Ездралэн 3-тӥ книгаез 7
7
7-тӥ ЛЮКЕТ
1Та верано кылъёсме вераса быдтэм берам мон доры Кылчин ыстэмын вал, азьвыл уйёсы но со ик мон доры ыстылэмын вал, 2со мыным шуиз: «Султы, Ездра, тыныд вераны лыктэм кылъёсме кылзы». 3Мон шуи: «Вера, кузёе». Соку со мыным шуиз: «Зарезь интыяськемын эркын, паськыт интые, со мур, мертаны луонтэм мед луоз шуыса; 4нош со пушкы пырон инты ӟоскыт азе интыяськемын, – озьы со шуръёслы укша. 5Кинлэн ке зарезе пыремез но сое адӟемез потысал ке, яке соин кузёяськыса улэмез потысал ке, со мурт ӟоскыт интыез ӧз ке ортчы, кызьы быгатоз пасьтала доры вуыны? 6Яке мукетыз ӵошатон: город пуктэмын, интыяськемын ӵошкыт азе, вань ӟечлыкъёсын пачылмемын; 7нош отчы пырон ӟоскыт, сыӵе меӵ азе со пуксемын – бурпалаз тыл гома, нош паллян палаз – мур ву. 8Соос вискытӥ – тылэн ву вискытӥ – одӥг гинэ сюбег сюрес мынэ, со вылэ адями одӥг пыдтыш вылаз гинэ султыны быгатэ. 9Та город адямилы люкетлы сётэмын ке луиз, со кызьы бен аслэсьтыз люкетсэ басьтоз, сюрес вылаз сылӥсь кышкыт могӟетъёсты ноку но ӧз ке ортчы?» 10Мон шуи: «Озьы, Кузё-Инмаре». Со мыным шуиз: «Сыӵе ик Израильлэн адӟон люкетэз. 11Соос понна Мон дуннеез кылдытӥ, нош Адам Мынэсьтым пуктон-косонъёсме сӧрем бере, мар лэсьтэмын вал, со суд улэ сюриз. 12Та дуннелэн пыронъёсыз ӟоскытэсь, вӧсь карисесь, жадьытӥсесь, озьы ик сюбегесь, кескичесь, курадӟонъёсын пачылэсь луизы, туж трос уж понэмез кулэ карисесь луизы. 13Нош вуоно дуннелэн пыронъёсыз эркынэсь, кышкытэсь ӧвӧл, быронтэм улонлэсь емышъёссэ ваё. 14Озьыен, али улӥсьёс, отчы пырыны малпасьёс, ӧз ке пыре та ӟоскыт, шугадӟон интые, соку соос, мар соослы дасямын, сое басьтыны уз быгатэ. 15Тон сисьмоно ке, малы кулэ кепыраны, тон кулоно ке, малы алекъяськиськод? 16Малы тон сюлмад кабыл ӧд басьты сое, мар луоз азьпалан, малы кабыл басьтӥд сое, мар вань туннэ улонын?» 17Мон ответ сётыса шуи: «Кузё-Инмаре Кузё-Атае! Тани Тон законэныд юнматӥд, тае шонер улӥсьёс люкетлы басьтозы шуыса, нош сьӧлыкоос кулозы-бырозы. 18Шонер улӥсьёс эркын улонэз басьтонлы оскиськыса ӟоскыт улонэз чидалозы, нош сьӧлыклэсь кышкатэк улэмъёс, ӟоскыт улонэз адӟоно луизы ке но, эркынзэ улонэз уз адӟе». 19Со мыным шуиз: «Инмарлэсь вылӥез судья ӧвӧл, Вылысь Инмарлэсь тросгес валасез но ӧвӧл. 20Та улонысь адямиос тросэз куло-быро, малы ке шуоно соослы ӵектэм Инмар законэз кулэтэм каро. 21Уго таяз дуннее лыктэмъёслы Инмар юн-юн вераз – лэсьтӥзы ке, соос улэп луозы, чакласа-быдэсъяса улӥзы ке, вӧсь каремын уз луэ. 22Нош соос ӧз кылзӥське, Солы пумитъяськизы, кулэтэм малпанъёссэс асьсэ пушкы юнматӥзы; 23сьӧлыко визь сынаськонъёсын вырыны кутскизы, Вылысь Инмар сярысь шуизы, Со ӧвӧл, пе, Солэсь сюресъёссэ ӧз тодэ; 24Солэсь законзэ кулэтэм каризы, Солэсь сӥзёнъёссэ палэнтӥзы, Солэсь тупатэм сямъёссэ быдэсъянын ӧй вал осконзы, Солэсь ужъёссэ ӧз быдэсъялэ. 25Соин ик, Ездра, тырттэмъёслы – тырттэмез сётӥськоз, нош тыроосызлы – тыроез сётӥськоз. 26Тани, дыр вуоз но паймымон тодметъёс лыктозы, соос сярысь Мон тыныд азьвыл ик тодытӥ, соку вылькен лыктоз, лыктыса возьматскоз, – али сое музъем ватыса возе. 27Котькудӥз адями азьвыл лыдъям-ӵотам лек ужъёсызлэсь мозмытскиз ке, со мурт ачиз адӟоз Мынэсьтым паймымон ужъёсме. 28Уго Мынам Пие Мессия#7:28 арамей, эфиоп, армян кылъёсын Мессия гожтэмын; латин, черк-славян, вуж англи берыктонын Иисус гожтэмын; туала выль англи берыктонъёсын Мессия гожтэмын соосын усьтӥськоз, кинъёс – Соин огазьын, нош кылемъёсыз ньыль сю ар эзылыса улозы. 29Со аръёс бере Мынам Пие Мессия кулоз, вань шокасьёс – адямиос но. 30Дунне сизьым нунал ӵоже вашкала дыръя кадь чус улоз, кызьы вал азьвыл, озьыен, нокин но улэп уз кыльы. 31Со сизьым нуналъёс бере умме усем дунне сайкалоз, сисьмем-сӧриськем дунне кулоз. 32Музъем ас пушказ кӧлӥсьёсты кутыса сётоз, сюй ас пушказ чус улӥсьёсты сётоз, нош лул возён интыос соослы возьманы сётэм лулъёсты сётозы. 33Соку Вылысь Инмар суд лэсьтон престол вылаз вуоз, курадӟонъёс ортчозы, кема чидаса витён но быроз. 34Одӥг суд луоз, зэмлык юнматскоз, оскон юнмалоз. 35Котькудӥзлэн ужез кыре потоз, пунэм берыктон усьтӥськоз, шонерлык султоз, шонертэм улон кузёяськемысь дугдоз».
* * *
(36) #7:(36) Валэктон. Ездралэн 3-тӥ книгаез грек Библияе пыртэмын ӧвӧл, но со вань вашкала христианъёслэн – арамей (сири), эфиоп, армян кылъёсын, нош озьы ик латин кылын гожтэм Библияосын. Черк-славян, ӟуч кылын печатлам таиз книга басьтэмын латин Вульгатаысь. Латин Вульгатаын печатлатэк кельтэм люкетэз – 36-105 кылбуръёс – пумисько вашкала христиан калыкъёслэн Библиязы; берло дыре латин кылэ берыктэм люкетъёссэ но шедьтӥзы ини. Та тунсыко, кулэ люкетэз ми курсивен печатласа сётӥськомы.«Курадӟон инты – ты – усьтӥськоз, нош солэн ваче пумитаз – каньылэн улон инты; геенналэн гурез адӟиськоз, нош солэн ваче пумитаз – шумпотыса улон рай адӟиськоз. (37) Соку сайкам калыкъёслы Вылысь Инмар шуоз: ”Учкелэ, валатӥське, Кинэ тӥ кулэтэм кариды, Кинлы тӥ ужаса-тыршыса ӧд улэ, Кинлэсь курон-косонъёссэ тӥ кулэтэм кариды. (38) Азьпалады меӵак учке, асьтэлэн ваче пумитады но учке: отын шумпотыса улон, каньыллык, нош татын тыл но курадӟон”. Тани суд нуналэ мар Тон соослы шуод. (39) Та нунал сыӵе: солэн шундыез но, толэзез но, кизилиосыз но ӧвӧл, (40) пилемез но, гудыриез но, чилекъянэз но, тӧлэз но, зорез но, бусэз но, пеймытлыкез но, ӝытэз но, ӵукнаез но ӧвӧл, (41) гужемез но, тулысэз но, пӧсез но, толэз но, кезьытэз но, салкымез но, йӧзорез но, зорез но, лысвуэз но ӧвӧл, (42) лымшор но, уй но, ӵук ӟардон но, пиштон но, сэзь куазь но, югыт но ӧвӧл, – Вылысь Инмарлэн пиштонэз сяна, номыр но ӧвӧл, соин гинэ ваньзы адӟыны быгато сое, мар вань азьпалазы. (43) Со кыстӥськоз арлэн сизьым нуналъёсыз кадь. (44) Таӵе Мынам судэ но солэн радлыкез. Тыныд огнадлы гинэ Мон сое усьтӥ». (45) Ответ сётыса, мон шуи: «Мон верай ни, эшшо верало на: шудоесь Тынэсьтыд курон-косонъёстэ быдэсъяса улӥсьёс. (46) Нош мон та сярысь вӧсяськыса кури: дунне вылын улӥсьёс пӧлысь сюроз-а одӥг ке но сьӧлыкамтэ мурт, яке вордскемъёс пӧлысь Тынэсьтыд сӥзён-косондэ сӧрылымтэ муртэ луоз-а шедьтыны? (47) Табере мон адӟисько: вуоно вапум-даур ӧжыт муртлы гинэ шумпотон ваёз, нош курадӟон – тросэзлы. (48) Уго милям пушкамы лек сюлэм будӥз, со милемыз Инмар бордысь палэнтӥз, сисьмон азе, кулон-бырон сюрес вылэ, вуттӥз, быронлэсь ӟоскытэсь сюресъёссэ возьматӥз, улон бордысь палэнтӥз, – ӧжытсэ гинэ ӧз, – ваньзэс сямен ик кылдытэм муртъёсты палэнтӥз». (49) Соку Со мыным ответ сётыса шуиз: «Кылзы Монэ, Мон дышето тонэ, азьпалан мар луоно, сое валан сёто. (50) Со понна ик Инмар одӥг гинэ дунне ӧз, кык дунне кылдытӥз. (51) Тынад кылъёсыд сярысь ке верано, шонер улӥсьёс трос ӧвӧл – ӧжыт гинэ, со дыре ик сӧлыклэсь кышкасьтэмъёс туж трос, соин ик та пумысен тани та верамез кылзы: (52) ”Дуно изъёсыд ӧжыт ке луиз, соос пӧлы, трос мед луозы шуыса, узвесь но горд сюй ватсалод шат? Узвесь но горд сюй трос уго”». (53) Мон шуи: «Кызьы озьы луоно?» (54) Со мыным шуиз: «Та гинэ ӧвӧл, музъемлэсь но юа, со тыныд вералоз, чеберъяськыса со доры мын но, со тыныд вералоз. (55) Тон солы шуод: ”Тон зарни, азвесь но ыргон, нош озьы ик корт, узвесь но горд сюй поттӥськод. (56) Зарни сярысь азвесез тросгес поттӥськод, азвесь сярысь ыргонэз тросгес, ыргон сярысь кортэз тросгес, корт сярысь узвесез тросгес, узвесь сярысь горд сюез тросгес поттӥськод”. (57) Табере ачид чакла, мар дуно но ас бордаз юнгес кыске: мар тросгес, яке мар шер-шер гинэ пумиське?» (58) Мон шуи: «Кузё-Инмаре Кузё-Атае! Мар тросгес пумиське, со сыӵе ик дуно ӧвӧл, нош мар шер пумиське, со дуногес». (59) Мыным, ответ сётыса, Со шуиз: «Ас поннад мерта, мар тон малпад: секытэн поттэм ваньбурезлы мурт юнгес шумпотэ со муртлэсь, кин трос-трос кыллись ваньбурез аслыз каре ке. (60) Тазьы ик луоз Мынам сӥзем судэным но. Ӧжыт утиськем муртъёс понна но Мон шумпото, уго соос та виын Мынам данлыкелэсь кужымзэ юнматӥзы, соос пыр та виын ик Мынам нимы данъямын. (61) Трос быронэ сюремъёс понна ӝоже уг усьы: уго со самой соос – табере ини буслы укшатэмъёс, тылэн но ӵынэн оградэ пыртэмъёс. Тани соос ӝуатскизы, гомаса ӝуаны кутскизы но кысӥзы». (62) Мон ответ сётыса шуи: «Э, музъем! Мае тон вордскытӥд, сюйысь йырвизь потӥз, вань кылдытэм макеосты сямен ик? (63) Эсьмаса сюй медаз но поты вал, со пушкысь йырвизь медаз кылды вал шуыса. (64) Нош табере йырвизь милемын ӵош будэ, соин сэрен ми курадӟиськомы, уго тодыса вылысь быронэ мынӥськомы. (65) Адями выжы мед викышъялоз, луд вылысь пӧйшуръёс мед шумпотозы; вань вордскемъёс мед викышъялозы, ньыль пыдоос, пудоос мед шумпотозы. (66) Уго соослы, асьмелы сярысь, трослы умойгес, – соослы судэз витёно ӧвӧл; соос курадӟытонэз но, шудо-буро улонэз но кулэм беразы уз тодэ. (67) Кулэм бере улонлэн милемлы мар пайдаез, туж секыт курадӟыса улоно луимы ке? (68) Уго котькудӥз но вордскем адями законлы пумит улонэн пачылмемын, сьӧлыкъёсын тырмемын, йыружъёсын секытомемын». (69) Асьмелы судэ мыноно ӧй луысал, оло, умойгес луысал. (70) Со мыным ответ сётыса шуиз: «Вылысь Инмар Адамен но со бордысь потэм вань калыкен дуннеез кылдытэмезлэсь азьвыл ик Со судэз но мар соин герӟаськемын, дасяз. (71) Табере нош аслад верам кылъёсыд вылын ик валатскы; йырвизь асьмемын ӵош будэ тон шуид ук. (72) Соин но музъем вылын улӥсьёс курадӟонъёс чидано луо: йырвизьзы вань вылысь, законлы пумит улӥзы, курон-косонъёс басьтӥзы, нош соосты ӧз быдэсъялэ, закон сьӧры мынӥсьёс луыса вылысь, басьтэм законзэс кулэтэм каризы. (73) Судын мар вераны малпало, яке берпуметӥ дыре кыӵе ответ соос сётозы? (74) Зэмзэ ик, Вылысь Инмар кӧня дыр ӵоже чиданзэ соослы возьматыса улӥз, кин та дуннеын улэ, соос асьсэос понна ӧвӧл, Солэн азьвыл ик малпам-пуктэм дырыз понна Со кема чидаса улӥз». (75) Ответ сётыса, мон шуи: «Кузё-Инмаре, Тон азьын мон дэлет шедьтӥ ке, эшшо тае но мыным, Аслад ляльчиедлы, возьматы на: кулэммы бере – ми пӧлысь ваньмыз лулзэ сётэм бере – Тон кылдытэм дуннеез выльдытыны кутскид ке, каньыллыкын улонэз адӟомы на-а яке соку ик-а курадӟонъёсты чиданы кутскомы?» (76) Со, ответ сётыса, мыным шуиз: «Тае но мон тыныд возьмато. Но тон синазькыль карисьёсын астэ эн сура, курадӟон чидасьёс радэ но астэ эн пукты, (77) уго тынад Вылысь Инмар дорын возиськись ӟеч ужъёсын шыкысэд но берпум нуналъёс вуытозь со тыныд возьматэмын уз на луы. (78) Табере кулон сярысь вераськон мыноз, соку срок-дыр пумысен Вылысь Инмарлэн пуктон-косонэз (приговорез) потоз, адями мед кулоз но мугорысьтыз лулыз потыса нош ик Со доры, Кин сое сётӥз, нырысь ик, Вылысь Инмарлэн данлыкезлы йыбырттыны мед берытскоз. (79) Та Вылысь Инмарлэсь сюресъёссэ кулэтэм карисьёслэн, со вылысь кожылӥсьёслэн лулъёссы, кинъёс Солэсь законзэ санэ ӧз ке понылэ, Инмарлэсь кышкасьёсты синазькыль карылӥзы ке, (80) таӵе лулъёс каньылэн улон интые уз пыре, соку ик соос курадӟыны кутскозы, бырылӥсьтэм куректон-кайгуэн, кӧтӝожен сизьым сюресъёс кузя йыромыса ветлозы. (81) Нырысетӥез сюрес: Вылысь Инмарлэсь законзэ кулэтэм каремзы понна. (82) Кыкетӥ сюрес: улонэз басьтон понна соос уг ни быгато ӟеч-ӟеч ӧпкельыны. (83) Куинетӥ сюрес: соос Вылысь Инмарлэсь сӥзён-косонъёссэ быдэсъяса улӥсьёслы дасям медэз-кузьымез адӟозы. (84) Ньылетӥ сюрес: самой берпум вакытлы соос понна дасям курадӟытылонъёсты соос адӟозы. (85) Витетӥ сюрес: мукетъёслэсь улон интыоссэс соос адӟозы, кудъёссэ, туж-туж чус кариськыса, кылчинъёс возьмало. (86) Куатетӥ сюрес: соос адӟо – чик ӝегатскытэк татысен соос курадӟон интые выжо. (87) Сизьыметӥез сюрес вань вылӥ верам сюресъёсты ортче: куалекъяменызы соос сылмо, возьдаськон соосты сюпсе, Вылысь Инмарлэсь пиштӥсь данлыксэ адӟыса кышкаменызы кынартэм кылё, уго Со азьын улэп дыръязы сьӧлыкаса улӥзы, берпум аръёс вуэм бере Со азе судэ султоно луозы.
(88) Нош Вылысь Инмарлэсь сюресъёссэ утьыса возисьёс сярысь верано ке, сисьмоно сосудысьтызы лулзы потэм бере таӵе адӟонзы луоз. (89) Дунне вылын улыкузы, соос секытлыкъёсты чидаса, Вылысь Инмарлы ужаса-тыршыса улӥзы, Закон Сётӥсьлэсь законзэ быдэсак утьыны мед быгатысалзы шуыса, часлы быдэ кышкытлыкъёсын пумиськылоно луылӥзы. (90) Соин ик соос пумысен пуктон-косон (приговор) таӵе луоз: (91) нырысь ик соос туж шумпотыса Солэсь пиштӥсь данлыксэ адӟозы, Кин соосты Ас дораз кутэ; нош соос сизьым пумо каньыллыкъёссы пӧлын улозы. (92) Нырысетӥ пумоез та со: соос туж-туж секыт нюръяськизы соосын ӵош кылдэм лек малпанэз вормон понна, со соосты палэнэ, улонысь кулонэ медаз нуы шуыса. (93) Кыкетӥ пумоез: сьӧлыклэсь кышкасьтэмъёслэн лулзылэсь куалекъяса, йыромыса ветлэмзэ, азьпалан соослы чидано вӧсь каронэз соос адӟо. (94) Куинетӥ пумоез: соос адӟо Кылдытӥсьлэсь соослы сётэм тодытон-веранзэ – соослы сётэм законэз соос улэп дыръязы утьыса улӥзы. (95) Ньылетӥ пумоез: али майбырен, каньылэн улонзэс тодо, улон интыязы огазе люкасько но соосты кылчинъёс туж шыпыт чус улыса возьмало; соосты берпуметӥ нуналъёсы витись данэ поттонэз но тодо. (96) Витетӥ пумоез: сисьмон пӧлын улоно азьысь кошкемзы понна, вуоно улонын люкет басьтозы шуыса соос шумпото-куано; со сяна, соос адӟо туж ёрмыса, ӝикаса, курадӟыса азьвыл улэм интызэс, кудӥзлэсь соос мозмытскизы, табере шудоос, кулонэз-быронэз тодӥсьтэмъёс эркын улонэз шӧдыса улыны кутско ини. (97) Куатетӥ пумоез: соослы возьматэмын луоз, кызьы соослэн ымныръёссы шунды кадь пиштыса улыны кутскозы, кизилиослэн чиляса улэмзылы соос укшалозы, соку ик соос сисьмисьтэмесь-бырисьтэмесь луозы. (98) Сизьыметӥ пумоез вань вылӥ верамъёсызлэсь вылӥынгес луэ: йыг-йыг оскиськыса соос шумпотозы-куанозы; возьытэ вуонтэмлы оскиськыса, кышкатэк шумпотыса улозы, уго Солэсь ымнырзэ адӟыны соос дырто, Кинлы соос (музъем вылын) ужаса-тыршыса улӥзы, Кин киысь соос мед-кузьым басьтыны кулэ – соосты данэ поттыку. (99) Шонер улэмъёслэн лулъёссылэн сыӵе адӟонзы, соослы соку ик та сярысь ивортӥське. Азьвылгес верамын вал ни сьӧлыкоослэн курадӟон сюрессы сярысь». (100) Ответ сётыса, мон шуи: «Озьыен, мар сярысь Тон мыным верад, лулзы мугорзылэсь люкиськем бере сое адӟыны дыр сётэмын луоз». (101) Со мыным шуиз: «Сизьым нунал ӵоже соос эрикын улозы, мар сярысь вылӥын верамын вал сое сизьым нунал ӵоже адӟон понна, нош собере соос асьсэлэн улон интыязы люкаськозы». (102) Мон ответ сётыса шуи: «Тынад азьысьтыд гажан-жалянэз шедьтӥ ке, мыным, Аслад ляльчиедлы, возьматы на сое: суд нунал вуэм бере шонер улӥсьёс сьӧлыклэсь кышкасьтэмъёс понна Вылысь Инмар азьын вӧсяськыны, соослэсь сьӧлыкъёссэс мед куштоз шуыса куриськыны быгатозы-а, (103) атайёс пиоссы понна, нылпиос анай-атайёссы понна, агай-вынъёс агай-вынъёссы понна, ӵыжы-выжыос матысьёссы понна, эшъёс дуно муртъёссы понна быгатозы-а вӧсяськыны?» (104) Ответ сётыса, Со мыным шуиз: «Мон азьын гажан-жалян шедьтӥд бере, Мон тыныд тае но возьмато. Судлэн нуналыз ужез йылаз-пумаз вуттэ, ваньмыз мед адӟозы шуыса, зэмлыклэсь печатьсэ уж вылэ нюртэ. Кызьы али атай пизэ яке пиез атайзэ, яке кузё ляльчизэ уг ысты, яке эш аслыз самой дуно луись муртсэ соиз со интыын мед малпалоз яке изёз, яке сиёз, яке эмъяськоз шуыса уг ысты, (105) озьы ик ноку но, нокин но (со нуналэ) мукет мурт понна уз дурбасьты, соку котькудӥз нуллоз аслэсьтыз шонерлыксэ яке шонертэм луэмзэ».
36Мон шуи: «Авраам нырысез Содомын улӥсьёс пумысен вӧсяськиз; Моисей кыр дуннеын сьӧлыкам атайёс понна вӧсяськиз; 37Иисус (Навин) со бере – Ахан улон нуналъёсы – Израиль понна вӧсяськиз; 38Самуилэн Давид – кулӥсь-бырись калык понна, Соломон храмез вӧсяны лыктэм калык понна вӧсяськиз; 39Илия зорез кабыл басьтэмъёс понна но кулэм мурт мед улӟоз шуыса вӧсяськиз; 40Езекия – Сеннахирим вакытысь калык понна, тросэз – трос адямиос понна вӧсяськизы. 41Озьыен, сьӧлыкаса улон йылэм дыръёсы, шонертэм улон трос луон дыръёсы шонер улӥсьёс шонертэм улӥсьёс понна вӧсяськизы бере, малы бен озьы ик луыны кулэ ӧвӧл та виын но?» 42Ответ сётыса, со мыным шуиз: «Таиз даур быронлэн пумыз ӧвӧл на; Инмарлэн данлыкез отын ӵем дыръя уг луы, соин ик кынартэмъёс понна вӧсяськылӥзы. 43Судлэн нуналыз та улон даурлэн-дырлэн пумыз луоз но вуоно кулытэк-бырытэк улон вакытлэн кутсконэз луоз, – соку сисьмон-бырон ортчоз, 44возиськыны быгатытэк улон быроз, оскытэк улон дугдытӥськоз, нош шонерлык йылоз, зэмлык пиштыны кутскоз. 45Соку нокин но быронэ сюрись муртэ утьыны уз быгаты, вормись муртэ быдтыны уз быгаты». 46Ответ сётыса, мон шуи: «Тани мынам нырысетӥез но, берпуметӥез но кылы: Адамлы музъем сётэмын ӧй ке луысал, умойгес луысал, яке, сётэмын ни ке, медаз сьӧлыка шуыса кутоно вал. 47Адямилы мар пайдаез – таяз дуннеын куректон-кайгу пӧлын ул, нош кулэм берад – вӧсь карон тонэ возьма ке? 48Э, Адам! Мар тон лэсьтӥд? Тон сьӧлыкад но, соку тон огнад гинэ ӧд усьы, ми но, тон бордысь потэмъёс, усимы. 49Мар милемлы пайдаез, милемлы кулытэк-бырытэк улон дыр-вапум сӥземын ке, нош ми быронэ нуись ужъёс лэсьтыса улӥмы бере? 50Асьмелы пумтэм вапумъёслы оскиськон сӥзьыса верамын, нош асьмеос, лэсянтэмъёс, алекъяськисесь луэмын. 51Асьмелы тазалыко, каньыллыко улонлы интыос дасямын, нош асьмеос ярантэм урод улӥмы; 52зӥбыт-востэм улэмъёсты утьыса возён понна Вылысь Инмарлэн данлыкез дасямын, нош асьмеос туж урод-лек улонлэн сюресъёсыз кузя ветлӥмы. 53Рай возьматэмын луоз, солэн емышез сисьмытэк улэ, отын уло каньыллык но эм луон; 54нош ми отчы ум пыре, уго емыш вайисьтэм улон пӧлын улӥмы. 55(Уродлэсь) возиськыны быгатӥсьёслэн ымныръёссы кизилиослэсь но югытгес пиштыса улозы, нош милям ымныръёсмы пеймытлыклэсь но пеймытгес адскозы. 56Законлы пумит ужъёс лэсьтыса улыкумы, ӧм но малпаськылэ, кулэм берамы курадӟыса уломы шуыса». 57Со ответ сётыса шуиз: «Та – нюръяськон сярысь малпаськон, сое музъем вылын вордӥськем котькуд адями нуыны кулэ, 58вормемын ке со луиз, мед чидалоз, мар сярысь тон верад, нош со вормиз ке, соку со басьтоз сое, мае Мон верасько. 59Та – Моисеен верам улон, калыкен вераськыса улыкуз верам кылъёс: ”Аслыд улонэз бырйы – мед улод”. 60Нош соос солы ӧз оске, со бере вуэм пророкъёслы но, Мыным но – соослы верасьлы – ӧз оске, 61соослэн кулон-быронзы пумысен куректон уз луы, нош утиськон басьтоноос пумысен шумпотон луоз». 62Мон ответ сётыса шуи: «Тодӥсько, Кузё-Инмаре, Вылысь Инмар гажась-жалясь шуыса нимаське, малы ке шуоно кинъёс али таяз дуннее эшшо ӧз на лыктэ на, соосты Со жалялоз, 63Солэн сётэм законэзъя улонзэс ортчытӥсьёсты Со гажа-жаля. 64Со кема чидась, уго сьӧлыкасьёс вылын но кема чидась луэмзэ возьматэ, соос но Солэн кылдытэмъёсыз луо уго. 65Со шырыт сямо, уго Со дась кӧня кулэ, сомында сётыны, 66Со трос гажась-жалясь, уго Со Аслэсьтыз гажан-жалянзэ тросгес но тросгес возьматэ али улӥсьёслы но, азьвыл улӥсьёслы но, азьпалан улоноослы но. 67Аслэсьтыз гажан-жалянъёссэ ӧй ке йылэтысал, соку дунне отын улӥсьёсын ӵош улыны ӧй быгатысал. 68Со кузьымъёс сётэ, Ас ӟечезъя ӧй ке сётысал, йӧнтэм ужъёс лэсьтӥсьёслэн законлы пумит улэмзы ӧй куштӥськысал, нош соку адямиос пӧлысь дас сюрсэтӥ люкетэз но улэп кыльыны ӧй быгатысал. 69Со – Судья, Аслаз кылызъя кылдытэм муртъёслэсь сьӧлыкъёссэс ӧй ке куштысал, трос йыруж лэсьтонъёсты ӧй ке быдтысал, 70оло нош соку туж-туж трос калык пӧлысь ӧжытэз гинэ улэп кыльысал».
Currently Selected:
Ездралэн 3-тӥ книгаез 7: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016