Ездралэн 3-тӥ книгаез 2
2
2-тӥ ЛЮКЕТ
1Тазьы шуэ Кузё-Инмар: «Та калыкез Мон уж пӧлысь поттӥ, Аслам ляльчиосы, пророкъёсы, пыр Мон соослы косон сётӥ, нош соослэн пророкъёсме кылзэмзы но ӧз поты, Мынэсьтым визь-кенешъёсме кулэтэм каризы. 2Соослэн вордэм анайзы соослы шуэ: ”Нылпиосы, мынэ, мон палкышно, огнам улыны кельтэмын. 3Мон тӥледыз шумпотыса вордӥ – но бӧрдыса, секыт ӝоже усьыса кошкыны лэзи, малы ке шуоно тӥ Инмарды Кузё-Инмар азьын сьӧлыкады, Со азьын лек уж лэсьтӥды. 4Нош али мон мар тӥледлы лэсьтом? Мон палкышно, огнам улыны кельтэмын; нылпиосы, мынэлэ, монэ мед жалялоз шуыса, Кузё-Инмарлэсь куре”. 5Тонэ, Атае, Мынэсьтым сӥзён-косонме утемзы потӥсьтэм пиослэн анайзы доры адӟись луыны ӧтисько: 6возьдаськыса улон киулэ сёт соосты, соослэсь анайзэс но – туркан-таркан улэ, соослэн выжызы но медаз кыльы; 7соослэн нимъёссы калыкъёс пӧлы мед пазьгиськозы, музъем вылысь мед ӵушиськозы, уго соос Мынэсьтым сӥзён-косонме кулэтэм каризы. 8Куректон-кайгу тыныд, Ассур, сьӧлыклэсь кышкасьтэмъёсты дорад ватыса возись! Кескич выжы! Тодад вай али, Содомлы но Гоморралы мар Мон кари: 9соослэн музъем вылазы смола люкъёс, пень вырйылъёс сыло. Мон тазьы каро Мынэсьтым кылзӥськисьтэм муртъёслы», – шуэ Дунне Кутӥсь Кузё-Инмар. 10Тазьы шуэ Кузё-Инмар Ездралы: «Мынам калыкелы иворты: Израильлы сӥзем Иерусалим эксэйлыкез Мон соослы сёто, 11соослэсь данъямзэс кабыл басьто, пумтэм вапумъёс ӵожелы дасям улон интыосме соослы сёто. 12Улон писпу соослы ческыт зын поттӥсь луоз; ужен какалмытэмын уз луэ, кужымтэк-кынартэк соос уз кыле. 13Мынэлэ – басьтоды; возьмано нуналъёсты трос медаз луэ, вакчиятэмын мед луозы шуыса куре. Тӥледлы эксэйлык дасямын ни: сэзь улэ. 14Ин но музъем, тодыты, уго Мон уродэз-лекез ӵушыса куштӥ, ӟечлыко луисез кылдытӥ. Улӥсько Мон! – шуэ Кузё-Инмар. 15Анай! Аслэсьтыд пиостэ ӟыгырты, шумпотыса соосты быдэ вутты; дыдык анай кадь соослэсь пыдъёссэс юнматы, уго Мон тонэ бырйи, – шуэ Кузё-Инмар. 16Кулэмъёсты интыысьтызы улӟытыса султыто, шайгуысьтызы потто, малы ке шуоно Израиль бордысь Мон Аслэсьтым нимме тодмай. 17Эн курда, пиослэн анайзы, уго Мон тонэ бырйи, – шуэ Кузё-Инмар. 18Тыныд юрттӥськыны Аслэсьтым ляльчиосме Исаияез но Иеремияез ысто, соослэн визь-кенешенызы Мон вӧсяй но тыныд пӧртэм емышъёсын узырмем дас кык писпуосты сётыны дасяй, 19сомында ик йӧлын но чечыен бызись ошмесъёсты, сизьым туж бадӟымесь гурезьёсты дасяй, кытын будо роза но лилия сяськаос, соос пыр тынэсьтыд пиостэ шумпотонэн тыр каро. 20Палкышноез шонере потты, куанерез шонер судить кар, кураськисьлы юрттӥськы, анайтэм-атайтэм нылпиослы дурбасьты, гольык муртэ дӥся, 21висись, кынартэм адями сярысь сюлмаськы, чутӥсь муртэ эн серекъя, пал суй муртлы дурбасьты, синтэм муртэ Мынэсьтым югытме адӟон доры вай, 22пересь муртэз, егит муртэз изкар пушкад уть, 23(ватытэк кельтэм) кулэм муртъёсты шедьтӥд ке, соосты пусйыса шайгуэ пон, – кулонысь улӟыса султон дыръя тонэ нырысетӥ интые пукто. 24Шутэтскы, ялкар, Мынам калыке, уго тынад каньылэн улон дырыд вуоз. 25Ӟеч сюдӥсь-вордӥсь, сюд пиостэ, пыдъёссэс юнматы. 26Тыныд сётэм ляльчиосы пӧлысь нокин но медаз кулы-быры, уго Мон соосты тон дорысь утчало. 27Эн лябӟы. Ӝожомыса, ёрмыса-ӝикаса улон нуналъёс вуизы ке, мукетъёс бӧрдыса, чигиськыса улозы, нош тон шулдыр мылкыдын, котьмаин но тыр улод. 28Язычникъёс тыныд кӧтсы пӧсен улозы, но номыр но тыныд пумит лэсьтыны уз быгатэ, – шуэ Кузё-Инмар. 29Тынад пиосыд курадӟон тыл дуннеез медаз адӟе шуыса, Мынам киосы тонэ шобыртозы. 30Пиосыд понна буйгатскы, анай, Мон соосты утё уго. 31Тодад вай кулон уммен изись пиостэ. Музъемлэн пумъёсысьтыз Мон соосты потто, гажамме-жалямме соослы возьмато, уго Мон гажась-жалясь, – шуэ Дунне Кутӥсь Кузё-Инмар. 32Мон лыктытозь, нылпиостэ ӟыгыртыса возь, Мон лыкто но гажан-жалянме соослы возьмато, Мынам ошмесъёсы пачылмыса улӥсесь, дэлетэ кулэсмисьтэм».
33Мон, Ездра, мыным Израиле мыныны кулэ шуыса, Орив гурезьысен Кузё-Инмарлэсь косонзэ басьтӥ. Мон соос доры вуи, нош соос монэ кулэтэм каризы, Кузё-Инмарлэсь курон-косонзэ санэ ӧз понэ. 34Соин ик, кылыны но валаны быгатӥсьёсыз язычникъёс, мон тӥледлы верасько: вите Возьмасьтэс, – Со тӥледлы пумтэм вапумъёс ӵожелы каньыллык сётоз, уго дунне бырыку Лыктӥсь матын. 35Эксэйлыклэсь пунэм берыктонзэ кабыл басьтыны дась луэ, уго кысылӥсьтэм-бырисьтэм югыт тӥледлы пумтэм вапумъёс ӵоже пиштоз. 36Таизлэн дуннелэн вужераз сюронлэсь утиське; данлыктылэсь майбырлыксэ кабыл басьтэ. Аслам Утисе сярысь мон ватӥськытэк тодытӥсько. 37Тӥледлы сётэм салам-кузьымез кабыл басьтэ – шумпотэ-куанэ, тӥледыз Ин Эксэйлыке Ӧтисьлы тау каре. 38Султэлэ, сылэ, учке, Кузё-Инмарлэн ӝытаз кӧня-кӧня Инмарлэн пусъемъёсыз, 39соос таизлэн дуннелэн вужерысьтыз мукетаз улонэ выжизы но Кузё-Инмар дорысь югыт-тӧдьы дӥськутъёс басьтӥзы. 40Сӥон, (ас пушкад улоноослэсь) лыдзэс кабыл басьты, Кузё-Инмарлэсь законзэ быдэстэмъёсты, югыт-тӧдьы дӥськут дӥсямъёстэ, котырты. 41Кема возьмам пиосыдлэн лыдзы тырмыт луэмын. Кузё-Инмарлэсь ӟеч эриксэ кур, нырысь кутсконысеныз ик ӧтем калыктэ дун-чылкыт карон понна.
42Мон, Ездра, Сӥон гурезьысь огазе люкаськем туж трос калыкез адӟи, кӧня луэмзэс лыдъяны ӧй быгаты, – ваньзы соос кырӟаса Кузё-Инмарез данъязы. 43Соос пӧлын вал ӝужыт-веськрес пинал пи, со ваньмызлэсь синмаськымонгес вал, ваньзылэн йыр вылазы со венец изьы тырылӥз, соин со уката но вылӥе ӝутскиз; паймем берам мон солы пайми. 44Соку мон Кылчинлэсь юай: «Кузёе, та кинъёс?» 45Со мынам пумитам шуиз: «Та – соос, кинъёс кулон-бырон дӥськутсэс куштӥзы но кулӥсьтэм-бырисьтэм дӥськут дӥсязы, Инмарлэсь нимзэ тодытӥзы; табере соос венец изьыен чеберъясько, вормонлэсь пальма вайзэ басьто». 46Мон юай: «Нош кин та пинал пияш, кудӥз соос вылэ венец изьы изьыя, пальма вайёс сётъя?» 47Со мынам пумитам шуиз: «Ачиз Инмар Пи, Кинэ соос та дунне вылын данъяса улӥзы». Мон соосты, Кузё-Инмарлэн нимыз понна кышкатэк сылӥсьёсты, данъяны кутски. 48Соку Кылчин мыным шуиз: «Мын, калыкелы тодыты, Инмарлэсь Кузё-Инмарлэсь кыӵе паймымонэсь ужъёссэ тон адӟид».
Currently Selected:
Ездралэн 3-тӥ книгаез 2: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016