2 Пачаби 16
16
Цивал хӀилла-макру
1МугӀрул тӀогьиса цодагьав гӀодовегӀан щведал, цебе къотӀун кӀиго кьолораб хӀамагун Мефи-Бошетил хъулухъчи Цива дандчӀвана Давудида. Гьел хӀамузда тӀад къан кӀинусго чедги, нусго чед кишмишалъулги, нусго гъал инжиралъулги ва цо рахълъен чӀагӀдалги букӀана.
2Пачаяс Цивада цӀехана: «Гьаб сундуе къачӀараб жо дуца?» – ян.
Циваца жаваб кьуна: «ХӀамул рукӀина пачаясул хъизан-къаялъе хӀалтӀизаризе, чедги пихъги – рагъухъабазе кваназе, чагъир – нухда тату хваразе гьекъезе кьезе», – ян.
3Цинги пачаяс цӀехана: «Дур хважаин Шаулил васасул вас кив вугев?» – ин.
Циваца абуна: «Досул инсул эмен Шаулил пачалъи гьанже жиндихъе тӀадбуссинабизе бугин гӀизраилазинги ккун, Иерусалималдаго чӀана дов».
4Гьебмехалъ пачаяс Цивада абуна: «Мефи-Бошетил букӀарабщинаб магӀишат гьанже дур буго», – ян.
«БетӀерчӀахъаяв дир пача, дур лагълъун вукӀине хӀадурав вуго дун. Дур рахӀму-цӀобалде хьул буго дир кидаго», – ян жаваб гьабуна Циваца.
ШимгӀица Давудие нагӀанаби кьей
5Бахурималде Давуд гӀагарлъидал, гьесие нагӀанабиги кьолаго, Шаулил гӀагарлъиялъул ШимгӀиян цӀар бугев Герал вас вачӀана гьениса къватӀиве. 6Давудидаги гьесул цересел чагӀаздаги ганчӀал речӀчӀизе жувана гьев; Давудил квегӀаб ва кваранаб рахъалда чӀун гьесул киналго чагӀиги рагъухъабиги рукӀана. 7ШимгӀица абулеб букӀана:
«Хазабе гьаниса! Хазабе гьаниса! ЧӀвадарухъан! ХӀалихьат! 8БЕТӀЕРГЬАНАС бецӀана дуе, Шаулил бакӀалда мунго пачалъунги гьавун, дуца гьесул хъизан-агьлуялъул гӀодобе тӀураб биялъухъ. Гьанже БЕТӀЕРГЬАНАС духъаги бахъун, дур вас Авессаломихъе кьуна пачалъи. Мунин абуни, бидулав вугелъул, балагьалъукье ккана!»
9Гьебмехалда Церуягьил вас Авишайица пачаясда абуна: «Гьаб махӀцараб гьойца дир бетӀерчӀахъаяв пачаясде рогьо щай балеб бугеб? Дие изну кье досул бетӀер къотӀун рехизе», – ян.
10Цинги Давудица абуна: «Церуягьил васал, диеги нужееги гьелъул милат гьабун щай? НагӀанаби кье абе гьес, нагӀанаби кье Давудиеянги абун, БЕТӀЕРГЬАНАС тӀамурав чи вугелъул гьев дида тӀаде. Гьединав чиясда кӀал гьикъизе лъиданиги бажарулебдай?»
11Давудица Авишайида ва жиндирго тӀолалго чукъбузда абуна:
«Дие гьавурав дирго васцин дун чӀвазе дида хадув лъугьун вуго, буняминиясул бицинего ккелищ? ЖахӀавго те гьев чи; нагӀанаби кьолев вукӀа абе, БЕТӀЕРГЬАНАС тӀамун вугелъул гьев гьедин гьабизе. 12Щиб лъалеб, дир инжитлъи-хӀакъирлъиги бихьун, БЕТӀЕРГЬАН гурхӀизе бегьула, ва жакъа дие кьолел гьел нагӀанабазул бакӀалда, баракат лъезе бегьула БЕТӀЕРГЬАНАС дида».
13Давудги гьесул чагӀиги жидерго нухда рилълъана. ШимгӀиги мугӀрул щобккун Давудида дандвитӀун унев вукӀана, балаго рогьогун, речӀчӀулаго ганчӀалгун ва хӀарщгун. 14Иордан гӀурухъе щведал, Пачаги тӀолабго гьесда цадахъ букӀараб халкъги кутакалда свакан рукӀана, ва хӀухь бахъизе гьез гьениб чӀел гьабуна.
Авессалом Иерусалималде щвей
15Цадахъ гӀизраилазул аскаргун Авессалом Иерусалималде щвана, Ахитофелги вукӀана Авессаломида цадахъ. 16Давудил гьудул аркияв Хушай вачӀана Авессаломида цеве ва гьес абуна:
«БетӀерчӀахъаяв пача! БетӀерчӀахъаяв пача!» – ин.
17Авессаломица Хушайида цӀехана: «Гьединищ дуца дурго гьудуласе ритӀухълъи бихьизабулеб бугеб? Мун щай досда цадахъ инчӀев?» – ин.
18Хушайица жаваб гьабуна: «Щайгурелъул, БЕТӀЕРГЬАНАС тӀаса вищарасул ва халкъалъгун тӀубараб ГӀизраилалъ къабул гьавурасул рахъ кквела дица ва гьасда цадахъ чӀела. 19Гьелда тӀадеги, Давудил васасе гуреб цоги лъие дица хъулухъ гьабилеб? Дур инсуе гьабураб хъулухъ гьанже дуеги гьабизе буго дица».
20Авессаломица Ахитофелида абуна: «РачӀа гӀакълу дандбазе, щибдай гьанже нилъеца гьабун лъикӀ?» – ин.
21Ахитофелица абуна: «Дурго инсуца кӀалгӀаялъул тӀалаб-агъаз гьабизе тарал гьесул гъаравашал-лъудбузда аскӀов вега. Гьебмехалда тӀолалго гӀизраилазда рагӀила мун инсуе рихаравлъи ва дур рахъ ккуразул дудехун бугеб ракӀчӀей цӀикӀкӀина».
22Цинги тӀохда Авессаломие чадир лъуна, ва тӀолалго гӀизраилазда вихьун, жиндирго инсул гъаравашал-лъудбузда аскӀове ана гьев.
23Доб заманалда Ахитофелица кьураб гӀакълу живго Аллагьасул гӀакълугӀанги къиматаблъун рикӀкӀунаан. Давудги Ахитофелил щибаб гӀакълуялда нахъ вилълъунаан, Авессаломицаги гьединго гьабуна.
Currently Selected:
2 Пачаби 16: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
