3 Пачаби 1

Давуд херлъи

1Давуд пачаяс гӀемерал сонал рана ва гьев херлъана. КигӀан ретӀел тӀад ретӀаниги гьев хинлъизавизе кӀолев вукӀинчӀо. 2Цинги гьесул чукъбуз гьесда абуна:

«Биччанте нижер бетӀерчӀахъаяв пачаясе цо гӀолохъанай ясгӀадан ялагьизе, гьелъ хъулухъ гьабизе букӀине гьесие. Гьей гьесда аскӀой егила ва нижер бетӀергьан хинлъила», – ян.

3ТӀолабго ГӀизраил сверун берцинай яс ялагьизе журана гьел ва Авишаг абурай шунемияй ятун, гьез гьей пачаясда цее ячана. 4Гьей кутакалда берцинай яс йикӀана. Пачаясда аскӀой, гьесие хъулухъалъе тана гьей, амма пача, аскӀов вегарав, гьелда хъвачӀо.

Адониявица живго пачалъун чӀезави

5Давудие Хагитица гьавурав вас Адонияв лъугьана чӀухӀадго гаргадизе ва гьес абулеб букӀана: «Дун вукӀине вуго пачалъун», – ин.

Гьес чолгьакал, чотӀахъаби ва чуял чӀезаруна жиндиего ва кӀикъоялда анцӀго чукъбиги рукӀана гьесул. 6Гьесул эмен кидаго, гьесда цӀех-рех гьабун, щай дуца гьадин гьабулебин абун, гьесда кӀалъачӀо. Адонияв гьавуна Авессаломида хадув ва гьев цӀакъ берцинав чи вукӀана.

7Адониявица гъоркьанго къотӀи гьабуна Церуягьил вас Иоавилгун ва кашиш Авиатарилгун ва гьез гьесул рахъ ккуна. 8Амма кашиш Цадокица, ЕгьоядагӀил вас Бенаягьица, авараг Натаница, ШимгӀица, Рейица ва Давудил рорчӀухъабаз Адониявил рахъ кквечӀо.

9Рогел иццухъ бугеб Зохелет ганчӀида аскӀоб Адониявица гӀиялъажал, оцал ва кьараго хьихьарал гӀисинал бусби къурбаналъе хъуна, ва жиндирго киналго вацал, ай пачаясул васалгун цадахъ, Ягьудал къавмалъул тӀолалго пачаясул хъулухъчагӀиги ахӀана гьенире. 10Амма Натан аварагги, Ванейги, Давудил рорчӀухъабиги ва жиндирго вац Сулейманги ахӀичӀо гьес.

Давудица пачалъи Сулейманихъе кьей

11Цинги Натан кӀалъана Сулейманил эбел Батшебада: «Дуда рагӀичӀищ Хагитил вас Адониявица живго пачалъун чӀезавун вугевлъи ва нилъер бетӀергьан Давудида гьелъул щибго лъалареблъи? 12Гьединлъидал, мун дихъ гӀенекке ва дица малъараб гьабун, гӀедегӀе дурго ва дур вас Сулейманил гӀумру цӀунизе. 13Хехлъи гьабун мун Давудихъе а ва гьесда абе: „Я дир бетӀергьан пача, мун дие гьедун вукӀинчӀищ: ‘Дур вас Сулейман вукӀине вуго дида хадув пачалъун ва гьев чӀезе вуго дир тахида’, – янги абун? Щайха пачалъун Адонияв вахъарав?“ 14Мун жеги пачаясда кӀалъалей йикӀаго дунги вачӀина жаниве дуда хадув ва дур рагӀаби тасдикъ гьарун тӀадеги жубала».

15Батшеба рокъое жание пачаясухъе ана. Пача тӀуван херлъун вукӀана ва шунемияй Авишагица хъулухъ гьабулеб букӀана гьесие. 16Батшеба накабазде ккун пачаясе къулана.

«Щиб дуе бокьараб?» – ин цӀехана пачаяс.

17Гьелъ гьесда абуна: «Дир бетӀергьан, мунго лъикӀав лъугьун гьедана мун дие, дур лагъалъе, БЕТӀЕРГЬАН Аллагьасул цӀарги бахъун: „Дур вас Сулейман вукӀине вуго пачалъун дида хадув ва гьев гӀодов чӀезе вуго дир тахида тӀад“, – инги абун. 18Амма, доле, пачалъун Адонияв вахъун вуго, дудайин абуни, дир бетӀергьан пача, гьеб иш лъалеб гьечӀо. 19Гьес къурбаналъе гӀемерал оцал, кьари-кьариял гӀисинал бусби ва гӀиялъажал хъун руго, ва киналго пачаясул васалги, кашиш Авиатарги, аскаразул бетӀер Иоавги гьенире ахӀун руго, амма дур лагъ Сулейман ахӀун гьечӀо. 20Гьанже дир бетӀергьан, дир пача, тӀолабго ГӀизраил дур рагӀухъ хал ккун, щив дуда хадув тахида чӀезе вугевали лъазе, духъ балагьун буго. 21Гурони, дир бетӀергьан, дир пача, абадиялъего дуца бералги къанщун, мун умумулгун парахалъараб къоялъ, дунги дир васги хиянатчагӀилъун ккезарила».

22Гьей жеги кӀалъалей йикӀаго, Натан авараг вачӀана жаниве. 23Пачаясда лъазабуна гьенив Натан авараг вугин.

Цинги гьев пачаясда цеве вахъана ва гьесда цеве наку чӀван къулана.

24Натаница абуна: «Дир бетӀергьан пача, дуца абун букӀанищ дуда хадув пачалъун Адонияв вукӀине вугин ва дур тахида гьев чӀезе вугин? 25Щайгурелъул, жакъа гьес инеги ун къурбаналъе гӀемерал оцал, кьариял гӀисинал бусби ва гӀиялъажал хъун руго. Гьес киналго пачаясул васалги, аскаразул бутӀрулги, кашиш Авиатарги ахӀун руго гьенире. ГьабсагӀаталда гьел квана-гьекъолел руго гьесда цадахъ ва гьез абулеб буго: „БетӀерчӀахъаяв пача Адонияв!“ – абун. 26Амма, дун – дур лагъ, кашиш Цадок, ЕгьоядагӀил вас Бенаягь ва дур лагъ Сулейман гьес гьенире ахӀичӀо. 27Щив дир бетӀерчӀахъаяв пачаясда хадув гьесул тахида тезе вугевали дида, дур лагъасдаги лъазе биччачӀого, дир бетӀерчӀахъадил амруялдалъун гьабураб ишцин гурищ доб?»

28Гьебмехалъ Давуд пачаяс абуна: «Батшеба ахӀе дихъе». Гьей жание ячӀана ва пачаясда цее эхетана.

29Цинги пача гьедана: «Гьале, дун киналго балагьаздаса цӀунарав, Жив ХӀакъав БЕТӀЕРГЬАНАЛХӀА, 30дица тӀубазабила жакъа ГӀизраилил БЕТӀЕРГЬАН Аллагьасул цӀарги бахъун, дица дуе гьедун кьураб рагӀи: дур вас Сулейман вахъине вуго пачалъун дида хадув, ва, дир бакӀалда, дир тахидаги гӀодов чӀезе вуго гьев».

31Батшеба наку чӀван пачаясе къулана ва гьелъ абуна: «Дир бетӀергьан пачаясе абадияб гӀумру насиблъаги!»

32Пачаяс лъазабуна жиндихъе кашиш Цадокги, Натан аварагги ва ЕгьоядагӀил вас Бенаягьги ахӀеян.

Гьел пачаясухъе жанире рачӀиндал, 33гьес гьезда абуна: «Рачун цадахъ дир чукъбигун, дир вас Сулейман вахинаве дир гӀорцӀеналде ва Гихон иццухъе ваче гьев. 34Биччанте гьениб кашиш Цадокицаги Натан аварагасги гьесда зайтуналъул нахги бахун, гьев ГӀизраилалда тӀад пачалъун вахъин тасдикъ гьабизе. Хадуб суралъубе пуй ва ахӀе: „БетӀерчӀахъаяв пача Сулейман!“ – илан. 35Цинги гьевгун цадахъ тӀадруссун рачӀа ва гьев дир тахида чӀезаве дир бакӀалда пачалъи гьабизе. Дица гьев толев вуго пачалъун ГӀизраилалда ва Ягьудиялда тӀад».

36ЕгьоядагӀил вас Бенаягьица пачаясе жаваб кьун абуна: «Амин! Гьединан хъван батаги дир бетӀерчӀахъаяв пачаясул БЕТӀЕРГЬАН Аллагьасги. 37БЕТӀЕРГЬАНАС, дир бетӀерчӀахъаяв пачаясе сундулъгоги квербакъи гьабураб гӀадин, Сулейманиеги квербакъи гьабун, гьесул тах бетӀерчӀахъаяв дир пача Давудилалдасаги жеги тӀадегӀан гьабеги!»

38Кашиш Цадокица, Натан аварагас, ЕгьоядагӀил вас Бенаягьица, керетияз ва пелетияз#1:38 Керетиял ва пелетиял рукӀун ратизе бегьула къватӀиб ракьалдаса гӀарац кьун ккурал пачаясул рорчӀухъаби., рилълъун, Давуд пачаясул гӀорцӀеналда рекӀинавуна Сулейман ва гьевгун цадахъ Гихоналде ана. 39Кашиш Цадокица мукъадасаб Чодрониса зайтуналъул нахул цӀураб лълъар босана ва Сулейманил ботӀроде тӀуна. Хадуб гьез суралъубе пуна ва тӀолабго халкъ ахӀдана: «БетӀерчӀахъаяв пача Сулейман!» – илан.

40ТӀолабго халкъ, рачунаго щвантӀихалгун, гьесда хадуб билълъана. Гьезул рохел-разилъиялъул ахӀи-хӀуралъул кутакалъ ракьцин сородизабулеб букӀана.

Сулейманица Адонияв виччан тей

41Квана-гьекъей ахиралде щолеб букӀана Адониявида ва киналго гьесда цадахъ рукӀарал гьесул гьалбадерида гьеб рагӀараб мехалъ. Суралъул гьаракь рагӀун Иоавица цӀехана: «Гьаб щиб ахӀи-хӀур шагьаралда бугеб?»

42Гьев кӀалъан вахъиналде вачӀана Ионатан, кашиш Авиатарил вас. Адониявица абуна: «АскӀовегӀан вачӀа. Мун къадруяв чи вуго, гьай-гьай мун лъикӀаб хабаргун вачӀун ватила».

43«Гуро, – ян жаваб кьуна Ионатаница. Нилъер бетӀерчӀахъаяв пача Давудица Сулейман пачалъун гьавуна. 44Пачаяс кашиш Цадокги, Натан аварагги, ЕгьоядагӀил вас Бенаягьги, керетиялги ва пелетиялги ритӀана гьесда цадахъ. Гьез гьев пачаясул гӀорцӀеналда тӀад рекӀинавуна, 45ва кашиш Цадокицаги Натан аварагасги Гихоналда гьесда зайтуналъул нахги бахун, гьесул пачалъи тасдикъ гьабуна. ЦӀакъ разиго рахъана гьел гьениса къватӀире, шагьаралдаги кӀудияб багъа-бачари буго. Гьеле гьелъул ахӀи-хӀур буго дуда рагӀулеб жо. 46Гьелда тӀадеги, Сулейман пачаясул тахида гӀодов чӀана, 47пачаясул цересел чагӀийин абуни, нилъер бетӀерчӀахъаяв Давудида баркизе рачӀана: „Биччанте дур Аллагьас Сулейман дудасаги цӀикӀкӀун цӀар бугевлъун гьавизе ва гьесул тах дуралдасацин тӀадегӀан гьабизе!“ – янги абун. Цинги бусада вугев пачаясги бетӀер къулана 48ва гьес абуна: „Рецц БЕТӀЕРГЬАНАСЕ, ГӀизраилалъул Аллагьасе, жакъа тахида гӀодов чӀун дир ирсилав вихьизе рес кьурав!“»

49Гьебмехалда киналго Адониявил гьалбал хӀинкъун сородана, рахъун тӀадегун жинди-жиндир нух ккун бухъизабуна.

50Адониявин абуни, Сулейманихъа хӀинкъиялъ, инеги ун, къурбан хъолеб бакӀалъул лълъурдулги ккун чӀана.#1:50 Хвалил хӀинкъи тӀаде бачӀарав чиясул ихтияр букӀана къурбаналъе бакӀалъул ункъабго сибилалда эхетарал лълъурдулин абулел жалги ккун, рахӀму гьаризе. Гьедин гьел лълъурдулги ккун чӀарав чиясда хъвалароан. 51Сулейманихъе хабар щвезабуна: «Сулейман пачаясухъа хӀинкъун Адонияв вуго къурбан хъолеб бакӀалъул лълъурдулги ккун чӀун. Гьес абулеб буго: „Сулейман пача гьеде абе жакъа дие, гьес жиндирго лагъ чӀвазе къотӀиларин абун“».

52Сулейманица жаваб кьуна: «Гьес жив ракӀбацӀцӀадав чи вукӀин бихьизабуни, гьесул ботӀродаса цо расцин гӀодобе бортизе гьечӀо; амма гьесулъ хӀалихьалъи батани, гьев хвезе вуго», – ян.

53Сулейман пачаяс хадур чагӀиги ритӀун, гьез гьев къурбан хъолеб бакӀалдасан вачун вачӀана. Адонияв жаниве вачӀун Сулейман пачаясе къулана ва Сулейманица гьесда абуна: «Мун рокъове а», – ян.

Currently Selected:

3 Пачаби 1: АварАК

Highlight

Copy