Коринфиязухъе кӀиабилеб кагъат 3

3 бетӀер

ЦӀияб къотӀиялъул Нур

1Ниж щал чагӀияли нужеда гьанжеги бихьизабизейищ ниж кӀалъалел ругел? Цогидазе гӀадин, нижее хӀажат бугебищ ниж реццарал кагътал я нужехъе хъвазе, я нужеца хъван рачӀине?

2Нуж руго – ниж реццараб кагъат! Нижер ракӀазулъ хъван буго гьеб, киназдаго лъазе, киназго цӀализе! 3Щакъиялъ гуреб, хӀакъав Аллагьас битӀараб РухӀалдалъун МасихӀица хъван, нижеца босун бачӀараб кагъатлъун ругеллъи бихьизабуна нужеца. ГанчӀил къаназда гуреб, инсанасул рекӀеда хъвараб кагъатин гьеб.

4МасихӀидалъун Аллагьасде кӀудияб божи-иман бижун буго нижер рекӀелъ. 5Сундуениги ярагьунел чагӀи ниж ругилан абизесеб гьунар гьечӀо нижелъ, кинабго Аллагьасдасан щвараб буго. 6Гьес лъугьинаруна ниж ЦӀияб къотӀиялъе хъулухъ гьабизе ярагьунеллъун. ЦӀияб къотӀиялъул аслу-кьучӀ хӀарпазулъ гуро бугеб, РухӀалъулъ буго. ХӀарпалъ хвезарула, РухӀалъ чӀаголъизарула!

7Къанун хъван букӀана ганчӀил къаназда. Аллагьас гьеб рещтӀинабулеб мехалъ илагьияб Нур гвангъана, гьеб дагьабго заманаялъ загьирлъун букӀаниги, Исраилил халкъалда кӀвечӀо гьеб Нуралъ гвангъизабураб Мусал гьурмахъ ралагьизе. Хвалде рачунеб Къанунгун цадахъ рещтӀараб Нур гьединаб гвангъараб букӀараб батани, 8Илагьияб РухӀалъ чӀезабураб къотӀиялъул Нур кигӀан кутакабха букӀинеб? 9ТамихӀалде рачунеб Къанунгун цадахъ рещтӀараб Нур гьединаб гвангъараб букӀараб батани, инсан ритӀухъ гьавулеб РухӀалъул Нур кигӀан кутакабха букӀинеб? 10Кидаялиго Къанунгун цадахъ рещтӀараб Нур гьанже тӀубанго тӀагӀун буго, гьелдасаги гӀемерго гвангъараб Нур хӀакълъунго ракьалде рещтӀун бугелъул! 11Дагьабго заманаялъе рещтӀараб Нур гвангъун букӀараб батани, гьелдаса гӀемерго цӀикӀкӀун гвангъула абадияб Нур.

12Гьеб киналдего хьул лъезе рес бугелъул, рагьун ва хӀинкъичӀого кӀалъала ниж. 13Ссун унеб ва цебеса тӀагӀунеб Нур Исраилил халкъалда бихьичӀого букӀине гьумер пардавалъ бахчарав Муса гӀадин гурелха. 14РакӀбицалъун букӀана гьезул. Жакъа къоялде щвезегӀанги, НекӀсияб къотӀиялъул ТӀухьдул цӀалулеб мехалъ, гьеб пардав букӀуна гьезул гьурмазда цебе. ВачӀун МасихӀицалъидал гьеб бахъун рехулеб. 15Жакъа къоялде щвезегӀанги, Мусал Къанун цӀалулеб мехалъ, гьеб пардавалъ бахчун букӀуна гьезул ракӀги. 16Амма инсан БетӀергьанасдехун вуссиндал, гьес бахъун рехула гьеб. 17Гьаниб БетӀергьан абураб рагӀул магӀна ккола Илагьияб РухӀ. Аллагьасдасан бачӀараб РухӀ бугеб бакӀалда эркенлъиги букӀуна! 18Пардавалъ гьумер бахчичӀого, матӀуялъуре гӀадин, ралагьула ниж БетӀергьанасул гвангъараб Нуралъухъ. Нижелъ гьеб Нур дагь-дагьккун гвангъидал, нижги лъугьуна гьесул сипатлъун. Гьеб кинабгоги лъугьуна жинда РухӀилан абулев БетӀергьанасдасан.

Currently Selected:

Коринфиязухъе кӀиабилеб кагъат 3: АварАК

Highlight

Copy