4 Пачаби 19
19
Ишаягь аварагас Иерусалим хвасарлъизе бугилан бици
1Гьеб кинабго рагӀидал, Хизкиягьица тӀад букӀараб ретӀел бихъана ва хӀебтил гӀабаги тӀад ретӀун, БЕТӀЕРГЬАНАСУЛ Рокъове вилълъана. 2Гьединго хӀебтил гӀабабиги тӀад ретӀун, кӀалгӀаялъул тадбирчи Элиякимги, хъвадарухъан Шевнаги, чӀахӀиял кашишзабиги гьес Амоцил вас Ишаягь аварагасухъе ритӀун ана
3гьадинаб ругьелгун: «Гьадин абулеб буго Хизкиягь пачаяс: „Балагь-жазаялъ ва инжитлъиялъ къвал бараб къо бачӀана жакъа нижеде; лъимер гьабизе хӀара чӀварай, амма гьункьизе къуват гӀоларей чӀужугӀадан гӀадин хутӀун руго ниж. 4Ассириялъул пачаяс хӀакъав БЕТӀЕРГЬАН Аллагьасул цӀар инжит гьабизе гьесул бетӀерав гӀакълучи витӀун вачӀана. Щиб лъалеб, БЕТӀЕРГЬАН Аллагьасда гьебги бихьун, Гьес гьел рагӀабазухъ гьезие жаза гьабизе бегьулагури. Гьабе гьанже дугӀа нижер жеги чӀаго хутӀун ругезул рахъалъ“».
5Хизкиягьица ритӀун рачӀарал чагӀазда Ишаягь аварагас абуна: 6«Гьадин абе пачаясда:
„Гьале БЕТӀЕРГЬАНАСУЛ калима: ‘Диде рогьоги бан, Ассириялъул пачаясул чукъбуз рицарал рагӀабазукьа мун хӀинкъуге. 7Дица гьесда цо хабар рагӀизабила. Гьеб рагӀараб сагӀаталда гьев жиндирго ракьалде тӀадвуссина. Цинги гьенив жиндирго ракьалда хвалчадалъун хвезе хъван буго Дица гьесие’“».
8Ассириялъул пачаясул бетӀерав гӀакълучи пачаясухъе тӀадвуссана, амма пача, Лахишги тун, Ливнаялде тӀаде кӀанцӀизе ун ватана. Гьединлъидал гьесги гьенибе нух босана.
Сенахеривил цӀиял хӀинкъалаби ва Хизкиягьил дугӀа
9Цинги Сенахеривихъе хабар бачӀана Кушалъул#19:9 Куш абураб некӀсияб пачалъиялда гьоркьоре кколаан Мисриялъул, Суданалъул ва Эфиопиялъул ракьазул цо-цо бутӀаби. пача Тиргьака вачӀунев вугин гьесде тӀаде кӀанцӀизеян. Гьебмехалъ гьес нахъеги Хизкиягьихъе чапарзаби ритӀана гьадинал хӀинкъалабигун:
10«Ассириялъ Иерусалим кверде босизе гьечӀилан Аллагьас абураб жоялде хьулги лъун, мун Гьес гуккизе чӀоге. 11Дуда рагӀанагури Ассириялъул пачабаз цогидал ракьазе гьабураб жо – тӀуран щущахъ разаруна гьел. Мун ворчӀилиланищ дуда ккун бугеб? 12Дир умумуз гъурарал цогидал халкъазул: Гозаналъул, Харраналъул, Рецепалъул, Теласаралда букӀараб халкъ Эденалъул аллагьзабаз гьел хвасар гьарунищ? 13Кир ругел Хаматалъулги, Арпадалъулги пачаби? Сепарвайим, Гьена ва ГӀиввагь шагьаразул пачаби кир ругел?»
14Чапарзабаз гьеб кагъат босун бачӀиндал Хизкиягьица гьеб цӀалана, цинги БЕТӀЕРГЬАНАСУЛ Рокъовеги вилълъун, БЕТӀЕРГЬАНАСДА цебе лъуна гьеб кагъат.
15Ва гьадинаб дугӀа гьабуна Хизкиягьица БЕТӀЕРГЬАНАСДЕ:
«Хъерувимазул куркьбазда тӀад тах лъурав ГӀизраилалъул БЕТӀЕРГЬАН Аллагь! Гьаб дунялалъул тӀолалго пачалихъазда тӀад цохӀо Мун вуго Аллагь. Зобалги ракьалги Дуца рижана. 16Гьарула БЕТӀЕРГЬАН, Мун гӀенекке ва балагье, БЕТӀЕРГЬАН, Сенахеривица хӀакъав Аллагьасул цӀарги инжит гьабун ритӀун рачӀарал гьал рагӀабазухъ. 17Гьебги битӀараб буго, БЕТӀЕРГЬАН, Ассириялъул пачабаз унго-унголъунги халкъал гъурана, гьезул улкаби чӀунтизаруна, 18гьезул аллагьзабаздаги цӀа гъуна. Гьел инсанасул квераз бекӀараб ганчӀил ва цӀулал гьарурал жал – хӀакъикъаталда гьел аллагьзаби рукӀинчӀелъул. 19Гьанже нижер БЕТӀЕРГЬАН Аллагь, гьарула Дуда, цо Мун БЕТӀЕРГЬАН гурев тӀокӀав батӀияв Аллагь гьечӀевлъи гьаб дунялалъул тӀолалго пачалихъазда лъан букӀине, хвасар гьаре ниж гьесул квердаса».
Ишаягь аварагас Сенахерив щапулин бици
20Амоцил вас Ишаягьица Хизкиягьихъе гьадинаб хабар битӀана:
«Гьадин лъазабулеб буго ГӀизраилалъул БЕТӀЕРГЬАН Аллагьас: „Ассириялъул пача Сенахеривил хӀакъалъулъ дуца гьабураб дугӀа Дица къабул гьабуна“.
21Гьале Гьесул рахъалъ БЕТӀЕРГЬАНАС абулеб буго:
„Сионалъул ясалъ#19:21 Сионалъул бикрияй яс, ялъуни Иерусалималъул яс – поэзиялъул мацӀалда Иерусалим абураб магӀна ккола гьелъул.
басра гьавила мун,
гьей елъанхъила дуда тӀад.
Лъутун унев дуда хадуб бетӀер кӀибикӀила
Иерусалималъул ясалъ.
22Мун лъиде рогьо балев, щив инжит гьавулев чи?
Лъида данде гьаракь борхараб дуца,
лъиде чӀухӀун валагьарав?
Хирияв ГӀизраилалъул Аллагьасде?!
23Чапарзабиги ритӀун
БетӀергьанасул цӀар инжит гьабуна дуца.
Дуца абуна:
‘Дирго гӀемерал чолгьакалгун
мугӀрузул тӀогьал кверде росана дица,
Ливаналъул бакълъабазде вахана.
Гьелъул руччарал рохьал кверде росун,
гьениса лъикӀал тӀаса рищун,
кедралъул гъутӀби ва накӀкӀигъутӀби къотӀана.
24Дица чияр ракьазда гъуялги рухъун,
гьезул лъим гьекъана.
Мисриялъул гӀорал
дица мерхьун ракъвазаруна’.
25Дуда рагӀун букӀинчӀищ,
Дица цебего, некӀсияб заманалдаго
гьедин хъван букӀараблъи? Гьанже
Дица гьеб тӀубазабуна –
гьел щула гьарурал шагьарал
чӀвадназде руссинаризе дудаса пайдаги босун.
26Гьезул жамагӀатал тату хун,
хӀинкъиялъ рухӀ лъугӀун, инжитлъиялъ чара бухӀун руго.
Гьел авлахъалда хер гӀадин,
цӀиял раккарал чӀимигӀал чӀорал гӀадин,
тӀохда бижун,
къватӀибе баккарабго бакъуца бухӀараб хер гӀадин руго.
27Амма дуца гьабулебщинаб, дур хьвада-чӀвади –
дур рахъалъ кинабго лъала Дида.
Дур рекӀелъ Дидехун бугеб ццинги лъала.
28Гьеб дур Дида данде бугеб ццинги
чӀухӀиги сабаблъун,
Дица дур къалазда кӀиликӀги бан,
кӀалдиб чӀолохъжоги бан,
вачӀарабго нух ккун
тӀадвуссинавила мун“.
29Хизкиягь, гьале дуе гӀаламат.
Исана нужеца кваназе буго хурзабахъ жибго бижараб нигӀмат,
тӀадияб соналъги гьелдасаги жибго бижараб нигӀмат.
Амма хариялъул хурзал рекье, хурисажо бакӀаре,
цӀолбол ахал гӀезаре – гьезул пихъ кванай.
30Ягьудал къавмалъул чӀаго хутӀараз цӀидасан ракьулъе кьалбал риччазе руго
ва гьезда пихъ бижизе буго.
31ЧӀаго хутӀаразул гьитӀинаб къокъа бачӀина Иерусалималдаса къватӀибе
ва хвалдаса рорчӀарал Сионалдаса гӀодоре лъугьина.
Гучал Аскаразул БЕТӀЕРГЬАНАС, Жиндирго халкъ Гьесие гӀемер хиралъиялъ, тӀубазабизе буго гьеб.
32Гьединлъидал, Ассириялъул пачаясул хӀакъалъулъ БЕТӀЕРГЬАНАС абулеб буго:
„Гьев гьаб шагьаралда жаниве лъугьине гьечӀо,
гьес речӀчӀараб чӀор гьенибе гӀунтӀизе гьечӀо.
Хъалхъаналгун гьесул рагъухъаби гьелда аскӀоре къазе гьечӀо,
гьеб сверун ккун, гьес буцурал разе гьечӀо.
33ВачӀарабго нух ккун тӀадвуссун ине вуго гьев,
гьаб шагьаралда жаниве лъугьине гьечӀо, –
БЕТӀЕРГЬАНАС лъазабулеб буго гьедин.
34Дирго цӀаралъе гӀоло ва Дир лагъ Давудие гӀоло
Дица цӀунила гьаб шагьар“».
Ассириялъул аскар къей
35Гьебго сордоялъ БЕТӀЕРГЬАНАСУЛ Малаик рещтӀун ассириязул нусиялда ункъоялда щуазарго чи чӀвана. Нахъисеб къоялъ радал рагъухъаби рорчӀидал, гьезда свера-тирун киса-кирего жаназаби ратана. 36Цинги Ассириялъул пача Сенахерив, рачун жиндирго рагъухъабигун, рокъове тӀадвуссун ана ва Ниневиялда чӀана гӀумру гьабун.
37Цо нухалъ жиндирго аллагь Нисроил рокъов гьесие сужда-тӀагӀат гьабулев вукӀаго, гьесул васал Адрамелехица ва Сарэцерица хечги къазабун чӀвана гьев, жалгоги Арараталъул ракьалде лъутана. Гьесул бакӀалда гьесул вас Эсархадон пачалъун вахъана.
Currently Selected:
4 Пачаби 19: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
4 Пачаби 19
19
Ишаягь аварагас Иерусалим хвасарлъизе бугилан бици
1Гьеб кинабго рагӀидал, Хизкиягьица тӀад букӀараб ретӀел бихъана ва хӀебтил гӀабаги тӀад ретӀун, БЕТӀЕРГЬАНАСУЛ Рокъове вилълъана. 2Гьединго хӀебтил гӀабабиги тӀад ретӀун, кӀалгӀаялъул тадбирчи Элиякимги, хъвадарухъан Шевнаги, чӀахӀиял кашишзабиги гьес Амоцил вас Ишаягь аварагасухъе ритӀун ана
3гьадинаб ругьелгун: «Гьадин абулеб буго Хизкиягь пачаяс: „Балагь-жазаялъ ва инжитлъиялъ къвал бараб къо бачӀана жакъа нижеде; лъимер гьабизе хӀара чӀварай, амма гьункьизе къуват гӀоларей чӀужугӀадан гӀадин хутӀун руго ниж. 4Ассириялъул пачаяс хӀакъав БЕТӀЕРГЬАН Аллагьасул цӀар инжит гьабизе гьесул бетӀерав гӀакълучи витӀун вачӀана. Щиб лъалеб, БЕТӀЕРГЬАН Аллагьасда гьебги бихьун, Гьес гьел рагӀабазухъ гьезие жаза гьабизе бегьулагури. Гьабе гьанже дугӀа нижер жеги чӀаго хутӀун ругезул рахъалъ“».
5Хизкиягьица ритӀун рачӀарал чагӀазда Ишаягь аварагас абуна: 6«Гьадин абе пачаясда:
„Гьале БЕТӀЕРГЬАНАСУЛ калима: ‘Диде рогьоги бан, Ассириялъул пачаясул чукъбуз рицарал рагӀабазукьа мун хӀинкъуге. 7Дица гьесда цо хабар рагӀизабила. Гьеб рагӀараб сагӀаталда гьев жиндирго ракьалде тӀадвуссина. Цинги гьенив жиндирго ракьалда хвалчадалъун хвезе хъван буго Дица гьесие’“».
8Ассириялъул пачаясул бетӀерав гӀакълучи пачаясухъе тӀадвуссана, амма пача, Лахишги тун, Ливнаялде тӀаде кӀанцӀизе ун ватана. Гьединлъидал гьесги гьенибе нух босана.
Сенахеривил цӀиял хӀинкъалаби ва Хизкиягьил дугӀа
9Цинги Сенахеривихъе хабар бачӀана Кушалъул#19:9 Куш абураб некӀсияб пачалъиялда гьоркьоре кколаан Мисриялъул, Суданалъул ва Эфиопиялъул ракьазул цо-цо бутӀаби. пача Тиргьака вачӀунев вугин гьесде тӀаде кӀанцӀизеян. Гьебмехалъ гьес нахъеги Хизкиягьихъе чапарзаби ритӀана гьадинал хӀинкъалабигун:
10«Ассириялъ Иерусалим кверде босизе гьечӀилан Аллагьас абураб жоялде хьулги лъун, мун Гьес гуккизе чӀоге. 11Дуда рагӀанагури Ассириялъул пачабаз цогидал ракьазе гьабураб жо – тӀуран щущахъ разаруна гьел. Мун ворчӀилиланищ дуда ккун бугеб? 12Дир умумуз гъурарал цогидал халкъазул: Гозаналъул, Харраналъул, Рецепалъул, Теласаралда букӀараб халкъ Эденалъул аллагьзабаз гьел хвасар гьарунищ? 13Кир ругел Хаматалъулги, Арпадалъулги пачаби? Сепарвайим, Гьена ва ГӀиввагь шагьаразул пачаби кир ругел?»
14Чапарзабаз гьеб кагъат босун бачӀиндал Хизкиягьица гьеб цӀалана, цинги БЕТӀЕРГЬАНАСУЛ Рокъовеги вилълъун, БЕТӀЕРГЬАНАСДА цебе лъуна гьеб кагъат.
15Ва гьадинаб дугӀа гьабуна Хизкиягьица БЕТӀЕРГЬАНАСДЕ:
«Хъерувимазул куркьбазда тӀад тах лъурав ГӀизраилалъул БЕТӀЕРГЬАН Аллагь! Гьаб дунялалъул тӀолалго пачалихъазда тӀад цохӀо Мун вуго Аллагь. Зобалги ракьалги Дуца рижана. 16Гьарула БЕТӀЕРГЬАН, Мун гӀенекке ва балагье, БЕТӀЕРГЬАН, Сенахеривица хӀакъав Аллагьасул цӀарги инжит гьабун ритӀун рачӀарал гьал рагӀабазухъ. 17Гьебги битӀараб буго, БЕТӀЕРГЬАН, Ассириялъул пачабаз унго-унголъунги халкъал гъурана, гьезул улкаби чӀунтизаруна, 18гьезул аллагьзабаздаги цӀа гъуна. Гьел инсанасул квераз бекӀараб ганчӀил ва цӀулал гьарурал жал – хӀакъикъаталда гьел аллагьзаби рукӀинчӀелъул. 19Гьанже нижер БЕТӀЕРГЬАН Аллагь, гьарула Дуда, цо Мун БЕТӀЕРГЬАН гурев тӀокӀав батӀияв Аллагь гьечӀевлъи гьаб дунялалъул тӀолалго пачалихъазда лъан букӀине, хвасар гьаре ниж гьесул квердаса».
Ишаягь аварагас Сенахерив щапулин бици
20Амоцил вас Ишаягьица Хизкиягьихъе гьадинаб хабар битӀана:
«Гьадин лъазабулеб буго ГӀизраилалъул БЕТӀЕРГЬАН Аллагьас: „Ассириялъул пача Сенахеривил хӀакъалъулъ дуца гьабураб дугӀа Дица къабул гьабуна“.
21Гьале Гьесул рахъалъ БЕТӀЕРГЬАНАС абулеб буго:
„Сионалъул ясалъ#19:21 Сионалъул бикрияй яс, ялъуни Иерусалималъул яс – поэзиялъул мацӀалда Иерусалим абураб магӀна ккола гьелъул.
басра гьавила мун,
гьей елъанхъила дуда тӀад.
Лъутун унев дуда хадуб бетӀер кӀибикӀила
Иерусалималъул ясалъ.
22Мун лъиде рогьо балев, щив инжит гьавулев чи?
Лъида данде гьаракь борхараб дуца,
лъиде чӀухӀун валагьарав?
Хирияв ГӀизраилалъул Аллагьасде?!
23Чапарзабиги ритӀун
БетӀергьанасул цӀар инжит гьабуна дуца.
Дуца абуна:
‘Дирго гӀемерал чолгьакалгун
мугӀрузул тӀогьал кверде росана дица,
Ливаналъул бакълъабазде вахана.
Гьелъул руччарал рохьал кверде росун,
гьениса лъикӀал тӀаса рищун,
кедралъул гъутӀби ва накӀкӀигъутӀби къотӀана.
24Дица чияр ракьазда гъуялги рухъун,
гьезул лъим гьекъана.
Мисриялъул гӀорал
дица мерхьун ракъвазаруна’.
25Дуда рагӀун букӀинчӀищ,
Дица цебего, некӀсияб заманалдаго
гьедин хъван букӀараблъи? Гьанже
Дица гьеб тӀубазабуна –
гьел щула гьарурал шагьарал
чӀвадназде руссинаризе дудаса пайдаги босун.
26Гьезул жамагӀатал тату хун,
хӀинкъиялъ рухӀ лъугӀун, инжитлъиялъ чара бухӀун руго.
Гьел авлахъалда хер гӀадин,
цӀиял раккарал чӀимигӀал чӀорал гӀадин,
тӀохда бижун,
къватӀибе баккарабго бакъуца бухӀараб хер гӀадин руго.
27Амма дуца гьабулебщинаб, дур хьвада-чӀвади –
дур рахъалъ кинабго лъала Дида.
Дур рекӀелъ Дидехун бугеб ццинги лъала.
28Гьеб дур Дида данде бугеб ццинги
чӀухӀиги сабаблъун,
Дица дур къалазда кӀиликӀги бан,
кӀалдиб чӀолохъжоги бан,
вачӀарабго нух ккун
тӀадвуссинавила мун“.
29Хизкиягь, гьале дуе гӀаламат.
Исана нужеца кваназе буго хурзабахъ жибго бижараб нигӀмат,
тӀадияб соналъги гьелдасаги жибго бижараб нигӀмат.
Амма хариялъул хурзал рекье, хурисажо бакӀаре,
цӀолбол ахал гӀезаре – гьезул пихъ кванай.
30Ягьудал къавмалъул чӀаго хутӀараз цӀидасан ракьулъе кьалбал риччазе руго
ва гьезда пихъ бижизе буго.
31ЧӀаго хутӀаразул гьитӀинаб къокъа бачӀина Иерусалималдаса къватӀибе
ва хвалдаса рорчӀарал Сионалдаса гӀодоре лъугьина.
Гучал Аскаразул БЕТӀЕРГЬАНАС, Жиндирго халкъ Гьесие гӀемер хиралъиялъ, тӀубазабизе буго гьеб.
32Гьединлъидал, Ассириялъул пачаясул хӀакъалъулъ БЕТӀЕРГЬАНАС абулеб буго:
„Гьев гьаб шагьаралда жаниве лъугьине гьечӀо,
гьес речӀчӀараб чӀор гьенибе гӀунтӀизе гьечӀо.
Хъалхъаналгун гьесул рагъухъаби гьелда аскӀоре къазе гьечӀо,
гьеб сверун ккун, гьес буцурал разе гьечӀо.
33ВачӀарабго нух ккун тӀадвуссун ине вуго гьев,
гьаб шагьаралда жаниве лъугьине гьечӀо, –
БЕТӀЕРГЬАНАС лъазабулеб буго гьедин.
34Дирго цӀаралъе гӀоло ва Дир лагъ Давудие гӀоло
Дица цӀунила гьаб шагьар“».
Ассириялъул аскар къей
35Гьебго сордоялъ БЕТӀЕРГЬАНАСУЛ Малаик рещтӀун ассириязул нусиялда ункъоялда щуазарго чи чӀвана. Нахъисеб къоялъ радал рагъухъаби рорчӀидал, гьезда свера-тирун киса-кирего жаназаби ратана. 36Цинги Ассириялъул пача Сенахерив, рачун жиндирго рагъухъабигун, рокъове тӀадвуссун ана ва Ниневиялда чӀана гӀумру гьабун.
37Цо нухалъ жиндирго аллагь Нисроил рокъов гьесие сужда-тӀагӀат гьабулев вукӀаго, гьесул васал Адрамелехица ва Сарэцерица хечги къазабун чӀвана гьев, жалгоги Арараталъул ракьалде лъутана. Гьесул бакӀалда гьесул вас Эсархадон пачалъун вахъана.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023