4 Пачаби 15
15
Азариягь – Ягьудиялъул пача
1ГӀизраилалъул пачалъун Яровоам вахъун къоло анкьабилеб соналъ Ягьудиялда Амациягьил вас Азариягь пачалъун вахъана. 2АнцӀила анлъго сон барав чи вахъана гьев пачалъун ва кӀикъоялда анцӀила кӀиго соналъ пачалъи гьабуна гьес Иерусалималда. Гьесул эбелалда цӀар Ехолия букӀана, гьейги Иерусалималдаса гӀадан йикӀана. 3Гьесул эмен Амациягьицаго гӀадин, гьесги БЕТӀЕРГЬАНАСДА берцин бихьанщинаб гьабуна. 4Амма рорхалъабазда гьересиаллагьзабазе гӀибадаталъе рарал бакӀал риххизарун рукӀинчӀо жеги, ва халкъалъ гьенир къурбанал гьарулел ва кьеккенал рухӀулел рукӀана.
5БЕТӀЕРГЬАНАС барасалъул унти биччана гьесда тӀаде ва гӀумруялъул къоял лъугӀизегӀан гьеб унтиялъул гӀазаб гьесда тӀаса босичӀо; гьев батӀа гьабураб минаялъуве вахъана. Халкъалда тӀад кверщел гьаби ва пачалихъ нухда бачи пачаясул вас Ётамица тӀаде босана.
6Азариягьил пачалъиялъул хутӀарал лъугьа-бахъинал ва киналго гьес гьарурал ишазул хӀакъалъулъ хъван буго «Ягьудиялъул пачабазул тарих» абураб тӀехьалда. 7Азариягь хвана ва Давудил Шагьаралда жиндирго умумузда аскӀов хабалъ лъуна. Гьесул бакӀалда гьесул вас Ётам пачалъун вахъана.
Закариягь – ГӀизраилалъул пача
8Азариягь Ягьудиялъул пачалъун вахъун лъебералда микьабилеб соналъ Яровоамил вас Закариягь ГӀизраилалъул пачалъун вахъана ва анлъго моцӀалъ пачалъи гьабуна гьес Самариялда. 9Гьес жиндирго умумузда релълъун БЕТӀЕРГЬАНАСДА квешбихьанщинаб гьабуна – Наватил вас Яровамица ГӀизраилги къосинабун гьарурал мунагьаздаса дове-гъове кьуричӀо.
10Явешил вас Шалумица гъоркьчӀелги гьабун Кавал-Амалда чӀвана гьев ва гьесул бакӀалда пачалъун живго чӀана. 11Закариягьил пачалъиялъул хутӀарал лъугьа-бахъинал «ГӀизраилалъул пачабазул тарих» абураб тӀехьалда хъван руго. 12Гьедин тӀубана БЕТӀЕРГЬАНАС Егьуе кьураб рагӀи: «Ункъабилеб кьералде гӀунтӀун дур наслуялъул чагӀи рукӀине руго ГӀизраилалъул тахида», – ян абураб.
Шалум – ГӀизраилалъул пача
13Азариягь Ягьудиялъул пачалъун вахъун лъебералда ичӀабилеб соналъ Явешил вас Шалум ГӀизраилалъул пачалъун вахъана ва цо моцӀалъ пачалъи гьабуна гьес Самариялда. 14Гадил вас Менагьем вачӀана Тирзаялдаса Самариялде, гьенив Явешил вас Шалумги чӀван, живго гьесул бакӀалда пачалъун чӀана.
15Шалумил пачалъиялъул хутӀарал лъугьа-бахъинал ва гьес гьабураб гъоркьчӀелалъул хӀакъалъулъ хъван буго «ГӀизраилалъул пачабазул тарих» абураб тӀехьалда.
16Гьебго заманалда Менагьемица ТипсахӀ абураб шагьар кверде босана, ва гьелъул жамагӀатгун цадахъ гьеб тӀатӀала ккезабуна; Тирзаялде щвезегӀан гьеб шагьаралъул сверухълъиялда бугеб халкъги гъурана гьес, щайгурелъул гьез гьесие шагьаралъул каваби ричӀичӀелъул. Гьеб шагьаралъул лъимаде ругел руччабазул чахьалцин рихъана гьес.
Менагьем – ГӀизраилалъул пача
17Ягьудиялъул пачалъун Азариягь вахъун лъебералда ичӀабилеб соналъ ГӀизраилалда Гадил вас Менагьем пачалъун вахъана ва анцӀго соналъ пачалъи гьабуна гьес Самариялда. 18Гьес БЕТӀЕРГЬАНАСДА мекъи бихьанщинаб гьабуна. Наватил вас Яровамица ГӀизраилги къосинабун гьарурал мунагьаздаса кьуричӀо гьевги пачалъун вугебгӀан заманаялъ.
19Гьеб заманалда Ассириялъул пача Тиглатпаласар ГӀизраилалде тӀаде кӀанцӀана. Цинги Менагьемица гьесие азарго талант#15:19 1000 талант – гӀага-шагарго 36 тонна гӀарцул. гӀарцул кьуна, жиндирго хъатикь пачалъи щула гьабизе гьесдасан кумек щвезе гӀоло. 20Гьеб гӀарцул къадар гьес ГӀизраилазда тӀад лъуна. Ассириялъул пачаясе гӀарац бакӀаризе, бечедавщинав чиясухъа кӀикъоялда анцӀго шекел#15:20 50 шекел – гӀага-шагарго 600 гр. гӀарцул. тӀалаб гьабуна. Цинги Ассириялъул пача нахъе ана.
21Менагьемил пачалъиялъул хутӀарал лъугьа-бахъинал, киналго гьесул ишал – гьеб хъван буго «ГӀизраилалъул пачабазул тарих» абураб тӀехьалда. 22Менагьем хвана ва жиндирго умумузда аскӀов хабалъ лъуна. Гьесул бакӀалда гьесул вас ПекахӀиягь пачалъун вахъана.
ПекахӀиягь – ГӀизраилалъул пача
23Ягьудиялъул пачалъун Азариягь вахъун кӀикъоялда анцӀабилеб соналъ Менагьемил вас ПекахӀиягь ГӀизраилалъул пачалъун вахъана ва кӀиго соналъ пачалъи гьабуна гьес Самариялда. 24Гьес БЕТӀЕРГЬАНАСДА мекъи бихьанщинаб гьабуна. Наватил вас Яровамица ГӀизраилги къосинабун гьарурал мунагьазде мугъ рехичӀо гьес.
25Ремалиягьил вас ПекахӀ, гьевги ПекахӀиягьил аскаралъул бетӀер, пачаясда данде гъоркьанго ургъана. КӀикъоялда анцӀго чи гилгӀадиязулги вачун, цадахъ Ариягьгун ва Арговгун, Самариялда пачаясул кӀалгӀаялда бугеб щулалъиялда жанир ПекахӀиягьида тӀад речӀчӀана гьел. Гьенив ПекахӀиягьги чӀван гьев живго гьесул бакӀалда пачалъун вахъана. 26ПекахӀиягьил пачалъиялъул хутӀарал лъугьа-бахъинал, киналго гьесул ишал – гьеб хъван буго «ГӀизраилалъул пачабазул тарих» абураб тӀехьалда.
ПекахӀ – ГӀизраилалъул пача
27Азариягь Ягьудиялъул пачалъун вахъун кӀикъоялда анцӀила кӀиабилеб соналъ Ремалиягьил вас ПекахӀ ГӀизраилалъул пачалъун вахъана ва къого соналъ пачалъи гьабуна гьес Самариялда. 28БЕТӀЕРГЬАНАСДА мекъи бихьанщинаб гьабуна гьес. Наватил вас Яровамица ГӀизраилги къосинабун гьарурал мунагьаздаса кьуричӀо гьев.
29ГӀизраилалда ПекахӀ пачалъун вугел къояз Ассириялъул пача Тиглатпаласарица кверде росана Иён, Авел-Бет-Мааха, Янох, Кедеш, Хацор абурал шагьаралги, ГилгӀадалъул ва Галилеялъул ракьалги, тӀолабго Нафталил ракьги, гьениса гӀадамалги ана Ассириялде асирлъуде рачун. 30Элагьил вас Гьошеа гъоркьанго ургъана Ремалиягьил вас ПекахӀида данде. Гьес гьев тӀадги речӀчӀун чӀвана ва живго гьесул бакӀалда пачалъун вахъана. Азариягьил вас Ётам пачалъун вахъун къоабилеб сон букӀана гьеб.
31ПекахӀил пачалъиялъул хутӀарал лъугьа-бахъинал, киналго гьесул ишал – гьеб хъван буго «ГӀизраилалъул пачабазул тарих» абураб тӀехьалда.
Ётам – Ягьудиялъул пача
32Ремалиягьил вас ПекахӀ ГӀизраилалъул пачалъун вахъун кӀиабилеб соналъ Азариягьил вас Ётам Ягьудиялъул пачалъун вахъана. 33Къоло щуго сон барав чи вахъана гьев пачалъун ва анцӀила анлъго соналъ пачалъи гьабуна гьес Иерусалималда. Гьесул эбелалда цӀар Еруша букӀана, гьейги Цадокил яс йикӀана. 34Гьес, жиндирго эмен Азариягьицаго гӀадин, БЕТӀЕРГЬАНАСДА битӀун бихьанщинаб гьабуна. 35Амма рорхалъабазда гьересиаллагьзабазе гӀибадаталъе рарал бакӀал риххизарун рукӀинчӀо ва халкъалъ гьенир къурбанал гьарулел ва кьеккенал рухӀулел рукӀана. Ётамицайин БЕТӀЕРГЬАНАСУЛ Рукъалъул ТӀадехунаб абулеб каву цӀидасан бараб.
36Ётамил пачалъиялъул хутӀарал лъугьа-бахъинал, гьесул ишал – гьеб кинабго хъван буго «Ягьудиязул пачабазул тарих» абураб тӀехьалда. 37Гьев пачалъун вугел къоязин БЕТӀЕРГЬАНАС Ягьудиялда данде Сириялъул пача Рецин ва Ремалиягьил вас ПекахӀ тӀамизе байбихьараб. 38Ётам хвана ва Давудил Шагьаралда жиндирго умумузда аскӀов хабалъ лъуна. Гьесул бакӀалда гьесул вас Ахаз пачалъун вахъана.
Currently Selected:
4 Пачаби 15: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
