Matayo 5

Köp na Yecu ötïtö ï wi kidi

1Ï karë na Yecu önënö lwak, ën öcïdhö ï wi kidi cë obedo pïny. Ëlübkörë obino bothe, 2ëka ën öcakö pwonyogï nakun kobo nï:

3“Komgï gum jö na ngeo nï gïn ebedo ëcan ï cwiny,

pïën ker më polo bino bedo mëgï.

4Komgï gum jö na kumo,

pïën ebino kweo cwinygï.

5Komgï gum jö na mwol,

pïën gïn bino leo lobo bedo mëgï.

6Komgï gum jö na kec ëka örïö nekogï pï bedo jö na kitegï atïr,

pïën ebino mïögï yeng.

7Komgï gum jö n'obedo ëkïca,

pïën ebino tïmö kïca nïgï.

8Komgï gum jö na cwinygï leng,

pïën gïn bino nënö Obanga.

9Komgï gum jö na kelo kuc,

pïën ebino cwodogï nï ëthïnö k'Obanga.

10Komgï gum jö n'eyelogï pï bedo jö na kitegï atïr,

pïën ker më polo bino bedo mëgï.”

11“Komwu gum ka jïï yanyöwu, eyelowu, ëka ekobo kwa köp na reco kïbëc më twodo ï komwu pïra. 12Bed unu kï yom cwiny, pïën cül na mewu tye na dit ï polo. Man ënë kite na gïn oyelo k'edwarpïny n'öcakö bedo niwu.”

Köp ï kom kadö ëka tar

(Marako 9:50; Luka 14:34-35)

13“Un ibedo kadö më lobo. Ëntö ka kadö orwenyo mït mërë ökö, ëtwërö mïö dökö na mït nïngö dökï? Köny mërë nwongo dong ope, myero ëöny ökö jïï önyön.

14“Un ibedo tar më lobo. Pacö n'ëgërö ï wi kidi ba twërö kanërë. 15Ngat mörö ope na cwïnyö tara ëka ketho ï thë agulu. Ëntö eketho kanya oten malö ëka mënyö jö kïbëc na tye ï öt. 16Ï yoo acël nön, mïï unu tar na mewu öryëny ï nyim jïï, ëk gïn önën ticwu na bëcö, ëka öpak gïnï Apapwu na tye ï polo.”

Pwony ï kom Cïk

17“Kür ïtham unu nï an abino më jükö Cïk onyo köp k'edwarpïny; an ba abino më jükögï ëntö më cobogï. 18An akobo niwu köp adyer nï wang na polo ëka lobo othuno ï ajiki, nyukuta mörö acël na tïdï onyo tön mörö acël më Cïk ba bino rwenyo, naka ka köp kïbëc ocobere. 19Dong ka ngat mörö ötürö cïk mörö acël kï ï kom cïk ni gïnï, nakun pwonyo kï jö nökënë më tïmö nï kömanön, ebino cwodo ën nï dhanö na tïdï ï ker më polo. Ëntö ngat na ketho ï tic ëka pwonyo cïk ni ebino cwodo nï dhanö na dit ï ker më polo. 20Ëntö an akobo niwu nï ka kite atïrwu ba ölöö më k'Eparicayo ëka më k'epwony cïk, un ba ibino dönyö ï ker më polo.”

Pwony ï kom akëmö

21“Un iwinyo köp na yam ekobo both jö na cön nï, ‘Kür ineki,#Yaa 20:13 ëka ka ngat mörö na bino neko dhanö, ebino ngölö-köp nïnë.’ 22Ëntö an akobo niwu nï ngat mörö n'akëmö makö ï kom ömïn mërë ebino ngölö-köp nïnë. Ngat mörö na bino yanyö ömïn mërë nï, ‘In ibangiri,’ ebino tero ï nyim athuko më öd okiko k'edong. Ëntö ngat mörö na kobo nï, ‘In amingo’ ebino bolo ï mac më kapïny.

23“Pï manön, ka ikelo mïcni ï keno tyër më mïö both Obanga ëka ipo nï omeru tye kï köp mörö ï komi, 24wëk mïcni ï nyim keno tyër. Cïdh kono both omeru ëk ïrïb unu wat na bër ï kinwu; cë dong idwogi ëka ïmïï mïcni.

25“Tyek köp pïöpïö kï ngat n'odothi na pod itye unu ï yoo më cïdhö ï pido, ëk ngat n'odothi kür oteri ï nyim angöl-köp, cë angöl-köp bino mïöni both acikari, ëka ebino tweoni ï buc. 26An akobo niwu köp adyer nï ba ibino donyo kï ï buc naka ka ïcülö cül kïbëc, na wi cïlïng mörö ba orem.”

Pwony ï kom elomi

27“Un iwinyo köp na yam ekobo nï, ‘Kür ïdöny ï elomi.’#Yaa 20:14 28Ëntö an akobo niwu nï ka ngat mörö önënö dhakö cë öthamö kï ï cwinye më bedo ködë nwongo ödönyö ï elomi. 29Ka wangi më kucem ënë mii ipodho ï bal, köl iyuu ökö. Bër nini më rwenyo dul komi acël nï löönö bolo komi kïbëc ï mac më kapïny. 30Ka cingi më kucem ënë mii ipodho ï bal, ngun iyuu ökö. Bër nini më rwenyo dul komi acël nï löönö bolo komi kïbëc ï mac më kapïny.”

Pwony ï kom këthö nyom

31“Un iwinyo cïk na kobo nï, ‘Ngat mörö na kwërö dhakö mërë myero ömïï waraga më këthö nyom.’#Nwönö Cïk 24:1 32Ëntö an akobo bothwu nï ka ngat mörö ökwërö dhakö mërë, na path kï köp më tar wang, nwongo ömïö dhakö nön ödökö jö elomi, ëka ngat mörö na nyömö dhakö n'ëkwërö ökö nwongo ödönyö ï elomi.”

Köp ï kom kwongo kwong

33“Dökï, un iwinyo köp na yam ekobo both jö na cön nï, ‘Kür ikwong kwong nono, ëntö cob kwong na in ikwongo both Rwoth.’ 34Ëntö an akobo niwu, kür ikwong unu kwong mörö na twal, kadï kï polo pïën manön obedo then ker k'Obanga; 35onyo kï nyïng lobo, pïën manön obedo then më theno tyënë; onyo kï nyïng Jerucalem, pïën manön obedo pacö k'Obanga, Rwoth na Dit. 36Kür ikwong kwong kï wii, pïën in ba ïtwërö mïö yer mörö acël më bedo na tar onyo na cöl. 37Mïï unu köpwu obed nï, ‘Eyo’ obed ‘eyo,’ onyo ‘Pe’ obed ‘pe.’ Köp mörö na kadhö manön nwongo öya kï both ngat na rac.”

Köp ï kom cülö kwor

(Luka 6:29-30)

38“Un iwinyo köp na yam ekobo nï, ‘Wang ëcülö kï wang, ëka lak ëcülö kï lak.’#Yaa 21:24; Jö Lebi 24:20; Nwönö Cïk 19:21 39Ëntö an akobo niwu nï kür ïcül unu kwor ï kom ngat mörö n'ötïmö gin na rac ï komi. Ka ngat mörö odhongo lemi kucem, lök nïnë lemi nökënë thon. 40Ka ngat mörö mïtö pidoni nï ëk eter catïni, mïï ën thon kotini. 41Ka ngat mörö odii më yëö yëc mërë pï kilomita acël, woth ködë pï kilomita arïö. 42Ka dhanö mörö ökwaö gin mörö kï bothi, mïï gin nön bothe. Ka ngat mörö mïtö deno gin mörö kï bothi, mïï ën oden.”

Pwony ï kom marö lang onu

(Luka 6:27-28, 32-36)

43“Un iwinyo köp na yam n'onwongo ekobo nï, ‘Mar awodhi#Jö Lebi 19:18 ëka ïdag langöni.’ 44Ëntö an akobo niwu: Mar unu langwu ëka ïlëg unu pï jö na yelowu, 45ëk ibed unu calö ëthïnö k'Apapwu adyer na tye ï polo. Pïën ën mïö ceng mërë ryëny both jö na reco ëka kï jö na bëcö. Ën mïö köth both jö na kitegï atïr ëka both jö na kitegï ba tye atïr. 46Ka ïmarö unu jö na maröwu, cül ngö n'Obanga bino cülöwu ködë? Naka thon ëcök ocoro tïmö gïnï nï kömanön. 47Ka imotho unu utmegowu këkën, apokapoka ngö na tye ï kinwu kï jö nökënë? Naka thon jö na ba ngeo Obanga tïmö nï kömanön. 48Myero ibed unu jö na bal mörö ope ï komgï, na calö Apapwu na tye ï polo na bal mörö ope ï kome.”

Currently Selected:

Matayo 5: THUR

Highlight

Copy

Compare