Маккавейёслэн 3-тӥ книгазы 5
5
5-тӥ ЛЮКЕТ
1Соку эксэй, туж-туж вожомыса, синазькыль каронэн пачылмыса, слонъёсын кузёяськись Ермонэз ӧтиз но вуоно нуналэ ваньзэ вить сю слонъёсты ик трос ладанэн сюдыны но кӧтсы тырымон кужмо винаен сектаны косӥз, нош кӧтсы тырымон люктам бере, сьӧсьяськыны кутскыкузы, соосты кулонэз пумитаны кылем иудейёс вылэ лэзёно. 2Таӵе косон сётӥз но ачиз сиён-юон пӧлы кошкиз, бӧрсяз ӧтиз иудейёсын тужгес но тушмонъяськыса улӥсь аслэсьтыз тужгес но матысь эшъёссэ, ожгарчиосты; нош Ермон, слонъёсын кузёяськись, солэсь косонзэ тып-тып ас дыраз быдэстӥз. 3Та ужез быдэстыны пуктэм медоос шудтэм муртъёслэсь киоссэс думылыны ӝыт ик мынӥзы, мукетъёс но соослы пумит чакласькыса улӥзы, малпазы, уй ортчиз ке, вань калык быдэсак быдтэмын луоз шуыса. 4Язычникъёс малпало вал, иудейёслэн нокин но юрттӥськисьсы ӧвӧл ни шуыса, уго котыр ласянь соос секыт жильыосын ӝикатэмын вал; но иудейёс ваньмызлэсь кужмо Кузё-Инмарлы тэльмырыса вазиськылӥзы, вань кивалтӥсьёслы Кивалтӥсь Кузё Луисьлы, гажась-жалясь Инмарзылы, Атайзылы, дугдылытэк, бӧрдыса, синву пыр Солы тэльмырыса вазиськылӥзы, сюлворыса куризы урод-лек малпанэз соос котырысь палэнтыны но Аслаз данлыко лыктонэныз соослы дасям кулон-быронлэсь утьыны.
5Сюлмысь вӧсяськемзы Инме ӝутскиз. Ермон кутыса возьыны луонтэм слонъёсты кӧтсы тырымон трос винаен сектаз, трос ладанэн сюдӥз но ӵукна эксэй юртэ та сярысь ялыны лыктӥз. 6Нош Инмар эксэйлы юн ум сётӥз – та Инмарлэн дауръёс кутсконысен сётӥськись ӟеч кузьымез, – уйёсы но, нуназе но ваньмызлы, кинлы сётэмез потэ, Со сое сётэ. 7Инмарлэн сётэменыз эксэй ӟеч, мур умме усиз, законлы пумит лэсьтӥськись ужез сярысь вунэтӥз, одно ик быдэстоно малпам ужез сярысь чылкак алдаськиз. 8Нош иудейёс, тупатэм дырлэсь мозмытскыса, Дун-Сьӧлыктэм Инмарзэс данъяса улӥзы, нош ик ӟечен кусыпез тупатӥсь Инмарлэсь вылтӥяськись язычникъёслы Аслаз бур киызлэсь вераны луонтэм бадӟым кужымзэ мед возьматысал шуыса тэльмырыса куризы. 9Дасэтӥ часлэн ӝыны люкетэз ортчем бере ни куноосты ӧтчан-пумитан ужрадэз быдэсъясь медо ӧтем муртъёс вуиллям ни шуыса адӟиз но эксэй доры сайкатыны пыриз. Мырдэм гинэ сое сайкатӥз но кунояськон дыр ортче ни шуыса ялӥз, солы быдэстыны сётэм ужрад пумысен отчёт лэсьтӥз. Сое эскерем бере эксэй юыны кошкиз, юон пӧлы лыктэмъёсты эксэй асэныз ваче пумитэ интыяськыны косӥз. 10Тае быдэстэм бере юон пӧлы лыктэмъёсты юон дырлэсь али ортчись люкетсэ туж шулдырен ортчытыны со ӝутказ. 11Кема вераськем бере эксэй Ермонэз ӧтиз но лек кылъёсын юалляськыны кутскиз, кыӵе муген иудейёс туннэ нуналэз но улыны кельтэмын? 12Таиз вераз, кызьы со эшшо уйин ик косэм ужез быдэстӥз, эксэйлэн эшъёсыз веразы, со уг ӧрекчаськы шуыса. Соку эксэй, Фаларислэсь#5:12 Фаларис – Сицилиын Агригента городысь туж лек адями, тиран, улӥз христиан эралэн кутсконэзлэсь азьло (565–549 аръёсы) но лекгес луыса, шуиз, соос, пе, тау карыны кулэ туннэ ӟеч уммен иземзы понна, Со шуиз на: 13«Нош тон ӵуказе нуналлы чик ӝегатскытэк тазьы ик законлы пумит улӥсь иудейёсты быдтон понна слонъёсты дася». 14Эксэй та кылъёсты верам бере вань люкаськем калык куаныса, шумпотыса аслэсьтыз ӟеч мылкыдзэ вераз, собере ваньзы доразы бертӥзы. Уй дырез изьыса гинэ ӧз ортчытэ, со дырез пӧртэм сантэманъёсты малпанлы – ас визьмын малпам тушмонъёслы пумит сӥзизы. 15Вазь ӵукна, атас чоръяны кутскем бере ик, Ермон пӧйшуръёссэ поттӥз но паськыт азбарын вожзэс поттыны кутскиз. Шудтэмлэсь но шудтэм адӟытонэз учкыны городысь туж трос калык люкаськиз, куазьлэсь сактэмзэ чидатэк витизы. 16Иудейёс лулынызы-сюлмынызы курадӟизы но ялан туж бӧрдыса вӧсяськизы, синву пыр кырӟаса, ин пала киоссэс ӝутыса, Быдӟым Инмар нош ик ӝог юрттэт мед лэзёз вал шуыса, Солэсь тэльмырыса куризы. 17Шунды сиос ӧз потэ на, эксэй эшъёссэ куноятэ на вал, Ермон со доры вуыку, со эксэез ӧс сьӧры потыны куриз – ваньмыз дась ни, пе, мар кулэ вал эксэйлы. 18Тае кылзэм бераз, малы сое огдышем сямъёсызлы тупасьтэм дыре потыны ӧтё шуыса, эксэй паймиз. Со ваньмыз сярысь чылкак вунэтэм но юаз: «Мар со сыӵе уж, кудзэ со сокем дыртыса быдэстӥз?» Та вал ваньмызлы кузё луись Инмарлэн ужез – Со эксэйлы солэсь быдэстыны малпам ужъёссэ вунэтон сётӥз. 19Ермон но эксэйлэн вань эшъёсыз валэктыса солы шуизы: «Эксэй! Пӧйшуръёс но, ожгарчиос но тынад туж куремедъя, ваньзы дасямын». 20Нош со та вераськонъёслы пумит туж бадӟым йыркурен пурӟиз, – уго Инмарлэн малпаменыз солэн вань малпам ужез куашказ, – синъёсыз чиляса, кышкатыса со шуиз: 21«Тынад анай-атаед, нылпиосыд татын луысалзы ке, янгыштэм иудейёс интые соосты кыр пӧйшуръёс шумпотыса сиысалзы; иудейёс мыным но, мынам вашкала атайёсылы туж оскымонэсь, вошъяськисьтэмесь вал. Ӵош будэменымы сэрен мон тон борды думиськемын ӧй ке луысал, тынад мон азьын ӟеч ужъёсыд ӧй ке луысалзы, соку тон соос интые виемын луысалыд». 22Тазьы малпамтэ шорысь секыт кышкытлыкен пумиськиз Ермон – ымнырыз, тусбуез ик солэн воштӥськиз; эксэйлэн эшъёсыз пӧлысь ваньзы кӧтӝожен потылӥзы, вань люкаськемъёсты асьсэлэсь ужъёссэс быдэсъянэ мыныны косӥзы. 23Эксэйлэн таӵе ӟеч малпанэз сярысь иудейёс кылӥзы но быдӟым Инмарез, эксэйёслэсь Эксэйзэс, Солэсь юрттэт басьтэмзы понна ушъяны-данъяны кутскизы.
24Таӵе ужъёс бере эксэй нош ик юондыр ортчытӥз, кунооссэ шулдыръяськыны косӥз. Нош Ермонэз ӧтьытыса, солы лек шуиз: «Одӥг уж пумысен ик кӧня косон сётыны мон кулэ, лэсянтэм адями? Иудейёсты быдтон вылысь ӵукналы нош ик слонъёсты ожмаськыны дася». 25Соку соин ӵош кыллись ӵыжы-выжыосыз паймыса кылзӥськизы, кызьы солэн малпанъёсыз ялан вошъясько, соос шуизы: «Кема дыр ӵоже-а тон, эксэй, визьмес сынаса улод на, номыр валасьтэм муртъёсты кадь тон милемыз куинетӥ ползэ ини соосты быдтыны косӥськод, нош со ужез быдэстон доры вуиськод ке, нош ик малпандэ воштӥськод, быдтӥськод косонъёстэ? 26Таин сэрен, возьмаськыса улэмен, город но куалектэмын, туж трос калык огазе люкаськылэ, ялан кышкытлык вань, сое таркалозы-качалозы шуыса». 27Та бере эксэй, чылкак Фаларис музэн ик, визьзэ ыштыса, со пушкын иудейёслы пайда вайись воштӥськонъёс чиг уг ортчо шуыса лыдъяз, 28укылтэмлэсь но укылтэм кыл сётон пыр веранзэ юнматӥз, чик ӝегатскытэк соосты, пӧйшуръёслэн пыдъёсынызы, пыдтышъёсынызы лёгаса-сӧсыръяса, виылыны косӥз, нош собере кыл сётӥз Иудея вылэ ожен мыныны, тылын но мечен ӝоггес сое тырттэм кельтыны, милемыз пырыны лэзьымтэзы понна храмзэс тылын сутоно, ваньмызлы, отын курбон сётъяны малпасьёс, понна пумтэм дыръёс ӵожелы со тырттэм мед кылёз, со шуэ вал. 29Соку эшъёсыз но ӵыжы-выжыосыз туж шумпотыса, эксэйлэн верамезлы оскиськыса кошкизы но городлэн тупамон интыосаз возьмаськыны ожгарчиосты пуктылӥзы. 30Нош слонъёсын кузёяськись, вераны луоз, пӧйшуръёссэ, ладанэн сурам ческыт зыно вина сектаса, урмон калэ вуттӥз; бордазы шимес виылон арбериос ошылӥз. Ӵукна вазь ик, городысь потыса, лыдъянтэм трос калык вал ӵошатон интые вуыны кутскиз, Ермон эксэй юртэ лыктӥз но эксэйлы лэсьтоно уж сярысь тодаз вайытӥз. 31Нош эксэй, лек йыркурен пачылмыса, сьӧлыклэсь кышкасьтэм малпанэн, пӧйшуръёсын ӵош туж дыртыса, вожомыса потӥз, сюлмыз лек улэмен, ас синмыныз адӟемез потӥз вылӥ верам адямиослэсь бӧрдыса, курадӟыса кулэмзэс. 32Слонъёс капкаосысь потӥзы, соос бӧрсьы ожмаськон арбериосын ожгарчиос мынӥзы, озьы ик трос огшоры калык но; вань та уллё улысь ӝутскем тузонэз иудейёс адӟизы, зол шуккиськись кесяськем куараосты кылӥзы, соку соос малпазы, улонзылэн берпум минутъёсыз вуизы ни, шудтэмлэсь но шудтэм возьманзылэн пумыз вуиз ни шуыса. 33Бӧрдыны, викышъяны кутскыса, ог-огзэс чупаллязы, матысь выжы-кумыосынызы ӟыгыръяськизы, чырты бордазы ошиськылӥзы – атайёс пиоссы борды, нош анайёс – нылъёссылэн чырты бордазы ошиськылӥзы, 34куд-огез вож нуныоссэс гадь вылазы возизы, соос анайёссылэсь берпум йӧлзэс нонӥзы. 35Но та учыре но, Инмысь азьвыл вуылӥсь дурбасьтонъёсты тодазы вайыса, соос, ноныоссы бордысь нуныоссэс басьтыса, огкылысь ымныр вылазы выдылӥзы, 36вань кивалтӥсьёслы Кивалтӥсь Кузё Луисьлы бадӟым куараен вазиськылӥзы, соосты, кулонлэн капка выжыяз сылӥсьёсты, Со мед жалялоз вал, кужымзэ мед возьматоз вал шуыса, сюлворыса куризы.
Currently Selected:
Маккавейёслэн 3-тӥ книгазы 5: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016