Потон 32

32-тӥ ЛЮКЕТ

1Моисей гурезь йылысь кема дыр ӵоже уг ни васькы шуыса, калык адӟиз но Аарон доры люкаськыса шуиз: «Султы но милемлы инмар лэсьты, со милям азьтӥмы мед мыноз, асьмеды Египет музъемысь поттэм Моисей шуон адямиен мар луиз, ум тодӥське ук». 2Аарон соослы шуиз: «Кышноостылэн, пиостылэн, нылъёстылэн пельёсысьтызы зарни угыоссэс басьтыса мон доры вае». 3Вань калык пельёсысьтыз угыоссэ октӥз но Аарон доры вайиз. 4Соослэн киосысьтызы угыосты басьтӥз но соосты ӵыжатӥз, вӧлыса ошпилы укшась зарни сульдэр лэсьтӥз. Соку калык шуиз: «Израиль, та тынад инмаред, со тонэ Египет музъемысь поттӥз!» 5Тае адӟыса, Аарон сульдэр азе курбон сётон ӝӧк пуктӥз но ялӥз: «Ӵуказе Кузё-Инмарлэн праздникез!» 6Ӵуказеяз соос вазь ик султӥзы но тылын сутӥськись курбонъёс сётӥзы, тупаса улонлы сӥзем курбонъёс сётӥзы: калык сиыны, юыны пуксиз, нош бӧрысь шудыны-шулдыръяськыны султӥзы.

7Соку Кузё-Инмар Моисейлы шуиз: «Ӝоггес васькы [гурезь] улэ, уго Египетысь поттэм калыкед йӧнтэмъяськыны кутскиз; 8макем ӝог соос Мынам курон-косон сюрес вылысьтым мыдлане кожизы: асьсэлы ӵыжатыса ошпи сульдэр лэсьтӥзы но солы йыбырттӥзы, солы курбон сётӥзы, шуизы: ”Израиль, тани тонэ Египетысь поттэм инмаред!”» 9Соку Кузё-Инмар Моисейлы шуиз: «Мон та калыкез адӟисько, та калык туж чурыт сюлэмо; 10табере Монэ огнаме кельты, соос вылэ вожпотонэ мед ӝутскоз, соосты быдто но тон бордысь трос лыдо калык потто». 11Нош Моисей аслэсьтыз Инмарзэ Кузё-Инмарез тэльмырыса курыны кутскиз, тазьы шуиз: «Кузё-Инмаре, быдӟым кужыменыд, юн киыныд Египет музъемысь поттэм Аслад калыкед вылэ вожпотонэд медаз ӝутскы вал, 12египет калык тазьы шуоно медаз луы: ”Со соосты быдтыны поттӥз, гурезьёсын соосты виылыны, музъем вылысь соосты быдтыны поттӥз”; Аслэсьтыд ӝуась вожпотондэ кыс, Ас калыктэ быдтонлэсь куштӥськы; 13тодад вай Авраам, Исаак, Израиль [Иаков] ляльчиостэ, соос азьын Тон Аслад нимыныд кылдэ сётыса шуид: ”Инмысь кизилиос мында йылэто тӥлесьтыд выжыдэс, быдэс та музъемез, кудӥз сярысь Мон тӥледлы верай вал, тӥляд выжыдылы сёто, соос [соин] кузёяськыса улозы пумтэм вапумъёс ӵоже”». 14Соку Кузё-Инмар азьвыл верам малпанэзлэсь, Ас калыксэ быдтыны малпанлэсь, куштӥськиз.

15Моисей берытскиз но гурезь улэ васькыны кутскиз, солэн кияз сӥзён-косонэн кык изпулъёс вал, кык палтӥз но – та палтӥз но, со палтӥз но – Инмарлэн курон-косонъёсыз гожтэмын; 16изпулъёсты лэсьтон Инмарлэн ужез, соос вылэ гожъям кылъёс но Инмарлэн ужез вал. 17Калыклэсь куашетэмзэ кылыса, Иисус Моисейлы шуиз: «Калык сылон интыысь жугиськон-ожмаськон куара кылӥське». 18Нош [Моисей] шуиз: «Та вормисьёслэн куаразы ӧвӧл, пограсьёслэн ӝуштэмзы но ӧвӧл, кырӟам гур мон кылӥсько». 19Калык сылон интые матэ вуэм бераз со ошпиез, эктыса сылӥсьёсты адӟиз: соку со йыркурен пурӟиз но киысьтыз изпулъёсты куштӥз, гурезь выжыын соосты пильылӥз. 20Соослэсь лэсьтэм ошпи сульдэрзэс кутӥз но тылэ куштыса сутӥз, пеньлы пӧрмытозяз пыргытъяз, собере вуэ кисьтӥз, со вуэз израиль пиослы юыны сётӥз. 21Соку Моисей Ааронлы шуиз: «Та калык тон азьын мар уродзэ лэсьтӥз, малы тон сое туж бадӟым сьӧлыке пыртӥд?» 22Аарон [Моисейлы] шуиз: «Кузёелэн вожпотонэз медаз ӝуатскы; тон тодӥськод ук, та калык лекъяськыны быгатэ шуыса. 23Соос мыным шуизы: ”Милям азямы мынӥсь инмар лэсьты; асьмеды Египет музъемысь поттэм адямиен, Моисеен, мар луиз, ми ум тодӥське ук”. 24Мон соослы шуи: ”Кинлэн бордаз зарниез вань, бордысьтыды басьтэ”. [Соос мугор бордысьтызы басьтӥзы] но мыным сётӥзы; мон сое тылэ куштӥ но, отысь та ошпи потӥз».

25Моисей адӟиз: та серметаса возьыны сётскисьтэм калык, уго Аарон соосты та калэ вуттӥз, тушмонъёссы азьын серекъян-веранлы кельтӥз. 26Моисей станлэн ӟезьы дораз султыса шуиз: «Кузё-Инмарлэнэз адямиос, [лыктэ] мон доры!» Соку Левийлэн вань пиосыз со котыре люкаськизы. 27Со соослы шуиз: «Тазьы шуэ Кузё-Инмар, Израильлэн Инмарез: урдэскады мечтэс оше но стан пыр капка дорысен капка дорозь ортче, берен лыктэ но котькудды браттэс вие, котькудды эштэс, котькудды матысь мурттэс вие». 28Левий пиос Моисейлэсь верам кылзэ быдэстӥзы: со нуналэ калык пӧлысь ог куинь сюрс мурт виемын вал. 29Уго Моисей [соослы] шуиз: «Туннэ асьтэдыз Кузё-Инмарлы ужаны-тыршыны сӥзе, котькудӥз пиез пыр, братэз пыр, туннэ Со тӥледлы бакель карон мед лэзёз».

30Мукетаз нуналэ Моисей калыклы шуиз: «Тӥ бадӟымлэсь но бадӟым сьӧлык лэсьтӥды; но мон Кузё-Инмар доры тубо, уг быгаты-а меда тӥлесьтыд сьӧлыктэс ӵошкатыны». 31Моисей Кузё-Инмар доры берытскиз, со тазьы шуиз: «Э, [Кузё-Инмаре,] калык бадӟымлэсь но бадӟым сьӧлык лэсьтӥз – аслыз зарни инмар лэсьтӥз; 32соослэсь сьӧлыксэс кушты, нош уд ке куштӥськы, соку Аслад гожъям книгаысьтыд монэ но ӵуш». 33Кузё-Инмар Моисейлы шуиз: «Кин Мон азьын сьӧлыказ, сое Аслам книгаысьтым ӵушо; 34нош али мын, [васькы] но та калыкез Мынам тыныд косэм интыям вай; тани Мынам Кылчинэ тынад азьтӥд мыноз, нош Мынам соосты вӧсь карон нуналы вуиз ке, сьӧлыксы понна Мон соосты вӧсь каро». 35Ошпилэсь сульдэрзэ лэсьтэмзы понна, кудзэ Аарон лэсьтӥз, Кузё-Инмар калыкез погыртӥз.

Currently Selected:

Потон 32: УДМБИБ

Highlight

Copy