2 Пачаби 8

Давудил бергьенлъаби

1Гьелдаса хадуб Давудица, тӀаде кӀанцӀун, пилистимал гъурана, гьел жиндирго кверщаликье рачана ва пилистимазул тахшагьарги кверде босана. 2Гьединго МогӀавги кверде босана Давудица. Гьес гьезул рагъухъаби кьер гьабун ракьалда гӀодор регизаруна ва, кӀигояв чӀван лъабабилев чӀаго тун гьаризе къотӀана. Гьедин Давудие мутӀигӀлъана могӀавиял ва гьел гьесие ясахъ кьезе тӀамуна.

3Ефраталъул гӀурумухъ кверде босизе унев вукӀарав Цовагьалъул пача Гьададезерил боги гъурана Давудица. Гьададезер Реховил вас кколаан. 4Давудица гьесул азаралда анкьнусго чотӀахъанги къоазарго лъелав рагъухъанги кверде восана. Нусго чолгьакие гӀурал чуял нахъе тун, хутӀарал гьаказда ралел чуязул хӀатӀил щукӀдул къотӀана Давудица.

5Цовагьалъул пача Гьададезерие кумекалъе рачӀарал Сириялъул рагъухъабазулги къоло кӀиазарго чи чӀвана гьес. 6Давудица жиндирго рагъухъабазул цо-цо къокъаби Сириялда бугеб Дамаскалде рахъинаруна. Сириял гьесул лагъзаллъун ккана ва гьес гьезда тӀадги ясахъ лъуна. Киве аниги, БЕТӀЕРГЬАНАС Давудие бергьенлъи кьолеб букӀана.

7Гьададезерил чукъбузул рукӀарал меседил хъалхъанал Давудица Иерусалималде росун рачӀана. 8Давудица гӀемераб мазгарги босана Гьададезерил шагьарал Бетахалдаса ва Беротаялдаса.

9Давудица Гьададезерил тӀолабго аскар гъурун бугин рагӀидал, Хаматалъул пача Тойица 10жиндирго вас Ёрам витӀана Давудихъе сайгъат-саламгун, Гьададезерида тӀад гьес босараб бергьенлъи баркун. Тойил кидаго рагъ букӀана Гьададезерилгун. Давудие сайгъаталъе гӀарцул, меседил ва мазгарул тӀагӀелал росун рачӀана Ёрамица.

11Давуд пачаяс БЕТӀЕРГЬАНАСЕ ратӀа гьаруна гьел тӀагӀелал, жиндиего мутӀигӀ гьарурал цогидал халкъазухъа бахъараб месед-гӀарацгун цадахъ. 12Гьел халкъалги кколаан эдомиял, могӀавиял, аммониял, пилистимал ва амалекиял. Реховил вас Цовагьалъул пача Гьададезерихъа бахъараб давлаги БетӀергьанасе батӀа гьабуна гьес.

13ЦӀамгӀалаб расалъиялда анцӀила микьго эдомияв чӀван хадуб, Давудил цӀар сверухълъиялдаго машгьурлъана. 14Эдомалъул ракьалда киса-кирего жиндирго рагъухъабазул къокъаби чӀезаруна Давудица, ва тӀолалго эдомиял гьесул лагъзаллъун ккана. Киве аниги Давудие БЕТӀЕРГЬАНАС бергьенлъи кьолеб букӀана.

Давудил тӀадчагӀи

15ТӀолабго ГӀизраилалда тӀад пачалъун вукӀана Давуд; ритӀухъаб хъулухъ гьабун нухда бачунеб букӀана гьес жиндирго халкъ. 16Церуягьил вас Иоав вукӀана гьесул аскаразул бетӀерлъун; АхӀилудил вас Егьошафат – тарихчилъун; 17АхӀитувил вас Цадок ва Ахимелехил вас Авиатар – кашишзабилъун; Сераягь – хъвадарухъанлъун; 18ЕгьоядагӀил вас Бенаягь – керетиязул ва пелетиязул#8:18 Керетиял ва пелетиял рукӀун ратизе бегьула къватӀиб ракьалдаса гӀарац кьун ккурал пачаясул рорчӀухъаби. цевехъанлъун. Давудил васалги аслиял тӀадчагӀилъун рукӀана.

Currently Selected:

2 Пачаби 8: АварАК

Highlight

Copy