YouVersion Logo
Search Icon

Чапарзабазул ишал 28

28
28 бетӀер
Павелги гьесда цадахъ рукӀаралги Мальтаялде рорчӀула
1Ракъдаде рорчӀидал, нижеда лъана гьеб чӀинкӀиллъиялда цӀар Мальта букӀин. 2Гьеб ракьалъул гӀадамаз гӀемерго лъикӀаб гьоболлъи гьабуна нижее. ЦӀад балеб букӀиндал, квачалелги рукӀана ниж. ГьебсагӀат цӀаялги ракун, хинлъизе цӀадухъе рачана гьез ниж. 3Къвал цӀун босун бачӀун, хьоп-хъарахъ цӀадабе балев вукӀарав Павелил кверда хӀанчӀана цӀадул бухӀиялдаса хӀинкъун къватӀибе шурун бачӀараб борхьица. 4Гьесул квералда далун чӀараб борохь бихьидал, гьел гӀадамаз цоцазда абулеб бугоан гьав чи чӀвадарухъан ватилилан. Бихьуларищила, ралъдалъ гъанкъиялдаса хвасарлъаниги, гьаниб ракъдадаги ритӀухълъи бергьун, гьанже гьев гӀумруялдаса махӀрумлъизехъин вугила. 5ХьвагӀун квергун, цӀадабе бортизабуна Павелица гьеб борохь. КигӀан дагьабниги унтиги лъачӀо гьесда.
6Мальтаялъул гӀадамазда ракӀалде ккана гьабсагӀат гьесул квер гьоролин яги гьев хун ракьалде щапун инин. Гьесие щиб кколебали тӀаса бер босичӀого ралагьун чӀун рукӀана гьел лъикӀалан заманаялъ. Амма щибниги лъугьинчӀо гьесие. Гьебмехалъ батӀияб пикру гьабуна гьел гӀадамаз: гьев аллагь вугилан тана гьез.
7Гьениб гӀагардаго букӀана гьеб чӀинкӀиллъиялъул сардар Публийил мина-мулк. Гьес ниж жиндихъего рачана ва лъабго къоялъ гьениб лъикӀаб гьоболлъи гьабуна. 8Публийил эмен ватана, бакъул унтиялъги риххалил унтиялъги тату хун, бусаде ккун. Гьесде ваккизе ун, Павелица дугӀа гьабуна ва тӀад квер лъун гьев сахлъизавуна. 9Гьелъул хабар рагӀун, чӀинкӀиллъиялда рукӀарал цогидал унтаралги рачӀана гьесухъе. Гьелги сахлъизаруна Павелица. 10Гьеб чӀинкӀиллъиялъул гӀадамаз цӀакъаб адаб-хӀурмат гьабуна нижер. Гамида рекӀун гьениса нахъе унеб мехалъ нухда босизе къваригӀара-тарабги кьуна гьез нижее.
Павел Мальтаялдаса Рималде уна
11Лъабго моцӀидасан рахана ниж гамиде. Хаселалъго гьениб хутӀараб Искандарияталъулаб гама букӀана гьеб, Диоскуразул – «КӀиго цадахъ гьаруразул» цӀарги лъураб. 12Сиракузиялде щун, гьенибги бана лъабго къо. 13Гьениса рахъун, Сицилиялъул рагӀалдасан лъедон, Региялде щвана. Цо къо гьениб бараб мехалъ, къилбаялъул гьури пуйзе байбихьидал, ралъдалъе бахъана нижер гама ва нахъисеб къоялъ Путеолиялде щвана. 14Гьенир ратарал вацазул гьари къабул гьабун цо анкь гьезда аскӀобги бана.
Гьале ниж Рималде щвана. 15Рималда ругел вацазда нижер хабар рагӀун, гьел данде рачӀана Аппийил Базаралде ва «Лъабго Петер» абулеб бакӀалдеги щвезегӀан. Гьел рихьараб мехалъ мугъзал чӀоло битӀана Павелил, Аллагьасе рецц гьабуна гьес.
Павел Рималде щола
16Рималда Павелие изну кьуна туснахъаздаса ватӀаго чӀезе, амма цо рагъухъан тана гьесда аскӀов хъаравуллъун.
17Лъабго къоялдасан гьес гьенир ругел жугьутӀазул бищунго къадру-къимат бугел гӀадамал данде ракӀарана. РачӀун гьел данделъидал, Павелица гьезда абуна:
– Я, вацал! Нилъер халкъалда яги нилъер умумузул гӀадатазда дандечӀун дица гьабураб кигӀан гьитӀинабниги квешлъи гьечӀониги, Иерусалималда дун туснахъалъув тӀамуна ва Рималдаса хӀакимзабазухъе кьуна. 18Гьез дир ишалъул цӀех-рех гьабуна, амма чӀвазе къотӀизе гӀураб гӀайиб-хатӀа батичӀелъул, нахъе виччазехъин вукӀана. 19ЖугьутӀал гьелда дандечӀедал, дун къайсарасухъе витӀейилан гьаризе ккана дица. Амма дирго халкъалда гӀайиб чӀвазе гуребха!
20Гьединлъидалин дица нужеда гьарараб гьанире данделъеян ва дица бицаралъухъ гӀенеккеян. ХӀакъикъаталдайин абуни, гьал рахсаца дун вухьун вукӀиналъе гӀиллалъун вуго Жив вачӀинилан Исраилил халкъалъул хьул бугев чи.
21Гьез Павелида абуна:
– Дур хӀакъалъулъ нижехъе Ягьудиялдаса цониги кагъатги бачӀинчӀо, гьениса вачӀарав цониги чияс дур рахъалъ квешаб хабарги бачӀинчӀо, квешаб рагӀи жинцагоги абичӀо. 22Амма нижее бокьун буго дур пикруялъухъ гӀенеккизе. Гьеб мазгьабалъул хӀакъалъулъни нижеда рагӀана, киса-кибего халкъ гьелда дандечӀун гаргадулеб бугилан.
23Цинги гьез къотӀи гьабуна цо пуланаб къоялъ гьесухъе рачӀине. ЦӀакъ гӀемерал гӀадамал рачӀана гьеб къоялъ Павелихъ гӀенеккизе. Рогьаралдаса рукӀкӀинегӀан Аллагьасул ПарччахӀлъиялъул хӀакъалъулъ бицана гьес гьезие. Мусал къануналдасаги Аварагзабазул ТӀухьдуздасаги мисалалги рачун, ГӀисал хӀакъалъулъ бицана. 24Цоял божана гьес бицаралда, цогидал божичӀо.
25– Илагьияб РухӀалъ малъун, Ишая аварагас цӀакъ битӀун абун буго нужер умумузул хӀакъалъулъ, – гьедин байбихьун Павелица гьездехун хитӀаб гьабураб мехалъ цоцалъ дагӀбадана, къацандана гьел ва рахъун къватӀире ана.
26Ишая аварагас гьадин абун бугилан бицана Павелица:
– «Гьеб халкъалъухъе ун, гьезда абе дуца: гӀиналда рагӀаниги, нужеда бичӀчӀиларо, бералда бихьаниги, нужеда лъаларо. 27Щайгурелъул гьаб халкъалъул ракӀалги согӀлъун руго, гӀундулги гъугълъун руго, бералги къанщун руго гьез. Гьез гьедин гьабулеб буго беразда канлъи бихьунгутӀизе, гӀундузда рагӀи рагӀунгутӀизе, рекӀелъе щибго босунгутӀизе, дица сахлъизаризе дихъе нахъруссунгутӀизе». 28Гьединлъидал нужеда лъан букӀа: цогидал халкъазе Аллагьас хвасарлъи битӀун бачӀун буго. Гьеле гьезда рагӀизе буго!
30Жинцаго мухьдахъ ккураб гьеб рокъоб тӀубараб кӀиго лъагӀел бана Павелица. ТӀаде рачӀаралщиналги къабул гьарулаан гьес. 31Лъилниги квекӀен гьечӀого ва расги хӀинкъичӀого бицунеб букӀана гьес Аллагьасул ПарччахӀлъиялъул хӀакъалъулъги ТӀадегӀанав МасихӀ ГӀисал хӀакъалъулъги.

Highlight

Share

Copy

None

Want to have your highlights saved across all your devices? Sign up or sign in