2 Пачаби 2

Давуд Ягьудиялъул пачалъун вахъин

1Цодагьаб заман ун хадуб Давудица БЕТӀЕРГЬАНАСДЕ вуссун дугӀа гьабун, Гьесда цӀехана: «Я дир БЕТӀЕРГЬАН, ягьудиязул кинаб букӀаниги шагьаралде ине бегьиладай дун?»

«А», – ян абуна БетӀергьанас.

Цинги Давудица цӀехана: «Киве инев?»

Гьес жаваб кьуна: «Хевроналде», – ян.

2КӀияйго лъадиги цадахъ ячун – Изреелалдаса АхӀиноам ва Кармилалдаса Навалида йикӀарай Авигайл – Давуд гьениве гочана. 3Жив-живасул хъизан-лъималгун цадахъ жиндирго чагӀиги рачана Давудица ва Хевроналда чӀел гьабуна. 4Ягьудал къавмалъул чагӀи рачӀана гьенире ва Давуд Ягьудал къавмалда тӀад пачалъун тасдикъ гьавун, гьесда зайтуналъул нах бахана.

ГилгӀадалда бугеб Иавеш шагьаралъул жамагӀаталъ Шаулил жаназа хабалъ букъанин абун хабар Давудихъе щведал, 5гьес вакилзаби ритӀана ГилгӀадалъул Иавешалъул жамагӀаталъухъе хадусеб каламгун:

«БЕТӀЕРГЬАНАС баракат лъеги нужеда, нужер пача Шаулил гьедин адаб-хӀурматги гьабун, гьесул жаназа хабалъ букъаралъухъ. 6Гьанже нужееги БЕТӀЕРГЬАНАСУЛ гурхӀел-цӀоб гӀатӀилъаги! Дицаги нужее кӀвараб лъикӀлъи гьабила гьеб иш нужеца гьабуралъухъ. 7Гьанже нуж щулалъе ва къвакӀун чӀа. Нужер пача Шаул хвана, амма Ягьудал къавмалъ жиндаго тӀад пачалъун дун тасдикъ гьавун вуго».

Иш-Бошет ГӀизраилалъул пачалъун вахъин

8Амма Нерил вас, Шаулил аскаралъул бетӀер, Авнерица Шаулил вас Иш-Бошет вачун вачӀана Маханаималде, 9ва гьес гьев ГилгӀадалда, Ашуриялда, Ефраималда, Изреелалда, Буняминида ва тӀолабго ГӀизраилалда тӀад пачалъун гьавуна.

10Шаулил вас Иш-Бошетица кӀикъого сон бан букӀана ГӀизраилалъул пачалъун вахъараб мехалъ ва кӀиго соналъ пачалъи гьабуна гьес. ГӀицӀго цохӀо Ягьудал къавмалъ гурони Давудил рахъ кквечӀо. 11Кинабниги анкьго лъагӀелгун анлъго моцӀалъ пачалъи гьабуна Давудица Ягьудал къавмалда тӀад Хевроналда.

Давудида ва Шаулил гӀагарлъиялда гьоркьоб кьал байбихьи

12Цо къоялъ Нерил вас Авнер вачӀана Маханаималдаса Гаваоналде Шаулил вас Иш-Бошетил чукъбигун цадахъ. 13Давудил чукъбигун цадахъ Церуягьил вас Иоавги вахъана гьезда данде ва гьел Гаваоналъул хӀорихъ дандчӀвана. Цоял хӀорил гьаб рахъалда, цогидал хӀорил добаб рахъалда чӀана.

14Цинги Авнер кӀалъана Иоавида: «Риччанте нилъеда цере нилъер гӀолохъаби цоцалъ рагъизе!» – ян.

Иоавица жаваб гьабуна: «ЛъикӀ буго! Риччанте рагъизе».

15Шаулил вас Иш-Бошетил рахъалъ анцӀила кӀиго буняминияв ва Давудил рахъалъги анцӀила кӀиго чи цоцада данде рахъана. 16Гьел цоцалъ речӀчӀана ва жив-живас дандиясул бетӀерги ккун хьолболъ ханжар къазабуна; къоло ункъавго чи цоцаца чӀван цадахъ гӀодор лъуна. Гьелдаса хадуб, Гаваоналда бугеб Хелкат Гьацурим#2:16 Хелкат Гьацурим – Хунжрузул авлахъ абураб магӀна ккола гьелъул. абун цӀар тана гьеб бакӀалда.

17ГӀасияб рагъ ккана гьениб доб къоялъ, ва Давудил чагӀаз Авнерги гьесда цадахъ рукӀарал гӀизраилалги щущахъ риххизаруна.

18Церуягьил лъабго вас вукӀана гьенив: Иоав, Авишай ва Асаил. Асаил цӀакъ хӀетӀ гӀедерав чи вукӀана. ГӀалхул чан гӀадин векерулаан гьев. 19Авнерида хадув вортана Асаил ва, дове-гъове сверичӀого, гьесул лъалкӀккун векерана. 20Нахъехунги валагьун, мунищ Асаилилан цӀехана Авнерица. Дун вугоян жаваб кьуна гьес.

21Цинги Авнерица абуна: «Я кваранаб, я квегӀаб рахъалде вуссун, цоги чи валагье дуего ва гьесул ярагъ-къолденги босе давлаялъе», – ян.

Амма Асаилица гьеб рагӀи къабул гьабичӀо ва гьесда нахъаса вичӀичӀо. 22Нахъеги абуна Авнерица: «ТӀаса вичӀа! Мунги чӀван дур вац Иоавил бадиве кин дун балагьилев?» – ин.

23Амма Асаил гьесда нахъаса вичӀичӀо. Гьебмехалъ, кьурун нахъехунги вуссун, Авнерица бахъун хеч къазабуна гьесул чохьолъ; хеч гьесул мугъалда нахъасан баккана ва гьев, гӀодовги речӀчӀун, гьеб бакӀалдаго хвана. Асаил чӀвараб бакӀалдасан уневщинав рагъухъан гьесул жаназаялда аскӀов лъалхъулев вукӀана.

24Иоавги Авишайги Авнерида хадур лъугьана. БакътӀерхьуда, Гаваоналъул гӀалхуде унеб нухда, Гиахалда дандбитӀун бугеб Аммагь гохӀде щвана гьел. 25Буняминиял данделъана Авнерида сверухъ; рагъулаб къокъаги гӀуцӀун гьел цо гохӀил тӀогьиги ккун чӀана.

26Цинги Авнерица Иоавиде ахӀана: «Абадиялъго рагъ-кьалалдайищ нилъ рукӀинел? Дуда лъалагури гьелъул хӀасил кьогӀаб гурони кколареблъи? Кида дуца дурго чагӀазда абизе бугеб нужерго вацал жалго теян?»

27Гьебмехалъ Иоавица абуна: «ХӀакъав Аллагьасул цӀаралхӀа! Дуца гьеб рагӀи абичӀебани, сордо рогьинегӀан гӀодоре руссине рукӀинчӀо дир рагъухъаби»#2:27 Ялъуни, мун радалго гьедин кӀалъаравани, рагъухъаби жидерго вацазда хадур лъугьинароан..

28Иоавица суралъубе пуна ва рагъ къотӀизабуна. ТӀокӀалъ гьел гӀизраилазда хадур лъугьинчӀо ва гьелгун рагъичӀо.

29Авнерги гьесул рагъухъабиги тӀубараб сордоялъ рилълъана Иорданалъул расалъи къотӀун ва, Иордан гӀорги бахун, къадемех гӀагарлъулеб заманалда тӀадруссун Маханаималде щвана. 30Авнерилгун рагъ къотӀизабун хадуб, Иоавица тӀолалго рагъухъаби ракӀарана, ва, Асаил рикӀкӀинчӀого, гьезда гьоркьоса анцӀила ичӀго чи камун ватана. 31Давудил рагъухъабазин абуни, буняминиязул ва Авнерил чагӀазул лъабнусиялда лъабкъого чи чӀвана гьеб къоялъ. 32Гьез Асаилил жаназа Бет-Лехемалда бугеб гьесул умумузул хабалалъ букъана. Иоав жиндирго чагӀигун гьеб сордоялъго нухде вахъана ва рогьалил гӀужалъ Хевроналде тӀадвуссана.

Currently Selected:

2 Пачаби 2: АварАК

Highlight

Copy