Чапарзабазул ишал 27

27 бетӀер

Гамидаги рекӀинавун, Павел Рималде витӀула

1Гамида рекӀун Италиялде ине нижер хӀукму ккедал, Павелги цогидал туснахъалги рачун витӀана къайсарасул полкалдаса нусилбетӀер Юлий. 2Ралъдал рагӀалда ругел Асиялъул шагьаразде ине къачӀан букӀараб Адрамиттиялъул гамида рекӀана ниж. Нижеда цадахъ вукӀана Фессалоникаялдаса македонияв Аристархги. 3Нахъисеб къоялъ ниж Сидоналде щвана. Павелида гурхӀун, Юлийица гьев жиндирго гьудулзабазухъе ине виччана, гьезги Павелие къваригӀара-тараб кьезе.

4Кутакалда данде пулеб гьури бахъиндал, гьениса нижер гама Кипралъул къилбаялъул рахъалдасан ун, 5Киликиялъул ва Памфилиялъул ракьалда бугеб ралъадги къотӀун, Ликиялъул шагьар Мираялде щвана. 6Гьениб нусилбетӀерасда батана Италиялде унеб Искандарияталъул гама. Гьелда рекӀинаруна гьес ниж. 7Чанго къоялъ аниги, кӀудияб манзилго нахъа тезе бажаричӀо нижер гамида ва хӀалицаго Книдалде рорчӀана. Кутакаб гьороца церехун риччалел рукӀинчӀелъул, Крит чӀинкӀиллъиялъул гьородаса цӀунараб рахъалдасан, Салмонаялъул мицӀиралда цебесан бачине ккана гама. 8ЧӀинкӀиллъиялъул рагӀалдасан лъедон, гӀемераб къоги бихьун, ахирги щвана Ласея шагьаралда аскӀоб бугеб ЛъикӀаб Гавань абулеб бакӀалде. 9Гьедин гӀезегӀан мех индал, ГурхӀиялъул къо абураб жугьутӀазул динияб байрам лъугӀараб заманги букӀун, хадурккун церехун лъедезе хӀинкъи бугеб хӀал лъугьана. 10Павелица абуна:

– Дихъ гӀенекке нуж! ТалихӀ къараб сапар бугин ккола дида гьаб. Гамие ва гьелда тӀад бугеб къайиялъе гуребги, гӀадамазегицин зарал ккеялда хӀинкъи буго.

11Амма нусилбетӀерас Павелил гьел рагӀаби гӀадахъ росичӀо, капитанасдаги гамил бетӀергьанасдаги божана гьев. 12Хаселалъго гьенир чӀезе санагӀалъи бугеб гавань букӀинчӀо гьеб. Гьединлъидал гӀемериселги разилъун, хӀукму гьабуна нахъеги ралъдалъе рахъине ва Крит чӀинкӀиллъиялъул къилбаялъулабги севералъулабги рахъалдасан бакътӀерхьуде балагьараб Финиксалъул гаваналде рорчӀуларищали хӀалбихьизе, цинги хаселги гьениб тӀамизе.

Ралъдада кутакаб гьури бахъуна

13Къилбаялдасахун тӀадагьаб гьури пуйзе байбихьараб мехалъ, гьезда ракӀалде ккана гьанже бугин бищунго санагӀатаб заманилан. Цинги якорьги тӀаде харцӀун, Криталъул рагӀалдасан лъедезе лъугьана нижер гама. 14-15Амма гӀемер заман иналдего, чӀинкӀиллъиялдасахун северияб бакъбаккул рахъалдасан гьалагаб гьури речӀчӀана гамида ва гьебгун къеркьезе къуват гӀечӀелъул, бергьараб гьороца жиндие бокьаралъубе бачун унеб букӀана нижер гама. 16Кавда абулеб цо гьитӀинабго чӀинкӀиллъиялъул гьури гьечӀеб рахъалдасан ана ниж. Гьениб хӀалицаго кӀвана гъанкъиялда хӀинкъи бугеб мехалъ пайда босулеб раса щула гьабизе. Гамида тӀаде босун, гъоркьан рачун квараз бухьана гьеб гамида. 17ТӀадгояб бакӀалда салулъ къачӀого рорчӀилародайилан хьулалъ, нижеца лъадалъе биччана гама лъеда тӀад чӀезабулеб хасаб алат. Гьебмехалъги гьороца цебехун хъамулеб букӀана нижер гама. 18Гьороца гама рахъ-рахъалде кьабезабулеб букӀиндал, нахъисеб къоялъ байбихьана гамида букӀараб къайи ралъдалъе базе. 19Лъабабилеб къоялъин абуни, гамие къваригӀунеб тӀагӀел-алатги рехана гьез жалго лъугьун ралъдалъе. 20Чанго къоялъ нижеда я бакъул гордо бихьичӀо, я цӀваби рихьичӀо. Гьуриги гьалаглъулебго гьалаглъулеб букӀана. Хвасарлъиялдаса хьулго къотӀана нижер. 21Чанго къо бана щивниги кваначӀелдаса нахъе. Гьебмехалъ тӀаде вахъун Павелица абуна:

– ГӀенекке, гӀадамал! Криталдаго чӀайилан абулеб букӀана дица нужеда, добмехалъ нуж дир рагӀухъ гӀенеккун рукӀаралани, гьаб балагьги бачӀинароан, гьадинаб кӀудияб заралги ккелароан. 22Гьанже дица нужеда гьарулеб буго къвакӀун чӀайилан. Нужер щивниги хвезе гьечӀо, амма гама щущан ина. 23Дица жинде иман лъолев ва лагълъи гьабулев Аллагьасул малаик вачӀун, нолъ гьес дида абуна: 24«Мун хӀинкъуге, Павел. Аллагьас рагӀи кьолеб буго мун къайсарасда цеве чӀезе вачинилан ва дуда цадахъ ругезеги дуе бокьараб ккезе бугилан». 25Гьединлъидал, дир гьудулзаби, нуж къвакӀун чӀа. Дун дирго Аллагьасда божула. Гьес дие илгьам гьабухъе ккезе буго кинабго. 26Цо кинаб бугониги чӀинкӀиллъиялде рехила нилъ карачалабаз.

27КъватӀире рахъун анцӀила ункъабилеб сордоялъ Адриатикаялда гьороца добе рехун, гьанибе рехун, кьабелеб букӀана нижер гама. Сордо бащалъулеб гӀужалъ гамихъабазда бичӀчӀана ракъдаде гӀагарлъулел рукӀин. 28Лъадал гъварилъи борцараб мехалъ, кӀикъого метр гурони батичӀо тӀиналде щвезе. Цо заманаялдасан нахъеги борциндал, лъеберго метралде ккун батана. 29Гама кьурабазда тункизе гурилан, ункъо якорь биччана тӀиналде ва сордо хехго рогьагиян гьарделел рукӀана. 30Гьебмехалъ гамихъабаз къасд гьабуна гамидаса лъутизе. Гамил цебесеб рахъалдасан якорь рехизе бокьун бугиланги абун, ралъдалъе раса биччазе лъугьана гьел. 31Амма Павелица нусилбетӀерасдаги рагъухъабаздаги абуна, гьел гамида чӀечӀони, нилъ хвасарлъуларилан. 32Гьебмехалъ рагъухъабаз къотӀун рехана раса гамидехун бухьун букӀарал кварал ва гьеб расаги лъадалъе бортун ана. 33ХъахӀлъи балеб мехалъ, Павелица киназдаго лъазабуна гьанжегӀаги кваназе ккелилан. Гьес абуна:

– Жакъа анцӀила ункъабилеб къо буго нуж кваначӀого чӀун. 34Гьединлъидал дица нужеда гьарулеб буго: цо щиб букӀаниги кванай, нужерго рухӀ хвасарлъиялъе, нужер бутӀруздаса цониги рас бортизе гьечӀебин.

35Гьединги абун, цо чед кодобе босана Павелица, цинги киназдаго рагӀун Аллагьасе реццги гьабун, бекунго бекун гьеб квине лъугьана. 36Киналго чӀинкьа-кӀитӀун, аваданлъун лъугьана, кваназе байбихьана. 37(Гамида тӀад вукӀана кинавниги кӀинусиялда лъабкъоялда анцӀила анлъго чи.) 38Кванан рахъараб мехалъ, гьез байбихьана гамида букӀараб ролъги лъадалъе бан, гьеб тӀадагьлъизабизе.

Гама щущан уна

39Рогьараб мехалъги лъачӀо гьезда щиб ракь гьебали батӀа бахъизе: ралъдал цо квачӀалъул рагӀалда бихьулеб букӀана салуца бацараб ракъдаллъи. Гама гьенибе бачине бажаруларищали хал гьабуна. 40Якорал, гамидаса ратӀа гьарун, ралъдалъе риччана. Руль щула гьабун букӀараб кварги къотӀун, гамил цебесеб рахъалда дугъ борхизабуна гьеб сагӀаталъго. Гьури жаниб багъулеб хӀалалъ гьеб дугъги рекъезабун, рагӀалдехун балагьун бачана гама. 41Амма тӀадгояб бакӀалде ккана. Гамил цебесеб рахъ салулъ къана, гьанже чӀахӀиял карачалабаз цоцалъа бахъулеб букӀана гамил нахъисеб рахъ. 42Гьениб рагъухъабаз хӀукму гьабуна туснахъал чӀван лъикӀилан, лъедон ун цонигияв гьезухъа ворчӀизе гурилан хӀинкъун. 43Амма Павелил гӀумру хвасар гьабизе бокьун, нусилбетӀерас гьел чӀвазе риччачӀо. Лъедезе лъалел чагӀи, тӀоцере ралъдалъе кӀанцӀун, ракъдаде рорчӀуларищали хал гьабеян буюрухъ кьуна гьес. 44Цогидазе амру гьабуна хъарщазда ва гамил тӀагӀел-алаталда хурхун жинда цадахъ рагӀалде рахъине хӀаракат бахъейилан. Гьедин киналго ракъдаде рорчӀана.

Currently Selected:

Чапарзабазул ишал 27: АварАК

Highlight

Copy