Коринфиязухъе тӀоцебесеб кагъат 2
2
2 бетӀер
Аллагьасул балъгояб гӀакъиллъи
1Доб мехалда дун нужехъе вачӀиндал, Аллагьасул хӀакъалъулъ Хабар лъазабулаго, дилъ букӀинчӀо кӀалзул пасихӀлъиги кӀудияб гӀакъиллъиги. 2Нужеда гьоркьов вугеб заманалда дица хӀукму гьабун букӀиндалха, ГӀиса МасихӀ (хасго гьев хъанчида ван хвей) хутӀун, цогидабщинаб рехун телилан. 3Дун нужеда аскӀов вукӀана загӀипгоги ва хӀинкъун сородулевги. 4Дир гаргаралъги хабаралъги нужее гьабураб асар – гьеб букӀинчӀо гӀакъилал рагӀабазул хӀасиллъун. Илагьияб РухӀалъул хӀалкӀолъиялдалъунги мугӀжизатаздалъунги лъугьана гьеб гьедин, – 5нужелъ гьеб божи-иман, инсанасул гӀакъиллъиялдалъун гуреб, Аллагьасул къудраталдалъун лъугьине.
6Саламатал гӀадамазени гӀакъилаблъун букӀуна нижеца бицараб хабар. Амма гьеб хабар гьаб дуниялалъулаб гӀакъиллъи гуро, гьаб дуниялалъул кверщелчагӀазул (кверщел жидехъа унезул) гӀакъиллъиги гуро. 7Нижеца бицунеб буго Аллагьасулаб балъгояб гӀакъиллъиялъул. Аллагьас бахчун тараб гьеб гӀакъиллъи нилъер цӀар-реццалъейин дуниял бижилелдего къачӀан букӀараб. 8Гьаб дуниялалъул цониги кверщелчиясда бичӀчӀичӀо гьеб. БичӀчӀун букӀарабани, цӀар-реццалъул бетӀергьан хъанчида валароан гьез.
9ТӀухьдуздаги хъван бугелъулха:
«Лъилниги бералда бихьичӀебги,
лъилниги гӀиналда рагӀичӀебги,
лъилниги гӀакълу нахъгӀунтӀичӀебги
къачӀан буго Аллагьас жив вокьулезе».
10Нилъеени Аллагьас жиндирго РухӀалдалъун загьир гьабуна гьеб. РухӀ сундулъего лъугьуна – Аллагьас цӀакъго бахчун таралда гъорлъегицин лъугьуна. 11Гьесулъ жиндилъго бугеб рухӀалда гурони, цоги чиясда лъалебищ инсанасул рекӀелъ ругел пикраби? Гьедин Аллагьасул пикрабиги, гьесул РухӀалда гурони, лъалищха. 12Нилъее щвараб РухӀ дуниялалъулаб гуро, Аллагьас нилъее кьурал нигӀматал нилъеда ричӀчӀизе гьесдасан бачӀараб буго. 13Нилъеца гьелъул хӀакъалъулъ инсанасулаб гӀакъиллъиялъ малъарал рагӀабаздалъун гуро бицунеб, РухӀалъ малъарал рагӀабаздалъун бицуна. Илагьияб РухӀалъ цӀуразда бичӀчӀизабула нилъеца РухӀалда хурхарабщинаб. 14Жиндилъе РухӀ рещтӀинчӀев инсанас къабул гьабуларо Илагьияб РухӀалдасан бугебаб. Гьесие гьеб гӀантаб жолъун кколелъулха. Гьесда гьеб бичӀчӀизего бичӀчӀуларо, РухӀалдалъун гурони бичӀчӀизе рес гьечӀелъул. 15Илагьияб РухӀалъ цӀурав чиясда кӀола бокьараб жоялъул хӀакъикъат лъазе, амма лъиданиги кӀоларо Илагьияб РухӀалъ цӀурав чиясул хӀакъикъат лъазе. 16ТӀухьдузда хъван бугелъулха:
«БетӀергьанасул пикрабазда нахъгӀунтӀулев чи вугищ?
Гьесие гӀакълу кьезе лъида кӀолеб?»
Нилъелъин абуни МасихӀил гӀакъиллъи буго.
Currently Selected:
Коринфиязухъе тӀоцебесеб кагъат 2: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
