Ездралэн 3-тӥ книгаез 6
6
6-тӥ ЛЮКЕТ
1Со мыным шуиз: «Музъем котырез кылдытыны кутскем дырысен, вакытъёслэсь-дауръёслэсь пумзэс-йылзэс пуктэмлэсь азьло, тӧлъёс пельтыны кутскемлэсь азьло; 2гудыриослэн куараоссы кылӥськемлэсь азьло, чилектэмъёслэн ворекъяны кутскемзылэсь азьло, райлэсь инъетъёссэ пуктонлэсь-юнматонлэсь азьло, 3туж чебересь сяськаос возьматскемлэсь азьло, ин кужымъёслэн вырӟемзылэсь, юнматскемзылэсь азьло, лыдъянтэм трос Кылчин ожгарчиослэн люкаськемзылэсь азьло, 4омырысь ӝуждалаослэн ӝутскемзылэсь азьло, инъёслэсь мертэтъёссэс нимамлэсь азьло, Сӥонын тылъёс ӝуатскемлэсь азьло; 5аръёсты-вакытъёсты эскерем-чакламлэсь азьло, соосты, кинъёс али сьӧлыкаса уло, висъямлэсь-люкемлэсь азьло, осконэз дунолэсь но дуно макеез кадь утьыса улэмъёсты пусъемлэсь азьло – 6соку Мон малпай, ваньзэ Мон огнам кылдытӥ, кин ке но мукетыз пыр сое ӧй кылдыты; Мон дорысь ик пум но потоз, мукетыз дорысь уз поты». 7Соку мон шуи: «Дыръёсты-вапумъёсты кыӵе люкон луоз, ку луоз нырысетӥезлэн пумыз, нош вуоноезлэн кутсконэз?» 8«Авраам бордысен кутскыса Исаак дорозь ик, солэсь Иаковен Исав вордскем бере Иаковлэн киыз кутсконысеныз Исавлэсь пыдтышсэ кутыса возиз. 9Таизлэн даурлэн пумыз – Исав, нош вуоноезлэн кутсконэз – Иаков. 10Адямилэн киыз – солэн кутсконэз, нош пумыз – солэн пыдтышкыз. Мукетыз сярысь Мынэсьтым эн юалляськы, Ездра». 11Ответ сётыса, мон шуи: «Э, Кузё-Инмаре, Кузё-Атае! Тынад син азяд дэлет мон басьтӥ ке, 12тэльмырыса курисько: Аслад ляльчиедлы паймымон ужъёсыдлэсь пумзэс возьматы, соослэсь оглюкетсэс Тон мыным кылем уе возьматӥд». 13Со мыным ответ сётыса шуиз: «Пыд вылад султы, ӵаш поттӥсь куараез кылзы, 14музъем зуркан выллем маке но луоз, нош тынад сылон интыед уз вырӟылы. 15Со куара вераськон вакытэ эн кышкатскы; уго пумыз вуон сярысь верамын луоз но, музъемлэн инъетъёсыз валалозы. 16Соос сярысь вераськон мынэ бере, музъем куалекъялоз, зуркалоз, уго тодэ, соослэн пумзы воштӥськыны кулэ шуыса».
17Озьы луиз: куара кылӥ но пыд вылам султӥ, тае кылӥ: тани верась куара кылӥське, солэн куашетэмез но, трос вуослэн куашетэмзылы укшась куара кылӥське, 18со шуиз: «Тани, вуо нуналъёс – музъем вылын улӥсьёс доры вуылон понна Мон матэ карисько; 19соку Мон кылзэс юало шонертэм амалъёсын туж бадӟым изъян лэсьтӥсьёслэсь, соку Сӥонэз ултӥян йылпумъяськоз. 20Даур-вапум паймымон тодметъёсын тырмиз ке, со бырыны кутскиз ке, тани Мынам возьматоно паймымон тодметъёсы: ин азьын книгаос усьтӥськозы, ваньзы ӵош адӟозы; 21одӥг аресъем нуныос асьсэ куараен вераськыны кутскозы, секытэн луэм кышномуртъёс, куинь-ньыль толэзь ортчыса, вуымтэ нуныос вайылозы, но соос улэп кылёзы, юнмалозы; 22кизем ю бусыос шӧдтэк шорысь кизьымтэ анаос кадь возьматскозы, юэн пачылам кеносъёс шуак тырттэм кылёзы; 23собере, ӵаш поттыса, гумы шудыны кутскоз, сое кылыса, соку ик ваньзы туж куалектозы. 24Со дыре тазьы луоз: эшъёс эшъёссылы пумит ожмаськон тӥрлык кутозы, тушмонъёс музэн, музъем но со вылын улӥсьёс кышкатскозы, ошмесъёслэн сӥоссы быземысь дугдозы, куинь час ӵоже вузы уз бызьы. 25Вань та учыръёс бере кин улыны кылёз, мар сярысь Мон тыныд тодытыса верай, со утиськоз, Мынэсьтым утемме адӟоз, асьтэлэн улон даурдылэсь пумзэ но адӟоды. 26Вордскемзы дырысен кулонэз адӟымтэ, быръем адямиос тае адӟозы, улэп кылемъёслэн сюлэмъёссы воштӥськозы, мукет шӧдон-валанлы пӧрмытскозы: 27уго уродлык быдтэмын луоз, кескичлык но быроз. 28Оскон сяськаяськоз, юрӟым-кырсь сьӧлыко улон вормемын луоз, сомында дыр ӵоже емыш вайытэк улэм зэмлык усьтӥськоз». 29Со вераку, мынам азям сылӥсь шоры мон учки. 30Со мыным шуиз: «Вуоно уе тае возьматон понна мон тон доры лыкто. 31Озьыен, тон нош ик вӧсяськид ке, сизьым нунал нош ик визяд ке, соку мон тыныд троссэгес возьмато, со нуналэ тынэсьтыд мае кылӥ, солэсь но троссэгес возьмато. 32Вылысь Инмар тынэсьтыд куарадэ кылӥз; Юн-Кужмо шонер лэсьтэмдэ адӟиз, пинал дырысеныд утем чылкытлыктэ но Со адӟиз. 33Соин ик Со монэ ыстӥз ваньзэ тае тыныд возьматыны но шуыны: ”Оскиськы, эн кышка; 34эн дырты нырысетӥ дыръёсы кадь аляк ужъёс сярысь малпаськыны, берпум аръёс сярысь тазьы ик дыртыса судить карыса медад вераськы”».
35Та бере мон нош ик синвуэн вӧсяськи, озьы ик сизьым нунал ӵоже визяй, мыным сӥзем куинь арняез быдэстон понна. 36Тямысэтӥяз уе сюлмы нош ик бугыръяськыны кутскиз, соку мон Вылысь Инмар азьын вераны кутски; 37уго мынам духе кужмо ӝуатскиз, лулы курадӟиз. 38Соку мон шуи: «Кузё-Инмаре! Кылдытыны кутскем дырысен Тон верад; нырысетӥяз нуналэ шуид: ”Ин но музъем мед луозы”, Тынад верам кылыд быдэсмем ужлы пӧрмиз. 39Соку Дух (азьлань-берлань) поръяса ветлӥз, котыр дуннеез шобыртӥз пеймытлык но чуслык: адями куаралэн кылӥськонэз соку ӧй на вал. 40Соку Тон, Тынад ужед мед адӟиськоз шуыса, Аслад ваньбур возён интыысьтыд бадӟым югытлы потыны косӥд. 41Кыкетӥяз нуналэ Тон юн-чурыт интылэсь духсэ кылдытӥд но сое висъяны косӥд, вуосты ог-огзылэсь люкылыны косӥд, – оглюкетэз вылӥе мед тубоз, нош кылемез улӥе мед кылёз. 42Куинетӥяз нуналэ Тон вуосты музъемлэн сизьыметӥ люкетаз люкаськыны косӥд, нош куать люкетъёссэ кӧсатӥд, Тон азьын кидыс кизисесь мед луозы, гырыны-кизьыны ярасесь мед луозы шуыса. 43Тынад кылыд потыса гинэ вуэ, соку ик уж вуылӥз; 44шӧдтэк шорысь пӧртэм-пӧртэм шӧмоесь туж-туж трос емышъёс возьматскизы, сяськаос туссыя вошъяськисьтэмесь, туж ческыт зын поттӥсесь вал: ваньмыз та быдэстэмын вал куинетӥ нуналэ. 45Ньылетӥ нуналэ Тон шундылы пиштыны косӥд, толэзьлы югыт сётыны, кизилиосты интыяськыны косӥд, 46кылдытоно адямилы соосты ӟеч лэсьтыса улыны косӥд. 47Витетӥ нуналэ музъемлэн сизьыметӥ люкетэзлы – вулэн люкаськем интыезлы – Тон шуид, со улэп макеосты, лобасьёсты, чорыгъёсты мед поттоз, – озьы ик луиз. 48Кылтэм, лултэм ву, Инмарлэн косэмезъя, улэп макеосты поттӥз, Тынэсьтыд паймымон ужъёстэ вань выжыос мед ивортозы шуыса. 49Соку Тон кык животэз улэп кельтӥд: одӥгез бегемот шуыса нимаське, нош мукетыз – левиафан. 50Тон соосты ог-огзылэсь люкид, малы ке шуоно сизьыметӥ люкет, кытчы ву люкамын вал, соосты огазе тэрытыны ӧз быгаты. 51Бегемотлы Тон куинетӥ нуналэ куасьтэм музъемлэсь одӥг люкетсэ, сюрс гурезё интыез, сётӥд, отын со мед улоз; 52Левиафанлы сизьыметӥзэ вуо люкетэз сётӥд, утид сое, кинъёслы но ку Тынад сое сиёнлы сётэмед потоз. 53Куатетӥ нуналэ Тон музъемлы косон сётӥд, Тон азе пудоосты, пӧйшуръёсты, нюж кыстӥськыса ветлӥсьёсты мед поттоз шуыса. 54Нош таос бере Тон Адамез кылдытӥд, сое Тон вань кылдытэм макеосыдлы кузёе пуктӥд, со бордысь ваньмы асьмеос потӥмы, Тынад быръем калыкед но. 55Ваньзэ тае мон, Кузё-Инмаре, Тон азьын верай, малы ке шуоно ми понна Тон та дуннеез кылдытӥд. 56Нош Адам бордысь потэм мукетъёсыз калыкъёс сярысь Тон шуид, соос ӧвӧлтэмлэсь вань гинэ, соос дыльдылы укшало, соосты ваньзэс Тон сосудысь виясь шапыклы укшатӥд. 57Нош табере, Кузё-Инмаре, ӧвӧлтэмлэсь вань ӵотын лыдъям калыкъёс милемын кузёяськыса уло, милемыз сиё. 58Нош ми, Тынад калыкед, кинъёсты Тон нырысь вордскем нуныед, огназ вордӥськем, яратоно калыкед шуыса нимад, соослэн киулазы сётэмын. 59Та дунне ми понна кылдытэмын ке, соку нош малы бен та дуннелэсь люкетсэ ум басьтӥське? Кытчыозь тазьы кыстӥськоз?»
Currently Selected:
Ездралэн 3-тӥ книгаез 6: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016