4 Пачаби 7
7
1Амма ЭлишагӀ аварагас абуна: «ГӀенекке БЕТӀЕРГЬАНАСУЛ рагӀухъ. Гьадин абулеб буго БЕТӀЕРГЬАНАС: „Метер, гьаб гӀужалда, тӀаса бищараб ханждал цо сат#7:1 Сат – гӀага-шагарго 6 кило; гьединго бал. 7:16, 18. цо шекелалъул#7:1 Шекел – гӀага-шагарго 11 гр.; гьединго бал. 7:16, 18. багьаялда, кӀиго сат богӀолги цо шекелалъул багьаялда букӀине буго“».
2ГӀизраилалъул пачаясул вазирас ЭлишагӀида абуна: «БЕТӀЕРГЬАНАС зобалазул гордал рагь-рагьаниги, гьеб букӀунеб жо гуро!» «Дур беразда бихьила гьеб, – ин абуна ЭлишагӀица, – амма дуе кваназе щвеларо!»
Шагьар хвасарлъи
3Шагьаралъул кавабахъ вукӀана барасалъ унтарав ункъо чи. Гьез цоцазда абуна: «Щай нилъее гьанир чӀун – хвел щвеялъухъ балагьун? 4Нилъеца шагьаралде рилълъине хӀукму гьабуни, гьениб ракъи бугелъул, нилъ гьенир ракъуца хвела. Гьанирго чӀаниги, нилъ кингоги хвезе руго. РачӀа нилъ сириязухъе рилълъине ва гьезухъе кверде ине. Гьел нилъеда гурхӀани, нилъ чӀаго хутӀила, гурхӀичӀони, хун рукӀа абе».
5МаркӀачӀул гӀужалда рахъун гьел сириязухъе рилълъана. Гьел гьезул къайи чӀвараб бакӀалде гӀагардегӀан щваралго, гьенив вихьуда цо инсан вукӀинчӀо. 6Гьелда цебе, БетӀергьанас чуязул, чолгьаказул ва кӀудияб аскаралъул гӀадаб хъуй рагӀизабуна сириязда ва гьезда ккана: «ГӀизраилалъул пачаяс хитиязул ва мисриязул пачаби ккун руго нижеде тӀаде кӀанцӀизе!» – ян.
7Цинги маркӀачӀул гӀужалда рахъун, ругелъур чадралги, бугелъуб къайги, рухьухъе чуял-хӀамулги тун лъутун ана гьел.
8Гьенире щведал, гьел ункъалго чагӀи цо чодронире жанире лъугьана, гьенир кванана, гьекъана, цинги гьениб батараб гӀарац-месед ва ретӀел-кун босун цо бакӀалда бахчана. Хадур гьел тӀадруссана ва цогидаб чодронире раккана; гьенисаги батараб жо босана ва гьебги бахчана. 9Хадуб гьез цоцазда абуна: «Нилъеца мекъаб жо гьабулеб буго. Гьаб рохалил хабаралъул къо буго, амма нилъеца гьеб хабар лъазабулеб гьечӀо. Нилъеца рогьинегӀан нахъ бахъани, нилъ тамихӀалъукье ккола. Рилълъа хехго пачаясул кӀалгӀаялда лъазабизе гьаб иш», – ин.
10Гьел нухде рахъана, шагьаралъул кавабазул рорчӀухъабаздеги ахӀун, гьезда абуна: «Ниж сириязул къайи чӀвараб бакӀалде ун рукӀана, амма гьенив щивго ватичӀо – цо сасцин гьечӀо; рухьухъе чуялги хӀамулги руго ва чӀвавухъе чадралги руго».
11РорчӀухъабаз гьеб харбил гӀакӀа ахӀана ва гьеб хабар кӀалгӀаялде щвезабуна. 12Цинги пача бусадаса тӀаде вахъана. «Дида лъала сириязул къасд. Дозда лъала нилъ ракъуца холел рукӀин. Бугелъуб жиндирго къайиги тун, гьел ана авлахъалда рахчизе, нилъ ракӀчӀун квен балагьизе шагьаралдаса къватӀире рачӀинин, цинги чӀаго нилъги асир гьарун, шагьарги кверде босилин пикруги гьабун», – илан кӀалъана пача жиндирго цересел чагӀазда.
13Гьесул цересел чагӀазул цояс абуна: «Биччанте хутӀун ругел чуязда гьоркьоса щуго чуги бачун щиб ккун бугищали лъазабизе гӀадамал ине. Кингоги хвезе ругелъул гьелги, жеги хвечӀого хутӀарал гӀизраилазда цадахъ, – нилъ киналго хвалиде гӀагарлъулел ругелъул».
14КӀиго чолгьакида чуялги рана, цинги пачаяс гьел Сириязул аскаралда хадур ритӀана.
Гьес гьезие буюрухъ кьуна: «Ун дозда хадургун, ккараб жо лъазабе», – ян.
15Сириязул аскаралъул лъалкӀ ккун Иорданалде гӀунтӀун ана гьел ва хъатамасан лъутун унел сирияз гӀодобе бараб ратӀлил ва яргъил цӀун батана тӀолабго нух. Чапарзаби тӀадруссана ва жинда бихьараб-тараб пачаясда бицана. 16Гьебмехалда халкъ къватӀибе бахъана ва сириязул къайи хъамал гьабизе журана. БЕТӀЕРГЬАНАСУЛ рагӀуда рекъон, тӀаса бищараб ханждал цо сат цо шекелалъухъ ва бугӀадул кӀиго сатги цо шекелалъухъ бичизе байбихьана.
17Пачаяс жиндирго вазир тун вукӀана шагьаралъул кавабахъ гӀадлу-низамалъе, амма гьев гьенив гӀаламалъ мерхьун хвана. ЭлишагӀ аварагас, гьесул рокъове пача вачӀараб мехалда, цебеккунго бицаралда рекъон хвана гьев. 18ЭлишагӀица абун букӀана: «Метер, гьаб гӀужалда, тӀаса бищараб ханждал цо сат цо шекелалъул багьаялда ва кӀиго сат богӀолги цо шекелалъул багьаялда букӀине буго», – ян. 19Гьев вазирас ЭлишагӀида абуна: «БЕТӀЕРГЬАНАС зобалазул гордал рагь-рагьаниги букӀунеб жо гуро гьеб!» – ин. Цинги ЭлишагӀица абун букӀана: «Дур беразда бихьила гьеб, амма дуе кваназе щвеларо!» – ян. 20Гьедин ккезеги ккана гьесие: шагьаралъул кавабахъ гӀаламалъ мерхьун хвана гьев.
Currently Selected:
4 Пачаби 7: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
