3 Пачаби 20
20
Бен-Гьадад рагъде къачӀай
1Сириялъул пача Бен-Гьададица аскар данде бакӀарана. Гьесул кверщаликь вугев лъебералда кӀиго пачагун, гьезул чуялгун ва чолгьакалгун цадахъ вахъун, Самария сверун ккуна ва гьелда данде рагъ байбихьана. 2Гьес шагьаралде Ахавихъе вакилзаби ритӀана гьадинаб хабаргун: 3«Гьадин абулеб буго Бен-Гьададица: „Дур гӀарацги меседги – дир, дур руччабиги лъималги – дир“».
4ГӀизраилалъул пачаяс жаваб кьуна: «Дир бетӀергьан пача, гьеб дуца абухъе, дунги дир кинабго бугебщинабги дур ккола», – ян.
5Вакилзаби рачӀана нахъеги ва гьез абуна: «Дица духъе чагӀи ритӀун рукӀана дур гӀарац-меседги, дур руччаби-лъималги тӀалаб гьарун. 6Гьелда тӀадеги, дица дир чукъби ритӀизе руго метер гьаб гӀужалъ, дур кӀалгӀаялда ва дур цересел чагӀазул рукъзабахъ чӀухь базе. Гьез жиндир берда берцин бихьараб багьаябщинаб жоялде квер битӀизе буго ва цадахъ босун ине буго».
7Цинги ГӀизраилалъул пачаяс улкаялъул киналго кӀудиял чагӀи данде ахӀана ва гьезда абуна: «Балагье цо, гьав чияс питна балагьулеб бугеб куц! Дос дир гӀарац-месед ва руччаби-лъимал тӀалаб гьаридал, дица инкар гьабичӀо досие».
8Цинги киналго кӀудиял чагӀаз гьесда абуна: «Мун досухъ гӀенеккуге ва гьес тӀалаб гьабуралдаги воре тӀад рекъоге».
9Цинги гьес Бен-Гьададил вакилзабазда абуна: «Дир бетӀергьан пачаясда абе: „ТӀоцебесеб нухалъ дуца тӀалаб гьабурабщинаб жо дица тӀубазабила, амма гьаб жо гьабизе кӀоларо“, – ян».
Гьел ана ва жаваб Бен-Гьададихъе щвезабуна. 10Гьебмехалъ Бен-Гьададица гьадинаб хабар битӀана Ахавихъе: «Биччанте аллагьзабаз кьварараб тамихӀ гьабизе дие, дир жив-жив чиясе цо-цо дангъура цӀезе гӀураб рахъуцин Самариялъул хутӀани!»
11ГӀизраилалъул пачаяс жаваб гьабуна: «Гьесда абе: „Гьанжего гьанже къолден ретӀунев вугев рагъухъан, бергьенлъиги босун гьеб тӀаса рехулев чи гӀадин веццардуге“, – ян».
12Бен-Гьадад пачабигун цадахъ чадразухъ гьекъолдулев вукӀана гьеб жаваб гьесда рагӀидал. Цинги гьес жиндирго рагъухъабазе буюрухъ кьуна: «Рагъде къачӀай!»
Гьел шагьаралде тӀаде кӀанцӀизе хӀадурлъана.
Сириязул тӀоцебесеб къей
13Гьебго заманалда ГӀизраилалъул пача Ахавихъе вачӀана цо авараг ва гьес абуна: «Гьадин лъазабулеб буго БЕТӀЕРГЬАНАС: „Доб кӀудияб аскар бихьулищ дуда? Жакъа Дица гьеб духъе кьела ва дуда Дун БЕТӀЕРГЬАН вукӀин бихьила“».
14«Гьеб иш лъица тӀубазабизе бугеб?» – ин цӀехана Ахавица. Аварагас жаваб гьабуна: «„Сардаразул нукарзабаз“#20:14 Сардаразул нукарзаби – гьел кколаан махщел цӀикӀкӀарал рагъухъаби., – ин абулеб буго БЕТӀЕРГЬАНАС».
«Лъица байбихьизе бугеб рагъ?» – ин цӀехана гьес. «Дуца», – ян жаваб кьуна аварагас.
15Цинги Ахавица сардаразул нукарзаби ахӀана, кӀинусиялда лъебералда кӀиго чи. Хадуб гьес ракӀарана хутӀарал гӀизраилал – кинавниги анкьазарго чи. 16Гьел къватӀире рахъана къалъул гӀужалда, Бен-Гьададги лъебералда кӀиялго гьесулгун къотӀиялда ругел пачабиги жидерго чадразухъ мехтизегӀан гьекъон рукӀадго. 17Сардаразул нукарзабазул къокъа тӀоцебесеб кьералда къватӀире рахъана.
Бен-Гьададица ахӀвал-хӀал лъазабизе ритӀарал рорчӀухъабаз Самариялдаса къватӀире чагӀи рачӀунел ругин лъазабуна.
18«Рекъелгун рачӀунел ратаниги, рагъгун ратаниги, гьел чӀаго кверде росе», – ян лъазабуна гьес.
19Цере-цере сардаразул нукарзабигун, гӀизраилазул аскар шагьаралдаса къватӀибе лъугьана. 20Рагъ байбихьана, сириял лъутанхъизе лъугьана. ГӀизраилал гьезда хадур рекерана, амма Сириялъул пача Бен-Гьадад чодеги кӀанцӀун, цогидал чотӀахъабигун цадахъ лъутун хвасарлъана. 21ГӀизраилалъул пачаяс чотӀахъабиги чолгьакалги гъурана; сириязул хӀур гьабуна пачаяс гьеб рагъулъ.
22Гьебмехалда ГӀизраилалъул пачаясухъе авараг вачӀана ва гьес абуна:
«Ярагъ къачӀай ва рагъухъаби хӀадур гьаре, щайгурелъул тӀадияб ихдалил гӀужалда Сириялъул пача цӀидасан дуде тӀаде кӀанцӀизе вуго».
Сириязул кӀиабилеб къей
23Сириялъул пачаясул божарал чагӀаз гьадинаб гӀакълу кьуна гьесие:
«Дозул Аллагь вуго мугӀрузул Аллагь. Гьелъин дол нилъедаса къуватал ругел. Амма нилъ гьелгун расалъиялда рагъани, гьайгьай, нилъер къуват цӀикӀкӀине буго. 24Цоги гьадинаб жо гьабе: киналго пачабиги нахъе гьарун, аскаразда тӀад цогидал бутӀрул лъе гьезул бакӀалда. 25Жеги, доб рагъулъ хвараб аскаралъул бакӀалда, гьелдаго релълъараб, добго къадаралда цӀияб аскар бакӀаре – чол бакӀалда чу, чолгьакил бакӀалда чолгьоко – нилъ гӀизраилалгун расалъиялда рагъизе рукӀине. Цинги нилъ, гьайгьай, доздаса бергьуна».
Гьев гьезда тӀад рекъана ва гьедин гьабуна.
26Хадусеб ихдалил гӀужалда Бен-Гьададица сириял данде ракӀарана ва ГӀизраилгун рагъ гьабизе Апекалде къокъана. 27ГӀизраилалги данде ракӀарана ва квен букӀа, ярагъ букӀа, хӀажатабщинабги цадахъ босун сириязда данде рахъана. Гьел кӀиго къокъаялдеги рикьун, сириязда дандритӀун чӀана; гьезул кӀиго къокъа релълъунаан кӀиго гьитӀинаб цӀаназул рехъада, сириязин абуни тӀолабго сверухълъиго цӀезабун букӀана.
28Аллагьасул лагъ вачӀана ГӀизраилалъул пачаясухъе ва гьес абуна:
«Гьадин абулеб буго БЕТӀЕРГЬАНАС: „Сирияз МугӀрузул Аллагь вугин БЕТӀЕРГЬАН, амма расалъиялъул Аллагь гурилан абуралъухъ, Дица гьаб кӀудияб бо духъе кодобе кьела ва нужеда лъан букӀина Дун вугеблъи БЕТӀЕРГЬАН“».
29Анкьго къоялъ цоцада дандритӀун рукӀелалги гьарун чӀана гьел ва анкьабилеб къоялъ рагъ байбихьана. Цо къоялда жаниб ГӀизраилаз сириязул нусазарго рагъухъан чӀвана. 30ХутӀарал Апек шагьаралде тӀурана ва гьениб гьезул къоло анкьазарго чиясда тӀадеги къед биххана. Бен-Гьададги тӀурана шагьаралде ва хъалаялъул нахъарокъов вахчана.
Ахавица Бен-Гьадад чӀаго тей
31Бен-Гьададил божарал чагӀаца абуна гьесда: «ГӀенекке, нижеда рагӀана ГӀизраилазул пачаби гурхӀел бугел ругилан. Изну кье нижее, хӀебтил гӀабабиги тӀад ретӀун ботӀрода кваралги ран#20:31 ХӀебтил гӀаба тӀад ретӀунаан рекӀекълъи загьир гьабизе. БотӀрода кварал раялъул магӀна батизе бегьула гьел жалго кверде рачӀунел ругин абураб. ГӀизраилалъул пачаясухъе ине. Щиб лъалеб, гьес дур гӀумру цӀунизе бегьула».
32ТӀад хӀебтил гӀабабиги ретӀун, кваралги ботӀрода ран гьел ГӀизраилалъул пачаясухъе рачӀана ва гьез абуна: «Дур лагъ Бен-Гьададица абулеб буго: „Гьарула дуда, чӀаго те дун“, – ин».
Пачаяс жаваб гьабуна: «Гьев жеги чӀагойищ вугев? Гьев дир вац вуго».
33Вакилзабаз гьеб рагӀи лъикӀалъе батилин пикру гьабуна ва хӀалакун гьелда тӀад рекъана: «У, дур вац вуго Бен-Гьадад!» – ин абуна гьез.
«Дихъе ваче гьев», – ин абуна пачаяс. Бен-Гьадад гьесухъе вачӀаравго Ахавица гьев жиндирго чолгьакиде вахинавуна.
34«Дир инсуца дур инсухъа рахъарал шагьарал нахъруссинарила дица, – ян кӀалъана Бен-Гьадад. – Дуего базаралги рагье Дамаскалда, дир инсуца Самариялда рагьарал гӀадин».
Ахавица абуна: «Гьединаб къотӀигун виччала дица мун». Гьесулгун къотӀи-къайги гьабун гьес гьев виччан тана.
Ахавие къотӀараб хӀукму
35БЕТӀЕРГЬАНАСУЛ амруялдалъун цо аварагас цогидасда абуна: «Гьарула, кьабе дида». Амма гьес инкар гьабуна. 36Цинги аварагас абуна: «Дуца БЕТӀЕРГЬАНАСУХЪ гӀин тӀамичӀелъул, гьаниса къватӀиве вахъаравго, гъалбацӀалъ чӀвазе вуго мун». Гьев чи гьениса нахъе аравго кӀанцӀун дандеги бачӀун гъалбацӀалъ чӀвана гьев. 37Аварагас цоги чи валагьана ва гьесда абуна: «Гьарула, кьабе дида», – ян.
Гьев чияс гьев кьабун лъукъ-лъукъана. 38Хадуб гьенисаги вилълъун пача вачӀинегӀан нухда вахъун чӀана гьев авараг. Беразде жоги рехун гьес жиндирго гьумер бахчана. 39Пача аскӀоса унев вукӀаго гьев гьесде ахӀдана:
«Дун, дур лагъ рагъул коронив вукӀана. Цо рагъухъан вачӀана дида аскӀове асирги вачун, ва гьес дида абуна: „Гьав чиясе хъаравуллъи ккве. Гьав лъутани, гьасул бакӀалда мун хвезе вуго, ялъуни цо талант#20:39 Талант – гӀага-шагарго 36 кило. гӀарцул кьезе ккезе буго дуца“. 40Амма дур лагъ доб-гъобалъул тӀалабалда вукӀаго, асир тӀагӀана».
«Дурго кӀалалъ бицанагури дуего къотӀулеб хӀукму», – ян абуна ГӀизраилалъул пачаяс.
41Гьебмехалъ аварагас гьурмадаса жо бахъун нахъе рехана ва ГӀизраилалъул пачаясда гьев аварагзабазул цояв вукӀин лъана. 42Гьес пачаясда абуна: «Гьадин абулеб буго БЕТӀЕРГЬАНАС: „Дица хвезе къотӀарав чи виччан тана дуца. Гьединлъидал мун хвезе вуго гьесул бакӀалда ва дур халкъ – гьесул халкъалъул бакӀалда“».
43Кьерхун гьумергун ва ццидал цӀун ракӀгун вуссана ГӀизраилалъул пача Самариялде жиндирго кӀалгӀаялде.
Currently Selected:
3 Пачаби 20: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
