Маккавейёслэн 2-тӥ книгазы 5
5
5-тӥ ЛЮКЕТ
1Та вакытэгес ик Антиох кыкетӥ пол ожен Египет вылэ мынӥз. 2Озьы луиз: быдэс город йылын, омырын, ог ньыльдон нунал ӵоже зарни дӥськутэн дӥсяськем буш вал вылын ворттылӥсьёс возьматскылӥзы, шибодыосын ожмаськыны дасяськем ожгарчиослы соос укшало вал; 3вал вылын оградын, ӵошкыт мынӥзы отрядъёс, ог-огзы вылэ урдскылӥзы, берлань чигналлязы – соосыз ласянь но, таосыз ласянь но щитъёс берыкъяськылӥзы, трос шибодыосын, мечъёсын сэзъязы, ньӧлъёсты ыбылыса лэзьязы, зарнилэсь лэсьтэм дӥсянъёссы чилязы, пӧртэм ожмаськон тӥрлыкъёссы но. 4Соин ик ваньзы вӧсяськизы, та возьматскон ӟечлы мед луоз вал шуыса.
5Табере ӧрекчи ивор вӧлмыны кутскиз: Антиох, пе, кулэм, соку Иасон ог сюрс воргоронъёсты люказ но шӧдтэк шорысь город вылэ урдскиз; кар борддор йылэ тубемзы но городэз киултэмзы бере Менелай изкар пушкы пегӟиз. 6Нош Иасон жалятэк ас калыкез пушкын вир кисьтыны кутскиз, ӧз но малпаськы, ас калыктэ виылыса басьтэм вормон шудтэм луонлэсь но шудтэм луон вае шуыса, малпаз, ожысь тушмонъёсты кадь погыртыса, вормон басьтыны, нокыӵе ӧз кариськы, таос солэн аслаз калыкез луо шуыса. 7Озьы ке но кузё луыны ӧз быгаты, нош лек малпанэз тазьы йылпумъяськиз: возьытэ вуыса, со нош ик пегась мурт кадь Аммон калыклэн музъемаз кошконо луиз. 8Лек улонэзлэн пумыз таӵе луиз: арабъёслэн кузёзы Арета азьын янгыше уськытэм бере городысь городэ пегаса ветлоно луиз, ваньмыз со сьӧрын уйиськыса ветлӥзы, законъёслэсь куштӥськемез понна сое адӟемпотостэм каризы, дор музъемлэсь, ас калыкезлэсь тушмонзэ кадь сое синазькыль каризы, Египетэ улляса лэзизы. 9Со, кин сокем трос калыкез ас музъем вылысьтыз улляса лэзиз, ачиз но мурт дуннее кулӥз-быриз, кылдэмезъя одӥг выжы луэмлы оскиськыса, со Лакедемон#5:9 Лакедемон – Спарта (1 Макк. 12:1-23; 14:20-23) калык доры лыктӥз вал, соос дорын ватӥськыса улыны быгатоз шуыса, уго со малпаз вал. 10Трос адямиосты сюе ватытэк кельтэм мурт со ачиз но сюе согиськытэк, атайёсызлэн шайвылазы ватӥськытэк кылиз, нокин но со понна ӧз бӧрды, жалясь ӧйлась.
11Вань та луэм учыр сярысь ивор эксэй доры вуэм бере со малпаз, Иудея со бордысь куштӥське шуыса, Египетысен ӝутскиз, лулыз-сюлмыз лекен пурӟиз но, ожмаськон тӥрлыкъёс кутыса, городэз киултӥз. 12Со ожгарчиослы косон сётӥз: кин ки улазы сюриз, ваньзэс жалятэк погыръяны, кин корка пушказ пегӟиз, соосты виылыны. 13Тазьы пиналъёсты но, пересьёсты но погыръязы, пиосмуртъёсты, кышномутъёсты, нылпиосты виылӥзы, нылмуртъёсты, пичи пиналъёсты бышказы. 14Куинь нунал куспын тямыстон сюрс мурт быриз: ньыльдон сюрссэ быдтӥзы адями виылӥсьёс, виемез мында ик ляльчи карыса вузамын вал. 15Таин Антиохлэн кӧтыз ӧз тыры, солэн возьытэз тырмиз дунне вылысь святойлэсь но святой храме пырыны, сое келяса мынӥз Менелай, законъёсты, атыкай музъемез туркась-таркась. 16Юрӟым киосыныз вӧсяськон сосудъёсты кутылӥз, мукет эксэйёслэсь но та святой интыез вылӥ карыса, данъяса, сӥё-сано карыса кузьмам арбериоссэс но кырсь киыныз таласа нуиз. 17Антиох вылтӥяськыны кутскиз, со ӧз вала, городын улӥсьёс вылэ сьӧлыкъёссы понна Кузё-Инмар вакчи дырлы гинэ вожзэ поттӥз шуыса, та понна ик уго та инты учкисьтэк-чакласьтэк кылиз. 18Соос трос сьӧлыкъёсын биниськемын ӧй ке луысалзы, соку Селевк эксэен ваньбур тыронэз эскерыны ыстэм Илиодор музэн, Антиох пырыса гинэ вуысал ке, со куспын со вӧсь каремын луысал, кышкасьтэм-возьыттэм ужезлэсь куштӥськысал. 19Но Кузё-Инмар калыкез инты понна ӧз бырйы, калыкез понна Со та интыез бырйиз. 20Соин ик ачиз инты но калыклэсь шугадӟонъёссэ адӟоно луиз, нош бӧрысь Кузё-Инмарлэсь ӟечлыкъёссэ адӟись луиз, Ваньмызлэсь Кужмо вожез потыку сое куштӥз, но нош ик Вылысь Кузё-Инмарлэн гажам-жаляменыз со туж бадӟым данэн ӝутӥськиз.
21Озьы Антиох храмысь сюрс тямыс сю талантэз лушказ но дыртыса Антиохияе кошкиз, сюлмыныз вылтӥяськыса, со музъем вылэз уян интылы пӧрмытыны, зарезь вылэз пыдын ветлон интылы пӧрмытыны луоз, кожаз. 22Со дыре ик со аслэсьтыз учкись-чакласьёссэ калыкез ёртыса-ӝигатыса возён понна кельтӥз: Иерусалиме – Фригияысь потэм Филиппез, сое пуктэм муртлэсь сямызъя эшшо но лек адямиез, 23нош Гаризине – Андроникез, соос сяна, Менелаез – татын улӥсьёс понна самой лек сямо адямиез, Иудеяысь калыкен тушмонъяськыса улӥсь муртэ. 24Адӟемпотостэм кузёйырез, Аполлониез, кызь кык сюрс ожгарчиосын Антиох вань быдэ вуэм пимуртъёсты виыны, нош кышномуртъёсты но пичи пиналъёсты – ляльчи карыса вузаны ыстӥз. 25Нош со Иерусалиме вуиз но тупаса улонэн лыктӥ шуыса возьматыны дауртӥз, нош ачиз святой суббота нуналэз возьмаса гинэ улӥз, куке иудейёс ужатэк, каньылэн доразы уло, со вакытлы ас адямиоссэ ожмаськон тӥрлык кутыны дасяз. 26Ваньзэс тае адӟыны потэмъёсты виылӥз, ожгарчиосынызы ӵош городэ пырыса, туж трос калыкез вииз. 27Нош Маккавей Иуда укмыс муртэн ӵош кыр дуннее кошкиз, аслаз матысь муртъёсыныз ӵош со гурезьёсын, кыр пӧйшуръёс музэн, турын-куар сиыса улӥз, озьы саптаськонлэсь утиськыса улӥз.
Currently Selected:
Маккавейёслэн 2-тӥ книгазы 5: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016