Маккавейёслэн 2-тӥ книгазы 4
4
4-тӥ ЛЮКЕТ
1Нош вылӥын верам Симон, ваньбурез, атыкай музъемез вузась луыса, Ония вылэ ӧрекчи кылъёс вераз, со, пе, ачиз Илиодорез лӧпкытъяз та ужлы, та урод ужын со янгыш луэ. 2Городлы ӟеч лэсьтӥсь муртэ, ас калыкез понна сюлмаськисез, законъёсты быдэсъян понна туж тыршисез со кунэн кивалтон ужлы пумитъяськись луэ шуыса вераны дӥсьтылӥз. 3Тушмонъяськыса улон сокеме вуиз – Симонлэн одӥг оскиськымон муртэз пыр адямиосты виылыны кутскизы; 4соку Ония адӟиз, нюръяськон кышкыт луыны кутске шуыса, Аполлоний, Келе-Сириялэн но Финикиялэн ож ужъёсын кивалтӥсез, укыр лекъяське, Симонлэсь йыркурзэ эшшо будэтэ шуыса, 5соку со эксэй доры мыныны потӥз, ас калыксэ янгыше уськытыны ӧз, котькуд адямилы, вань калыклы пайда вайыны малпаса мынӥз, 6уго со адӟе вал, эксэй ӧз ке сюлмаськы, ужъёсты каньылэн уд радъя, Симон озьы гинэ визьтэмъяськемысь уз дугды. 7Нош Селевк кулэм бере Епифан кушем нимын ветлӥсь Антиохлы кун-эксэйлык сюриз, со вакытэ вӧсяськон ужез киултыны выриз Онийлэн Иасон братэз. 8Адӟиськыкузы со эксэйлы куинь сю куатьтон талант азвесь сёто, шуиз, куд-ог мукет барышез пӧлысь тямыстон талант сётыны сӥзиськиз. 9Та сяна кыл сётӥз на, егит пиослы мугорзэс кыдатонъя дышетсконни усьтыны солы луонлык сётӥзы ке, Иерусалимысь улӥсьёсты антиохиецъёс шуыса гожтыны луонлык сётӥзы ке, со сю витьтон талант тыроз на. 10Эксэй соглаш луэмзэ верам бере со соку ик таӵе эрик басьтӥз но ас выжы калыксэ эллин калыклэн сямъёсызъя улон пала берыктыны кутскиз. 11Рим карын улӥсьёс доры тупаса, эшъяськыса улон пумысен вераськыны вуылэм Евполемлэн#4:11 1 Мак. 8:17 атаезлэн Иоаннлэн курем-тыршемезъя иудейёслы сётӥськем эксэй льготаосты Иасон кулэтэм кариз, законъя улонэз быдтыса, законлы пумит луись сямъёсты пыртылӥз. 12Изкарлэн выжыяз ик егит пиослы мугорзэс кыдатон-чебертон понна нимысьтыз дышетскон юрт пуктӥз, чеберлэсь но чебер пиосты отчы люкалляз, петас изьыен#4:12 петас изьы – вашкала грекъёслэн паськыт дуро шляпазы; татын: иудейёслы мурт луись улон сямлэн тодметэз ветлыны косӥз. 13Тазьы Инмарлы оскисьтэм, сьӧлыклэсь чик курдасьтэм, архиерейлы чик тупасьтэм Иасонэн сэрен, эллин сямъёслы дышыны кутскизы, мурт выжы калыкен матысь луыны ӧдъязы. 14Тазьы луэмен священникъёс гинэ но алтарьын сюлмысь, Инмарлэсь кышкаса ужамысь дугдӥзы, храмез санэ понэмысь дугдӥзы, курбон сётон сярысь ӧз сюлмаське, дыртыса, диск лэзьянэ ӧтён кылӥськыку, мынӥзы палестра#4:14 палестра – вашкала грекъёслэн спортэн вырон интызы шуон интые законлы пумит луись шудонэн шудыны зӥртэм дисклэн ӧтемезъя. 15Ас вордскем музъемзылэсь сӥ-данзэ номыр ӵотэ но ӧз понылэ, эллинъёслэсь сямъёссэс гинэ ваньмызлэсь умоесь луо шуыса лыдъяллязы. 16Та понна соос доры секыт адӟон вуиз; кинъёслэсь улон сямъёссэс басьтыны ӵошатскыса улӥзы, кинъёслэсь ваньзэ адӟем карыны тыршыса улӥзы, соос ик соослы тушмон но, курадӟытӥсь но луизы; 17уго сьӧлыклэсь кышкатэк Инмар законэз сӧрыса улэм понна вӧсь карон басьтытэк кыльыны уг луы, тае ик возьматэ та бӧрсьы вуись аръёс-вакытъёс. 18Тирын вить арлы быдэ ортчись шудонъёсты пусйыку, отчы эксэй но лыктэмын вал, 19соку сьӧлыклэсь кышкасьтэм Иасон, адӟисьёс карыса, Иерусалимысь антиохиецъёс шуыса гожтӥськем воргоронъёсты ыстӥз, Геркулеслы курбон сётыны куинь сю драхма нуыны косӥз; нош асьсэос коньдон вайисьёс куризы, сое курбонлы медаз сётэ, – тазьы лэсьтыса, ӟеч уз луы, сое мукет кулэ ужъёслы кутыны умойгес луоз; 20озьы, аслаз нимыныз со та уксёез Геркулеслы курбон сётыны ыстӥз, нош коньдон вайисьёс сое полысано пыжъёс лэсьтонлы сётӥзы. 21Та бере Менесфейлэн Аполлоний пиез Египетэ ыстэмын вал Филометор Птоломейлэсь эксэй пуконэ пуксемзэ сӥлы карыны, соку Антиох малпаз Филометор Птоломей солы пумит тушмон уж нуэ шуыса, ассэ утён пумысен сюлмаськыны кутскиз; та муген со Иоппияе мынӥз, отысен Иерусалиме вуиз. 22Иасон но, городын улӥсьёс но сое туж умой пумитазы, тылӝуатонъёссэс аратыса, (данъян кылъёсын) черекъяса пумитазы, татысен со ожгарчиосыныз ӵош Финикияе кошкиз. 23Куинь ар ортчем бере Иасон азьвыл верам Симонлэсь Менелай братсэ эксэй доры коньдон нуыны ыстӥз но куд-ог кулэ ужъёс пумысен кенешыны келяз. 24Нош со эксэйлы возьматскиз но, власть басьтон понна сое ушъяса-данъяса, Иасон сярысь куинь сю талант тросгес азвесь сётыны кыл сётыса, аслыз вӧсяськон ужъёсъя кузё луонэз басьтӥз. 25Эксэйлэсь косонъёс басьтэм бераз со дораз берытскиз, архирей луыны со чик ярантэм адями вал: туж лек кивалтӥсь кадь со вожзэ поттылӥз, сьӧсь пӧйшур кадь лекъяськыса улӥз. 26Тазьы Иасон аслэсьтыз агайзэ ӧрекчамез понна, сое ассэ но мукет мурт ӧрекчаз, уллям мурт кадь со аммон калыклэн музъем вылаз кошконо луиз. 27Менелай кивалтон ужез басьтӥз ке но, со чик ӧз сюлмаськы эксэйлы сӥзем коньдонэз сярысь, городысь изкарен кивалтӥсь йыр, Сострат, солэсь курылӥз ке но, 28уго со выт бичанэн кивалтӥз; та муген соосты кыкназэс ик эксэй доры ӧтизы. 29Архиерейлэсь ужзэ воштӥсе Менелай Лисимах вынзэ кельтӥз, нош Сострат – Кратитэз, кипр ожгарчиослэсь кивалтӥсьсэс.
30Та ужъюгдуръёс ортчылон вакытэ Тарсын, Малл карын улӥсьёс бугыръяськыны кутскизы соослэсь городъёссэс, кузьым карыса, эксэйлэн дусымезлэн, Антиохидалэн, киулаз сётэм понна. 31Таин сэрен эксэй дыртыса кошкиз кун-эксэйлыкысьтыз улонлэсь радлыксэ юнматон понна, ас интыяз Андроникез, сӥё-дано кузёйырез, кельтӥз. 32Соку тупась ӟеч учырез шӧдыса, Менелай храмысь куд-ог зарни сосудъёсты лушказ но Андрониклы кузьмаз, нош мукетъёссэ со талэсь азьвыл Тирын но котыр ёросъёсысь городъёсын вузалляз. 33Та сярысь пыр-поч тодэм бераз Ония сое шарае поттыса пыкылӥз но кышкатэк улон интые Антиохия вӧзысь Дафна каре ватӥськиз. 34Соин ик Менелай, Андроникез огназзэ учыртыкуз, Онияез виыны косӥз; Андроник Ония доры лыктӥз но кескич амалын сое оскытӥз – кыл сётыса бур кизэ мычиз; Ония шекланыса улӥз ке но, Андроник сое оскытыса ватӥськон интыысьтыз потытӥз, нош ачиз, чик возьдаськытэк, со куспын ик сое вииз. 35Талы иудейёс гинэ ӧз керӟегъяське, мукет калыкъёс пӧлысь но трос адямиос йыркуръяськизы та пиосмуртэз чик юнме шорысь вием понна. 36Киликия шаерысь эксэй берытскем бере городысь иудейёс бугыръяськись эллинъёсын ӵош солы веразы, Ония юнме шорысь виемын вал шуыса. 37Лулыныз-сюлмыныз ӝоже усьыса, жаль потыса, Антиох кулэм муртлэсь туж-туж визьлыко улэмзэ, котыр ласянь ӟеч сямо луэмзэ бӧрдыса буре вайиз, 38Андрониклы йыркурез ӝуатскон дыръя солэн вылысьтыз дарали дӥсьсэ кыскыса басьтӥз, дӥськутсэ кесяз но сое быдэс город пыр нуллыны косӥз, кытын со туж лек амалын Онияез вииз, отын ик ассэ но адями виисез виыны косӥз; озьы Кузё-Инмар солы пунэмзэ берыктӥз, кызьы кулэ вал, озьы сое вӧсь кариз.
39Менелайлэн сётэм эрикезъя Лисимахлэн городын вӧсяськон интыысь трос пол лушкаськемез сярысь куара-ланга вӧлмем бере, калык Лисимахлы пумит бугырскиз, уго трос зарни сосудъёс лушкамын вал. 40Вожпотонэз пачылмыса, калык бугырскем бере, Лисимах куинь сюрс мурт кие ожмаськон тӥрлык сётӥз но, жалянэз тодӥсьтэм, пересьмыса эшшо но визьтэмгес луэм адямилэн кивалтэм улсаз законлы пумит урод-лек вӧсь карон уж нуыны кутскиз. 41Лисимахлэсь таӵе лек ужзэ адӟыса, одӥгъёсыз изъёс кутӥзы, кыкетӥосыз – зӧк зыръёс, нош мукетъёсыз, музъем вылысь тузонэз кырмыса, Лисимахлэн адямиосыз вылэ пазяны кутскизы, 42таӵе амалэн троссэ яраё каризы, куд-огзэ погыртӥзы, ваньзэс бызьыса кошкытӥзы, нош ассэ вӧсяськон интыысь лушкаськисез ваньбур возён кенос доры виизы. 43Та пумысен Менелайлы суд лэсьтӥзы. 44Эксэй Тире вуэм бере тӧроослэн люкаськем кенешазы быръем куинь пиосмуртъёс солы асьсэлэсь урттылӥськонзэс вуттӥзы. 45Киултэм Менелай Дорименлэн Птоломей пиезлы кыл сётӥз: эксэйлэсь сое мозмытыны куриз ке, солы со трос коньдон сётоз. 46Птоломей эксэез бӧльмы сьӧры шутэтскыны шуыса ӧтиз, ужъюгдурез мыдланьтӥз. 47Эксэй вань урод ужез лэсьтӥсь Менелаез янгыш карон улысь мозмытӥз, нош шудтэм муртъёсты, – соос скифъёс азьын ке но верасалзы, янгыше уськытытэк лэземын луысалзы, – виыны косӥз. 48Тазьы городэз, калыкез, священной сосудъёсты утьыны тыршыса вераськисьёс ӝогак гинэ шонертэм виемын вал. 49Тирын улӥсьёс талы туж йырзы курен жалятэк вайизы ваньзэ, мар кулэ вал соосты ватон понна. 50Нош Менелай, кивалтӥсьёслэн узырлыкез яратэменызы сэрен, кияз кивалтон ужез кельтӥз, лекез эшшо но йылӥз, Иудеяын улӥсь калыклы со туж лек тушмон луиз.
Currently Selected:
Маккавейёслэн 2-тӥ книгазы 4: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016