъана.)
Хешбоналъул пача Сихонида тӀад бергьенлъи боси
(Тар. 21:21-30)
24„Сапаралде рахъа, Арнон гӀор бахе, – ян абуна БЕТӀЕРГЬАНАС. – Дица духъе кьолел руго Хешбоналъул пача аморияв Сихонги гьесул улкаги. Рагъ байбихье ва гьезул ракьал кверде росе. 25Жакъа къоялдаса нахъе Дица дукьан гӀасияб хӀинкъи рещтӀинабила гьаб дунялалъул тӀолалго халкъазде. Гьезда дур хӀакъалъулъ хабар рагӀила ва хӀинкъараб хӀинкъиялъ сородизарила гьел“.
26Цинги Кедемоталдаса вакилзаби ритӀана дица Хешбоналъул пача Сихонихъе ракълилаб хабаргун: 27„Риччанте ниж дур улка къотӀун ине. КӀудияб нухккун ина ниж – я кваранаб, я квегӀаб рахъалде свериларо. 28ГӀарцухъ биче нижее кваназе квенги гьекъезе лъимги. ГӀицӀго изну кье нижее дур улкаялъул нухккун ине, 29Сеиралда чӀел гьабурал ГӀисавил наслабазги Аралда чӀарал могӀавиязги гьабурабго гӀадин. Ниж Иордан бахун дорехун, БЕТӀЕРГЬАН Аллагьас нижее кьураб ракьалде унел руго“. 30Амма Хешбоналъул пача Сихоница риччачӀо нилъ гьесул улкаялдаса ине, щайгурелъул нилъер БЕТӀЕРГЬАН Аллагьас гьесул рекӀелъ рокьукълъи лъун букӀун, Сихон пача нужер кверщаликье кьезе гӀоло. Гьедин ккезеги ккана.
31БЕТӀЕРГЬАНАС дида абуна: „Гьале Дица духъе кьолев вуго Сихонги гьесул улкаги. Гьанже бахъе гьесул ракь ва гьелда тӀад кверщел гьабе“. 32Гьебмехалъ Сихон вачӀана нилъеда данде тӀолабго жиндирго аскаргун ва Яхацалда аскӀоб рагъ ккана. 33БЕТӀЕРГЬАН Аллагьас гьевги нилъер кверщаликье кьуна: нилъеца чӀвана гьев, гьесул васалгун ва аскаргун цадахъ. 34Доб мехалъ нилъеца гьесул тӀолалго шагьарал кверде росана ва гьезул бихьиналги, руччабиги, лъималги, цо чи нахъе течӀого херем#2:34 Херем – тӀубан тӀагӀинабиялдалъун БЕТӀЕРГЬАНАСУХЪЕ кьей. гьаруна, ай тӀуран гъурана, 35амма гӀи-боцӀиги шагьараздаса щвараб давлаги нилъеего тана. 36Арнон гӀурухъ бугеб АрогӀер шагьаралдаса бахъараб ГилгӀадалде щвезегӀан цо шагьар хутӀичӀо нилъеда бахъун бажаричӀеб. БЕТӀЕРГЬАН Аллагьас кинабго кьуна нилъер кверщаликье. 37Амма БЕТӀЕРГЬАН Аллагьасул амруялдалъун, я аммониязул ракьазде, я Яббок гӀурул рагӀаллъиялда ругел ракьазде, я шагьаразул сверухълъиялъул мугӀрузда ругел ракьазде нилъеца квер бегьичӀо.
Currently Selected:
Къанун 2: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
