Чапарзабазул ишал 26
26
26 бетӀер
Павелица Агриппада цеве живго ритӀухъ гьавула
1– Гьанже бицеха дурго, – ян абуна Агриппаца Павелида.
Кверги борхун, Павелица байбихьана жиндаго гӀайиб гьечӀолъи чӀезабизе:
2– Я, Агриппа хан! Жакъа дица талихӀлъун рикӀкӀунеб буго жугьутӀаз диде гӀунтӀизабураб гӀайиб битӀараб гьечӀеблъи чӀезабизе дуда цеве кӀалъазе рес щвей. 3Хасго дуда цӀакъ лъикӀ лъала жугьутӀазул киналго гӀадаталги гьезул рукӀунел дагӀба-къецалъул суалалги. Гьединлъидал гьарулеб буго дица дуда сабруялда дихъ гӀенеккейилан. 4Киналго жугьутӀазда лъала гӀолохъанаб мехалдаса нахъего дирго халкъалда гьоркьобги хадуб Иерусалималдаги кинаб гӀумру дир букӀарабали. 5Гьезда цебего лъала дун фарисеяв вукӀаравлъи, ай нижер диналъул тӀалабал кьуричӀого тӀуразарулел рукӀараблъи. Гьединлъидал, гьезие бокьани, гьелъие нугӀлъиги гьабила гьез. 6Жакъа дун судалда цеве чӀезавун вуго Аллагьас нижер умумузе гьабун букӀараб къотӀи тӀубаялде хьул лъурав чи вугилан. 7Гьеб къотӀи тӀубазе букӀиналде хьул лъун къасиги къадги тӀадчӀун Аллагьасе гӀибадат гьабулеб буго нижер анцӀила кӀиго наслуялъ. Я дир хан, гьеле гьединаб хьул дирги бугилан гӀайиб гӀунтӀизабулеб буго диде жугьутӀаз. 8Аллагьас хварал тӀаде рахъинари букӀунеб-лъугьунеб жоцин гурилан абураб пикру щай нужелъ бугеб? 9Дидаги ракӀалде кколаан Назареталдаса ГӀисада дандечӀун гӀемераб жо гьабизе кколилан. 10Дица гьедин гьабизеги гьабуна Иерусалималда, чӀахӀиял кашишзабаз ихтиярги кьун, иман лъуразул гӀемерал гӀадамал туснахъалъуре рехана дица. Гьел чӀвалеб мехалъги, разияв вугилан квер борхана дица. 11Киналго синагогабазухъе ун, чанги тамихӀ гьабуна дица гьезие, гьеб дин какизе тӀамуна ва гьездехун букӀараб ццидал кутакалъ дун тӀамуна, цогидал шагьаразде унги, гьезие гӀазаб-гӀакъуба кьезе.
«Дида кӀвечӀо зобалаздасан гьабураб амру тӀубазабичӀого чӀезе»
12Гьеле гьедин чӀахӀиял кашишзабаз ихтиярги кьун, гьезул вакиллъун Дамаскалде унев вукӀана дун. 13Бакъул канлъиялдаса гӀемерго гвангъараб нур рещтӀана, хан, къалъул гӀужалда зобалаздасан дидеги дида цадахъ рукӀараздеги. 14Гьебмехалъ ниж киналго гӀодор ккана. Цинги дида рагӀана жугьутӀ мацӀалда кӀалъалеб гьаракь. «Шаул! Шаул! – абун ахӀана гьес. – Щай дуца дие гьаб гӀазаб-гӀакъуба кьолеб бугеб? ГӀебутӀа зар базе бажариларо духъа». 15«Мун щив, бетӀерчӀахъад?» – абун гьикъана дица. «Дун вуго дуца гӀазаб-гӀакъуба кьолеб бугев ГӀиса, – ян абуна ТӀадегӀанас. – 16ТӀаде вахъун, вахъун чӀа гьанже! Дун духъе рещтӀана, мун дие хъулухъ гьабизе тӀамизе, дуда бихьарабги дуда дица бихьизабизе бугебги бицине тӀамизе. 17Дица мун дурго халкъалдаса хвасар гьавила ва мун дица жидехъе витӀизе вугел цогидал халкъаздасаги хвасар гьавила. 18Дуца гьезул беразда канлъи бихьизабила, бецӀлъиялдаса канлъуде рачина, илбисалъул къуваталдаса рорчӀун Аллагьасде руссинарила ва, мунагьал чурун, гьезиеги, дида божиялъ жал рацӀцӀалъарал чагӀазего гӀадин, бутӀа насиблъизе бугиланги лъазабила».
19Гьединлъидал, Агриппа хан, зобалаздасан илгьам лъугьун дие гьабураб амру тӀубазабичӀого чӀечӀо дун. 20Цин Дамаскалда ругезда, цинги Иерусалималда ругезда ва тӀолабго Ягьудиялъул улкаялда, гьединго цогидал халкъазул гӀадамаздаги лъазабуна дица кантӀун Аллагьасде руссаян ва нужер тавбу биххиларедухъ хьвадеян. 21Гьеб сабаблъунин дун Мукъадасаб Рокъов жугьутӀаз тӀад речӀчӀун ккурав ва чӀвазехъин вукӀарав. 22Аллагьасул квербакъиялдалъун къечӀо дун гьаб жакъа къоялде щвезегӀан. ГӀисиналгунги чӀахӀиялгунги гара-чӀварулаго, дица щибниги бицинчӀо Мусацаги цогидал аварагзабазги хадуб ккезе бугелъул хӀакъалъулъ цебеккунго бихьизабун букӀаралдаса батӀияб жо. 23Гьез абун букӀана МасихӀ ГӀисае гӀазаб-гӀакъуба кьезе бугилан, хваразда гьоркьоса тӀоцеве тӀаде вахъинеги вугилан ва нижер халкъалдаги цогидал халкъаздаги Нур бихьизе бугилан.
24Гьедин живго вацӀцӀад гьавун кӀалъалев Павел вугеб мехалъ, Фест гьесде ахӀана:
– Павел, мун гӀадаллъун вуго. ГӀелмуялъул кутакалъ бетӀер сверизабун буго дур! – абун.
25– Дун гӀадаллъун гьечӀо, бетерчӀахъаяв Фест, – абун жаваб кьуна гьесие Павелица. – Гьаб дир рагӀи битӀарабги буго, цӀодорабги буго! 26Агриппа ханасда цӀакъ лъикӀ лъалелъул гьадинал ишазул хӀакъикъат, хӀинкъичӀого гьесдехун кӀалъалев вуго дун. Гьаб ишалъулъ щибго балъгояб жо хутӀун батиларо гьесие, бецӀаб бокӀнилъ гурелъул гьеб кинабго ккараб. 27Мун аварагзабазда божулевищ, Агриппа хан? Дидани лъала мун божулевлъи.
28Гьебмехалъ Агриппаца Павелида абуна:
– Дун христианавлъун лъугьинави гьедигӀан бигьаяб ишиланищ дуда ккараб?
Павелица абуна:
29– Бигьа букӀаниги, захӀмат букӀаниги, дица Аллагьасда гьарилаан цо мун гуревги, гьанир дихъ гӀенеккун ругел киналго гӀадамалги дун гӀадиналлъун лъугьагийилан. Рахсаца вухь-вухьарав туснахълъун гуревха!
30Гьебмехалъ ханги, гьесдаго цадахъ сардарги, Береникаги, гьенир рукӀарал гӀадамалги тӀаде рахъун къватӀире ана.
31– ЧӀвазе къотӀизе яги туснахъалъув тӀамизе гӀураб гӀайиб гьечӀо гьадав чиясда, – ян абулеб букӀана гьез цоцазда.
32Цинги Агриппаца Фестида абуна:
– ГьабсагӀатго туснахъалъуса къватӀиве виччазе бегьилаан дов, къайсарасул суд дос тӀалаб гьабулеб гьечӀебани.
Currently Selected:
Чапарзабазул ишал 26: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
