Matayo 21

Yecu ödönyö ï Jerucalem calö Rwoth

(Marako 11:1-11; Luka 19:28-40; Jon 12:12-19)

1Ï karë na Yecu k'ëlübkörë dong cwök thuno ï Jerucalem, gïn obino ï Betepage ï kor Kidi më Jeituni. Cë Yecu ooro ëlübkörë arïö, 2nakun kobo nïgï nï, “Cïdh unu ï pacö na tye ï nyimwu, cë cücüth ibino unu nwongo kana n'etweo kanya acël k'athïn mërë ï ngete. Göny unu ëka ikel unugï botha. 3Ka dhanö mörö okobo niwu köp mörö, kob unu nïnë nï Rwoth ënë mïtögï, ëka dhanö nön bino mïöwu ikelo pïöpïö.”

4Man ötïmërë më cobo köp na yam adwarpïny ötwakö nï:

5“Kob nï jö më Cion nï,

‘Nën, rwothwu tye ka bino bothwu,

ën mwol ëka obedo ï wi kana

ï wi athïn kana.’ ”

6Ëlübkörë öcïdhö ëka ötïmö gïnï kite na Yecu öcïkögï ködë. 7Gïn okelo kana ëka athïn mërë, cë öpëdhö gïnï böng-gï ï ngeegï ëka Yecu obedo ï wie. 8Lwak na pol öpëdhö böng-gï ï dye yoo, nakun jö nökënë tongo jang yen cë pëdhö gïnï ï dye yoo. 9Lwak n'ötëlö anyim ëka kï jö n'ölübö körë onwongo tye ka wöö gïnï nï,

“Ocana,#21:9 Ocana ï lëb Iburu gönyö nï Lar n'ölökërë ödökö më pak. Wod ka Daudi!”

“Gum obed ï kom ngat na tye ka bino kï nyïng Rwoth!”#Jabuli 118:26

“Ocana na tye malö rwök!”

10Ï karë na Yecu ödönyö ï Jerucalem, jö kïbëc kï ï taun obedo gïnï k'ethime nakun penyo gïnï nï, “Man ënë nga?”

11Lwak ögamö nï, “Man ënë Yecu, adwarpïny n'öya kï ï Najaret na tye ï Galilaya.”

Yecu öcïdhö ï Öt k'Obanga

(Marako 11:15-19; Luka 19:45-48; Jon 2:13-22)

12Yecu ödönyö ï dyekal öt k'Obanga ëka öryëmö jö kïbëc n'onwongo cadhö ëka wïlö gïnï wïl kunön. Ën ölökö mëja ka jö na lökö cïlïng atarö ëka thene ka jö na cadhö amame. 13Ën okobo nïgï nï, “Ëcöö nï, ‘Öda ebino cwodo nï öt më lëga,’#Icaya 56:7 ëntö un ïlökö ödökö ‘ka pono k'ekwoe.’#Jeremia 7:11 ”

14Ëthöö wang ëka engwalo obino gïnï bothe ï dyekal öt k'Obanga ëka ën öcangögï. 15Ëntö ëlamdhök na dito ëka epwony cïk öngöö gïnï rwök ï karë n'önënö gïnï tic më aura na ën onwongo tye ka tïmö ëka ëthïnö na wöö ï dyekal Öt k'Obanga nakun kobo gïnï nï, “Ocana Wod ka Daudi.”

16Gïn openyo ën nï, “In itye ka winyo ngö n'ëthïnö ni tye ka kobo?”

Yecu ögamö nï, “Eyo, un anaka bara ïkwanö unu nï,

“ ‘Kï ï dhö ëthïnö ëka ëthïnö na döth

in ipwonyo ëthïnö më mïöni pak’#Jabuli 8:2?”

17Cë ën öya öwëkögï ëka öcïdhö yo Betania cë obuto kunön.

Yecu ölamö yath ölam

(Marako 11:12-14, 20-24)

18Kodiko cön na Yecu onwongo tye ka dök cen yo taun, kec onwongo oneko ën. 19Yecu önënö yath ölam ï nget yoo, ën öngël ïë ëntö ba onwongo ölam mörö na path k'oboke këkën. Ën okobo nï yath ölam nï, “Ba dökï ibino nyakö nyigi!” Cë cücüth yath ölam öthwö ökö.

20Ï karë n'ëlübkörë önënö, ouro gïnï ëka openyo gïnï nï, “Yath ölam öcakö thwö nïngö pïöpïö?”

21Yecu ögamö nï, “An akobo niwu köp adyer nï ka iut unu kï yee na ba itye unu k'akalakala, ba ibino unu tïmö gin na an atïmö ï kom yath ölam këkën, ëntö ïrömö unu thon kobo nï kidi ni nï, ‘Mukiri ëka ïcïdh icibiri ï nam,’ cë bino tïmërë. 22Ka in itye kï yee, gin mörö këkën na in ibino kwaö kï lëga ibino nwongo.”

Epenyo Yecu ï kom twër mërë

(Marako 11:27-33; Luka 20:1-8)

23Ï karë na Yecu odwogo ï dyekal öt k'Obanga, na ën tye ka pwony, ëlamdhök na dito ëka edite ka lwak obino gïnï bothe cë openyo gïnï ën nï, “Twërö mënë na in itye ka tïmö kï gin ni gïnï? Ëka nga ënë omii twërö ni?”

24Yecu ögamö nï, “An thon abino penyowu peny acël. Ka ïgamö unu nïna, cë an abino kobo niwu twërö mënë na an atye ka tïmö kï gin ni gïnï. 25Batica ka Jon öya kï kwene? Öya kï ï polo onyo kï both dhanö?”

Gïn öcakö larö köp nön ï kin-gï kën-gï ëka okobo gïnï nï, “Ka onu ekobo nï öya kï ï polo, ën bino penyo nï, ‘Pïngö ba iyee unu ï kom Jon?’ 26Ëntö ka onu ekobo nï, ‘Öya kï both jïï’—cë onu elworo lwak, pïën jö kïbëc yee nï Jon onwongo obedo adwarpïny.”

27Cë gïn ögamö nï Yecu nï, “Wan ba engeo.”

Ëka Yecu okobo nïgï nï, “An thon ba abino kobo niwu twërö mënë na an atye ka tïmö kï gin ni gïnï.”

Carolok ï kom awope arïö

28“Ngö na un ïthamö? Yam ëcwö mörö tye n'onwongo ut k'awope arïö. Ën öcïdhö both awobi më acël ëka okobo nïnë nï, ‘Woda, cïdh itii ï pwodho ölökna tin.’

29“Ën ögamö nï, ‘Ba abino cïdhö,’ ëntö kinge ën ölökö thama mërë ëka öcïdhö.

30“Cë apap mërë thon öcïdhö both awobi nökënë ca ëka okobo kömanön. Awobi ni ögamö nï, ‘Eyo, apap, an abino cïdhö,’ ëntö ën ba obino öcïdhö.

31“Nga kï kin jö arïö ni ënë ötïmö gin n'apap mërë mïtö?”

Gïn ögamö nï, “Awobi më acël.”

Cë Yecu okobo nïgï nï, “An akobo niwu köp adyer nï ëcök ocoro ëka oleye bino cakö dönyö niwu ï ker k'Obanga. 32Pïën Jon obino më nyutho niwu yoo më kite atïr, ëka un ba iyee unu ï kome, ëntö ëcök ocoro ëka oleye oyee ï kome. Ëka thon kinge na dong ïnënö unu gin ni, ba ibino ingut ëka iyee unu ï kome.

Carolok ï kom epang pwodho

(Marako 12:1-12; Luka 20:9-19)

33“Winy unu carolok nökënë: Yam onwongo tye won pwodho mörö n'öpïdhö ölök. Ën oketho cël ögürö, ökünyö bur ïë më bïö ölök ëka öyübö pem më kür ïë. Cë ën ömïö pwodho ölök both epang pwodho mörö ëka ën öcïdhö ökö ï lobo nökënë. 34Na karë më kac onyingo na cwök, ën ooro etic mërë both epang pwodho më gamö nyig ölök na mëgë.

35“Epang pwodho ömakö etic mërë, epwodo, eneko nökënë, ëka ecelo nökënë kï kite. 36Cë ën dökï ooro etic nökënë bothgï, na pol na löö më acël ökö ëka epang pwodho oterogï na rac calö më acël ca. 37Më ajiki mërë ën ooro wode bothgï nakun kobo nï, ‘Gïn bino wörö woda.’

38“Ëntö ï karë n'epang pwodho önënö wod ka won pwodho, cë ötwak ï kin-gï kën-gï nï, ‘Man ënë ngat na bino leeno jami. Bin unu, eru enek ën ökö ëka eter jami më alea mërë.’ 39Cë gïn ömakö ën, oyuo gïnï yökö kï ï pwodho ölök ëka eneko ökö.

40“Pï manön, ka won pwodho ölök obino, ën bino tïmö ngö ï kom epang pwodho?”

41Gïn ögamö nïnë nï, “Ën bino neko jö nön na kitegï reco ökö ëka bino mïö pwodho ölök më apanga both epang pwodho nökënë, na bino mïö ën nyig ölök na mëgë ï karë më kac.”

42Cë Yecu okobo nïgï nï, “Un bara ïkwanö unu Cöc na Leng:

“ ‘Kidi n'egedo ökwërö

ënë ödökö kidi më gwïc öt.

Man ënë tic ka Rwoth,

ëka obedo gin më aura both onu.’#Jabuli 118:22-23

43“Pï manön an akobo niwu nï ker k'Obanga ebino kwanyö ökö kï bothwu ëka ëmïö both jö nökënë na bino nyakö nyige n'opore. 44Ngat na bino podho ï kom kidi ni bino tütüra ngïdhërë na thïthïnö, ëntö ka kidi nön örëdhërë ï kom ngat mörö, bino ngïngïnyö ökö.”#21:44 Baibul nökënë ba ketho tyeng 44.

45Ï karë n'ëlamdhök na dito ëka Eparicayo owinyo gïnï carolok ka Yecu gïnï, gïn önïang nï ën onwongo tye ka twak ï komgï. 46Cë gïn öcakö rangö yoo më makö ën, ëntö gïn onwongo lworo lwak pïën lwak onwongo ngeo nï Yecu obedo adwarpïny.

Currently Selected:

Matayo 21: THUR

Highlight

Copy

Compare