Ездралэн 3-тӥ книгаез 9
9
9-тӥ ЛЮКЕТ
1Ответ сётыса, Со мыным шуиз: «Ас пушкад дырез туж чакласа мерта, азьвылгес верам паймымон тодметъёслэн оглюкетэз кошкиз ни шуыса адӟид ке, 2соку валалод, Вылысь Инмарлэн Аслэсьтыз кылдытэм дуннезэ (судить карыны) лыктон дырыз та луэ шуыса. 3Та дуннеын музъем зурканы, калыкъёс бугыръяськыны кутскизы ке, 4соку валалод, та сярысь Вылысь Инмар кутсконысеныз ик, тынад вордскемедлэсь азьвыл ик, вераз шуыса. 5Кызьы та дуннеысь вань кылдытэмлэн вань кутсконэз, пумыз но, нош пумыз адӟиськымон луэ, 6озьы ик Вылысь Инмарлэн дыръёсызлэн-вакытъёсызлэн вань кутсконзы, кудъёсыз усьтӥсько паймымон ужъёсын, кужымен, вань пумзы но, кудъёсыз адӟисько уж вылын, паймымон тодметъёс пыр. 7Котькудӥз утиськоно мурт, аслаз ужъёсыныз но осконэныз, кудӥныз тӥ оскиськоды, азьвыл верам шугадӟонъёслэсь утиськыны быгатӥсь мурт 8улэп кылёз но Мынам музъем вылысьтым Мынэсьтым утён сётонме адӟоз, кудзэ Мон дунне кылдытон вакытэ ик Аслым дун-чылкыт кари. 9Мынам сюрес вылысьтым али палэнскемъёс соку тазьы лэсьтэмысьтызы жалялозы, синазькыль карыса курон-косонъёсыя улонлэсь куштӥськемъёс курадӟон пӧлын улозы. 10Улэп дыръязы ӟечлыкъёс басьтыса вылысь Монэ тодмамтэос, 11эриксы вал на дыръя, куке соослы ӧпкельыса сьӧлыкъёслэсь куштӥськон понна инты усьтэмын на вал, законме кулэтэм каризы, ӧз валалэ сое, 12соос кулэмзы бере, курадӟыса улыкузы, Монэ тодмалозы. 13Табере тон эн ни тунсыкъяськы сьӧлыклэсь кышкасьтэмъёслэн вуоно курадӟонзы пумысен, тон эскеры-тод, кызьы но ку шонер улэмъёс утиськозы, соос понна уго та дунне кылдытэмын, соослэн уго та дуннезы». 14Ответ сётыса, мон шуи: 15«Мон азьвыл но верай ни, али но верасько, берло но верало: кулоноос-быроноос утиськоноос сярысь тросгес, кызьы тулкым ву шапыкъёслэсь бадӟымгес». 16Со, ответ сётыса, мыным шуиз: 17«Кыӵе муэз, сыӵе ик кидысэз; кыӵе сяськаез, сыӵе ик буёлъёсыз; кыӵе ужасез, сыӵе ик ужез; кыӵе музъем ужасез, сыӵе ик мулэн утялтэмез; уго со вал та дуннелэн дырыз-вакытэз. 18Та дуннеез кылдэмезлэсь азьвыл ик, али дыре отын улӥсьёс понна улоно дуннеез Мон дасяку, нокин но Мыным ӧз пумитъяськы. 19Нош табере, та дунне кылдытэм ни бере, кылдытэм лулъёслэн сямъёссы-йылолъёссы сӧриськизы кулэсмисьтэм аран мыныку, эскерыны луонтэм закон вань дыръя. 20Мон дуннеез эскери-чаклай: но тани, отын улӥсьёслэн малпанъёсынызы сэрен, солы кышкытлык кылдэмын вал. 21Мон адӟи но жаляй сое, виноград пурыысь одӥгзэ мульыез Аслым кельтӥ, трос мерттэм будосъёс пӧлысь одӥгзэ Аслым кельтӥ. 22Юнме вордскемъёс тросэн мед бырозы, Мынам кельтэм мульые мед утиськоз, будосэ но, кудзэ Мон шуген-шуген будэтӥ. 23Нош тон мукет сизьым нуналъёс ортчем бере, визятэк (кӧс утьытэк) со нуналъёсы, 24сяськаяськись бусые потод, отын пуктэм корка ӧвӧл, бусы сяськаосты сиыса гинэ кӧттэ тырод, сӥль уд сиы, вина уд юы, сяськаос сиыса гинэ улод, 25дугдылытэк Вылысь Инмарлы вӧсяськы, соку Мон лыкто но тонэн верасько». 26Солэн верамезъя, мон Ардаф нимо бусые мынӥ, отысен сяськаос пӧлы пукси но бусы сяськаосты сии, соосты сиыса кӧтме тыри. 27Сизьым нунал бере мон турын вылын кылли, сюлмы нош ик, азьло кадь ик, куалекъяз. 28Ымы усьтӥськиз но, Вылысь Инмар азьын вераськыны кутски, тазьы шуи: 29«Э, Кузё-Инмаре! Астэ милемлы возьматыса, Тон пырыны-потыны луонтэм, номыр будӥсьтэм луоё кыр дуннеысен, Египетысь потэм беразы, милям атайёсмылы возьматскид, 30Тон шуид: ”Кылзы Монэ, Израиль, Иаковлэн выжыез, верам кылъёсме санэ пон. 31Тани, Мон тӥ пушкы Аслэсьтым законме кизисько, тӥ пушкын со емыш ваёз, со бордын тӥ пумтэм вапумъёс ӵоже данъяськыса улоды”. 32Нош милям атайёсмы закондэ кутӥзы ке но, сое ӧз быдэсъялэ, пуктон-косонъёстэ ӧз уте; законэдлэн емышез ӧз быры, бырыны но ӧй быгатысал, уго со Тынад вал, 33нош законэз кутэмъёс, мар соос пушкы киземын вал, сое утьытэмзы понна быризы. 34Ӵемгес тазьы луэ: музъем кидысэз пушказ басьтӥз ке, яке зарезь кораблез вылтӥз уяны, яке кыӵе ке но сосуд сиёнэз яке юонэз пушказ басьтӥз ке, нош кытчы со киземын я кытчы со понэмын изъянмыны сюриз ке, 35таӵе учыре соин ӵош быроз, мар киземын яке мар пушказ понэмын, кабыл басьтэмын вал, но со кабыл басьтэм асьме азе уз ни кыльы. Нош милемын тазьы уг луы. 36Ми, законэз кутэмъёс, сьӧлыкаммы понна кулӥмы, сое кабыл басьтэм сюлэммы но кулӥз; 37нош закон ӧз быры, кужымез ӧз быры». 38Сюлмыным тае веракум, синъёсыным учки но бурпалась кышномуртэз адӟи: тани, со бӧрдэ, бадӟым куараен кыласа-бураса викышъя, лулыныз туж куректӥз; дӥськутэз кесямын вал, нош йыр вылаз пень пызьнамын. 39Соку мон дырме быдтыса малпаськемысь дугдӥ, табере, кышномуртлы вазиськыса, мон шуи: 40«Мар пумысен тон бӧрдӥськод, мар понна тон лулыныд сокем куректӥськод?» 41Кышномурт шуиз: «Кузёе, эн иса монэ, ачим понна бӧрдӥсько, куректонме юнгес каро, уго мон лулыным укыр ӝоже усемын, юн гинэ ултӥямын». 42Мон солэсь юай: «Мар тон адӟоно-чидано луид? Вера мыным». Со мыным шуиз: 43«Мон, тынад ляльчиед, нылпи вайисьтэм вал, кузпалэн улӥ, нош нылпие куамын ар ӵоже ӧй вал. 44Та куамын аръёс ӵоже котькуд часэ, котькуд нуналэ дугдылытэк Вылысь Инмарлэсь вӧсяськыса кури, 45куамын ар ортчем бере Инмар монэ, тынэсьтыд ляльчидэ, кылӥз, зӥбыт-востэм улэмме адӟиз, кӧтӝожме валаз но пи нуны мыным сётӥз, мон солы туж шумпотӥ, кузпалы но озьы ик, вань бускельёсы но, ми Вылысь Инмарез туж данъяса улӥмы. 46Туж секытэн мон сое сюдӥ-вордӥ. 47Со быдэ вуиз но аслыз кышно кураны мынӥз, мон юондыр ортчытӥ.
Currently Selected:
Ездралэн 3-тӥ книгаез 9: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016