Къанун 12

Аллагьасе къурбанал гьаризе бихьизабураб бакӀ

1Гьале, нужер умумузул БЕТӀЕРГЬАН аллагьас нужее кьураб ракьалде щвараб мехалъ, нужеца думалъго тӀуразаризе кколел Аллагьасул къануналги амрабиги. Гьел тӀуразаре нужеца гьениб гӀумру гьабулебщинаб заманалда. 2Жидерго аллагьзабазе хъулухъ гьабулел рукӀарал гьел халкъазул мукъадасал бакӀал риххе: мугӀрузул тӀогьазда, гохӀ-щобазда ва киналго гъутӀбузда гъоркь. 3Гьезул къурбан-бакӀал риххе, мукъадасал ганчӀал гъуре, Ашерал хӀубал рухӀе ва аллагьзабазул сипат-суратал рек-рекун рай, щибго нахъе течӀого.

4Гьезда релълъун гьабуге нужеца нужерго БЕТӀЕРГЬАН Аллагьасе гьабулеб хъулухъги. 5Къурбаналги хириял садакъабиги росун нуж рачӀине ккола гӀицӀго БЕТӀЕРГЬАН Аллагьас тӀаса бищараб ва Гьесул цӀар чӀвараб бакӀалде – киналго къавмазул ракьазда гьоркьоса Гьес Жиндирго мукъадасаб Рукълъун тӀаса бищараб бакӀалде. 6Гьенире рачӀа нуж, тӀуран рухӀулел къурбаналги, цогидал къурбаналги, анцӀил бутӀабиги, хириял садакъабиги, назруялъул ва суннатал къурбаналги, гӀи-боцӀул тӀоцере гьарурал хӀайваналги рачун. 7Гьениб БЕТӀЕРГЬАН Аллагьасда цебе аваданаб квана-гьекъей гӀуцӀе хъизан-лъималгун цадахъ, нужго хӀалтӀун ва БЕТӀЕРГЬАН Аллагьасул квербакъиялдалъун щвараб буголъиялдасаги рохун.

8Гьанже гӀадин, щивасда берцин бихьухъе, жиндиего бокьа-бокьарабги гьабун рукӀине бегьуларо нуж. 9Нуж жеги щвечӀо БЕТӀЕРГЬАН Аллагьас нужее кьолеб бугеб парахатаб ракьалде. 10Амма Иордан гӀор бахарабго, БЕТӀЕРГЬАН Аллагьас нужее кьолеб бугеб ракьалде щвела нуж. Гьес нужее гьениб хӀалхьиги кьела, кинабго рахъалъ тушбабаздаса цӀунараб парахатаб гӀумруги букӀина нужер.

11Гьеб мехалъ дица абураб къагӀидаялъ тӀуран рухӀулел къурбаналги, цогидал къурбаналги, анцӀил бутӀабиги, хириял садакъабиги, назруялъул къурбаналги росун нуж рачӀине ккола нужерго БЕТӀЕРГЬАН Аллагьас тӀаса бищараб ва Гьес Жиндирго мукъадасаб Рукълъун гьабураб бакӀалде. 12Гьениб БЕТӀЕРГЬАН Аллагьасда цебе ихтилат гьабе нужерго васалгун, ясалгун, лагъзалгун ва гъаравашалгун; нужер шагьаразда чӀарал левиталги кӀочонге, гьезие ракьазул бутӀаги магӀишатги гьечӀелъул, нужее бугеб гӀадин. 13Вореги, цебе ккараб бакӀалда къурбанал рухӀуге. 14ГӀицӀго нужер къавмазул ракьазда гьоркьоса БЕТӀЕРГЬАНАС тӀаса бищараб бакӀалда рухӀе къурбанал ва дица малъарабщинабги гьениб тӀубазабе.

15Амма дуца гӀи-боцӀи хъвезе бегьула дуцаго гӀумру гьабулеб бокьараб бакӀалда ва бокьарабгӀан гьанги кваназе бегьула, дурго ресалъухъ балагьун, ай БЕТӀЕРГЬАН Аллагьас дуе кьураб боцӀи-рикъзиялъухъ балагьун. Нужер бокьарас кваназе бегьула гьединаб гьан – хъубасги вацӀцӀадасги – ритӀучӀалъул яги жайраналъул гьан квине бегьулеб гӀадин. 16ГӀицӀго би квание хӀалтӀизабуге, гьеб лъим гӀадин ракьалде гӀодобе тӀе.

17Дуца дурго рокъоб кваназе бегьуларо: бугӀа-ролъул ва зайтуналъул нахул анцӀил бутӀа, гӀи-боцӀул тӀоцебесеб къинлъиялъул гьан, назруялъул ва суннатаб къурбаналъул гьан ва хириял садакъабазул нигӀмат. 18Гьеб кинабго кванай БЕТӀЕРГЬАН Аллагьас тӀаса бищараб бакӀалда, Гьесда цебе. Биччанте дуда цадахъ гьеб кваназе дур васазги, ясазги, лагъзадерицаги, гъаравашазги, дур шагьаралдаса левитазги. Мунго хӀалтӀун щвараб нигӀматалъул лазат босе гьениб дурго БЕТӀЕРГЬАН Аллагьасда цебе. 19Вореги, дурго ракьалда парахалъараб мехалъ, левитал кӀочонге.

20БЕТӀЕРГЬАН Аллагьас, Жиндирго рагӀуда рекъон, дур ракьал гӀатӀид гьарила; ва гьанаде хьул лъуни, кида бокьаниги, гӀорцӀизегӀан гьан кваназе бегьула дуца. 21БЕТӀЕРГЬАН Аллагьас тӀаса бищараб Мукъадасаб бакӀ дудаса цӀакъго рикӀкӀада бугони, БЕТӀЕРГЬАНАС дуе кьураб гӀи-боцӀи дуца дурго бакӀалда бокьараб мехалъ хъвезе бегьула ва бокьарабгӀан гьан кваназе бегьула. 22РитӀучӀалъул яги жайраналъул гьан гӀадин кванай гьеб. Хъубасги вацӀцӀадасги кваназе бегьула гьеб.

Би квание хӀалтӀизабизе гьукъи

23Амма би гьекъеялдаса цӀуне, щайгурелъул бидулъ буго гӀумру: гьангун цадахъ гӀумру кванаге. 24Би квание хӀалтӀизабизе бегьуларо – лъим гӀадин ракьалде гӀодобе тӀе гьеб. 25Гьекъоге би – БЕТӀЕРГЬАНАСЕ бокьараб гьабуни, дуеги дур наслабазеги лъикӀ букӀина.

26Амма Аллагьасе батӀа гьабурабги назру гьабурабги жо БЕТӀЕРГЬАНАС тӀаса бищараб бакӀалде босизе ккола. 27ТӀуран рухӀулел къурбанал – гьанги биги – БЕТӀЕРГЬАН Аллагьасул къурбан-бакӀалде росе. Ракълил къурбаназул биги БЕТӀЕРГЬАН Аллагьасул къурбан-бакӀалде тӀезе ккола, гьезул гьан кваназе бегьула. 28ТӀадчӀун тӀубазабе жакъа дица нужеда малъарабщинаб. Дуца БЕТӀЕРГЬАН Аллагьасе бокьараб гьабуни, дуеги дур наслабазеги лъикӀ букӀине буго.

Гьересиаллагьзабазе хъулухъ гьабиялдаса цӀуне

29Нужеца цогидал халкъазухъ бугеб ракь кверде босизе буго ва гьезул ракьазда гӀумру гьабизе буго; БЕТӀЕРГЬАНАС нужеда цереса тӀагӀинаризе руго гьел халкъал. 30Гьел халкъал тӀагӀинарун хадуб, гьезул аллагьзабиги цӀехон, къорикье ккеялдаса цӀуне: „Гьал халкъаз кинаб дин гьабулеб букӀараб? Дицаги гьебго гьабила“, – ян абуге. 31БЕТӀЕРГЬАНАСЕ гьединаб жо гьабуге! Гьез жидерго аллагьзабазе Гьесда рихарал хъубал жал гьарула. Гьез жидерго лъималцин рухӀула гьел аллагьзабазе гӀоло.

32МухӀканго тӀубазабе дица малъараб кинабго жо. Гьелда тӀаде щибго жубаге яги тӀаса бахъуге.

Currently Selected:

Къанун 12: АварАК

Highlight

Copy