3 Пачаби 15
15
Авиям – Ягьудиялъул пача
1Наватил вас Яровам ГӀизраилалъул пачалъун вахъун анцӀила микьабилеб соналъ Авиям Ягьудиялъул пачалъун вахъана. 2Лъабго соналъ пачалъи гьабуна гьес Иерусалималда. Гьесул эбелалда цӀар букӀана Мааха, гьейги йикӀана Авессаломил ясалъул яс.
3Жиндирго инсуца гьарулел рукӀарал хӀарамал ишал течӀо гьесги ва гьесул кӀудияв эмен Давуд гӀадин тӀуван жиндирго БЕТӀЕРГЬАН Аллагьасе мутӀигӀав вукӀинчӀо гьев. 4БукӀаниги, БЕТӀЕРГЬАНАС Давудие гӀоло, гьесул агьлуялъул чирахъ свине течӀо Иерусалималда; гьесул бакӀалда гьесул наслуялъул чи тана, ва Иерусалим щула гьабуна. 5Давудица кидаго БЕТӀЕРГЬАНАСДА лъикӀ бихьараб гьабуна ва хитияв Уриягьилгун ккараб хутӀун цогидабщиналъулъ гӀумруялъго Гьесул амруяздаса гьев кьуричӀо.
6Авиямил пачалъиялъул заманалдаги Реховамида ва Яровамида гьоркьобго байбихьараб рагъ къотӀичӀо. 7Авиямил пачалъиялъул цогидал лъугьа-бахъинал ва гьес гьарурал киналго ишал хъван руго «Ягьудиязул пачабазул тарих» абураб тӀехьалда. Авиямидаги Яровамидаги гьоркьоб рагъ букӀана. 8Авиям хвана ва Давудил Шагьаралда жиндирго умумузда аскӀов хабалъ лъуна. Гьесул бакӀалда гьесул вас Аса пачалъун вахъана.
Аса – Ягьудиялъул пача
9ГӀизраилалъул пача Яровам пачалъун вахъун къоабилеб соналъ Аса Ягьудиялъул пачалъун вахъана. 10КӀикъоялда цо соналъ пачалъи гьабуна гьес Иерусалималда. Гьесул кӀодоэбелалда цӀар букӀана Мааха – Авессаломил ясалъул яс. 11Асаца, гьесул кӀудияв эмен Давудица гӀадин БЕТӀЕРГЬАНАСДА берцин бихьараб гьабуна. 12Гьес бихьин-хъахӀбаби улкаялдасаго къватӀире рачахъана ва киналго гьесул умумуз гьарурал аллагьзабиги нахъе рехана. 13Жиндирго кӀодоэбел Маахацин эбел-бика абураб цӀарудаса махӀрум гьаюна гьес, гьелъ хъубаб Ашерал хӀуби эхетаралъухъ. Асаца нахъе бахъана гьеб хӀуби ва Кедрон абулеб расалъиялда бухӀана гьеб. 14Гьев гӀумруялъго ракӀ-ракӀалъ БЕТӀЕРГЬАНАСЕ ритӀухъавлъун вукӀана, амма гохӀ-щобазда ругел мукъадасал бакӀал щущазаричӀо тана. 15БЕТӀЕРГЬАНАСУЛ Рокъоре жиндирго ва гьесул инсул рахъалъан сайгъат гьарун хириял тӀагӀелал, гӀарац ва меседги кьуна гьес.
16Асадаги ГӀизраилалъул пача Баашадаги гьоркьоб гьезул пачалъи бугебгӀан заманалда рагъ букӀана. 17Цо пуланаб заманалда ГӀизраилалъул пача Бааша Ягьудиялъул ракьалде тӀаде кӀанцӀана ва Ягьудиялъул пача Асал ракьалде, я жаниве, я къватӀиве щивго чи вачӀинчӀого вукӀине, Рама шагьар щула гьабуна. 18Гьебмехалда Асаца кинабго БЕТӀЕРГЬАНАСУЛ рокъоб ва жиндирго кӀалгӀаялда батарабщинаб гӀарацги меседги бакӀарун, жиндирго божарал чагӀазухъе кьуна ва Тавримонил вас, Хезионил васасул вас, Дамаскалда пачалъун вукӀарав Сириялъул пача Бен-Гьададихъе битӀана гьадинаб хабаргун:
19«Биччанте нилъеда гьоркьоб дирги дурги инсуда гьоркьоб букӀараб гӀадаб къотӀи букӀине. Гьале дица дуе сайгъаталъе гӀарацги меседги битӀулеб буго. ГӀизраилалъул пача Баашагун дур бугеб къотӀи хвезабе, гьев дир ракьалдаса нахъе ине вукӀине».
20Бен-Гьададица Асал рагӀи къабул гьабуна ва жиндирго аскаразул бутӀрул ритӀун ана ГӀизраилалъул шагьаразде тӀаде кӀанцӀизе. Гьез Иён, Дан, Авел-Бет-Мааха абулел шагьарал ва тӀолабго Нафталил ракьгун цадахъ Киннереталъул ракь-мухъги кверде босана. 21Гьеб хабар рагӀидал Баашаца, Рама щулалъизабизе гьарулел хӀалтӀабиги къотӀизарун, Тирзаялде бухъизабуна. 22Асаца тӀолалго Ягьудиязе буюрухъ кьуна Рамаялдаса Баашаца хӀалтӀизабулеб букӀараб цӀулги гамачӀги щибго течӀого бакӀарун нахъе босеян. Аса пачаяс Буняминил ракьалда бугеб Гева ва Мицпа абулел шагьарал щула гьаризе хӀалтӀизабуна гьеб.
23Асал пачалъиялъул цогидал лъугьа-бахъинал, гьес рарал шагьаралги рикӀкӀун, киналго гьес гьарурал ишал – гьеб хъван буго «Ягьудиялъул пачабазул тарих» абулеб тӀехьалда. Амма херлъараб мехалъ гьесул хӀатӀазул унтиги букӀана. 24Аса хвана ва Давудил Шагьаралда жиндирго умумузда аскӀов хабалъ лъуна. Гьесул бакӀалда гьесул вас Егьошафат пачалъун вахъана.
Надав – ГӀизраилалъул пача
25Аса Ягьудиялъул пачалъун вахъун кӀиабилеб соналъ Яровамил вас Надав ГӀизраилалъул пачалъун вахъана, ва ГӀизраилалда тӀад кӀиго соналъ пачалъи гьабуна гьес. 26Гьес БЕТӀЕРГЬАНАСДА цебе квешабщинаб гьабуна. ГӀизраилго мунагьалде бачарав жиндирго инсуца гьабураб гьабуна.
27Гьев тӀолабго ГӀизраилалъул аскаргун цадахъ пилистимазул шагьар Гиббетон сверун кквезе къеркьолев вукӀаго, Иссахарил къавмалъул чи АхӀиягьил вас Баашаца, гъоркьанго гьесда дандеги ургъун, чӀвана Надав. 28Ягьудиялъул пачалъун Аса вахъун лъабабилеб соналъ Баашаца Надав чӀвана ва гьесул бакӀалда пачалъун чӀана.
29Пачалъун вахъараб сагӀаталдаго гьес тӀолабго Яровамил хъизан-къай гъурана. БЕТӀЕРГЬАНАС Шилоялдаса АхӀияги гьоркьов ккун лъазабураб рагӀуда рекъон, гьес Яровамил цо чи чӀаго течӀо, киналго чӀвана. 30Гьедин жаза гьабуна гьезие Яровамил мунагьал сабаблъун ва гьес жиндирго мунагьазул нухда тӀолабго ГӀизраилги бачун, гьел мунагьаз ГӀизраилалъул БЕТӀЕРГЬАН Аллагьасул ццин бахъинабуралъухъ.
31Надавил пачалъиялъул цогидал лъугьа-бахъинал ва гьес гьарурал ишал хъван руго «ГӀизраилалъул пачабазул тарих» абураб тӀехьалда. 32Асадаги ГӀизраилалъул пача Баашадаги гьоркьоб гьел пачабилъун ругебгӀан заманалда рагъ букӀана.
Бааша – ГӀизраилалъул пача
33Аса Ягьудиялъул пачалъун вахъун лъабабилеб соналъ АхӀиягьил вас Бааша ГӀизраилалъул пачалъун вахъана. Тирза шагьаралда чӀун, къоло ункъо соналъ пачалъи гьабуна гьес. 34Гьес БЕТӀЕРГЬАНАСДА квешбихьанщинаб гьабуна. ГӀизраилго мунагьалде бачарав Яровамица гьабураб гьабуна.
Currently Selected:
3 Пачаби 15: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
