2 Пачаби 14
14
Авессалом Иерусалималде вуссинавизе Иоав ургъи
1Церуягьил вас Иоавида лъалеб букӀана Давуд Авессаломил пикрабазда вукӀин. 2Текоаялде цо гӀакъилай чӀужугӀаданалда хадур чагӀи ритӀана гьес.
Цинги гьес гьей гӀаданалда абуна: «Дуца гӀодулеб ххвел гьабе, чӀегӀерги бай, махӀгьуинал нахалги рахунге. Хварав чиясда хадуб бухӀараб магӀу тӀун гӀемерал къоял рарай гӀаданлъун хӀай. 3Хадуб пачаясухъеги ун, гьадин кӀалъай».
Иоавица гьелда малъана пачаясда абизе кколебщинаб жо.
4Цинги гьей гӀадан пачаясда цее ячӀана ва накабазде ккун гьесие къулана. Гьелъ пачаясда абуна: «Вай, дир пача, кумек гьабе дие!» – ян.
5«Щиб дуе ккараб?» – ин цӀехана пачаяс.
Гьелъ абуна:
«Росги хун къорол хутӀарай гӀадан йиго дун. 6КӀиго вас вукӀана дир, дур лагъалъул. Авлахъалда рукӀаго данд речӀчӀун цоцалъ рагъун руго гьел. Гьел ратӀа гьаризе цониги чиги вукӀун гьечӀо сверухълъиялда. Цинги цояс цояв чӀварав. 7Гьале гьанже тӀолабго гӀагарлъи бахъун буго дида тӀаде ва гьез абулеб буго: „Вац чӀварав чи кье гьаниве, вац чӀваралъухъ гьевги чӀвазе вукӀине; цохӀо хутӀарав ирсилав вукӀиналъухъ балагьичӀого, гьев чӀван рехизе вуго“, – ян. Дир цохӀо хутӀараб чирахъалъул кунчӀи свинабизехъин бугогури гьез, цогӀаги наслуги течӀого дир росасул цӀарги дунялалдаса нахъе хъвагӀан».
8Цинги пачаяс абуна: «Парахат рокъое а. Дица тӀубазабила дур мурад», – ин.
9Текоаялдаса чӀужугӀаданалъ абуна: «Дир бетӀерчӀахъаяв пача, гьелъул гӀайиб дидеги дир инсул агьлуялдеги тӀаде ккезе биччанте, амма пачаясдеги гьесул пачалъиялдеги тӀаде гӀайибалъул цо тӀанкӀцин ккеларо».
10Пачаяс абуна: «Дуда рагӀи абулев чи дихъе ваче. Гьес дуда тӀокӀаб килищ хъваларо».
11Гьелъ абуна: «Бидуласдаса бидул къисас босизе гьукъараб бугин абун, жиндирго БЕТӀЕРГЬАН Аллагьасул цӀарги бахъун гьеде абе пача, дир вас чӀвачӀого хутӀизе вукӀине».
«ХӀакъав БЕТӀЕРГЬАНАЛХӀА дур васасул цо рас бортизе гьечӀо ботӀродаса», – ян абуна пачаяс.
12Цинги гьей гӀаданалъ абуна: «Дир бетӀерчӀахъаяв пачаясда цо рагӀи абизе изну кье дур лагъалъе». «Абе», – ян жаваб гьабуна пачаяс.
13Гьебмехалъ гьей гӀаданалъ абуна:
«Щайха цинги пачаяс Аллагьасул халкъалда данде гьадинаб иш гьабулеб? Жиндирго кӀалалъ жиндаго данде диван къотӀулеб гьечӀищ пачаяс? Апараглъуде лъутарав дурго вас жеги тӀадвуссинавичӀогури дуца. 14Нилъ киналго хвезе къотӀарал чагӀи руго. ГӀодобе чвахараб ва бакӀаризе кӀолареб лъадада релълъуна нилъер гӀумру. Амма Аллагь нилъ хвезаризе къачӀарав гьечӀо. Гьелъул гӀаксалда, къосарав инсанцин витӀун ккезавизе рес балагьула Гьес.
15ГӀадамаз хӀинкъалаби кьолел рукӀун, гьале дир бетӀерчӀахъаяв пачаясда гьеб бицине ячӀана дун гьание. Дица пикру гьабуна: „Пачаясда кӀалъала дун. Щиб лъалеб, гьес дир, гьесул лагъалъул, гьари къабул гьабизе бегьулагури. 16Аллагьас кьураб ирсалдаса дунги дир цохӀо хутӀарав васги махӀрум гьаризе лъугьарав чиясдаса пачаяс хвасар гьаризе бегьулагури ниж“, – абун.
17Гьале гьанже дур лагъ кӀалъалей йиго дуда: пачаясул рагӀуца ракӀги чучун йикӀина гьанже дун, щайгурелъул Бичасул малаик гӀадав, квешаб-лъикӀаб батӀа бахъизе лъалев чи вугелъул дир бетӀерчӀахъаяв пача. Дур БЕТӀЕРГЬАН Аллагьас квербакъи гьабеги дуе сундулъго!»
18Пачаяс гьей гӀаданалда абуна: «Дица цӀехараб жоялъе щибго балъго течӀого жаваб кье», – ян.
«Бокьараб жо цӀехезе биччай дир бетӀерчӀахъаяв пачаяс», – ин абуна гьелъ.
19Цинги пачаяс цӀехана: «Иоавица малъунцин гурищ мун дихъе ячӀарай?»
Гьелъ жаваб гьабуна:
«Дир пачаясул гӀумруялхӀа, битӀараб жоха гьеб, бетӀерчӀахъад. Дир бетӀерчӀахъаяв пачаясул рагӀудаса я квегӀаб, я кваранаб рахъалде кьуризе лъидаго кӀоларо. Дур лагъ Иоавица малъана дида гьадин гьабеян, дур лагъалъул мацӀалда гьал рагӀабиги гьес лъуна. 20Цо суалалъул батӀи-батӀиял рахъал рихьизаризе бокьун гьабуна Иоавица гьаб иш. Амма дир бетӀерчӀахъадил гӀакълу Бичасул малаикасулалда релълъуна – дуда лъалареб жо щибго гьечӀо гьаб ракьалда».
21Хадуб пачаяс Иоавида абуна: «ЛъикӀ буго, гьедин букӀине те. Гьанже дир вас Авессалом тӀадвуссинавизе а», – ян.
22Иоав гьумер гӀодоб цун пачаясе къулана ва, гьесие баркалаги кьун, тӀаде жубана: «Жакъа лъана дур лагъасда дир бетӀерчӀахъаяв пачаясул дидехун рахӀму-цӀоб букӀин, щайгурелъул дир – дур лагъасул – гьари пачаяс къабул гьабидал».
23Цинги Гешуралде ана Иоав ва Авессалом Иерусалималде тӀадвуссинавуна. 24Амма пачаяс лъазабуна: «Гьев жиндирго рокъове айилан абе. Дида цеве вачӀине гьукъараб буго гьесие», – ян.
Авессалом жиндирго рокъове тӀадвуссана, амма пачагун дандчӀвачӀо.
Давудидаги Авессаломидаги гьоркьоб маслихӀат
25Авессалом гӀадав гьайбатав, жиндир берцинлъиялъ цӀар рагӀарав инсан ГӀизраилалдаго тӀокӀав вукӀинчӀо. Камилаб, щибго гӀайиб чӀвазе бакӀ гьечӀеб лага-черхалъул гӀолохъанчи вукӀана гьев. 26БотӀрол расалъул керчлъиялъ лъагӀалидаса лъагӀалиде къунцӀулаан гьеб, гурони бетӀер бакӀлъулаан. Пачаясул цӀадирабазда рекъон, гьесул ботӀродаса къунцӀараб расул кӀинусго шекел#14:26 200 шекел – гӀага-шагарго 2,3 кило. бахъулаан. 27Авессаломие гьаруна лъабго васги цо ясги. Ясалда цӀар Тамар абун лъуна, гьейги кутакалда гьайбатай яс йикӀана.
28КӀиго сон бана Авессаломица Иерусалималда пачаясул гьумерги бихьичӀого. 29Цинги Авессаломица Иоав ахӀизе чагӀи ритӀана, гьев пачаясухъе витӀизе бокьун. Амма Иоав гьесухъе вачӀине разилъичӀо. Гьес кӀиабилеб нухалъги Иоавида хадур чагӀи ритӀана, амма гьес нахъеги вачӀине инкар гьабуна. 30Гьебмехалъ Авессаломица жиндирго лагъзадерида абуна:
«Доб диралда аскӀоб бугеб Иоавил пурчӀина бекьараб хур бихьулищ нужеда? Ун дорегун, долда цӀа гъе».
Цинги Авессаломил лагъзаз цӀа гъуна гьеб хуралда. 31Цинги кӀанцӀун вахъун Иоав Авессаломил бакӀалде вачӀана ва гьесда кӀал гьикъана: «Щай дур лагъзадерица дир хур бухӀараб?» – инги абун.
32Авессаломица Иоавида абуна:
«Дица дуда хадур чагӀи ритӀун рукӀана гьадинаб каламгун: „Мун гьаниве вачӀа; дие бокьун буго мун пачаясухъе витӀизе дир рахъалъ гьадин гьесда кӀалъазе: ‘Щиб гьабизе дун Гешуралдаса тӀадвуссинавурав? Доваго чӀун вукӀаравани, гӀемерго лъикӀ букӀинаангури дие!’ – ян“. Гьале дие пачаясда дандчӀвазе бокьун буго гьанже. Цинги, дида ккараб гӀайиб батани, гьес дун чӀвазе къотӀе абе».
33Иоав пачаясухъе вилълъана ва Авессаломил мурад гьесда бицана. Гьебмехалъ пачаяс Авессалом ахӀана жиндихъего. Авессалом вачӀана пачаясда цеве ва гӀодоб гьумер цун, къулана гьесие. Пачаясги каранде гьевги къан убач гьабуна Авессаломида, жинца гьев ракӀ-ракӀалъ къабул гьавун вукӀин бихьизабизе.
Currently Selected:
2 Пачаби 14: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
