4 Пачаби 8

Шунемиялъул ракь гьелъухъе тӀадбуссинаби

1Жиндир вас хваралъуса вахъинавурай чӀужугӀаданалда абуна ЭлишагӀ аварагас: «Хъизан-къайгун цадахъ гьаниса нахъе а, ва чияр ракьалда бакӀ балагьун, гьениб чӀел гьабе, щайгурелъул анкьго соналъ халат бахъараб ракъи биччалеб буго БЕТӀЕРГЬАНАС гьаб ракьалда тӀаде», – ян.

2Гьей гӀаданалъ Аллагьасул аварагас абураб гьабуна ва бачун жиндирго хъизан-къайгун, пилистимазул ракьалдеги ун, гьениб анкьго соналъ гӀумру гьабуна. 3Анкьго соналдасан гьей пилистимазул ракьалдаса тӀадюссана ва жиндирго минаялъулги хуралъулги кӀалъай гьабизе пачаясухъе йилълъана.

4ЭлишагӀ аварагас гьарурал хӀикматал ишазул бице жиндаянги абун, ЭлишагӀил лагъ Гехазида кӀалъалев вукӀана пача гьебмехалда.

5Гехазица ЭлишагӀица хварав чи чӀаго гьавураб куцалъул пачаясда бицунеб сагӀаталда, жиндир вас ЭлишагӀица чӀаго гьавурай гӀадан ячӀана пачаясухъе, жиндирго минаялъулги хур-ракьалъулги хӀакъалъулъ кӀалъазе.

Цинги Гехазица абуна: «Дир бетӀергьан пача, гьалегури дой гӀадан! Гьалъул васин ЭлишагӀ аварагас хваралъуса тӀаде вахъинавурав!»

6Гьеб мехалъ пачаяс гьей чӀужугӀаданалда цӀех-рех гьабуна ва гьелъ гьесда кинабго бицана.

Цинги гьелъул къваригӀел тӀубазабеян жиндирго чиясда тӀадкъана пачаяс ва гьелъ улка таралдаса нахъе гьелъул хуриса щвараб хайирги рикӀкӀун, кинабго гьелъул букӀараб боцӀи-рикъзи гьелъухъе тӀадбуссинабеян лъазабуна.

ЭлишагӀ аварагас Бен-Гьадад чӀвазе вукӀин бицуна

7Сириялъул пача Бен-Гьадад унтараб заман букӀана; ЭлишагӀ Дамаскалде вачӀана. Гьев вачӀун вугилан рагӀидал 8пачаяс Хазаилида абуна: «Цадахъ сайгъатги босун Аллагьасул аварагасда дандчӀвазе а. Биччанте дун сахлъулищин цӀехезе ЭлишагӀ аварагас БЕТӀЕРГЬАНАСДА».

9КӀикъого вараниялда тӀад бараб, Дамаскалдаса тӀаса бищараб къайиги сайгъаталъе босун, Хазаил ЭлишагӀгун дандчӀвазе вахъана. ВачӀун гьесда цевегун гьес абуна: «Дур мутӀигӀав лагъ, Сириялъул пача Бен-Гьададица витӀана дун жив доб унтудаса сахлъулищин дуда цӀехезе», – ян.

10ЭлишагӀица абуна: «Досда абе мун ракӀчӀун сахлъулин, амма БЕТӀЕРГЬАНАС хӀакъикъаталдаги гьев хвезе вукӀин загьир гьабуна дие». 11Цинги ЭлишагӀ бер къапичӀого таманаб заманаялъ гьесухъ валагьун чӀана – ахирги Хазаил намуслъун лъугьана. Цинги гӀек-гӀекиялда гӀодана ЭлишагӀ авараг.

12«Я дир эмен, щай мун гӀодулев?» – ин цӀехана Хазаилица. «Щайгурелъул дида лъалелъул дуца гӀизраилазе гьабизе бугебщинаб квешлъи, – ян абуна гьес. – Дуца гьезул хъулби рухӀизе руго, гьезул гӀолохъаби хвалчаца къотӀ-къотӀизе руго, гьитӀинал лъимал чӀвазе руго, ва лъимаде ругел руччабазул чахьал рихъизе руго».

13Хазаилица абуна: «Дица, щивго гурев чияс, гьединал кӀудиял ишал кин гьарулел?» – ин. «БЕТӀЕРГЬАНАС загьир гьабуна дие мун Сириялъул пачалъун вахъине вукӀин», – ин жаваб кьуна ЭлишагӀица#8:13 Гьаниб ЭлишагӀица бицунеб буго цебеккунго Аллагьас Илясие рагьун букӀараб балъголъи (бал. 3 Пач. 19:15-17)..

14Цинги Хазаил жиндирго бетӀергьанасухъе тӀадвуссана.

Пачаяс гьесда цӀехана: «ЭлишагӀица щиб абураб?»

Хазаилица жаваб гьабуна: «Дос дида абуна мун ракӀчӀун сахлъулин».

15Нахъисеб къоялъ гьес биччизабун юргъан рехана пачаясул гьурмада тӀаде ва гъанкъизавуна гьев. Хазаилги гьесул бакӀалда пачалъун вахъана.

Егьорам – Ягьудиялъул пача

16Ахавил вас Иорам ГӀизраилалъул пачалъун вахъун щуабилеб соналъ, Егьошафатил вас Егьорам Ягьудиялъул пачалъун#8:16 Доб заманалда цо-цо мехалъ инсуцаги васасги цадахъ гьабулаан пачалъи. вахъана – жеги Егьошафатги вукӀана Ягьудиялъул пачалъун. 17Лъебералда кӀиго сон барав чи вахъана гьев пачалъун ва микьго соналъ пачалъиги гьабуна Иерусалималда. 18ГӀизраилалъул пачабазул нухккун, Ахавил хъизан-къаялдаса мисалги босун хьвадана гьев, щайгурелъул гьес Ахавил яс ячун йикӀиндал. Гьес БЕТӀЕРГЬАНАСДА квеш бихьанщинаб гьабуна. 19Амма Жиндирго лагъ Давудие гӀоло, Ягьудия тӀагӀинабизе бокьичӀо БЕТӀЕРГЬАНАСЕ. Гьесул зурияталъе абадиялъего пачалъиялъул тах цӀунизе къотӀи гьабун букӀиндал Гьес.

20Егьорам пачалъун вугеб заманалда Ягьудиялъул кверщалида данде чӀана Эдом ва жиндирго пачаги вищана. 21Цинги цадахъ рачун киналго жиндирго чолгьакалгун ЦагӀиралде тӀаде кӀанцӀизе вилълъана Егьорам. Гьенир эдомияз сверун ккуна гьевги гьесул киналго чолгьакалги. Къаси сардилъ гьевги гьесул чолгьаказул бутӀрулги тушбабазул сверункквеялдаса къватӀире рорчӀана, амма киналго гьесул рагъухъаби рокъо-рокъоре лъутун ана. 22Гьелдаса нахъе Эдом Ягьудиялъе мукӀурлъичӀо. Гьебго заманалда Ягьудиялда данде чӀана Ливнаги.

23Егьорамил пачалъиялъул хутӀарал лъугьа-бахъинал «Ягьудиялъул пачабазул тарих» абураб тӀехьалда хъван руго. 24Егьорам хвана ва Давудил Шагьаралда жиндирго умумузда аскӀов хабалъ лъуна. Гьесул вас Ахазиягь гьесул бакӀалда пачалъун вахъана.

Ахазиягь – Ягьудиялъул пача

25Ахавил вас Иорам ГӀизраилалъул пачалъун вахъун анцӀила кӀиабилеб соналъ, Егьорамил вас Ахазиягь пачалъун вахъана Ягьудиялда. 26Къоло кӀиго сон барав чи вахъана Ахазиягь пачалъун ва цо соналъ пачалъи гьабуна гьес Иерусалималда. Гьесул эбелалда цӀар Аталия букӀана ва ГӀизраилалъул цеве вукӀарав пача ГӀомри гьелъул кӀудияв эмен вукӀана. 27Ахавил хъизаналъул нухккун хьвадана Ахазиягь ва гьесги БЕТӀЕРГЬАНАСДА квеш бихьанщинаб гьабуна – Ахавилгун ригьнал гӀагарлъи букӀиндал гьесул.

28Ахазиягь ун вукӀана цо нухалъ Ахавил вас Иорамгун ГилгӀадалъул Рамоталде Сириялъул пача Хазаилида данде вагъизе; сирияз гьенив лъукъана Иорам. 29Рамоталда Хазаилида данде вагъулаго сирияз лъукъарав Иорам пача, Изреелалде тӀад вуссана ругънал сах гьаризе. Хадув Ягьудиялъул пача Ахазиягь вилълъана Изреелалде, унтун вугев Иорамиде ваккизе.

Currently Selected:

4 Пачаби 8: АварАК

Highlight

Copy