2 Пачаби 3

1Давудилги Шаулилги гӀагарлъиялда гьоркьоб халат бахъараб тушманлъи ккана. Давудил тӀадеялдаса тӀаде къуват цӀикӀкӀунеб букӀана, Шаулил гӀагарлъиялъулин абуни – дагьлъулеб букӀана.

Давудил васал

2Давудие Хевроналда анлъго вас гьавуна:

Изреелияй АхӀиноамие гьавуна гьесул тӀоцевесев вас, гьесда цӀарги Амнон букӀана;

3кӀиабилев вас Килеав гьавуна Кармилалдаса Навалида йикӀарай Авигайлие;

Давудил лъабабилев вас – Авессалом, гьесул эбелалда цӀар букӀана Мааха – Гешуралъул пача Талмайил яс кколаан гьей;

4ункъабилев вас – Хагитица гьавурав Адонияв;

щуабилев – Авиталица гьавурав Шефатиягь;

5анлъабилев – Давудил лъади Эглае гьавурав Итреам. Хевроналда вукӀаго гьавуна Давудие гьев анлъавго вас.

Авнерица Давудил рахъ кквей

6Шаулилги Давудилги гӀагарлъиялда гьоркьоб тушманлъи букӀарабгӀан заманалъ Шаулилазда гьоркьоб Авнерил къуват цӀикӀкӀана. 7Шаулил гъараваш-чӀужу йикӀана Рицпа абулей, гьейги – Аягьил яс. Цо къоялъ Авнерида кӀал гьикъун кӀалъана Иш-Бошет:

«Дир инсуе йикӀарай гъаравашалъухъе щай мун хьвадулев?»

8Авнерил кутакалда ццин бахъана Иш-Бошетил рагӀуда ва гьес Иш-Бошетида абуна:

«КъватӀул таращиланищ дуда дун ккарав? Дица ягьудиязул рахъ ккун бугищ? Дур эмен Шаулил хъизан-къаялъе, гьесул вацазе ва гьудул-гьалмагълъиялъе ритӀухълъи цӀунун чӀана дун, мунги Давудихъе кверде ккезе виччачӀо дица! Гьанже цо кинаялиго чӀужугӀадан сабаблъун диде гӀайиб гьабун кӀалъалев вугогури мун! 9Аллагьас балагьалъукье ккезавеги дун, БЕТӀЕРГЬАНАС Давудие гьедараб гьаялда рекъон гьабичӀони гьанже дица: 10Шаулил наслуялъухъа пачалъиги нахъе бахъичӀони ва Давудил тахги – Шималияб рахъалда Даналдаса бахъараб къилбаялъул рахъалда Беэр-Шеваялде щвезегӀан – ГӀизраилалдаги Ягьудиялдаги тӀад щула гьабичӀони».

11ХӀинкъиялъ Авнерида данде цо рагӀи абизе кӀвечӀо Иш-Бошетида.

12Цинги Авнерица вакилзаби ритӀана Давудихъе гьадинаб хабаргун: «Гьаб ракьалъул хважаин цо вукӀине ккеларищ? Диргун къотӀи-къай гьабе, цинги ГӀизраилалъул тӀолабго халкъ дудехун буссинабизе квербакъи гьабила дица».

13Давудица гьадинаб жаваб битӀана гьесухъе: «ЛъикӀ буго, дица дургун къотӀи-къай гьабила. Амма цо иш тӀалаб гьабила дица дудасан: цин Шаулил яс Михала щвезае дихъе – гьелдаса хадуб гурони мун дида цеве ваккуге».

14Шаулил вас Иш-Бошетихъеги чапарзаби ритӀана Давудица гьадинаб тӀалабгун: «Нусго пилистимавги чӀван дие щварай дир лъади Михала нахъе кье». 15Гьебмехалда Иш-Бошетица чиги витӀун гьей гьелъул рос, Лаишил вас, Палтиилидаса нахъе ячана. 16Амма гьелъул рос тӀолаго магӀугун Бахурималде щвезегӀан гьелда хадув вилълъана.

Гьениб Авнерица: «Дурго рокъове тӀадвусса», – янги абун, гьев нахъе инавуна. Палтиил рокъове тӀадвуссана.

17Цинги Авнер ГӀизраилалъул кӀудиял чагӀазда кӀалъана:

«Цебе нужеего бокьун букӀана Давуд нужеда тӀад пачалъун вахъине. 18Гьанже тӀубазабе гьеб иш! БЕТӀЕРГЬАНАС Давудие рагӀи кьун букӀиндал: „Дир лагъ Давудидаса пайда босила Дица пилистимаздаса ва тӀолго тушбабаздаса Дирго халкъ эркен гьабизе“, – янги абун».

19Гьединго буняминиялгунги кӀалъана Авнер. Хадуб ГӀизраилги тӀолабго Буняминил къавмги тӀад рекъон гьабураб хӀукму гьес Хевроналдеги ун Давудида бицана. 20Авнерги гьесул къого чиги Давудихъе Хевроналде рачӀиндал, Давудица гьезие лъикӀаб гьоболлъи гьабуна. 21Авнерица Давудида абуна:

«Изну кье дие гьабсагӀатго ун тӀолабго ГӀизраил духъе, дир пачаясухъе, бакӀаризе. Цинги гьез дургун къотӀи-къай гьабила ва дуцаги дурго рекӀее бокьухъе пачалъи гьабила гьезда тӀад».

Давудица Авнер виччан тана ва гьев парахатго нухда ана.

Авнер чӀвай

22Гьебго заманалда Давудил рагъухъабиги Иоавги бечедаб давлагун чабхъадаса тӀадруссана. Авнер, гьел рачӀиналде, Хевроналдаса нахъе ун вукӀана, щайгурелъул Давудица берцинго нухда регӀун вукӀиндал гьев. 23Рагъухъабигун цадахъ Иоав тӀадвуссиндал, гьесда бицана Нерил вас Авнер вачӀун вукӀанин пачаясухъе, пачаяс виччан танин ва гьев сах-саламатго нухда анин.

24Пачаясухъе вилълъун, Иоавица гьесда абуна:

«Дуца гьабураб жо щиб? Духъе Авнер вачӀун вукӀун рагӀулагури! Щай дуца гьев нахъе виччарав? 25Дуда лъалагури Нерил вас Авнер! Мун махсароде кквезе, дуца гьабулебщиналъул гъоркьанго хал-шал гьабизе ва мун хьвадулелщинал бакӀал лъазаризе вачӀун вукӀарав чийин дов».

26Пачаясда аскӀоса къватӀиве вилълъаравго, Иоавица Давудидаса балъго Авнерида хадур чагӀи ритӀана ва гьез, Сирагьил лъадал гъуялъухъе щун ватун, тӀадвуссинавуна гьев. Амма Давудида гьеб лъалеб букӀинчӀо. 27Нахъвуссун Хевроналде щваравго, Иоавица, цо балъголъи бицине къваригӀараб ххвелги гьабун, Авнер шагьаралъул кавабазда жанивехун вачана. Гьенив гьес, жиндирго вац Асаилил бидул къисас босун, чохьолъ ханжарги къазабун чӀвана Авнер.

Авнерида хадуб Давудил магӀу

28Гьеб ккараб жоялъул хабар рагӀидал Давудица абуна:

«БЕТӀЕРГЬАНАСДА лъала Нерил вас Авнер чӀваялъул щибго гӀайиб я дида, я дир пачалъиялда тӀад гьечӀеблъи. 29Гьесул гӀодобе тӀураб биялъул хӀакъ Иоавил ботӀроде ва гьесул хъизан-къаялда тӀаде ккаги. Иоавил хъизамалда жанив кидаго камугеги я талав бахъарав, я барасалъ унтарав, я рекъав, я хвалчадалъун гӀажал насиблъарав, я чед-хинкӀ камурав чи».

30Иоавицаги, гьесул вац Авишайицаги Авнер чӀвана, Гаваоналда ккараб рагъулъ гьес гьезул вац Асаил чӀваралъухъ.

31Давудица Иоавида ва киналго гьесда цадахъ рукӀарал рагъухъабазда абуна: «Бихъун тӀад бугеб ретӀелгун хӀебтил гӀабаби ретӀе; Авнерил жаназаялда цере рилълъун магӀу гьабе», – ян.

Живго Давуд пачаги вилълъана Авнерил жаназаялда хадув. 32Авнер хабалъ вукъидал, гьесул хабаде къулун гӀек-гӀекиялда гӀодана Давуд; тӀолабго халкъалъги кӀудияб магӀу бахъана гьениб. 33Пачаяс гьадинаб магӀу гьабуна Авнерида хадуб:

«ХӀалихьатида рекъараб хвелалъищ Авнер хвезе кколев вукӀарав?

34Я дур кверал рухьун рукӀинчӀо,

Я хӀатӀазда рахсал ран рукӀинчӀо.

Хъачагъазул квердасан хвана мун!»

Гьебмехалъ тӀолабго халкъ цӀи-цӀи гьабун гӀодана Авнерида хадуб.

35Къадемех букӀана жеги; гӀемерав чи кӀалъана Давудида кваназе вахъаян. Амма Давудица гьедун абуна: «Аллагьас балагьалъукье ккезавеги дун, маркӀачӀумех щвезегӀан тӀагӀамалъул цо лукъма дица кӀалдиб лъуни!» – ян.

36ТӀолабго халкъалъ пикру гьабуна гьелъул ва киназулго ракӀ рекъана пачаясда; гьес гьабурабщиналда гьезул ракӀ рекъолеб букӀана. 37ТӀолабго ГӀизраилалда ва кинабго халкъалда бичӀчӀана гьеб къоялъ Нерил вас Авнер хвей Давудил гӀайибалдалъун ккечӀолъи. 38Пачаяс жиндирго чагӀазда абуна:

«Гучав цевехъан ва кӀудияв инсан жакъа ГӀизраилалда щапаравлъи бичӀчӀулеб гьечӀищ нужеда? 39Дирги, БЕТӀЕРГЬАНАС тӀаса вищарав пачалъун вукӀаниги, жеги гӀураб къуват-гуч гьечӀо. Церуягьил васазулин абуни къуват диралдасаги цӀикӀкӀараб буго. Гьезул квешлъиялда рекъараб гьабеги БетӀергьанас гьезие!»

Currently Selected:

2 Пачаби 3: АварАК

Highlight

Copy