Коринфиязухъе тӀоцебесеб кагъат 3

3 бетӀер

Аллагьасе хъулухъ гьабулел чагӀи

1Амма нужедехунни, вацал, дун Илагьияб РухӀалъ цӀурал гӀадамаздехун гӀадин кӀалъачӀо, кӀалъана напсалъ малъараб гьабулездехун гӀадин ва МасихӀиде цолъараб гӀумру лъималазда кинигин гурони бичӀчӀуларездехун гӀадин. 2Кваназе квен гуро дица нужее кьураб, гьекъезе рахь кьуна. Кваназе гӀун рукӀинчӀо нуж добмехалъ, – гьанжегицин гӀун гьечӀо нуж! 3ГьанжелъагӀанги напсалъ малъараб гьабулеб бугелъулха нужеца. Нужеда гьоркьоб жахӀда-хӀусудги дагӀба-рагӀиги бугеб мехалъ, напсалъе мутӀигӀлъи гурищ гьеб кколеб, гьаб дуниялалъул гӀадамал гӀадин хьвадулел рукӀинги гурищ кколеб? 4Цояс «дун Павелил рахъ ккурав вугилан», цогидасги «дун Аполлосил рахъ ккурав вугилан» абулеб бугони, гьаб дуниялалъул гӀадамаллъун ккеларищ нуж? 5Гьаха, щив кколев Аполлос? Павелги щив кколев? Гьел руго нуж иманалде рачарал ва хъулухъалъе тӀамурал гӀадатиял чагӀи. БетӀергьанас тӀадкъараб хӀалтӀи гьабулеб буго гьезул щивас. 6Дица мугь чӀана, Аполлосица лъалъана, амма бижизе Аллагьас гьабуна. 7Мугь чӀолевги – рикӀкӀунаро, лъалъалевги – рикӀкӀунаро. Бижизабулев – Аллагь вуго! 8Мугь чӀолесдаги лъалъалесдаги гьоркьоб батӀалъи гьечӀо. Жидеца гьабуралда рекъараб мухь щвела гьезул щивасе. 9Ниж кӀиялго руго Аллагьасул хӀалтӀухъаби, нуж руго Аллагьасул хур, Аллагьасул мина.

10Аллагьас дие кьураб баркатаб гьунаралда рекъон, махщел бугев устарас гӀадин, дица кьучӀ лъуна. Цогидаз гьелда тӀад мина балеб буго. Щивас хал гьабизе биччанте кин жинца балеб бугебали. 11Цебего лъун бугелдаса батӀияб кьучӀ лъезе лъиданиги кӀоларо. ЦохӀо бугеб гьеб кьучӀги ГӀиса МасихӀ ккола. 12Амма гьеб кьучӀалда тӀад мина меседил, гӀарцул, жавгьар-якъуталъул, яги цӀулал, бакъвараб харил, муцӀидул баниги, 13щивас гьабураб хӀалтӀи къиямасеб къоялъ бихьила. Гьеб къоялъ цӀаялъ хӀалбихьулелъулха щивас кинаб хӀалтӀи гьабун бугебали. 14Гьеб кьучӀалда тӀад бараб минаялда доб цӀа хӀехьезе кӀвани, устарасе кири щвела. 15ЦӀаялъ гьеб бухӀани, зарал ккела. Хвасарлъизени гьев хвасарлъила, амма цӀадулъа вахъарав чи гӀадин вукӀина. 16Нужеда лъаларебищ нуж Аллагьасул мукъадасаб рукъ ругеблъиги нужелъ Аллагьасул РухӀ бугеблъиги? 17Аллагьасул мукъадасаб рукъ щущазабурав чи Аллагьасги тӀагӀинавила. Нуж ккола Аллагьасул гьеб мукъадасаб рукълъун.

18Лъицаниги живго гуккуге абе! Нужеда гьоркьоса лъиданиги ракӀалде кколеб батани гьаб дуниялалда жив гӀакъилав вугилан, хӀакълъунго гӀакъилав вукӀине бокьани, гьев гӀантлъеян абе. 19Гьаб дуниялалъул гӀакъиллъи Аллагьасда цебе гӀантлъилъун кколелъулха. ТӀухьдузда хъван буго: «Аллагьас гӀакъилзаби жидерго сихӀирлъиялъул гьиналъ ккола». 20Цоги бакӀалда хъван буго: «БетӀергьанасда лъала гӀакъилазул пикрабаз пайда гьабулареблъи». 21Гьединлъидал, гӀадамазул рахъги ккун, живго веццизе лъугьунге щивниги. Кинабго нужерлъидалха: 22Павелги, Аполлосги, Кефаги, дуниялги, гӀумруги, хвелги, гьанжесебги, букӀинесебги – кинабго нужер буго. 23Нуж МасихӀил руго, МасихӀги Аллагьасул вуго!

Currently Selected:

Коринфиязухъе тӀоцебесеб кагъат 3: АварАК

Highlight

Copy