Маккавейёслэн 2-тӥ книгазы 13
13
13-тӥ ЛЮКЕТ
1Сю ньыльдон укмысэтӥ арын Иудаен ӵош ветлӥсьёс доры ивор вуиз, Иудея вылэ, туж трос ожгарчиосты люкаса, Евпатор Антиох лыктэ, пе, 2соин ӵош ик лыктэ, пе, Лисий, солэн чакласез-утисез, кун ужъёсын кивалтӥсь, таослэн котькудзылэн эллинъёс пӧлысь люкам ожгарчиоссы вал: сю дас сюрс пыдын ожмаськисьёс, вить сюрс куинь сю мурт вал вылын ожмаськисьёссы, кызь кык слонъёссы, кусоос шедьытъям куинь сю ожмаськон уробооссы. 3Соос борды ик Менелай но итӥськиз, туж кескичъяськыса, Антиохез ӝутказ, атыкай музъемез утён понна ӧз, кивалтон ужез басьтонлы оскиськыса (со озьы кариз). 4Нош эксэйёслэн Эксэйзы Антиохлэсь вожпотонзэ йыруж лэсьтӥсь вылэ берыктӥз; куке Лисий валэктӥз, кызьы вань урод ужъёсты лэсьтонын Менелай янгыш луэ, соку Антиох Менелаез Берияе нуыны но отысь сямъя сое виыны косӥз. 5Со интыын витьтон гырпум ӝужда каланча сылэ, со пушкы пачылаз пень тыремын; со борды кыӵе ке но арбери шедьытэмын вал, со каланча котыртӥ берга-берга но пень пушкы лэзиське вал. 6Отчы виён вылысь кушто вал инмаръёссылы пумит йыруж лэсьтӥсьёсты яке мукет урод ужъёсты лэсьтонлэн сьӧраз потэмъёсты. 7Таӵе эзелен кулоно луиз сӧлыклэсь кышкасьтэм Менелай, сюй пушкы но сое ӧз ватэ, – туж шонер. 8Кузё-Инмарлэсь курбон сётон ӝӧксэ трос пол саптамез понна, кытын тыл но, пень но святоесь луо, со каланчаысь пень пӧлы кулон шедьтӥз.
9Со дыре ик эксэй, малпанъёсыныз лекомыса, азьлань мынӥз, иудейёслы атаезлэн ваем курадӟонъёсызлэсь но секытгес курадӟонъёс вайыны мылкыдыз вал. 10Иуда та сярысь тодэмез бере калыкез Кузё-Инмар азьын уй но нунал вӧсяськыны куриз: Со, азьвыл кадь ик, али но мед юрттӥськысал, куке законлы, атыкай музъемлы но святой храмлы кышкытлык кылдӥз, 11али гинэ ӧжытак эркын шокчыны быгатэм калыкез лек кыло язычникъёслэн киулазы медаз сёты вал. 12Ваньзы, огкылысь кариськыса, та куронэз быдэстӥзы, – куинь нунал ӵоже бӧрдыса, визяса, ымнырынызы музъем вылэ выдыса, дугдылытэк вӧсяськизы гажась-жалясь Кузё-Инмар азьын; соку Иуда калыклэсь мылкыдзэ ӝутыса, дась улыны косӥз. 13Тӧроосын огазе кыльыса, кенешиз: эксэй армия Иудеяе пырытозь но городэз киултытозь, потоно но, Кузё-Инмарлэн юрттэменыз, ужез быдэстоно. 14Ас сярысьтыз сюлмаськонэз дуннеез Кылдытӥсьлэн кияз сётӥз. Асэныз ӵош луэмъёсты кышкатэк ожмаськыны куриз – кулытозь – законъёс понна, храм понна, город понна, атыкай музъем, адямиез утись правоос понна, аслэсьтыз армизэ Модин кар вӧзы интыяз. 15Асэныз ӵош луэмъёслы куспазы тодметлы (парольлы) «вормон Инмар киын» шуэмез сётӥз но быръем кужмо егит пиосын эксэйлэн балаганэз доры уйин бызьыса мынӥзы но ньыль сюрс ожгарчиосты отчы виизы, со сяна, самой бадӟымез слонэз тыбыр вылаз интыяськем ожгарчиосын валче виизы. 16Отысь ожгарчиосты юн кышкатэм, куалектытэм бере соос отысь ӟечкын берытскизы. 17Та куазь ӟардыку вал ини, соосты шобыртыса возись Кузё-Инмарлэн юрттэменыз ваньмыз ӟечкын ортчиз. 18Нош эксэй, иудейёслэсь кышкасьтэм луэмзэс тодыса, кескич амалэн малпаз вал та интыосты киултыны. 19Соку иудейёслэн Вефсура юн изкарзы борды урдскиз вал, но пегӟыса кошконо луиз, сое вормизы, трос ыштон адӟиз. 20Нош Иуда изкар пушкы кылемъёслы, мар кулэ вал соослы, ваньзэ сое ысъялляз. 21Иудей ожгарчиос пӧлысь кыӵе ке но Родок лушкемлыкъёс сярысь тушмонъёслы ялӥз, но сое утчаса шедьтӥзы, кутӥзы но пытсэт сьӧры ворсазы. 22Кыкетӥ полаз эксэй Вефсураын улӥсьёсын вераськиз; соосын тупаса улыны кыл сётӥз, соос но соин тупаса улыны кыл сётӥзы, собере эксэй отысь кошкиз но Иудаен ӵош ветлӥсьёс вылэ урдскиз, но сое ассэ вормизы. 23Антиохияе кивалтыны кельтэм Филипп со бордысь куштӥськиз шуыса тодэм бераз эксэй ӝоже усиз: иудейёсты либатыны кутскиз, зӥбыт-востэм кариськыса, ваньзэ шонерлыкоесь куронъёсты быдэсъяса улыны кыл сётӥз, соосын тупаса улоно кариськиз но курбон сётӥз, храмез сӥлы кариз но городлы ӟеч ужъёс лэсьтӥз. 24Маккавеез бордаз кутӥз но Птолемаидаысен кутскыса самой Герринозь сое ожен кивалтӥсе пуктӥз. 25Собере со Птолемаидае мынӥз: Птолемаидаын улӥсьёслы огкыл гожтэмлэн пуштросэз кӧтазы уг кельшы вал, отысь курон-косонъёслы бадӟым йыркурен улӥзы, соослэн соосты воштэмзы потэ вал. 26Суд ортчытон интые Лисий пыриз, быгатэмезъя утиськыны выриз, соосты либатӥз, ӟеч мылкыдоесь кариз но Антиохияе кошкиз. Тазьы йылпумъяськиз эксэйлэн ожен лыктонэз но берен берытсконэз.
Currently Selected:
Маккавейёслэн 2-тӥ книгазы 13: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016