Даниял 11

1Дир бицани, Мадаялдаса Дарий пачалъун вахъун тӀоцебесеб соналъ#11:1 Бал. 5:31. МикагӀил малаикасе хӀалае чӀана дун.)

Шималалъул ва къилбаялъул пачазаби

2Гьанже дица дуда бицина унго-унголъунги ккезе бугеб жо: Персиялда жеги лъабго пача вахъине вуго. Гьезда хадув вачӀине вуго ункъабилев, гьел киназдасаго кутакалда бечедав пача. Гьеб бечелъиялдалъун гьесул къуват цебе тӀезе буго ва тӀолалго халкъал Грециялъул пачалихъалда данде чӀезаризе руго гьес. 3Гьеб заманалда Грециялда вахъине вуго кутакалда гучав ва тӀасанккарав пахруяв пача#11:3 Гьев ккола Александр Македонский (цебесеб эраялъул 336–323 сс.). Гьес гӀемерал халкъал жиндирго кверщаликье рачине руго. 4Амма гьесул къуват щулалъун бахъиналде гьесул пачалихъ гьородахъ щущан ине буго ва ункъиде бикьизе буго. Пачалихъ гьесул наслабазе щвезе гьечӀо, гьесул гӀадаб къуват-гучалдалъун гьеб цебе бачунев пачаги тӀокӀалъ вукӀине гьечӀо, щайгурелъул, гьесухъа бахъун, чияхъе кьезе буго гьеб.

5 # 11:5-45 Къилбаялъул пачазаби – гьел ккола Мисриялъул пачазаби, ай, Лагидазул (Птолемеязул) къавм; Шималалъул пачазаби – гьелги Цебесеб Азиялъул пачазаби, ай, Селевкидазул къавм ккола.Цинги къилбаялъул пача къуваталде вачӀине вуго, амма гьесул рагъул церехъабазул цояв гьесдасаги бергьараб къуваталъул вукӀине вуго ва жеги цӀикӀкӀарал ракьал рахъизе руго гьес. 6Чанго соналдасан шималалъул ва къилбаялъул пачабаз жидедаго гьоркьоб ракълилаб къотӀи-къай гьабизе буго. Гьеб къотӀи-къай щула гьабизе къилбаялъул пачаяс шималалъул пачаясе жиндирго яс кьезе йиго, амма гьелда пачалъиялъул ихтияр кверде босун бажаризе гьечӀо, гьесулги наслу къотӀизе буго. ХӀилла-рекӀкӀги гьабун, чукъа-рахьангун, гьелъул рахъ ккуралщинал чагӀигун ва жиндирго лъимергун цадахъ, гьей чӀвазе йиго.

7Гьел къояз гьелъул кьолболъан цоги чи вахъине вуго гьелъул бакӀалда чӀезе. Шималалъул пачаясда данде рагъ гьабизе буго гьес. Гьесул хъалаялда тӀаде кӀанцӀила гьев ва гьеб кверде босила. 8Гьес гьезул аллагьзабиги кверде росизе руго, маххул гьарурал хьварс-аллагьзабиги, гӀарац-меседалъул гьарурал хириял тӀагӀелалги цадахъ Мисриялде росун ине руго. Хадуб чанго соналъ гьес шималияб пачалихъалъул рахӀат хвезабизе гьечӀо. 9Хадуб шималалъул пача къилбаялъул пачалихъалда тӀаде кӀанцӀизе вуго, амма нахъе къазе ва жиндирго улкаялде тӀадвуссине ккезе вуго. 10Цинги гьесул васаз кӀудияб аскар данде бакӀаризе буго ва цӀидасан рагъде хӀадурлъи гьабизе буго. Щвараб гӀор гӀадин гьеб аскар цебе ине буго, жибго тушманасул хъалаялде гӀунтӀизегӀан.

11Гьебмехалъ къилбаялъул пачаясул ццин гьалаглъила. КӀудияб аскаргун вачӀарав шималалъул пачаясда данде рагъ гьабила ва гьесда тӀад бергьенлъи босила гьес. 12Гьеб аскар нахъе тӀуризабидал, къилбаялъул пачаясул гӀамал кӀодолъила. ГӀемераб халкъ гъурила гьес, амма гьесул бергьенлъи гӀемер халат бахъинаро. 13Шималалъул пачаяс цебе букӀаралдасаги къуватаб цоги аскар данде бакӀарила ва чанго соналдасан яргъид гӀуцӀараб рикӀкӀун хӀал кӀолареб аскаргун рагъде вахъина.

14Гьеб заманалда гӀемерисел къилбаялъул рахъалъул пачаясда данде рахъине руго. Дур халкъалъул цо-цо питначагӀиги рахъине руго гьесда данде, амма гьел къезе руго – гьеб ккезе буго дуда бихьараб балъголъи битӀараб букӀин тасдикълъизе. 15Шималалъул пача вачӀина ва сверун къараб шагьаралъул къадакье ганчӀилгун хӀатӀул нухги лъун#11:15 Доб заманалда шагьар гохӀккараб бакӀалда балаан. Шагьар сверун ккураз гьеб сверун къан бараб къадакье ганчӀилгун хӀатӀалъул гьабураб нух балаан, гьакибурдузда тӀад лъураб кӀудияб хӀосги тунк-тункизабун, гьеб къед борлъизелъун., гьеб шагьар кверде босила гьес. Гьесда данде чӀезе къуват хутӀиларо къилбаялъул рахъалъул; бищунго лебалал рагъухъабаздацин бажаризе гьечӀо данде чӀезе. 16Шималалъул пачаясин абуни, бокьа-бокьараб гьабизе буго, гьесда данде вахъине кӀолев чиги цониги вукӀине гьечӀо. Гьайбатаб Ракьалда щулалъила гьев, ва тӀолабго гьеб улка гьесул ихтияралда букӀина#11:16 Цебесеб эраялъул 199 соналъ Антиох Лъабабилев тӀубанго щулалъана ГӀизраилалъул ракьалда.. 17ТӀолабго жиндирго къуватги данде бакӀарун, кӀудияв кверщелчилъун вахъине къасд гьабила гьес. Гьелъие гӀоло гьес къилбаялъул рахъалъул пачагун ракълилаб къотӀи-къай гьабила ва, гьев чӀвазе къасдгун, гьесие жиндирго яс кьела. Амма гьеб гӀакса ккезе буго, гьесул мурад тӀубазе гьечӀо#11:17 Антиох Лъабабилес жиндирго яс Клеопатра ТӀоцеесей кьола Птолемей Ункъабилев Эпифание цебесеб эраялъул 194 с., амма Клеопатраца циндаго жиндирго росасул рахъ ккола.. 18Гьебмехалъ гьес ралъдал рагӀаллъабазда ругел ракьазде бер рехила ва гьенир ругел гӀемерисел шагьарал кверде росила, амма цо кинавалиго рагъул бетӀерас гьесул чӀухӀиялъул мугъ бекила ва гьесул хӀалихьалъи жиндаго данде буссинабила. 19Цинги гьев нахъе къала, жиндирго улкаялъул хъулбузухъе валагьун лъутила, амма нухда щапила ва араб бакӀ лъачӀого цевеса тӀагӀина.

20Гьесул ирсилас магъало бакӀаризе чагӀи ритӀила, жиндирго пачалихъ бечелъизабизе. Цодагьабго заманалдасан гьевги чӀвазе вуго, амма рагъулъ багьадур гӀадин гурев.

Аллагьасул халкъалъул тушман

21Гьесул бакӀалде вачӀине вуго кутакалда къадарав сурарав чи. Пачабазул гӀадаб къадруги гьесулъ букӀине гьечӀо. Гьев вачӀине вуго халкъ тохлъарабго, ва хӀилла-макрабаздалъун пачалъиялъул тахиде вахине вуго. 22Гьев чияс кӀудияб ва гучаб аскар щущахъ биххизабизе буго ва Бичасул кӀудияв кашишги чӀвазе вуго. 23ГӀемерисез гьесулгун ракълилаб къотӀи-къай гьабизе буго, амма гьесул рагъа-рачари хъачагъасул гӀадаб букӀина. ХӀакъикъаталда гьесул рахъ ккурал чагӀи дагьал гурони рукӀине гьечӀо, амма кӀудияб кверщеллъи щвезе буго гьесие. 24Тохлъукьего вачӀун тӀаде кӀанцӀизе вуго гьев бече-бечедал рихьун пачалихъазул ракьазде ва, я гьесул умумузда, я гьезулги умумузда гьабизе бажаричӀеб гьабизе буго гьес. Гьениса бикъа-хъамураб боцӀи-рикъзи гьес жиндирго рахъ ккуразда гьоркьоб бикьизе буго. Сверун къарал шагьарал щущахъ разаризе ургъизе вуго гьев, амма гьедин букӀине буго дагьаб заманаялъ.

25КӀудияб аскаргун жиндирго къуват-гучги данде бакӀарун, таваккалго къилбаялъул пачаясда данде рагъде вахъине вуго гьев. Гьединго кӀудияб ва кутакалда къуватаб аскаргун гьесда данде рагъде вахъина къилбаялъул пачаги, амма гьесда данде ургъарал хӀилла-макраби сабаблъун къезавила къилбаялъул пача. 26Гьесулгун квен гӀахьал гьабулел божарал чагӀи ургъила гьев чӀвазе; гьесул аскарги щущазабила ва рагъулъ гьесул гӀемерал рагъухъабиги чӀвала. 27Гьев кӀиявго пачаясул цо мурад букӀина: цоцазе кӀвараб зарал гьаби. Цо столалда нахъа гӀодор чӀела гьел, амма цоцазе гьерсал цӀалкӀила. Амма гьезул цонигиясе гьелъул хайир лъугьинаро, щайгурелъул, Аллагьас гьезие гӀажал хъван бугелъул, гьелъие заманги цӀан бугелъул. 28Шималалъул пача кӀудияб боцӀи-рикъзигун, гьениса жиндирго улкаялде тӀадвуссун нахъе ина. Амма Бичасул КъотӀиялъул халкъги гьезул динги гьесие рихараб букӀина. Гьединлъидал, нухда унелъул, гьев гьезие квешлъиялъе ургъила ва ургъарабги тӀубазабун, жиндирго улкаялде тӀадвуссина#11:28 Цебесеб эраялъул 169 соналъ Антиох Ункъабилес гӀемерал жугьутӀал чӀвана ва Иерусалималъул Мукъадасаб Рукъги хъамал гьабуна..

29ЦӀараб заманалда гьев цӀидасан къилбаялъул ракьазде тӀаде кӀанцӀила, амма гьаб нухалъ цебе гӀадин битӀккей букӀине гьечӀо гьесие. 30Киттималъул гумуз нух къазе буго гьесие, гьезукьа хӀинкъун гьевги нахъе къазе вуго. Жиндирго гьалагаб ццин гьес Мукъадасаб КъотӀиялде данде буссинабила, ва гьеб КъотӀиялъе хилиплъаразе хӀалае чӀела гьев.

31Гьес ритӀун рачӀарал рагъухъабазул къокъаялъ Иерусалималъул Мукъадасаб Рукъ хъублъизабила; къойилал къурбанал гьукъила ва къабихӀал чорокал ишал гьарила гьенир#11:31 Цебесеб эраялъул 167 соналъ Антиох Эпифаница Иерусалималъул Мукъадасаб Рукъ хъублъизабуна – гьениб Зевсил статуя эхетана ва болъон къурбаналъе хъуна. Гьединго балагье Дан. 9:27; 12:11.. 32Бадибе реццги гьабун, гьес КъотӀиялъе хилиплъаралщинал жиндирго рахъалде цӀала, амма ХӀакъав Аллагьасда божарал къуркьичӀого гьесда данде чӀела.

33ГӀакъилаз гӀемерал чагӀи кантӀизаризе руго, амма гьез жидецагоги гӀазаб-гӀакъуба баччизе ккезе буго: гьезул цоял чӀвазе руго, цоял чӀаго рухӀизе руго, лъабабилел асирлъуде ккезе руго, цогидазул мина-къайги боцӀи-рикъзиги хъамал гьабизе буго#11:33 ГӀакъилал – гьел ккола БЕТӀЕРГЬАНАСУЛ Къанун лъалел ва гьелъие мутӀигӀал чагӀи. Гьезул цоявлъун живго Даниялги ккола.. 34БукӀаниги, гьезие кумекги щвела, цинги гӀемерисез гьезул рахъалде рачӀараб ххвел гьабила. 35ГӀакъилазул цо-цоязги зиян-захӀмат баччизе ккезе буго, гьелъул хӀасилалда, цӀадулъ месед гӀадин, мунагьаздаса рацӀцӀалъизе рукӀине. Цинги Бичас цӀараб заманалда киналъего ахир букӀине буго#11:35 Гьаб бакӀалдаса нахъехун Аллагьас Даниялида бихьизабулеб буго хадубккун букӀине бугеб..

36Шималалъул пачаяс жиндиего бокьа-бокьараб гьабизе буго. Гьес аллагьзабаздасаги тӀадегӀанавлъун живго рикӀкӀине вуго ва ГӀизраилалъул Аллагьасда данде тӀасанворчӀун гаргадизе вуго. Бичасул ццидал лълъар тӀасан чвахараб къо бачӀинегӀан, гьабулебщиналъулъ гьесие икъбал букӀине буго (ккезе хъварабщинаб тӀубазе кколелъул). 37Цониги аллагь гьес малъихъ гьавиларо, я гьесул умумузул аллагьзаби, я руччабазе Хирияв#11:37 Руччабазе Хирияв – гьев ватизе бегьула Таммуз (Адонис) аллагь. Цоги-цоги магӀнабиги руго гьелъул., я цоги батӀияв бокьарав аллагь, щайгурелъул, кина-щиналдасаго тӀокӀавлъун ва тӀадегӀанавлъун живго рикӀкӀине вугелъул гьес. 38Шималалъул пачаяс, гьел аллагьзабазул бакӀалда, хъулбузул ва къуват-гучалъул аллагьасе бетӀер къулизе буго – гьесул умумузда лъалев вукӀинчӀев аллагьасе. Гьес гӀарац-меседалдалъун, хирияб жавгьар-якъуталдалъун ва бечедал сайгъатаздалъун кӀодо гьавизе вуго жиндирго аллагь. 39Гьев аллагьасе гӀибадатги гьабун, чанги щулияб хъала кверде босила гьес; жиндирго кверщелчилъи къабул гьабурал кутакалда кӀодо гьарила, чӀухӀби-хӀакимзабилъун тела ва гьезие ракьал кьела.

40Ахиралдаги къилбаялъул пача гьесда данде рагъде вахъина. Амма шималалъул пача, бахъараб кутакаб гьури гӀадин, гьесда тӀадречӀчӀила, чолгьакалгун чотӀахъабигун ва гӀемерал гумулгун. Щвараб гӀор гӀадин батӀи-батӀиял улкабазде кӀанцӀила гьев. 41Гьайбатаб Улкаялдеги щвела гьев ва гӀемераб халкъ чӀвала. ГӀицӀго Эдом, МогӀав ва аммониязул кӀудияб бутӀа борчӀила гьесул кверзукьа. 42ГӀемерал ракьал кверде росизе руго гьес, Мисриги борчӀизе гьечӀо гьеб къисматалдаса. 43ТӀолабго хазинаги хъамал гьабила гьес: меседгун гӀарац ва тӀолабго Мисриялъул бечелъи. Гьединго ливиялги кушиталги#11:43 Куш абураб некӀсияб пачалъиялда гьоркьоре кколаан Мисриялъул, Суданалъул ва Эфиопиялъул ракьазул цо-цо бутӀаби. гьесул хӀатӀикье ккезе руго. 44Амма бакътӀерхьул ва шималалъул рахъалдасан бачӀараб харбица гьесул рахӀат хвезабила ва гьалагаб ццидалъ, жеги гӀемерал халкъал гъуризе къасдгун, гьев гьениве вортила. 45Гьес жиндирго чадрал чӀвазе руго Мукъадасаб МегӀералда#11:45 Хирияб МегӀер – Иерусалим жинда тӀад бараб мегӀер. ва ралъадалда гьоркьоб бакӀалда. Амма ахирги гьев хвезе вуго – гьесие лъицаго кумекги гьабизе гьечӀо.

Currently Selected:

Даниял 11: АварАК

Highlight

Copy