4 Пачаби 16

Ахаз – Ягьудиялъул пача

1Ремалиягьил вас ПекахӀ пачалъун вахъун анцӀила анкьабилеб соналъ Ягьудиялда Ётамил вас Ахаз пачалъун вахъана. 2Къого сон барав чи вахъана Ахаз пачалъун ва анцӀила анлъго соналъ пачалъи гьабуна гьес Иерусалималда. Жиндирго умумузул чи Давудида релълъарав вахъинчӀо гьев, гьелъул гӀаксалда, БЕТӀЕРГЬАН Аллагьасда рихарабщинаб гьабуна. 3ГӀизраилалъул пачабазул нухккун хьвадана гьев, ва БЕТӀЕРГЬАНАС жидеда цереса нахъе гъурал халкъазул къосарал ишаздаса мисалги босун, жиндирго васгицин къурбаналъе вухӀана. 4Гьес гохӀ-щобазда, гьересиаллагьзабазе как-диналъе рарал бакӀазда ва щибаб гӀаркьахараб гъотӀода гъоркь къурбанал хъолел ва кьеккен бухӀулеб букӀана.

Ахазица ассирияздасан кумек гьари

5Гьеб заманалда Сириялъул пача Рецинги ГӀизраилалъул пача, Ремалиягьил вас ПекахӀги Иерусалималде тӀаде кӀанцӀана ва гьеб сверун ккуна, амма Ахаз кверде восизе кӀвечӀо. 6Гьел къояз Сириялъул пача Рециница Элат ягьудиязухъа нахъе бахъун сириязул кверщаликье ккезабуна, гьениса ягьудиялги нахъе къотӀана. Элат сирияз ккуна, жакъа къоялъги гьезул чӀел гьениб буго.

7Ахазица Ассириялъул пача Тиглатпаласарихъе вакилзаби ритӀун ана гьадинаб ругьелгун: «Дун дуе ритӀухъав дур лагъ вуго. ВачӀа дие кумекалъе, диде тӀаде кӀанцӀун ругел, Сириялъулги ГӀизраилалъулги пачабаздаса дун хвасар гьавизе».

8БЕТӀЕРГЬАНАСУЛ Рокъоб ва пачаясул кӀалгӀаялда батарабщинаб гӀарац-меседги битӀана Ахазица Ассириялъул пачаясе сайгъаталъе. 9Ассириялъул пачаяс гьеб рагӀи къабул гьабуна ва Дамаскалде тӀаде кӀанцӀун, гьеб кверде босана. Гьес гьелъул жамагӀат асирлъуде Киралде бачун ана, Рецинги чӀвана.

Мукъадасаб Рокъоб Ахазица хиса-баси гьаби

10Цинги Ахаз Дамаскалде Ассириялъул пача Тиглатпаласаргун дандчӀвазе ана. Дамаскалда гьесда бихьана гьезул къурбаналъе бакӀ, ва кашиш Уриягьихъе гьелъул суратги, рагӀа-ракьанде щун гьеб гьабизе кколеб куцалъул малъа-хъваялги ритӀана. 11Кашиш Уриягьица, Дамаскалдаса Ахазица ритӀун рачӀарал киналго малъа-хъваязда рекъон, цӀияб къурбаналъе бакӀ бана ва пача тӀадвуссун вачӀиналде бан рагӀалде бахъинабуна гьеб. 12Дамаскалдаса тӀадвуссун вачӀиндал, пачаясда бихьана къурбаналъе бакӀ хӀадурун букӀин ва гьес гьелда тӀад къурбанал тӀоритӀана: 13къурбаналъе хӀайванал ва ролъул сайгъатал рухӀана гьенир, чагъиралъул сайгъаталги, ракълил къурбаналъе хъурал хӀайваназул биги гьелда тӀаде щвана. 14БЕТӀЕРГЬАНАСУЛ мазгарул къурбаналъе бакӀ, БЕТӀЕРГЬАНАСУЛ Рукъалда ва цӀияб къурбаналъе бакӀалда гьоркьоб ккана. Гьес гьеб гьениса нахъеги бахъун цӀияб къурбаналъе бакӀалъул хьибилалде, шималияб рахъалдехун хъурщизабуна.

15Хадуб Ахазица кашиш Уриягьие буюрухъ кьуна:

«Гьаб кӀудияб цӀияб къурбаналъе бакӀалда рухӀе гьанжеялдаса нахъе рогьалил тӀуран рухӀулел къурбаналги бакъанигӀужалъул ролъул сайгъаталги. Гьединго пачаясул ва тӀолабго халкъалъул рахъалъ рогьалил тӀуран рухӀулел къурбаналги, халкъалъул чагъиралъул сайгъаталгун цадахъ бакъанигӀужалъул ролъул сайгъаталги гьаб бакӀалда тӀуразаре. Киналго къурбаназул биги гьалда тӀаде щвай. Мазгарул къурбаналъе бакӀалъе гьабизе жоялда тӀад дунго ургъила».

16Ахаз пачаяс абухъе гьабуна Уриягьица кинабго. 17Цинги Ахазица Мукъадасаб Рукъалъул гьаказул горал рекана ва гьезда тӀаса тӀарсал нахъе росана. «Ралъад» абулеб хӀавуз тӀад лъун рукӀарал мазгарул оцалги нахъе росана гьес ва ганчӀил кьучӀги гьабун, гьелда тӀад лъуна гьеб. 18Гьединго, Ассириялъул пачаясда берцин вихьизе гӀоло, шамат къоялъ хӀалтӀизабизе халкъалъ бан букӀараб тӀокъоги биххана гьес ва БЕТӀЕРГЬАНАСУЛ Рокъове жаниве лъугьине пачаясе батӀаго гьабураб кавуги нахъе гьабуна.

Ахазил хвел

19Ахазил пачалъиялъул хутӀарал лъугьа-бахъинал, гьес гьарурал ишал – гьеб кинабго хъван буго «Ягьудиязул пачабазул тарих» абураб тӀехьалда. 20Ахаз хвана ва Давудил Шагьаралда жиндирго умумузда аскӀов хабалъ лъуна. Гьесул бакӀалда гьесул вас Хизкиягь пачалъун вахъана.

Currently Selected:

4 Пачаби 16: АварАК

Highlight

Copy