Потон 31

31-тӥ ЛЮКЕТ

1Соку Кузё-Инмар Моисейлы шуиз: 2«Учкы, Мон нимыныз ӧтьыса бырйи Веселеилэз – Иуда выжыысь Орлэн Урий пиезлэсь пизэ; 3Мон сое Инмарлэн Духеныз тыр кари, солы пачылаз визьлык, валан, тодон, ваньзэ лэсьтыны быгатонлык сётӥ, 4зарнилэсь, азвесьлэсь, ыргонлэсь арбериос со лэсьтэ [чагыр, нап-горд, пеймыт-горд ыжгонлэсь, черсэм етӥн шортлэсь кулэ макеосты дася], 5дуно изъёсты вандылыса маке пушкы пуктылэ, пӧртэм ужъёслы пу арбериос вандылэ; 6тани, солы юрттӥськыны Дан выжыысь Ахисамахлэсь Аголиав пизэ сётӥсько, котькудӥзлэн визьмо муртлэн сюлмаз визьлык поно, Мон тыныд мар косӥ, сое ваньзэ соос мед лэсьтозы шуыса: 7вӧсяськон скиния, сӥзён-косонэн ковчег, солы шобрет, скиниялы вань кулэ тӥрлыкъёсты, 8ӝӧк но [ваньзэ] мар солы кулэ, чылкыт зарнилэсь лэсьтэм югдытон арбери, со бордысь вань тӥрлыкъёс, ӵындытон курбон сётон ӝӧк, 9тылын сутӥськись курбон сётон ӝӧк, со бордысь вань арбериос, мисьтӥськон но солэсь сылон интызэ, 10служить карон дӥськутъёс, Аарон священниклы святой дӥськутсэ, солэн пиосызлы служить карыны священниклэсь дӥськутсэ, 11зырӟыны вӧй, вӧсяськон интыын ческыт зынын ӵындытон, кызьы Мон косӥ, соос ваньзэ озьы лэсьтозы». 12Соку Кузё-Инмар Моисейлы тазьы шуиз: 13«Израиль пиослы тазьы шу: Мынэсьтым субботаосме уте-чаклалэ, уго со – Монэн тӥ вискын выжыысь выжыосы возиськись паймымон тодмет, тӥ мед тододы: Мон – Кузё-Инмар, тӥледыз дун-чылкыт карись; 14субботаез уте, уго со тӥ понна дун-чылкыт: кин субботаез саптаз ке, виемын луоз; кин та нуналэ ужа ке, со лул ас калыкез пӧлысь быдтэмын луоз; 15куать нунал уждэ ужа, нош сизьыметӥзэ – шутэтскон нуналэз, субботаез – Кузё-Инмарлы сӥзь: кин суббота нуналэ ужаса улэ, виемын мед луоз; 16израиль пиос субботаез мед утёзы, пумтэм вапумъёс ӵоже, выжыысь выжыосы субботаез праздник карыса мед улозы. 17Та Монэн израиль пиос куспын пумтэм вапумъёслы сётӥськем паймымон тодмет, малы ке шуоно Кузё-Инмар куать нунал ӵоже инэз но музъемез кылдытӥз, нош сизьыметӥ нуналаз шутэтскиз, ӧз ужа». 18Сӥнай гурезьысен [Инмар] Моисеен вераськемысь дугдэм бере солы сӥзён-косонэз тодытӥсь кык изпулъёс сётӥз, изпулъёс – соос вылэ Кузё-Инмар чиньыеныз гожъяз.

Currently Selected:

Потон 31: УДМБИБ

Highlight

Copy