Ездралэн 3-тӥ книгаез 3
3
3-тӥ ЛЮКЕТ
1Городэз куашкатэмлэн куамынэтӥ араз мон Вавилонын вал; валес вылам кылльыкум куалекъяй, малпанъёс сюлэм пушкам пырылӥзы, 2уго мон Сӥонлэсь тырттэм кылемзэ, Вавилонын улӥсьёслэсь узыр улэмзэс адӟи. 3Лулы-сюлмы бугырскиз но Вылысь Инмарлы кышкаса вераны кутски, 4мон шуи: «Кузё-Инмаре Кузё-Атае! Кутсконысеныз ик Тон шуид, куке Тон огнад музъемез кылдытӥд но сюйлы-тузонлы косон сётӥд, 5Адамлы кулоно мугор сётӥд но, со но Тынад киыныд кылдытэмын вал, со пушкы улонлэсь духсэ пельтыса пыртӥд, соку со Тон азьын улэп луиз, 6сое рае пыртӥд, музъем емыш сётыны кутскемлэсь азьло Тынад бур киыд раез пуктӥз; 7Тон сое курон-косондэ утьыса улыны косӥд, нош со курон-косондэ сӧриз, – соку Тон сое кулон киулэ сётӥд, солэсь выжызэ но, со бордысь потэм улы-бечеос, выжыос, калыкъёс но соослэн вайёссы, – соослэн лыдзы лыдъяса быдтонтэм. 8Котькудӥз но калык ас мылпотэмъяз ветлыны кутскиз, Тон азьын укылтэм ужъёс лэсьтылӥзы, Тынэсьтыд курон-косонъёстэ синазькыль карылӥзы. 9Со виын, дыр вуыса, Тон музъем вылын улӥсьёс вылэ ву нюртон лэзид, соосты быдтӥд, 10соку соос доры кулон эзель вуиз, – кызьы Адам доры кулон вуиз, озьы таос доры быдтӥсь ву нюртон вуиз. 11Соос пӧлысь одӥгзэ Тон улэп кельтӥд – Ноез семьяеныз валче, со бордысь вань шонер улӥсьёс потӥзы. 12Музъем вылын улӥсьёс йылыны кутскем бере пиналъёс, калыкъёс, трос улыос-выжыос йылӥзы, соку нош ик азьвыл улэмъёслэсь но тросгес йӧнтэм ужъёс лэсьтыны кутскизы, 13Тон азьын законлы пумит ужъёс лэсьтыны кутскемзы бере, соос пӧлысь Тон Аслыд Авраам нимо пиосмуртэз бырйид, 14яратӥд сое, солы огназлы Аслэсьтыд эриктэ усьтӥд, 15пумтэм вапумъёс ӵожелы соин сӥзён-косон пыр кусып кылдытӥд но солэсь выжызэ-кидыссэ ноку но уд кушты, шуид. Солы Исаакез сётӥд. Исааклы Иаковен Исавез сётӥд; 16Тон Аслыд Иаковез бырйид, нош Исавез палэнтӥд. Иаков (выжы) туж йылӥз. 17Солэсь кидыссэ-выжызэ, Египетысь поттыса, Сӥнай гурезь доры ваемед бере, 18инъёсты мыкыртӥд, музъемез кутыса возид, быдэс дуннеез зуркатӥд, пыдэстэм дуннеосты кышкатӥд, быдэс дуннеез курдатӥд, – 19Тынад данлыкед ньыль капка пыр потӥз, (со капкаос): тыл, музъем зуркан, сильтӧл, кезьытлык, Иаковлэн кидысэзлы-выжыезлы закон сётон понна, Израиль выжылы ужан-тыршон сётон понна, – 20Тынад законэд соос пӧлын емыш мед ваёз шуыса, соослэсь кескич сюлэмзэс ӧд басьты. 21Кескич сюлэмен курон-косонэз нырысетӥ адями Адам сӧриз – вормемын вал; со бордысь вань потэмъёсын озьы ик луиз. 22Кужымтэм луон кылиз, калыклэн сюлэм пушказ уродлыклэн выжыеныз закон кылиз, – ӟечлык кошкиз, уродлык – кылиз. 23Вапумъёс ортчизы, аръёс быризы, – Тон Аслыд Давид нимо ляльчиез ӝутӥд; 24сое Тон Аслад нимыд понна город пуктыны косӥд, отын Тыныд мед ӵындытозы, курбонъёс мед вайылозы шуыса. 25Трос аръёс ӵоже тазьы лэсьтылӥзы, нош бӧрысь ини та городын улӥсьёс сьӧлыказы, 26кызьы Адам лэсьтӥз, солэн вань выжыосыз но ваньзэ озьы лэсьтылӥзы; уго соослэн но сюлэмзы кескичлыко вал. 27Соку Тон городдэ тушмонъёсыдлэн киулазы сётӥд. 28Вавилонысь калык умойгес улэ шат, соин сэрен Сӥонэз киулазы возё-а? 29Татчы вуэм берам лыдъяса быдтонтэм йӧнтэм ужъёсты мон адӟи, куамынэтӥ арзэ пленын улыкум, трос сьӧлыко муртъёсты мынам лулы адӟиз, соин сэрен сюлмы сэректӥз; 30уго мон адӟи, кызьы Тон со сьӧлыко муртъёсты чидаськод, сьӧлыклэсь кышкасьтэмъёсты жаляськод, нош калыктэ быдтӥд, тушмонъёстэ улэп кельтӥд, та пумысен нокыӵе но паймымон тодмет ӧд возьматы. 31Уг валаськы, кызьы та сюрес воштӥськыны быгатӥз. Оло нош Сӥон сярысь Вавилон ӟечгес лэсьтэ? 32Оло нош, Израиль сяна, кыӵе ке но калык Тонэ тодыны кутскиз? Яке Иаков кадь ик мукет улыос-выжыос Тынад сӥзён-косонъёсыдлы оскыны кутскизы? 33Соослы пунэм берыктон но огкадь ӧвӧл, ужам ужзы но емыш ӧз вайы, уго мон калыкъёс пушкытӥ ортчи но адӟи: соос узырлык пӧлын уло, Тынэсьтыд курон-косонъёстэ тодазы уг ке но ваё. 34Озьыен, вес вылын мерта милесьтым законлы пумит улэмъёсмес но, музъем вылын улӥсьёслэсь ужъёссэс но, – нокытысь но Тынэсьтыд нимдэ уд шедьты, Израильысь сяна. 35Музъем вылын улӥсьёс ку Тон азьын ӧз сьӧлыкалэ ни? Яке кыӵе калык тазьы утиз-возиз Тынэстыд курон-косонъёстэ? 36Курон-косонъёстэ утись-возись коть одӥг-ог ке но адямиосты шедьтод та калык пӧлысь, нош мукет калыкъёс пӧлысь уд шедьты».
Currently Selected:
Ездралэн 3-тӥ книгаез 3: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016