2 Пачаби 22
22
Давудица ахӀараб реццалъул назму
1Шаулил квердаса ва тӀолалго тушбабаздаса жив хвасар гьавиялда хурхун БЕТӀЕРГЬАНАСЕ назму ахӀана Давудица.
2Давудица абуна:
«БЕТӀЕРГЬАН – дир кьуру,
Дир щулияб хъала, ва дун хвасар гьавулевги Гьев;
3Дир Аллагь – дир щулияб кьуру,
Гьенив вахчула дун.
Гьев – дир хъалхъанги, дир хвасарлъиялъул лълъарги,
Дир хъалаги, дун вахчулеб щулалъиги ва дир Тархъанчиги.
Дуца дун зулмуялдаса эркен гьавуна.
4Реццалъе мустахӀикъав БЕТӀЕРГЬАНАСДЕ бала дица ахӀи
Ва тушбабаздаса хвасарлъула.
5Хвалил карачелаз сверун ккуна дун,
ГӀажалалъул иххаз гъанкъизавуна.
6Жагьандаманалъул рахсаз вухьана,
Хвалил къоралъ къан ккуна.
7Балагьалъукье ккедал, дица БЕТӀЕРГЬАНАСДЕ ахӀи бана;
Дирго Аллагьасдаса кумек гьарана.
Жиндирго мукъадасаб Рокъоб Гьесда рагӀана дир гьаракь,
Дир ахӀи Гьес къабул гьабуна.
8Ракь сородана, гьаргьадана;
Зобалазул кьучӀал тартадана
Ва Гьесул ццидаца сородизаруна.
9Гьесул магӀарзукъалазухъа кӀкӀуй бурана,
Гьесул кӀалдисан – гьелегьараб цӀа,
Гьесда сверухъги цӀа перхана.
10Гьес зобал къулизаруна ва Гьениса гӀодове лъугьана,
Гьесул хӀатӀазукь чӀегӀерал накӀкӀал кьерана.
11Хъерувимазда тӀадги рекӀун воржана,
Гьорол куркьбазда тӀад парпадана.
12БецӀлъи Жиндаго тӀад пардавлъун бигъана,
РахӀматалъул накӀкӀал юргъанлъун тӀад жемана.
13Гьесдасан гвангъараб нуралъ
Пири пирхана.
14БЕТӀЕРГЬАН зобалаздасан гъугъадана,
ТӀадегӀанас гьаракь бахъизабуна.
15Гьес чӀорал речӀчӀана ва тушбаби щущазаруна,
Пири пирхана ва гьел гъурун рана.
16Гьебмехалда ралъдал тӀину къватӀибе баккана,
Дунялалъул кьучӀал гӀицӀлъана,
БЕТӀЕРГЬАНАСУЛ кьварараб гьаркьил хъуялъ,
Гьесул гучаб хӀухьелалъ.
17Гьес борхалъудасан гӀодове къулун дихъе квер бегьана;
Гьес гьалагал иххазулъан дун къватӀиве цӀана.
18Гьес гучал тушбабазукьа дун хвасар гьавуна, –
Рокьукъал, дидасаги къуватал тушбабазукьа.
19Дида тӀаде балагь рещтӀиндал, гьел диде тӀаделъана,
Амма дица БЕТӀЕРГЬАНАСДА мугъ чӀвана.
20Гьес дун парахатаб бакӀалде ккезавуна;
Гьес хӀинкъи тӀаса босана – Гьесие вокьулелъул дун.
21БЕТӀЕРГЬАНАС дие дир иман-яхӀалда рекъон кьуна;
Дир кверзул бацӀцӀалъиялда рекъон шапакъатги щвана.
22Дун БЕТӀЕРГЬАНАСУЛ нухдасан хьвадидалха,
БЕТӀЕРГЬАНАСДА цебе дица щибго квешлъиги гьабичӀелъул.
23Гьесул тӀолалго къанунал кидаго дида ракӀалда руго;
Гьесул амраби дица нахъ чӀвачӀо.
24Дун Гьесда цеве вацӀцӀадго хьвадана –
Такъсиралдаса дунго цӀунана.
25БЕТӀЕРГЬАНАС дие дир иман-яхӀалда рекъон кьуна,
Гьесда цебе бугеб дир бацӀцӀалъиялда рекъон.
26Дуе ритӀухъазе Мун ритӀухъав вуго,
ЛъикӀазе лъикӀавги вуго.
27РакӀ бацӀцӀадасе Дуца Дурго бацӀцӀалъи бихьизабула,
Амма макручиясе гьесул макирлъиялда рекъон гьабула.
28Пакъирзаби Дуца хвасар гьарула,
Амма гӀамал кӀудиял Дуда рихьула
Ва Дуца гӀодорегӀан ккезарула.
29Дир БЕТӀЕРГЬАН, Мун вугелъул дир чирахъ;
БЕТӀЕРГЬАНАС дир бецӀлъи канлъуде сверизабуна.
30Дур кумекалдалъун дица хъачагъазул къокъа щущазабуна;
Дир Аллагьгун къадада тӀасан кӀанцӀула дун.
31Аллагьасул нух бацӀцӀадаб,
БЕТӀЕРГЬАНАСУЛ калима камилаб.
Гьесда мугъ чӀваралщиназе
Щулияб хъалхъанги Гьев.
32БЕТӀЕРГЬАН тун цоги Аллагь вугищ?
АллагьгӀадаб кьуру тӀокӀаб батулищ?
33Гьев Аллагьасин дида къуват борчулеб;
Гьесин дун битӀараб нухда вачунев.
34РитӀучӀил гӀадаб рилълъинги кьун,
Дун Гьес борхалъиялде вахинавула.
35Дир кверал рагъуе щулалъизарула Гьес;
Гьединлъидал, гьез мазгарул чӀор кӀичӀизабула.
36БетӀергьан, Дур тархъанлъиялъул хъалхъан лъуна Дуца дир хъатикь;
Дур цӀобалъ дун кӀодо гьавуна.
37Дуца дун унеб нух гӀатӀид гьабула,
Кибго хӀетӀе тункизе биччаларо.
38Дун тушбабазда хадув лъугьуна ва дица гьел щущахъ рала;
Гьел тӀуран лъугӀизаричӀого дун тӀадвуссунаро.
39Дица гьел щущазарула,
Дир хӀатӀикье ккарал гьел тӀокӀал тӀаде рахъунаро.
40Дуца рагъуе къуват кьуна дие;
Дида данде рахъарал Дуца дир хӀатӀикье ккезаруна.
41Дир тушбаби дида цереса лъутизаруна Дуца,
Ва дун рихаралщинал дица гъурун рана.
42Гьел кумекалъе ахӀдана, амма гьел хвасар гьаризе щивго ватичӀо;
БЕТӀЕРГЬАНАСДЕ ахӀи бана, амма Гьес жаваб гьабичӀо.
43Дица ракьул хӀур гӀадин хъурана гьел;
Дица къватӀул хӀарщ гӀадин мерхьана гьел.
44Дирго халкъалъул питнаялдаса ворчӀизавуна Дуца дун;
Чияр халкъазул бетӀерлъун гьавун цӀунана Дуца дун.
Дида лъаларел халкъал дие хъулухъалъе чӀун руго.
45КъватӀисел дие хӀелхӀедула;
ГӀинда рагӀун бахъиналде дир амраби тӀуразарула.
46ХӀинкъиялъ гьезул ракӀ гӀодоб чӀвана,
Сородулаго раккула гьел жалго рахчараб бакӀалдаса къватӀире.
47ХӀакъав БЕТӀЕРГЬАН! Дир баракатаб Кьуру!
Рецц Дуе, дир Аллагь – дир хвасарлъиялъул Кьуру!
48Дир Аллагьасин дие гӀоло рецӀел босулеб,
Дие халкъалги мутӀигӀлъизарулел,
49Дир тушбабаздаса дун ворчӀизавулев!
Дида данде чӀаразда цеве дун кӀодо гьавуна Дуца,
ВахӀшияздаса хвасар гьавуна.
50Гьединлъидал, дир БЕТӀЕРГЬАН, дица халкъазда гьоркьоб Дуе рецц гьабила;
Дур цӀар кӀодо гьабун назму ахӀила.
51Жиндирго пачаясе Гьес кӀудиял бергьенлъаби кьуна
Жиндирго тӀаса вищарав Давудида ва гьесул наслабазда абадиялъего цӀоб лъуна».
Currently Selected:
2 Пачаби 22: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
