2 Пачаби 9
9
Давуд ва Мефи-Бошет
1Цо къоялъ Давудица цӀехана: «Шаулил хъизаналъул цониги чи нахъе хутӀун гьечӀищ, дица Ионатание гӀоло гьесие лъикӀлъи гьабилаан букӀараб».
2Цива абурав цо хъулухъчи вукӀана Шаулил къавулъ. Гьев гьесда цеве вачун вачӀиндал, Давудица цӀехана: «Мун Цивайищ кколев?» – ин.
«У, дун вуго, дур лагъ», – ин жаваб кьуна гьес.
3Пачаяс цӀехана: «Шаулил хъизаналъул цониги чӀаго хутӀарав чиго гьечӀищ? Аллагьасе гӀоло гьесие лъикӀлъи гьабилаан дица букӀараб».
Циваца абуна: «Ионатанил цо вас вуго, кӀиябго бохги рекъав», – ин.
4Кив гьев вугевин пачаяс цӀехедал, Циваца абуна: «Ло-Деваралда, Аммиэлил вас Махирил минаялъув вуго», – ян.
5Давудица Ло-Деваралде Аммиэлил вас Махирил минаялъуса гьев вачине чагӀи ритӀана. 6Шаулил вас Ионатанил вас Мефи-Бошет Давудихъе вачун вачӀиндал, гьев гӀодоб гьумер цун пачаясе къулана.
«Мефи-Бошет!» – ин ахӀана Давудица.
«Гьале дун, дур лагъ», – ин жаваб гьабуна гьес.
7«Мун хӀинкъуге! Дица дур тӀалаб-агъаз гьабила гьанже, дур эмен Ионатание гӀоло. Дур кӀудияв эмен Шаулил рукӀаралщинал ракьалги духъе тӀадруссинарила. Мунин абуни, кидаго дида цадахъ квана-гьекъела».
8Пачаясе бетӀерги къулун, Мефи-Бошетица абуна: «Хвараб гьой гӀадав дун щив чи кколев, дуца гьединаб лъикӀлъи дие гьабизе ккани?»
9Шаулил вукӀарав хъулухъчи Циваги ахӀун, Давудица гьесда абуна:
«Дур хважаин Шаулил ва гьесул гӀагарлъиялъул букӀарабщинаб боцӀи-рикъзи дица гьесул васасул васасе кьолеб буго. 10Рачун дурго васалгун ва хӀалтӀухъабигун, дуца гьесул ракьал рекьизе ккола, дур хважаинасул васасул къавулъ рикъзи букӀине. Живго Мефи-Бошет абуни кидаго дунгун квен гӀахьал гьабулезда гьоркьов вукӀине вуго». (Цивал анцӀила щуго васги къого лагъги рукӀана.)
11Циваца пачаясда абуна: «Дица, дур лагъас, дир бетӀергьан пачаясул буюрухъалда рекъон гьабила кинабго», – ян.
Мефи-Бошет, пачаясул васазул цояв гӀадин, Давудида цадахъ кваналаан гьелдаса нахъе.
12Мефи-Бошетил вукӀана цо гьитӀинав вас; гьесда цӀар Мика букӀана. Цивал хъизан-къаялъул киналго чагӀи Мефи-Бошетида цере хӀалтӀулаан. 13Мефи-Бошет Иерусалималде вахъана, щайгурелъул гьев пачагун квен гӀахьал гьабулезда гьоркьове вачун вукӀиндал. КӀиябго бохалда рекъавги вукӀана гьев.
Currently Selected:
2 Пачаби 9: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
