4 Пачаби 11
11
Аталияца Давуд пачаясул наслу тӀубан тӀагӀинабизе хӀалбихьи
1Ахазиягьил эбел Аталияда жиндирго вас хун вукӀин лъайдал, гьелъ тӀолалго пачаясул ирсилал буюрухъги кьун чӀвана. 2Амма Егьорамил яс, Ахазиягьилги яц Егьошеваца Ахазиягьил вас Егьоашги гьесул рахьдал эбелги, чӀвазе къотӀарал пачаясул хъизан-къаялъул чагӀазда гьоркьоса балъго нахъеги рачун, бусен-къай лъолеб нахъарокъор рахчана. Гьедин вахчана гьев Аталиядаса, ва гьев чӀаго хутӀана. 3БЕТӀЕРГЬАНАСУЛ Рокъов вахчана Егьошеваца гьев анлъго соналъ; пачалъиялъул тахида Аталия йикӀана.
Аталия пачалъиялдаса рехи
4Аталия пачалъун яхъун анкьабилеб соналъ ЕгьоядагӀица#11:4 ЕгьоядагӀ – Аталиял заманалда БетӀергьанасул Рукъалъул кӀудияв кашишлъун вукӀарав чи. пачаясул рорчӀухъабазул нусилбутӀрул ва кӀалгӀаялъул хъаравулзаби, хадур чагӀиги ритӀун, жиндихъего БЕТӀЕРГЬАНАСУЛ Рокъоре ахӀана. Гьес гьезулгун къотӀи-къай гьабуна, БЕТӀЕРГЬАНАСУЛ Рокъоб гьезда гьаги базабуна. Цинги гьес гьезда пачаясул вас вихьизавуна, 5гьезие гьадинал тӀадкъаялги кьуна:
«Гьале нужеца гьабизе кколеб жо: шамат къоялъ хъулухъалде рахъунезул лъабил бутӀаялъ пачаясул кӀалгӀа цӀуне, 6кӀиабилеб лъабил бутӀаялъ – Сур абураб каву, ва ахирисеб лъабил бутӀаялъ РорчӀухъабазул Кавуялдаса добехун бугеб каву цӀуне. Ирга гьабун кӀалгӀаялъе хъаравуллъи гьабе нужеца. 7Шамат къоялъ рокъоре унезул кӀиго къокъа пача цӀунизе БЕТӀЕРГЬАНАСУЛ рокъор чӀезе ккола. 8Нуж ярагъги кодоб ккун, Егьоаш пачаясда сверун гор гьабун чӀа ва нужеда аскӀове къаравщинав чи чӀвай. Гьев ара-аралъуве ун пачаясда аскӀоса кьуруге».
9НусилбутӀруз кашиш ЕгьоядагӀица абухъе гьабуна кинабго. Гьел киналго – шамат къоялъ хъулухъалде рахъунелги, шамат къоялъ хъулухъалдаса рокъоре унелги – кашиш ЕгьоядагӀихъе рачӀана, цадахъ жидерго чагӀиги рачун. 10Гьес нусилбутӀрузе БЕТӀЕРГЬАНАСУЛ рокъоса росун Давудил рукӀарал хъалхъаналги хучдулги рикьана. 11Ярагъги кодоб ккун, къилбаялъул рахъалдаса шималияб рахъалде щвезегӀан, къурбаналъе бакӀги, БетӀергьанасул Рукъги жанибеги бачун, пача цӀунизе эхетана рорчӀухъаби.
12Цинги ЕгьоядагӀица къватӀиве вачун вачӀана пачаясул вас; гьес гьесул ботӀрода тажги лъуна, пачалъиялъул къотӀи тӀад хъвараб кагъатги кьуна гьесухъе ва гьев пача вугилан ахӀана. Цинги гьесда зайтуналъул нах бахана. ЧӀвалаго хъатгун ахӀи-хӀуралда букӀана тӀолабго халкъ: «БетӀерчӀахъаяв пача! Дур гӀумру халалъаги!» – ян ахӀулеб букӀана гьез.
13РорчӀухъабазулгун халкъалъул ахӀи-хӀур рагӀун, Аталия гьезухъе БЕТӀЕРГЬАНАСУЛ Рокъое йилълъана. 14Гьениб, гьезул гӀадаталда рекъон, хӀобода цеве эхетун цӀияв пача вихьана гьелда. Рагъул церехъабиги, накъирачагӀиги рукӀана гьесда сверухъ ракӀарун, ва тӀолалго гӀадамал рачулаго накъирабигун кӀудияб рохел-разилъигун ахӀи-хӀуралда рукӀана. Аталия цинги жиндаго тӀад букӀараб тӀасанретӀелги бихъун: «Хияналъи! Хияналъи!» – ян ахӀдана.
15Кашиш ЕгьоядагӀица нусилбутӀрузда абуна: «Рукъ тун къватӀие, рорчӀухъабазул кьер тун доехун яче гьей, ва гьелда цадахъ аравщинав чи хочоца чӀвай», – ян.
БЕТӀЕРГЬАНАСУЛ Рокъой жаний чӀвазе бегьуларин гьейин лъазабун букӀана кашишас.
16Гьей кквезеги ккун, пачаясул кӀалгӀаялде чуял рачунеб кавудухъа жаниеги ячун, гьений чӀвана.
17ЕгьоядагӀица БЕТӀЕРГЬАНАСДАГИ, пачагун халкъалдаги гьоркьоб, гьел БЕТӀЕРГЬАНАСЕ мутӀигӀал рукӀине ругин абураб къотӀи гьабуна. Пачаясда ва халкъалда гьоркьобги гьабуна гьес къотӀи-къай. 18Хадуб тӀолабго пачалихъалъул гӀадамал БагӀалил мукъадасаб рокъоре рилълъана ва гьеб щущахъ базабуна. Гьез гьениб букӀараб къурбаналъе бакӀги, гьересиаллагьзабиги гъурана ва гьеб къурбаналъе бакӀалда цеве вачун БагӀалил кашиш Маттанги чӀвана.
Цинги, БЕТӀЕРГЬАНАСУЛ Рукъги рорчӀухъабазда тӀад къан тун, 19ЕгьоядагӀицаги, нусилбутӀрузги, пачаясул рорчӀухъабазги, тӀолабго халкъгун цадахъ БЕТӀЕРГЬАНАСУЛ Рокъоса къватӀиве вачана пача ва РорчӀухъабазул Кавуги бахун, пачаясул кӀалгӀаялда жанире рилълъана. Гьенив пача жиндирго бакӀалда пачалъиялъул тахида гӀодов чӀезавуна, 20ва тӀолабго халкъ кутакалда разилъана. Пачаясул кӀалгӀаялда хочоца Аталия чӀван хадуб шагьаралда хӀалхьи ккана.
Егьоаш – Ягьудиялъул пача
21Пачалъун вахъаравго Егьоашица анкьго сон бан букӀана.
Currently Selected:
4 Пачаби 11: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
